ꓪꓴ-ꓢ ꓠꓴ ꓔꓯ ꓘꓴ ꓔꓬ ꓡꓳ (Homily)

ꓘꓴ ꓜꓲꓼ ꓞꓳ ꓟꓶꓽ ꓘꓳꓼ 5 ꓫꓵꓽ ꓠ

ꓬꓲ-ꓢ-ꓬ ꓕꓳꓽ ꓶ 6: 1 -8

ꓪ ꓔꓲ ꓪꓴ-ꓢꓲ-ꓬ ꓫꓵꓻ_ ꓕꓲ ꓘꓳꓼ ꓗꓪ꓾ ꓢꓲꓺ ꓒ ꓠꓬ ꓮ ꓟꓴꓹ ꓟꓴ ꓟꓬꓱ ꓓꓳꓽ ꓙꓳ_ ꓟ ꓙꓵꓽ ꓠꓬꓲ ꓕꓲ ꓗꓪ ꓠꓬꓲꓸ ꓠꓸ ꓔꓬ_ ꓟ ꓔꓯ ꓥꓪ ꓟꓳ_ ꓡꓳ꓿ ꓬꓲ ꓐꓵ ꓞꓶ ꓐ ꓢ ꓟꓶꓽ ꓠꓬ ꓢꓲ ꓫꓬ ꓦꓲ ꓓꓽ ꓟ ꓗꓪ ꓐꓲꓺ ꓡꓰ_ ꓡꓳ꓿ꓬꓰ-ꓧꓳ-ꓧꓪ ꓬꓲ ꓪꓴꓸ ꓗꓪ ꓠꓬ ꓢꓲ-ꓡ-ꓩꓷ ꓐꓴ ꓦꓰꓼ ꓞ_ ꓡꓳ꓿ ꓬꓲ ꓪ ꓮ ꓡꓲ ꓕꓲ ꓣꓳ_ ꓟꓲ ꓓꓴ ꓡꓯ ꓛꓳꓼ ꓐꓽ ꓙꓳ_ ꓡꓳ꓿ ꓠꓬꓲꓽ ꓐꓽ ꓟ ꓡꓰ ꓒꓬꓱ ꓟꓬ ꓔꓯ ꓑꓲꓸ ꓔ_ ꓡꓳ꓿ ꓠꓬꓲ ꓐꓽ ꓟ ꓡꓰ ꓛꓲ ꓒꓯ ꓔꓯ ꓑꓲꓸ ꓔ_ ꓡꓳ꓿ ꓠꓬꓲꓽ ꓐꓽ ꓟ ꓡꓰ ꓐꓬꓱꓻ_ ꓡꓳ꓿  ꓖꓳ ꓡꓱ ꓢꓲ ꓢꓲ-ꓡ-ꓩꓷ ꓕꓱ ꓕꓲ ꓣꓳ ꓡꓰ ꓖꓳ ꓕꓲ ꓣꓳ ꓔꓯ ꓘꓴ ꓢꓲ ꓕꓱ ꓡꓱ ꓐꓯ_ ꓡꓳ꓾ ꓢꓲ ꓫꓬ꓾ ꓢꓲ ꓫꓬ꓾ ꓢꓲ ꓫꓬ꓾ ꓟꓯꓼ ꓜꓴ ꓐꓴ ꓬꓰ-ꓧꓳ-ꓧꓪ ꓠꓬ ꓢꓲ ꓫꓬ_ ꓡꓳ꓿ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓬꓲ ꓟꓬꓱ ꓓꓳꓽ ꓡꓰ ꓐꓲ ꓞ_ ꓡꓳ꓾ ꓐꓯ_ ꓡꓳ꓿ ꓗ ꓘꓶ ꓛꓲ ꓟꓴ ꓚꓰꓺ ꓠꓬ ꓘꓴ ꓔꓬ ꓢꓴ ꓬꓲ ꓢꓯꓼ ꓗꓪ ꓐꓰ ꓓꓵꓺ ꓡꓰ_ ꓡꓳ꓿ ꓦꓲ ꓠꓬ ꓟꓴꓽ ꓘꓴ ꓡꓰ ꓐꓲꓺ ꓞ_ ꓡꓳ꓿ ꓖꓳ ꓕꓯ ꓥꓪ ꓕꓱ ꓡꓱ ꓐꓯ_ ꓡꓳ꓾ ꓥꓪ ꓠꓽ ꓫ ꓙꓵ_ ꓥꓳ꓿ ꓥꓪ ꓠꓽ ꓟꓶꓽ ꓬꓰ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓟꓽ ꓫꓬ ꓟ ꓟꓷ ꓠꓷꓹ ꓗꓴ ꓙꓲ ꓙꓳ_ ꓟ ꓞꓳ ꓤ ꓥ ꓡꓳ꓿ ꓟꓽ ꓫꓬ ꓟ ꓟꓷ ꓠꓷ ꓗꓴꓹ ꓙꓲ ꓙꓳ_ ꓟ ꓑ ꓫꓬ ꓗꓳ ꓡꓳ ꓗꓪ ꓔꓬ ꓢꓲ꓾ ꓥꓪ ꓟꓬ ꓢꓶ ꓡꓰ ꓪ ꓔꓲ꓾ ꓟꓯꓼ ꓜꓴ ꓐꓴ ꓬꓰ-ꓧꓳ-ꓧꓪ ꓔꓯ ꓟꓳꓻ ꓗꓷꓳ꓾ ꓐꓯ_ ꓡꓳ꓿ ꓖꓳ ꓕꓯ ꓢꓲ-ꓡ-ꓩꓷ ꓗꓪ ꓟ ꓕꓲ ꓣꓳ ꓠꓬ ꓔꓲ ꓖꓴ ꓗꓪ ꓐꓰ꓾ ꓬꓲ ꓡꓯ ꓒꓯ ꓗꓪ ꓟꓺ ꓠꓬꓱꓹ ꓡꓰ ꓐꓬ ꓞ_ ꓟ ꓘꓴꓽ ꓟꓶꓽ ꓜꓲꓻ ꓕꓲ ꓟ ꓔꓯꓹ ꓔ ꓢꓲ꓾ ꓥꓪ ꓔꓯ ꓐꓬꓱꓻ ꓩꓴ ꓡ_ ꓡꓳ ꓖꓳ ꓡꓱ ꓢꓲ ꓬꓲ ꓠꓬ ꓘꓴꓽ ꓟꓶꓽ ꓜꓲꓻ ꓖꓳ ꓟ ꓡꓰ ꓥꓪ ꓟꓷ ꓠꓷ ꓗꓪ ꓕꓲꓺ ꓖꓶ ꓡ ꓢꓲ ꓕꓱ ꓡꓱ ꓐꓯ_ ꓡꓳ꓾ ꓠꓬꓲ ꓠꓹ꓾ ꓕꓱ ꓟ ꓡꓰ ꓠꓴ ꓟꓷ ꓠꓷ ꓗꓪ ꓕꓲꓺ ꓗꓷꓳ꓿ ꓖꓳ ꓡꓱ ꓢꓲ ꓠꓴ ꓟꓽ ꓙꓲ ꓟꓽ ꓜꓳ ꓟ ꓣꓴ ꓦ ꓗꓷꓳ꓿ ꓠꓴ ꓝꓴꓲ_ ꓟꓲ ꓖꓽ ꓖꓶ ꓟꓶꓳ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓢꓲꓺ ꓒ ꓬꓲ ꓢꓯꓼ ꓥꓪ ꓑ ꓙ ꓢꓲ꓾ ꓕꓱ ꓡꓱ ꓐꓯ_ ꓡꓳ꓾ ꓥꓪ ꓠꓬ ꓮ ꓟ ꓔꓯ ꓝꓲ ꓩꓴ ꓗꓷ ꓠꓯ_ ꓡꓳꓺꓽ꓿ ꓥꓪ ꓠꓴꓽ ꓐꓱ ꓶ ꓮ ꓟ ꓙꓰ_ ꓥꓳ ꓪꓺꓽ꓾ ꓐꓯ_ ꓡꓳ꓿ ꓖꓳ ꓕꓯ ꓥꓪ ꓡꓰ꓾ ꓥꓪ ꓕꓻ ꓔꓬ_ ꓡꓳ꓾ ꓥꓪ ꓔꓯ ꓝꓲ ꓡꓯ꓾ ꓐꓰ ꓐꓯ_ ꓡꓳ꓿

1 ꓘꓳ-ꓡꓴ-ꓕꓴ 15ꓽ 1-`11

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓔꓯ ꓥꓪ ꓚ ꓖꓶ ꓗꓷ ꓟ ꓶꓼ ꓓꓳꓽ ꓫꓱꓹ ꓓꓳ ꓔꓯ ꓟꓳꓸ ꓝꓮꓲ ꓬꓲꓼ ꓠꓬꓲꓸ ꓖꓶ ꓠꓲꓹ ꓫꓵˍ ꓡꓳ꓿ ꓶꓼ ꓓꓳꓽ ꓫꓱꓹ ꓓꓳ ꓕꓱ ꓟ ꓠꓴ ꓪꓽ ꓘꓳ ꓣꓴ ꓟꓶ ꓡꓰ ꓢꓲ ꓕꓱ ꓟ ꓗꓪ ꓠꓴ ꓪꓽ ꓦꓰꓼ ꓕꓶꓻ ꓡꓰꓳ꓿ꓠꓴ ꓪꓽ ꓠꓬ ꓶꓼ ꓓꓳꓽ ꓫꓱꓹ ꓓꓳ ꓕꓱ ꓟ ꓔꓯ ꓕꓶ ꓕꓶˍ ꓡꓰꓽ ꓣꓴ ꓔ ꓠꓬ ꓚꓬꓴ ꓟꓶˍ ꓥꓳ꓿ ꓖꓳ ꓡꓱ ꓟꓽ ꓥ ꓕꓯ ꓠꓽ ꓠꓴ ꓪꓽ ꓙꓵꓻ ꓗꓷ ꓟ ꓠꓬ ꓮꓽ ꓔꓳˍ ꓡꓰꓽ ꓥꓳ꓿ꓮ ꓡꓲꓳ ꓐꓯ ꓠꓬ ꓥꓪ ꓡꓰ ꓠꓴ ꓪꓽ ꓔꓯ ꓡꓯꓼ ꓙꓱ ꓖꓶˍ ꓟ ꓬꓲ ꓪꓴ ꓕꓲ ꓫꓵꓽ ꓠꓬ꓾ ꓥꓪˍ ꓟꓲ ꓘꓳ ꓣꓴ ꓟꓶˍ ꓟ ꓥ ꓡꓳ꓿ ꓕꓱ ꓟ ꓠꓬ꓾ ꓢꓲꓽ ꓫꓬ ꓕꓳ ꓶ ꓗꓪ ꓐꓳ ꓔ ꓟ ꓡꓰ ꓐꓰ꓾ ꓙꓲ-ꓢꓴ ꓠꓬ ꓣꓳꓽ ꓝꓴꓲ ꓑꓶ ꓓꓴ ꓫꓵꓻ ꓢꓲ ꓬꓲ ꓔꓯ ꓔꓵꓸ ꓗꓷꓳ꓿ꓝꓮꓲ ꓠꓬ ꓢꓲꓽ ꓫꓬ ꓕꓳ ꓶ ꓗꓪ ꓐꓳ ꓔ ꓟ ꓡꓰ ꓐꓰ꓾ ꓢ ꓠꓬꓲ ꓗꓪ ꓬꓲ ꓔꓯ ꓢꓯꓸ ꓬꓲꓼ ꓡ ꓝꓲꓳ꓿ꓖꓳ ꓗꓸ ꓠꓯꓸ ꓒꓲ-ꓕꓱ ꓔꓯ ꓬꓲ ꓖꓳ ꓓꓱ ꓟꓳꓸ ꓖꓶˍ ꓡꓳ꓿ ꓗꓸ ꓠꓯꓸ ꓠꓬ ꓞꓲ ꓠꓬꓲꓽ ꓣꓳ ꓔꓯ ꓟꓳꓸ ꓖꓶˍ ꓡꓳ꓿ꓗꓸ ꓠꓯꓸ ꓬꓲ ꓠꓬ ꓕꓲ ꓙꓪꓻꓼ ꓐꓰ ꓬꓲꓼ ꓤ ꓠꓬꓲ ꓤ ꓥꓪꓽ ꓦꓬ ꓣꓳ ꓟꓽ ꓞꓲ ꓔꓯ ꓟꓳꓸ ꓖꓶˍ ꓡꓳ꓿ ꓬꓲ ꓪꓽ ꓟꓬꓽ ꓠꓬꓲ ꓕꓲ ꓐꓱ ꓠꓬ꓾ ꓮ ꓟꓶ ꓗꓪ ꓛꓲ ꓢꓯꓸ ꓔꓬ ꓢꓰꓽ ꓡꓳ꓿ ꓕꓲ ꓐꓱ ꓠꓽ ꓫꓵꓻꓳ꓿ꓗꓸ ꓠꓯꓸ ꓬꓲ ꓠꓬ ꓬ-ꓗꓴ ꓔꓯ ꓟꓳꓸ ꓖꓶˍ ꓡꓳ꓿ ꓗꓸ ꓠꓯꓸ ꓠꓬ ꓝꓲ ꓓꓴ ꓮꓽ ꓙꓵ ꓔꓯ ꓟꓳꓸ ꓖꓶˍ ꓡꓳ꓿ꓮꓽ ꓙꓵ ꓟ ꓗꓸ ꓠꓯꓸ ꓠꓬ꓾ ꓦꓬꓼ ꓠꓬꓲ ꓟꓽ ꓐꓲ ꓕꓯˍ ꓡꓰ ꓦꓵ ꓔ ꓟ ꓡꓰ ꓐꓰ ꓗ ꓢꓴ ꓥꓪ ꓔꓯˍ ꓟꓲ ꓟꓳꓸ ꓖꓶ ꓡꓺꓳ꓿ꓮ ꓡꓲꓳ ꓐꓯ ꓠꓬ ꓪꓴ-ꓢ ꓘꓴ ꓜꓲ ꓞꓳ ꓔꓯ ꓥꓪ ꓗꓸ ꓧꓪ ꓗꓷ ꓠꓬꓲ꓾ ꓥꓪ ꓠꓽ ꓝꓲ ꓓꓴ ꓣꓳ ꓓꓰˍ ꓕꓲ ꓣꓳ ꓟ ꓥ ꓢꓲ꓾ ꓝꓲ ꓓꓴ ꓘꓴꓻ ꓟꓽ ꓒꓵꓽ ꓟ ꓥ ꓡꓳ꓿ꓥꓪ ꓕꓱ ꓡꓱ ꓛꓲ ꓤꓽ ꓕꓲ ꓣꓳ ꓒꓬꓱꓼ ꓡ ꓟˍ ꓟꓲ ꓪꓴ-ꓢ ꓣꓱꓽ ꓛꓰ ꓗꓪ ꓐꓰ ꓥ ꓡꓳ꓿ ꓬꓲ ꓥꓪ ꓔꓯ ꓖꓶ ꓡ ꓟ ꓣꓱꓽ ꓛꓰ ꓠꓬ ꓮꓽ ꓔꓳ ꓟꓽ ꓗꓷ ꓡꓰ꓿ ꓥꓪ ꓠꓬ ꓝꓲ ꓓꓴ ꓮꓽ ꓙꓵ ꓢꓴ ꓟꓬꓺ ꓟꓽ ꓞꓲ ꓮꓽ ꓘꓶꓸ ꓢꓯꓼ ꓕꓵꓼ ꓪꓴꓽ ꓧꓶ ꓗꓷꓳ꓿ ꓖꓳ ꓡꓱ ꓥ ꓟꓲ ꓥꓪ ꓢꓯꓼ ꓗꓪ ꓐꓰ ꓟꓽ ꓥ꓿ ꓥꓪ ꓔꓯ ꓖꓶ ꓡ ꓟ ꓪꓴ-ꓢ ꓣꓱꓽ ꓛꓰ ꓗꓪ ꓐꓰ ꓥ ꓡꓳ꓿ꓖꓳ ꓡꓱ ꓠꓬꓲ ꓥꓪ ꓥ ꓟꓲ꓾ ꓬꓲ ꓪꓽ ꓥ ꓟꓲ꓾ ꓕꓱ ꓡꓱ ꓚ ꓟꓸ ꓖꓶ ꓢꓲ꓾ ꓠꓴ ꓪꓽ ꓠꓬ ꓕꓱ ꓟ ꓔꓯ ꓙꓵꓻ ꓗꓷ ꓟ ꓥ ꓡꓳ꓿

ꓡꓴ-ꓘ 5ꓽ 1- 11

ꓕꓲ ꓠꓬꓲ ꓙꓳˍ ꓠꓬ ꓬꓰ-ꓢꓴ ꓠꓽ ꓖꓶ-ꓠꓲ-ꓢ-ꓡꓱ ꓬꓲꓻ ꓡꓴꓽ ꓐꓱ ꓘꓶꓽ ꓗꓪ ꓦꓰꓼ ꓞꓹ ꓕꓯ꓾ ꓞꓳ ꓜꓴꓻ ꓞꓳ ꓟꓯꓼ ꓠꓬ ꓪꓴ-ꓢ ꓐꓯ ꓘꓶꓽ ꓠ ꓠꓹ ꓠꓹ ꓟ ꓬꓲ ꓔꓯ ꓝꓲꓽ ꓡꓙ ꓡꓳ꓿ꓬꓲ ꓠꓬ ꓬꓲꓻ ꓡꓴ ꓐꓱ ꓘꓶꓽ ꓗꓪ ꓡꓲ ꓠꓬꓲꓽ ꓟ ꓓꓹ ꓟ ꓔꓯ ꓟꓳꓻˍ ꓡꓳ꓿ ꓥꓪꓸ ꓓꓳꓽ ꓢꓴ ꓠꓽ ꓡꓲ ꓖꓳ ꓟ ꓗꓪ ꓐꓰ ꓓꓳ ꓙꓰ ꓢꓲ ꓥꓪꓸ ꓑꓱꓸ ꓞꓲꓽ ꓔꓬ ꓡꓳ꓿ꓬꓰ-ꓢꓴ ꓠꓬ ꓢꓲꓹ-ꓟꓴꓽ ꓡꓲ ꓗꓪ ꓓꓵꓽ ꓙꓰ ꓢꓲ꓾ ꓡꓲ ꓔꓯ ꓬꓲꓻ ꓙꓬ ꓘꓶꓽ ꓗꓪ ꓐꓰ ꓮ ꓔꓲꓸ ꓤ ꓓꓱꓽ ꓩꓴ ꓗꓷ ꓠꓹ ꓟ ꓓꓰꓽ ꓗꓷ ꓠꓬ꓾ ꓬꓲ ꓠꓽ ꓡꓲ ꓗꓪ ꓠꓬꓲꓸ ꓠꓸ ꓢꓲ ꓞꓳ ꓜꓴꓻ ꓔꓯ ꓟꓸ ꓖꓶˍ ꓡꓳ꓿ꓟꓸ ꓟꓲꓽ ꓚ ꓓꓳ ꓡꓰ ꓠꓬ ꓬꓰ-ꓢꓴ ꓡꓰ ꓢꓲ-ꓟꓴ ꓔꓯ꓾ ꓬꓲꓻ ꓙꓬ ꓠꓯꓸˍ ꓟ ꓗꓪ ꓡꓲ ꓗꓴꓸ ꓙꓰ ꓢꓲ꓾ ꓥꓪꓸ ꓑꓱꓸ ꓩꓴ ꓬꓯꓼ ꓗꓷ꓾ ꓐꓯ ꓖꓶˍ ꓡꓳ꓿ꓢꓲ-ꓟꓴ ꓒꓳꓹ ꓖꓶ ꓢꓲ꓾ ꓟꓸ ꓒꓽꓳ꓾ ꓥꓪ ꓠꓴꓽ ꓠꓬ ꓕꓲ ꓦꓬꓼ ꓡꓱꓸꓼ ꓮꓽ ꓘꓶꓸ ꓢꓯꓼ ꓕꓵꓼ ꓗꓷˍ ꓟꓲ ꓮꓸ ꓫꓵ ꓓꓳꓽ ꓟꓽ ꓟꓶ꓿ ꓖꓳ ꓡꓱ ꓥ ꓟꓲ ꓠꓴ ꓡꓰ ꓐꓯˍ ꓠꓬꓲ꓾ ꓥꓪꓸ ꓑꓱꓸ ꓩꓴ ꓬꓯꓼ ꓗꓷˍ ꓥꓳ꓾ ꓐꓯ ꓢꓲ꓾ꓬꓲ ꓪꓽ ꓡꓰ ꓥꓪꓸ ꓑꓱꓸ ꓩꓴ ꓬꓯꓼ ꓗꓷ ꓠꓬ꓾ ꓥꓪꓸ ꓬꓲ ꓜꓴꓻ ꓓꓽ ꓟ ꓪꓴꓻ ꓡꓰ ꓢꓲ ꓥꓪꓸ ꓑꓱꓸ ꓧꓽ ꓡꓰˍ ꓐꓰ ꓗꓹ ꓡꓳ꓿ꓖꓳ ꓕꓯ ꓬꓲ ꓪꓽ ꓔꓯ ꓬꓰ ꓙ ꓡ ꓠꓹ ꓟ꓾ ꓠꓱꓸ ꓐꓯꓼ ꓕꓲ ꓡꓲ ꓗꓪ ꓔꓬ ꓟ ꓛꓳꓽ ꓒꓯꓹ ꓐꓴ ꓔꓯ ꓡꓯꓼ ꓟꓰꓼ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓡ ꓢꓲ ꓡꓲ ꓠꓬꓲꓽ ꓟ ꓗꓪ ꓥꓪꓸ ꓗꓶ ꓐꓲ ꓡꓰ ꓠꓬꓲ꓾ ꓡꓲ ꓠꓬ ꓬꓲꓻ ꓙꓬ ꓠꓯꓸꓼ ꓗꓪ ꓦꓱꓺ ꓓꓵꓽ ꓡꓰˍ ꓐꓰ ꓗꓹ ꓡꓳ꓿ꓢꓲ-ꓟꓴ ꓒꓲ-ꓕꓱ ꓖꓳ ꓟ ꓔꓯ ꓟꓳꓻ ꓗꓷ ꓠꓬ ꓬꓰ-ꓢꓴ ꓟꓲꓽ ꓕꓯꓽ ꓢꓲ ꓗꓪ ꓟꓳꓼ ꓡꓰ ꓢꓲ꓾ ꓢꓲ ꓒꓽꓳ꓾ ꓥꓪ ꓔꓯˍ ꓐꓰ ꓧꓹ ꓙꓰ꓾ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓝꓴꓲ ꓙꓳ ꓢꓴ ꓥ ꓡꓳ꓾ ꓐꓯˍ ꓡꓳ꓿ꓒꓲ-ꓕꓱˍ ꓐꓰ ꓕꓲꓽ ꓪꓺꓼ ꓥꓪꓸ ꓓꓳꓽ ꓢꓴ ꓛꓳꓽ ꓒꓯꓹ ꓐꓴ ꓮꓽ ꓙꓵˍ ꓟꓲ꓾ ꓕꓲ ꓓꓳꓽˍ ꓗꓪ ꓥꓪꓸ ꓕꓱ ꓟꓬ ꓓꓳꓽ ꓟꓶˍ ꓟ ꓔꓯ ꓓꓵꓽ ꓙ ꓟꓶˍ ꓡꓳ꓿ꓖꓳ ꓟ ꓡꓰ ꓐꓰ ꓢꓲ-ꓟꓴ ꓬꓲ ꓛꓳ ꓒꓯ꓾ ꓜꓲ-ꓐꓱ-ꓓꓲ ꓬꓲ ꓤ ꓬ-ꓗꓴˍ ꓐꓰ ꓬꓳ-ꓦˍ ꓟꓲ ꓓꓵꓽ ꓙ ꓟꓶˍ ꓡꓳ꓿ ꓬꓰ-ꓢꓴ ꓠꓬ ꓢꓲ-ꓟꓴ ꓔꓯ꓾ ꓕꓽ ꓙꓳ꓾ ꓕꓱ ꓡꓱ ꓖꓳ ꓑꓳꓸ ꓠꓴ ꓠꓬ ꓥꓪꓸ ꓓꓳꓽ ꓟꓶˍ ꓟ ꓡꓰ ꓐꓰ ꓡꓽ ꓞꓳ ꓧꓪ ꓟꓶˍ ꓥꓳ꓾ ꓐꓯ ꓖꓶˍ ꓡꓳ꓿ꓬꓲ ꓪꓽ ꓡꓰ ꓡꓲ ꓖꓳ ꓠꓬꓲꓽ ꓟ ꓔꓯ ꓬꓲꓻ ꓙꓬ ꓘꓶꓽ ꓗꓪ ꓖꓳꓻ ꓛꓲ ꓡ ꓠꓬ꓾ ꓬꓲ ꓪꓽ ꓙꓳˍ ꓟ ꓮꓽ ꓙꓵ ꓗꓶ ꓔꓸ ꓬꓰ ꓢꓲ ꓬꓰ-ꓢꓴ ꓔꓯ ꓛꓳ ꓙꓰˍ ꓡꓳ꓿