ꓪꓴ-ꓢ ꓡꓰ ꓘꓴˍ ꓟ (ꓦꓳꓚꓮꓔꓲꓳꓠ) ꓧꓳꓟꓲꓡꓬ

ꓘꓴ ꓜꓲꓼ ꓞꓳ ꓟꓶꓽ ꓘꓳꓼ ꓠꓯꓸꓼ ꓗꓪ 2 ꓫꓵꓽ ꓠꓽ꓾ ꓢꓲ ꓫꓬ ꓕꓳꓽ ꓶꓽ ꓝꓲꓸ

1 ꓢ-ꓟꓴ-ꓬꓰ 3ꓽ 3-10ꓹ 19

1 ꓢ-ꓟꓴ-ꓬꓰ ꓕꓳꓽ ꓶ 3: 3 ꓬꓰ-ꓧꓳ-ꓧꓪ ꓟꓬ ꓡꓴ_ ꓟꓲ ꓟꓽ ꓫꓵꓻ ꓢꓰ ꓕꓯ ꓡꓰ꓾ ꓢ-ꓟꓴ-ꓬꓰ_ ꓟꓲ ꓪꓴ-ꓢ ꓘꓶꓽ ꓫꓵꓽ ꓝꓲꓸ ꓖꓶ ꓓꓯ_ ꓟ꓾ ꓬꓰ-ꓧꓳ-ꓧꓪ ꓬꓲ ꓦꓲ ꓠꓯꓸꓼ ꓗꓪ ꓗꓳꓺ ꓬꓲꓼ ꓔ ꓔꓬ_ ꓡꓳ꓿ 1 ꓢ-ꓟꓴ-ꓬꓰ ꓕꓳꓽ ꓶ 3: 4 ꓖꓳ ꓡꓱ ꓢꓲ ꓬꓰ-ꓧꓳ-ꓧꓪ ꓡꓰ ꓢ-ꓟꓴ-ꓬꓰ ꓔꓯ ꓘꓴ_ ꓡꓳ꓿ ꓬꓲ ꓠꓬ꓾ ꓥꓪ ꓕꓻ ꓔꓬ_ ꓡꓳ꓾ ꓐꓰ ꓐꓯ_ ꓡꓳ꓿ 1 ꓢ-ꓟꓴ-ꓬꓰ ꓕꓳꓽ ꓶ 3: 5 ꓬꓲ ꓠꓬ ꓱ-ꓡꓲ-ꓬ ꓔꓯ ꓔꓷꓹ ꓙꓰ ꓢꓲ꓾ ꓥꓪ ꓕꓻ ꓔꓬ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓥꓪ ꓔꓯ ꓘꓴ_ ꓡꓳ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓡꓰ꓾ ꓥꓪ ꓠꓴ ꓔꓯ ꓟꓽ ꓘꓴ꓿ ꓬꓲꓼ ꓔ ꓙꓰ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓠꓽ ꓬꓲꓼ ꓔ ꓙꓰ_ ꓡꓳ꓿ 1 ꓢ-ꓟꓴ-ꓬꓰ ꓕꓳꓽ ꓶ 3: 6 ꓖꓳ ꓡꓱ ꓠꓬ ꓬꓰ-ꓧꓳ-ꓧꓪ ꓡꓰ꓾ ꓢ-ꓟꓴ-ꓬꓰꓳ꓾ ꓐꓰ ꓘꓴ_ ꓢꓰꓽ ꓡꓳ꓿ ꓢ-ꓟꓴ-ꓬꓰ ꓔꓴ ꓡ ꓢꓲ꓾ ꓱ-ꓡꓲ-ꓬ ꓔꓯ ꓙꓰ ꓢꓲ ꓠꓬꓲ꓾ ꓥꓪ ꓕꓻ ꓔꓬ_ ꓡꓳ꓾ ꓮ ꓡꓲꓳ ꓐꓯ ꓠꓬ ꓠꓴ ꓡꓰ ꓥꓪ ꓔꓯ ꓘꓴ_ ꓡꓳ꓾ ꓐꓯ_ ꓡꓳ꓿ ꓱ-ꓡꓲ-ꓬ ꓠꓬ ꓒꓳꓹ ꓖꓶ ꓢꓲ꓾ ꓥꓪ ꓤꓽꓳ꓾ ꓥꓪ ꓠꓴ ꓔꓯ ꓟꓽ ꓘꓴ꓾ ꓬꓲꓼ ꓔ ꓙꓰ ꓢꓰꓽ꓾ ꓐꓯ_ ꓡꓳ꓿ 1 ꓢ-ꓟꓴ-ꓬꓰ ꓕꓳꓽ ꓶ 3: 7 ꓖꓳ ꓕꓯ ꓢ-ꓟꓴ-ꓬꓰ ꓠꓬ ꓬꓰ-ꓧꓳ-ꓧꓪ ꓔꓯ ꓟꓽ ꓢꓷ ꓢꓰꓽ꓾ ꓬꓰ-ꓧꓳ-ꓧꓪ ꓐꓯ ꓘꓶ_ ꓟꓲ ꓬꓲ ꓔꓯ ꓟꓽ ꓟꓳ ꓖꓶ ꓡ ꓢꓰꓽ꓿ 1 ꓢ-ꓟꓴ-ꓬꓰ ꓕꓳꓽ ꓶ 3: 8 ꓖꓳ ꓡꓱ ꓢꓲ ꓬꓰ-ꓧꓳ-ꓧꓪ ꓡꓰ ꓢ-ꓟꓴ-ꓬꓰ ꓔꓯ ꓢ ꓧꓪꓹ ꓕꓲ ꓧꓪꓹ ꓘꓴ_ ꓢꓰꓽ ꓡꓳ꓿ ꓬꓲ ꓠꓬ ꓔꓴ ꓡ ꓢꓲ꓾ ꓱ-ꓡꓲ-ꓬ ꓔꓯ ꓙꓰ ꓢꓲ ꓠꓬꓲ꓾ ꓥꓪ ꓕꓻ ꓔꓬ_ ꓡꓳ꓾ ꓠꓴ ꓥꓪ ꓔꓯ ꓘꓴꓻ ꓗꓷꓳ꓾ ꓐꓯ_ ꓡꓳ꓿ ꓖꓳ ꓕꓯ ꓬꓰ-ꓧꓳ-ꓧꓪ ꓠꓬ ꓤ ꓠꓱ ꓤ ꓔꓯ ꓘꓴ_ ꓡꓳ꓾ ꓐꓰ ꓱ-ꓡꓲ-ꓬ ꓡꓳꓸ ꓓꓳ ꓡ_ ꓡꓳ꓿ 1 ꓢ-ꓟꓴ-ꓬꓰ ꓕꓳꓽ ꓶ 3: 9 ꓖꓳ ꓡꓱ ꓠꓬꓲ ꓱ-ꓡꓲ-ꓬ ꓡꓰ ꓢ-ꓟꓴ-ꓬꓰ ꓔꓯ꓾ ꓙꓰ꓾ ꓬꓲꓼ ꓔ ꓬꓰ꓾ ꓮ ꓧꓪꓹ ꓬꓲ ꓡꓰ ꓠꓴ ꓔꓯ ꓘꓴ_ ꓐꓭ ꓠꓬ ꓠꓴ ꓕꓱ ꓡꓱ ꓐꓯ꓾ ꓬꓰ-ꓧꓳ-ꓧꓪꓳ꓾ ꓫ ꓕꓱ ꓡꓯ꓾ ꓠꓴ ꓚꓳ ꓑ ꓠ ꓠꓹ ꓔꓬ_ ꓥꓳ꓾ ꓐꓰ ꓐꓯ ꓖꓶ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓢ-ꓟꓴ-ꓬꓰ ꓬꓲꓼ ꓙꓰ ꓢꓲ꓾ ꓬꓲ ꓔꓬ ꓖꓴ ꓗꓪ ꓗꓳꓺ ꓬꓲꓼ ꓔ_ ꓡꓳ꓿ 1 ꓢ-ꓟꓴ-ꓬꓰ ꓕꓳꓽ ꓶ 3: 10 ꓖꓳ ꓡꓱ ꓢꓲ ꓬꓰ-ꓧꓳ-ꓧꓪ ꓠꓬ ꓦꓰꓼ ꓡ ꓢꓲ꓾ ꓧꓶꓸ ꓕꓯ ꓟ_ ꓡꓰ ꓐꓰ꓾ ꓢ-ꓟꓴ-ꓬꓰꓺꓳ꓾ ꓢ-ꓟꓴ-ꓬꓰꓺꓳ꓾ ꓐꓰ ꓘꓴ_ ꓡꓳ꓿ ꓖꓳ ꓕꓯ ꓢ-ꓟꓴ-ꓬꓰ ꓠꓬ꓾ ꓫ ꓕꓱ ꓡꓯ꓾ ꓠꓴ ꓚꓳ ꓑ ꓥꓪ ꓠ ꓠꓹ ꓔꓬ_ ꓡꓳ꓾ ꓐꓯ_ ꓡꓳ꓿ 1 ꓢ-ꓟꓴ-ꓬꓰ ꓕꓳꓽ ꓶ 3: 19 ꓢ-ꓟꓴ-ꓬꓰ ꓠꓽ ꓪꓴꓽ ꓡ ꓟꓴ ꓡ ꓢꓲ꓾ ꓬꓰ-ꓧꓳ-ꓧꓪ_ ꓟꓲ ꓬꓲ_ ꓐꓰ ꓕꓲ ꓪꓺꓼ ꓔꓬ_ ꓡꓳ꓿ ꓬꓲ ꓐꓯ ꓘꓶ ꓕꓲ ꓘꓶ ꓔꓯ_ ꓟꓲ ꓬꓲ ꓖꓳꓽ ꓟꓽ ꓗꓷ ꓡꓰ ꓝꓲ꓿

1 ꓘꓳ-ꓡꓱ-ꓕꓴ 6ꓽ 13-15ꓹ 17-20

ꓜꓽ ꓓꓴ ꓠꓬ ꓦꓰꓼ ꓟ ꓐꓱ ꓶ ꓥ ꓢꓲ꓾ ꓦꓰꓼ ꓟ ꓠꓬ ꓜꓽ ꓓꓴ ꓐꓱ ꓶ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓪꓴ-ꓢ ꓡꓰ ꓕꓱ ꓠꓬꓲꓽ ꓫꓵꓽ ꓡꓱꓸꓼ ꓔꓯ ꓡꓳꓹ ꓬꓰ ꓝꓲˍ ꓥꓳ꓿ ꓖꓳ ꓓꓱ ꓠꓬ ꓟꓽ ꓢꓲꓽ ꓟꓽ ꓫꓬ ꓟ ꓐꓱ ꓶ ꓟꓽ ꓥ꓿ ꓢꓲ ꓒꓽ ꓐꓱ ꓶ ꓥ ꓢꓲ꓾ ꓢꓲ ꓒꓽ ꓠꓬ ꓖꓳ ꓓꓱ ꓐꓱ ꓶ ꓥ ꓡꓳ꓿ꓪꓴ-ꓢ ꓡꓰ ꓢꓲ ꓒꓽ ꓔꓯ ꓢꓯꓸ ꓬꓲꓼ ꓡ ꓝꓲ ꓗꓷ ꓟˍ ꓡꓰꓽ ꓟꓽ ꓞꓲ꓾ ꓣꓳꓽ ꓔꓯˍ ꓟꓲ ꓬꓲ ꓪꓽ ꓠꓬꓲˍ ꓟ ꓡꓰ ꓢꓯꓸ ꓬꓲꓼ ꓡ ꓝꓲˍ ꓥꓳ꓿ꓠꓴ ꓪꓽ ꓖꓳ ꓓꓱ ꓠꓬ ꓙꓲ-ꓢꓴ ꓡꓯ ꓗꓸ ꓥ ꓟ ꓠꓴ ꓪꓽ ꓟꓽ ꓢꓷꓸ ꓡ? ꓖꓳ ꓡꓱ ꓥ ꓕꓯ ꓠꓽ ꓥꓪ ꓠꓬ ꓙꓲ-ꓢꓴ ꓡꓯꓼ ꓗꓸ ꓔꓯ ꓣꓴ ꓢꓲ ꓖꓳ ꓪꓴꓽ ꓟ ꓡꓯꓼ ꓗꓸ ꓗꓷ ꓡꓰ ꓝꓲ ꓠꓯꓹ ꓡ? ꓮ ꓡꓲ ꓥ ꓟꓲ ꓖꓳ ꓡꓱ ꓬꓰ ꓟꓽ ꓓ꓿ ꓖꓳ ꓡꓱ ꓥ ꓟꓲ ꓢꓲ ꓒˍ ꓐꓰ ꓝꓱꓺ ꓡꓰ ꓢꓴ ꓠꓽ꓾ ꓦꓻ ꓗꓪ ꓢꓲ ꓒˍ ꓐꓰ ꓕꓲ ꓖꓳ ꓓꓱꓽˍ ꓡꓰꓽ ꓗꓷ ꓡꓰˍ ꓡꓳ꓿ꓟꓽ ꓢꓲꓽ ꓟꓽ ꓫꓬ ꓟ ꓔꓯˍ ꓐꓰ ꓛꓰꓹ ꓙꓰ꓿ ꓞꓳ ꓤ ꓡꓰ ꓬꓰˍ ꓟ ꓠꓱꓸ ꓐꓯꓼ ꓮꓸ ꓫꓵ ꓝꓴꓲˍ ꓟꓲ ꓚꓲ ꓛꓬ ꓖꓳ ꓓꓱ ꓔꓯ ꓛꓬꓻ ꓟ ꓟꓽ ꓥ꓿ ꓟꓽ ꓢꓲ ꓟꓽ ꓫꓬ ꓟ ꓬꓰ ꓢꓴ ꓠꓽ ꓬꓲ ꓚꓲ ꓛꓬ ꓖꓳ ꓓꓱꓽ ꓔꓯ ꓛꓬꓻ ꓟ ꓝꓴꓲ ꓬꓰˍ ꓟ ꓥ ꓡꓳ꓿ꓝꓮꓲ ꓠꓴ ꓪꓽ ꓖꓳ ꓓꓱꓽ ꓠꓬ꓾ ꓠꓴ ꓪꓽ ꓠꓯꓸꓼ ꓗꓪ ꓔꓬ ꓟ ꓪꓴ-ꓢ ꓢꓲ-ꓫꓬ-ꓟ-ꓦ ꓬꓲ ꓦꓲ ꓥ ꓟ ꓠꓴ ꓪꓽ ꓟꓽ ꓢꓷꓸ ꓡ? ꓠꓴ ꓪꓽ ꓠꓬ ꓚꓲ ꓛꓬ ꓶꓽ ꓟꓽ ꓥ꓿ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓠꓽ ꓒꓵꓽ ꓡꓰ ꓪꓴꓻ ꓔ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓠꓴ ꓪꓽ ꓖꓳ ꓓꓱꓽ ꓗꓪ ꓪꓴ-ꓢ ꓟꓬꓱ ꓓꓳꓽ ꓓꓳ ꓡ ꓝꓲ꓿

ꓬꓳ-ꓦ 1ꓽ 35-42

ꓗꓸ ꓠꓯꓸ ꓕꓲ ꓠꓬꓲ ꓗꓪ ꓬꓳ-ꓦ ꓠꓬ ꓬꓲ ꓛꓳꓽ ꓒꓯꓹ ꓠꓬꓲꓽ ꓣꓳˍ ꓐꓰ ꓦꓰꓼ ꓞꓹ ꓢꓲ꓾ꓬꓰ-ꓢꓴ ꓙ ꓖꓴ ꓫꓱꓽ ꓗꓳꓸ ꓙꓰˍ ꓟ ꓔꓯ ꓡꓳꓸ ꓟꓳ ꓠꓬ ꓬꓲ ꓡꓰ꓾ ꓠꓬꓲ ꓠꓹ꓾ ꓪꓴ-ꓢ ꓬꓲ ꓮ ꓣꓳ ꓤ꓾ ꓐꓯˍ ꓡꓳ꓿ꓬꓲ ꓐꓯˍ ꓟ ꓔꓯ ꓛꓳꓽ ꓒꓯꓹ ꓖꓳ ꓠꓬꓲꓽ ꓣꓳ ꓑ ꓙꓽ ꓗꓷ ꓠꓬ ꓬꓰ-ꓢꓴ ꓔꓯ ꓛꓳ ꓙꓰˍ ꓡꓳ꓿ꓬꓰ-ꓢꓴ ꓔꓲꓸ ꓒꓳꓹ ꓢꓲ ꓬꓲ ꓪꓽ ꓛꓳꓻ ꓡ ꓟ ꓔꓯ ꓟꓳ ꓗꓷ ꓠꓬ꓾ ꓠꓴ ꓪꓽ ꓮꓸ ꓫꓵ ꓧꓪˍ ꓡ?꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓡꓰ꓾ ꓟꓸ ꓒꓽꓳ꓾ ꓠꓴ ꓮ ꓡꓲ ꓗꓪ ꓔꓬ ꓡ?꓾ ꓐꓰ ꓠ ꓠꓬꓲˍ ꓡꓳ꓿ꓬꓲ ꓡꓰ ꓬꓲ ꓪꓽ ꓔꓯ꓾ ꓡꓯ꓾ ꓖꓳ ꓡꓱ ꓠꓬ ꓠꓴ ꓪꓽ ꓢꓷꓸ ꓡꓰˍ ꓥꓳ꓾ ꓐꓯ ꓖꓶ ꓗꓷ ꓠꓬ꓾ ꓬꓲ ꓪꓽ ꓡ ꓢꓲ ꓬꓲ ꓔꓬ ꓖꓴ ꓔꓯ ꓢꓷꓸ ꓡꓰꓳ꓿ ꓖꓳ ꓕꓲ ꓠꓬꓲ ꓗꓪ ꓬꓲ ꓪꓽ ꓠꓬ ꓬꓰ-ꓢꓴˍ ꓐꓰ ꓕꓲ ꓪꓺꓼ ꓔꓬ ꓡꓳ꓿ ꓖꓳ ꓕꓯ ꓠꓬ ꓟꓶꓼ ꓘꓶꓼ ꓡꓲ ꓙꓵꓹ ꓛꓲ ꓥ ꓡꓳ꓿ꓬꓳ-ꓦ ꓡꓰ ꓐꓯ ꓗꓷ ꓟ ꓔꓯ ꓑ ꓙꓽ ꓢꓲ ꓬꓰ-ꓢꓴ ꓔꓯ ꓛꓳ ꓙꓰˍ ꓟ ꓖꓳ ꓠꓬꓲꓽ ꓣꓳ ꓗꓪ ꓟ ꓕꓲ ꓣꓳ ꓠꓬ꓾ ꓢꓲ-ꓟꓴ ꓒꓲ-ꓕꓱ ꓬꓲ ꓠꓬꓲ ꓤ ꓯ-ꓓꓱ-ꓣꓴ ꓥ ꓡꓳ꓿ꓬꓲ ꓠꓬ ꓬꓲ ꓮ ꓬꓲꓼ ꓢꓲ-ꓟꓴ ꓔꓯ ꓧꓶꓸ ꓕꓯ ꓧꓪ ꓟꓶ ꓢꓲ ꓬꓲ ꓔꓯ꓾ ꓥꓪ ꓠꓴꓽ ꓠꓽ ꓟꓲ-ꓢ-ꓬ ꓔꓯ ꓧꓪ ꓟꓶ ꓡꓰꓳ꓾ ꓐꓯ ꓖꓶˍ ꓡꓳ꓿ (ꓟꓲ-ꓢ-ꓬ ꓐꓯˍ ꓟ ꓠꓬ꓾ ꓙꓲ-ꓢꓴ ꓐꓯˍ ꓟ ꓥ ꓡꓳ꓿)ꓬꓲ ꓡꓰ ꓬꓲ ꓮ ꓬꓲꓼ ꓢꓲ-ꓟꓴ ꓔꓯ ꓬꓰ-ꓢꓴ ꓔꓬ ꓗꓪ ꓧꓳꓽ ꓡ ꓡꓳ꓿ ꓬꓰ-ꓢꓴ ꓬꓲ ꓔꓯ ꓡꓳꓸ ꓔ ꓢꓲ꓾ ꓠꓴ ꓠꓬ ꓬꓳ-ꓦ ꓮ ꓐꓲ ꓢꓲ-ꓟꓴ ꓥ ꓡꓳ꓿ ꓠꓴ ꓔꓯ ꓠꓬ ꓗꓷ-ꓒ ꓟꓬꓱꓺ ꓖꓶˍ ꓥꓳ꓾ ꓐꓯˍ ꓡꓳ꓿ (ꓗꓷ-ꓒ ꓐꓯˍ ꓟ ꓠꓬ꓾ ꓒꓲ-ꓕꓱ꓾ ꓐꓯˍ ꓟ ꓥ ꓡꓳ꓿)