ꓪꓴ-ꓢ ꓡꓰꓽ ꓢꓲ ꓚꓰꓸ ꓔ ꓟ (ꓪꓴ-ꓢ ꓟꓸ ꓟꓲꓽ)

ꓥꓳ ꓡꓳꓸ ꓔ ꓟ ꓙꓵꓹ ꓠꓯꓸꓼ ꓗꓪ 4 ꓠꓽ ꓾ ꓢꓲ ꓫꓬ ꓕꓳꓽ ꓶꓽ ꓝꓲꓸ

2 ꓢ-ꓟꓴ-ꓬꓰ ꓕꓳꓽ ꓶ 7: 1-5, 8-12, 14, 16

ꓪ ꓔꓲ ꓠꓬ ꓬꓲ ꓚꓲ ꓛꓬ ꓦꓲꓻ ꓗꓪ ꓔꓬ ꓢꓲ꓾ ꓬꓰ-ꓧꓳ-ꓧꓪ ꓡꓰ ꓚꓳ ꓡꓳ ꓡꓳ ꓗꓪ ꓬꓲ ꓔꓯ ꓛꓴꓽ ꓙꓳ ꓢꓴ ꓔꓯ ꓠꓽ ꓡꓰ ꓝꓲ ꓢꓲ꓾ ꓬꓲ ꓔꓯ ꓢꓲ ꓡꓲ_ ꓐꓰ ꓔꓬ ꓪ ꓝꓲ_ ꓕꓯ꓾ ꓪ ꓔꓲ ꓡꓰ ꓟꓷ ꓠꓷ ꓝ ꓒ ꓠ-ꓔ-ꓠ ꓔꓯ ꓕꓱ ꓡꓱ ꓐꓯ_ ꓡꓳ꓾ ꓠꓴ ꓡꓳꓸ ꓠꓬꓲ꓾ ꓮ ꓟꓶ ꓥꓪ ꓠꓬ ꓔ ꓫꓳ ꓦꓲꓻ ꓗꓪ ꓔꓬ ꓪ_ ꓡꓳ꓿ ꓖꓳ ꓡꓱ ꓥ_ ꓟꓲ ꓪꓴ-ꓢ ꓘꓶ ꓫꓵ ꓝꓲ ꓖꓶ ꓠꓬ ꓟꓶ ꓔꓶꓸ ꓦꓲ ꓗꓪ ꓓ_ ꓢꓰꓽ ꓡꓳ꓾ ꓐꓯ_ ꓡꓳ꓿ ꓠ-ꓔ-ꓠ ꓡꓰ ꓪ ꓔꓲ ꓔꓯ꓾ ꓠꓴ ꓬꓰ ꓠꓲꓹ ꓫꓵ_ ꓟ ꓮ ꓙꓵ ꓬꓰ ꓛꓵ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓰ-ꓧꓳ-ꓧꓪ ꓠꓴ_ ꓐꓰ ꓔꓬ_ ꓡꓳ꓾ ꓐꓯ_ ꓡꓳ꓿ ꓖꓳ ꓕꓲ ꓦꓬꓼ ꓗꓪ ꓬꓰ-ꓧꓳ-ꓧꓪ ꓐꓯ ꓘꓶ ꓠꓬ ꓠ-ꓔ-ꓠ ꓔꓯ ꓛꓲ ꓡ ꓢꓲ ꓕꓱ ꓡꓱ ꓐꓯ_ ꓡꓳ꓾ ꓠꓴ ꓙꓰ ꓢꓲ ꓥꓪ ꓚꓳ ꓑ ꓓ-ꓪꓵ ꓔꓯ ꓕꓱ ꓡꓱ ꓐꓯ ꓖꓶ꓾ ꓬꓰ-ꓧꓳ-ꓧꓪ ꓡꓰ ꓕꓱ ꓡꓱ ꓐꓯ_ ꓡꓳ꓾ ꓠꓴ ꓠꓬ ꓥꓪ ꓔꓬ ꓡ ꓠꓹ ꓟ ꓥꓪ ꓐꓱ ꓶ ꓦꓲꓻ ꓕꓲ ꓦꓲ ꓫꓬ ꓠꓲꓹ ꓫꓵ_ ꓡꓺꓽ꓿ ꓖꓳ ꓡꓱ ꓠꓬꓲ ꓮ ꓟꓶ ꓠꓴ ꓠꓬ ꓥꓪ ꓚꓳ ꓑ ꓓ-ꓪꓵ ꓔꓯ ꓕꓱ ꓡꓱ ꓐꓯ ꓖꓶ꓾ ꓟꓯꓼ ꓜꓴ ꓐꓴ ꓬꓰ-ꓧꓳ-ꓧꓪ ꓡꓰ ꓕꓱ ꓡꓱ ꓐꓯ_ ꓡꓳ꓾ ꓥꓪ ꓠꓬ ꓥꓪ ꓑ ꓫꓬ ꓬꓲ-ꓢꓷ-ꓡꓰ ꓐꓴ ꓕꓯ ꓢꓲ ꓗꓪ ꓠꓴ ꓔꓯ ꓢꓲꓽ ꓒ ꓬꓰ ꓝꓲ ꓠꓹ ꓟ꓾ ꓫꓵꓸ ꓟꓲ ꓗꓪ ꓮ ꓣꓳ ꓔꓯ ꓡꓳꓸ ꓔꓬ_ ꓟ ꓗꓪ ꓐꓰ ꓠꓴ ꓔꓯ ꓘꓴ ꓔꓯꓹ ꓡ_ ꓡꓳ꓿ ꓠꓴ ꓮ ꓡꓲ ꓔꓯ ꓟꓳꓸ ꓙꓰ ꓥ_ ꓟꓲ ꓥꓪ ꓠꓬ ꓠꓴ_ ꓐꓰ ꓕꓲ ꓪꓺꓼ ꓔꓬ ꓗꓷꓳ꓿ ꓠꓴ ꓔꓯ ꓛꓴꓽ ꓙꓳ ꓢꓴ ꓐꓴ ꓔꓯ_ ꓟꓲ ꓠꓴ ꓟꓲ ꓙꓬ ꓗꓪ ꓐꓰ ꓟꓶꓽ ꓬꓰ ꓝꓲꓳ꓿ ꓟꓲ ꓠꓯ ꓗꓪ ꓟꓬꓱ ꓓꓳꓽ ꓓꓽ ꓟ ꓙꓳ ꓢꓴ_ ꓡꓰ ꓐꓰ ꓥꓪ ꓡꓰ ꓠꓴ ꓔꓯ ꓟꓬꓱ ꓓꓳꓽ ꓓꓽ ꓟ ꓟꓶ ꓡꓰ ꓝꓲ_ ꓥꓳ꓿ꓥꓪ ꓡꓰ ꓥꓪ ꓑ ꓫꓬ ꓬꓲ-ꓢꓷ-ꓡꓰ ꓐꓴ ꓐꓱ ꓶ ꓔꓬ ꓖꓴ ꓢꓲꓺ ꓓꓳ ꓡ ꓢꓲ꓾ ꓬꓲ ꓪ ꓚꓲ ꓛꓬ ꓔꓬ ꓖꓴ ꓟꓵꓽ ꓗꓪ ꓔꓬ ꓠꓹ ꓟ ꓥꓪ ꓡꓰ ꓬꓲ ꓪ ꓔꓯ ꓖꓳ ꓗꓪ ꓕꓶꓻ ꓡꓰ ꓝꓲ ꓠꓬ꓾ ꓬꓲ ꓪ ꓟꓽ ꓚꓵꓸ ꓙꓰꓳ꓿ ꓬꓲ ꓪꓴꓸ ꓕꓯ ꓟ_ ꓡꓰ ꓐꓰ꓾ ꓞꓳ ꓥꓶ ꓐꓴ ꓡꓰ ꓬꓲ ꓪ ꓔꓯ ꓟꓽ ꓘꓶ ꓙꓵ ꓡꓻꓳ꓿  ꓥꓪ ꓑ ꓫꓬ ꓬꓲ-ꓢꓷ-ꓡꓰ ꓐꓴ ꓕꓯ ꓢꓲ ꓗꓪ ꓐꓯ ꓟꓴ ꓘꓶ ꓒ ꓣꓱꓽ ꓝꓲ_ ꓟ ꓦꓬꓼ ꓠꓬꓲ ꓗꓪ ꓗꓷ ꓡꓰ_ ꓟ_ ꓡꓰ ꓐꓰ ꓟꓽ ꓗ꓿ ꓥꓪ ꓡꓰ ꓠꓴ ꓔꓯ ꓛꓴꓽ ꓙꓳ ꓢꓴ ꓥ ꓕ ꓑꓳ ꓗꓪ ꓐꓰ ꓠꓴ ꓔꓯ ꓢꓲ ꓡꓲ ꓡꓲ_ ꓐꓰ ꓪꓴ ꓧꓶ ꓠꓽ ꓝꓲ_ ꓥꓳ꓿ ꓖꓳ ꓟ_ ꓡꓰ ꓟꓽ ꓞꓲ ꓬꓰ-ꓧꓳ-ꓧꓪ ꓡꓰ ꓠꓴ ꓔꓯ ꓦꓲ ꓕꓲ ꓦꓲ ꓒꓬꓱꓼ ꓡ ꓝꓲ_ ꓥꓳ꓾ ꓐꓰ꓾ ꓬꓰ-ꓧꓳ-ꓧꓪ ꓡꓰ ꓠꓴ ꓔꓯ ꓐꓯ ꓖꓶ_ ꓡꓳ꓿ ꓠꓴ ꓦꓬꓼ ꓠꓬꓲ ꓐꓲꓺ ꓡꓰ ꓢꓲ꓾ ꓠꓴ ꓠꓬ ꓠꓴ ꓒꓵꓽ ꓒ ꓐꓴ_ ꓐꓰ ꓕꓲ ꓪꓺꓼ ꓬꓲꓼ ꓟꓶ ꓡꓰ_ ꓕꓯ꓾ ꓠꓴ ꓙꓴꓽ ꓝꓲ ꓗꓪ ꓐꓰ ꓦꓵ ꓓꓳ ꓡ_ ꓟ ꓠꓴ ꓤꓽ ꓠꓬ ꓠꓴ ꓔꓯ ꓝꓸ ꓝꓲ ꓢꓲ꓾ ꓬꓲ ꓗꓴꓷꓼ ꓔꓯ ꓥꓪ ꓡꓰ ꓕꓶꓻ ꓡꓰ ꓝꓲ_ ꓥꓳ꓿ ꓥꓪ ꓠꓬ ꓬꓲ ꓐꓹ ꓐ ꓬꓰ ꓢꓲ꓾ ꓬꓲ ꓠꓬ ꓥꓪ ꓤꓽ ꓬꓰ_ ꓥꓳ꓿ ꓬꓲ ꓝꓴꓲ ꓬꓰ ꓗꓷ ꓠꓬ ꓥꓪ ꓡꓰ ꓞꓳ ꓤ ꓙꓽ ꓥꓳ ꓡꓰ ꓬꓲ ꓔꓯ ꓟꓸ ꓙ_ ꓥꓳ꓿ ꓡ ꓞꓳ ꓟꓸ ꓙ ꓓꓴ ꓡꓰ ꓬꓲ ꓔꓯ ꓧꓶꓹ_ ꓥꓳ꓿ ꓠꓴ ꓦꓲ_ ꓐꓰ ꓠꓴ ꓗꓴꓷ ꓠꓬ ꓥꓪ ꓟꓲ ꓙꓬ ꓗꓪ ꓕꓲ ꓞꓲ ꓕꓲ ꓑ ꓕꓶꓻ ꓡꓰ ꓝꓲ_ ꓥꓳ꓿ ꓠꓴ ꓙꓵꓽ ꓠꓬꓲ ꓕꓲ_ ꓟꓲ ꓕꓲ ꓞꓲ ꓕꓲ ꓑ ꓕꓶꓻ ꓡꓰ_ ꓥꓳ꓾ ꓐꓯ_ ꓡꓳ꓿

ꓣꓳ-ꓟ 16ꓽ 25-27

ꓥꓪ ꓚ ꓟꓸ ꓖꓶˍ ꓟ ꓬꓰ-ꓢꓴ ꓙꓲ-ꓢꓴ ꓶꓼ ꓓꓳꓽ ꓫꓱꓹ ꓓꓳ ꓗꓪ ꓐꓰ ꓠꓴ ꓪꓽ ꓔꓯ ꓕꓶꓻ ꓡꓰ ꓝꓲ ꓐ ꓡ ꓢꓴ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ꓿ ꓕꓱ ꓟ ꓠꓬ ꓮ ꓠꓱ ꓕꓯˍ ꓡꓰ ꓚꓵ ꓔ ꓟ ꓚꓵ ꓘꓶꓽ ꓮ ꓟꓶ ꓟꓳꓸ ꓖꓶ ꓡ ꓟ ꓥ ꓡꓳ꓿ 26 ꓚꓵ ꓘꓶ ꓕꓱ ꓟ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓢꓴ ꓪꓴ-ꓢ ꓕꓵꓼ ꓪ ꓗꓪ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓕꓳ ꓶ ꓗꓪ ꓟꓳꓸ ꓖꓶ ꓡ ꓟ ꓥ ꓢꓲ꓾ ꓞꓳ ꓫꓵꓽ ꓞꓳ ꓙꓰ ꓮꓽ ꓙꓵ ꓠꓬ ꓙꓵꓻ ꓢꓲ ꓒꓵꓽ ꓛꓳ ꓠꓹ ꓟ ꓬꓲ ꓪꓽ ꓔꓯ ꓢꓷ ꓡꓰ ꓝꓲˍ ꓟ ꓥ ꓡꓳ꓿ 27 ꓬꓲ ꓕꓲ ꓣꓳ ꓔꓵꓸꓼ ꓙ ꓜꓲꓼ ꓠꓲꓹ ꓙꓳ ꓢꓴ ꓪꓴ-ꓢ ꓔꓯ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓕꓲ ꓞꓲꓼ ꓕꓲ ꓑ ꓟꓬꓱ ꓓꓳꓽ ꓙꓳ ꓝꓲ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿

ꓡꓴ-ꓘ 1ꓽ 26- 38

ꓦꓻ ꓐ ꓛꓳꓼ ꓟ ꓗꓸ ꓠꓯ꓾ ꓪꓴ-ꓢ ꓡꓰ ꓟꓴꓽ ꓗꓪ ꓝꓲ ꓓꓴ ꓚꓬ-ꓑꓷ-ꓡꓰꓼ ꓔꓯ꓾ ꓖ-ꓡꓲ-ꓡꓲ ꓟꓵꓽ ꓠ-ꓢ-ꓡꓱ ꓟꓬꓱ ꓔ ꓟ ꓡꓳ ꓒꓱ ꓗꓪ꓾ 27 ꓟ-ꓡꓲ ꓟꓬꓱ ꓔ ꓟ ꓤ ꓟꓶ ꓡꓯꓸ ꓚꓵꓺ ꓔꓬ ꓗꓪ ꓝꓲ ꓩꓴ ꓗꓷˍ ꓡꓳ꓿ ꓟ-ꓡꓲ ꓠꓬ ꓬꓳ-ꓢꓷ ꓟꓬꓱ ꓔ ꓟ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓕꓲ ꓣꓳ ꓔꓯ ꓠꓲꓹ ꓒꓴ ꓔ ꓟ ꓥ ꓡꓳ꓿ 28 ꓟꓴꓽ ꓗꓪ ꓝꓲ ꓓꓴ ꓠꓬ ꓟ-ꓡꓲ ꓔꓬ ꓗꓪ ꓓꓵꓽ ꓡꓰ ꓢꓲ꓾ ꓣꓱꓽ ꓛꓰ ꓟꓶ ꓢꓴꓳ꓾ ꓧꓪꓸ ꓧꓪ꓾ ꓢꓲ ꓒꓽ ꓠꓴˍ ꓐꓰ ꓕꓲꓽ ꓪꓺꓼ ꓔꓬ ꓡꓳ꓾ ꓐꓯˍ ꓡꓳ꓿ 29 ꓒꓵꓽ ꓗ ꓐꓯ ꓘꓶꓽ ꓕꓱ ꓟ ꓔꓯ ꓟ-ꓡꓲ ꓮꓽ ꓘꓶꓸ ꓓꓵꓽ ꓙ ꓟꓶ ꓡꓰ ꓢꓲ꓾ ꓐꓯ ꓘꓶꓽ ꓕꓱ ꓟ ꓮꓸ ꓫꓵ ꓔꓯ ꓐꓯˍ ꓟꓽ ꓢꓷ꓾ ꓐꓰ ꓓꓵꓽ ꓙ ꓫꓸ ꓔꓬ ꓡꓳ꓿ 30 ꓟꓴꓽ ꓗꓪ ꓝꓲ ꓓꓴ ꓡꓰ ꓬꓲ ꓔꓯ꓾ ꓟ-ꓡꓲꓹꓳ꓾ ꓕꓽ ꓙꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓠꓽ ꓪꓴ-ꓢ ꓟꓲꓽ ꓙꓬ ꓗꓪ ꓣꓱꓽ ꓛꓰ ꓟꓶ ꓗꓷꓳ꓿ 31 ꓠꓴ ꓠꓬ ꓤ ꓠꓱ ꓶꓻ ꓡꓰ ꓢꓲ ꓤ ꓕꓲ ꓣꓳ ꓦꓵ ꓡ ꓥꓳ꓿ ꓬꓲ ꓔꓯ꓾ ꓬꓰ-ꓢꓴ꓾ ꓟꓬꓱꓺ ꓖꓶ ꓠ ꓗꓹ ꓡꓳ꓿ 32 ꓬꓲ ꓠꓬ ꓪꓴꓽˍ ꓟ ꓒꓬꓱꓼ ꓡ ꓥꓳ꓿ ꓬꓲ ꓔꓯ ꓠꓬ꓾ ꓟꓴꓺ ꓡꓳꓹ ꓬꓰ ꓢꓴ ꓬꓲ ꓮ ꓐꓲ꓾ ꓘꓴˍ ꓥꓳ꓿ ꓢꓲ ꓒꓽ ꓪꓴ-ꓢ ꓡꓰ ꓬꓲ ꓒꓵꓽ ꓒ ꓓ-ꓪꓵ ꓙꓵꓽ ꓠꓬꓲꓸ ꓕꓲꓺ ꓬꓲ ꓔꓯ ꓖꓶˍ ꓥꓳ꓿ 33 ꓖꓳ ꓡꓱ ꓢꓲ ꓬꓲ ꓠꓬ ꓕꓲ ꓞꓲꓼ ꓕꓲ ꓑ ꓬ-ꓗꓴ ꓞꓲꓼ ꓤ ꓡꓯꓹ ꓤ ꓐꓴ ꓪ ꓔꓲꓸ ꓣꓱꓽ ꓡ ꓥꓳ꓿ ꓬꓲ ꓗꓴꓷꓼ ꓠꓬ ꓮ ꓕꓯˍ ꓟꓲ ꓟꓽ ꓡꓳꓹ ꓬꓰ꓾ ꓐꓯˍ ꓡꓳ꓿ 34 ꓟ-ꓡꓲ ꓡꓰ ꓟꓴꓽ ꓗꓪ ꓝꓲ ꓓꓴ ꓔꓯ꓾ ꓥꓪ ꓠꓬ ꓤ ꓟꓶ ꓡꓯꓸ ꓚꓵ ꓥ ꓠꓬꓲ꓾ ꓕꓱ ꓟ ꓮ ꓡꓲ ꓒꓬꓱꓼ ꓡ ꓓ ꓢꓰꓽ?꓾ ꓐꓯ ꓖꓶˍ ꓕꓯ꓾ 35 ꓟꓴꓽ ꓗꓪ ꓝꓲ ꓓꓴ ꓡꓰ ꓬꓲ ꓔꓯ꓾ ꓢꓲ-ꓫꓬ-ꓟ-ꓦ ꓠꓬ ꓠꓴ ꓔꓯ ꓬꓯꓼ ꓡ ꓢꓲ꓾ ꓟꓴꓺ ꓡꓳꓹ ꓬꓰ ꓢꓴ ꓬꓲ ꓪꓽ ꓠꓬꓲˍ ꓟ ꓡꓰ ꓠꓴ ꓔꓯ ꓑꓲꓸ ꓡꓰˍ ꓥꓳ꓿ ꓖꓳ ꓡꓱ ꓠꓬꓲ ꓠꓴ ꓦꓵꓻ ꓠꓹ ꓟ ꓢꓲꓽ ꓫꓬˍ ꓟ ꓤ ꓠꓱ ꓖꓳ ꓟ ꓔꓯ ꓠꓬ꓾ ꓪꓴ-ꓢ ꓮ ꓐꓲ꓾ ꓘꓴˍ ꓥꓳ꓿ 36 ꓠ ꓠꓹ꓾ ꓠꓴ ꓫꓵꓽ ꓠꓴ ꓧꓪ ꓬꓲ-ꓡꓲ-ꓫ-ꓑꓷ ꓠꓬ ꓞꓲꓼ ꓪꓴꓽ ꓡꓰˍ ꓟꓲ꓾ ꓬꓲ ꓠꓬ ꓤ ꓕꓲ ꓣꓳ ꓶꓻ ꓞꓹ ꓡꓳ꓿ ꓧꓶꓸ ꓕꓯꓽ ꓢꓴ ꓡꓰ ꓬꓲ ꓔꓯ꓾ ꓞꓳ ꓡꓱꓽ ꓟꓺ꓾ ꓐꓰ ꓘꓴˍ ꓟꓲ꓾ ꓬꓲ ꓖꓳ ꓓꓱꓽ ꓡꓲꓽˍ ꓟ ꓮ ꓟꓶ ꓦ ꓐ ꓛꓳꓼ ꓟ ꓙꓳˍ ꓡꓳ꓿ 37 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓬꓰ ꓟꓽ ꓐ ꓡ ꓟ ꓕꓲ ꓫꓵꓽˍ ꓟꓲ ꓟꓽ ꓙꓳ꓾ ꓐꓯˍ ꓡꓳ꓿ 38 ꓟ-ꓡꓲ ꓡꓰ꓾ ꓥꓪ ꓠꓬ ꓢꓲ ꓒꓽ ꓚꓳꓺ ꓟ ꓥꓳ꓿ ꓠꓴ ꓐꓯˍ ꓟ ꓡꓰ ꓐꓰ ꓥꓪ ꓖꓳ ꓓꓱꓽ ꓗꓪ ꓒꓬꓱꓼ ꓡ ꓝꓲ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓟꓴꓽ ꓗꓪ ꓝꓲ ꓓꓴ ꓬꓲ ꓔꓯˍ ꓐꓰ ꓧꓹ ꓙꓰꓳ꓿

Add new comment

1 + 0 =