ꓪꓴ-ꓢ ꓬꓲ ꓫꓱꓸ ꓤ ꓠꓲꓹ꓾ ꓬꓲ ꓙꓽ ꓗꓳꓹ ꓠꓲꓹ ꓕꓲ ꓟˍ ꓗꓪ ꓐꓰ ꓡꓰꓽ ꓣꓳ ꓠꓬ ꓪꓴ-ꓢ ꓤ ꓮ ꓟꓲꓽ ꓒꓬꓱꓼ ꓡˍ ꓟ ꓥ ꓡꓳ

ꓢꓲ ꓒ ꓬꓰ-ꓢꓴ ꓬꓲ ꓤꓶꓻ ꓔꓯ ꓡꓳꓸ ꓠꓬꓲˍ ꓕꓯ ꓬꓲ ꓠꓬ ꓮ ꓫꓵꓽ ꓬꓰˍ ꓥ ꓟꓲ꓾ ꓪꓽ ꓘꓴ ꓢꓲ꓾ ꓪꓴ-ꓢ ꓔꓯ ꓧꓶꓸ ꓕꓯ ꓖꓪ ꓙꓱ ꓢꓲ ꓬꓰˍ ꓡꓳ= ꓕꓲ ꓙꓰꓽ ꓙꓰꓽ ꓬꓰˍ ꓕ ꓑꓳꓸꓼ ꓬꓲ ꓠꓬ ꓐꓹ ꓐ ꓠꓲꓹ ꓡꓶꓽ ꓐꓰ ꓕꓲ ꓡꓰꓹꓼ ꓒꓬꓱꓼ ꓡ ꓠꓹ ꓟ ꓐꓱ ꓶ꓾ ꓬꓲ ꓚꓲꓸ ꓛꓬ ꓠꓬ ꓐꓹ ꓐ ꓐꓰ ꓕꓲ ꓠꓲꓹ ꓕꓲ ꓪ ꓗꓷ ꓡꓰˍ ꓗꓪ ꓛꓲ ꓬꓰ ꓢꓲ ꓞꓳ ꓙꓳˍ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓥ ꓟ ꓡꓴ-ꓘ 6ꓽ12-19 ꓗꓪ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓔꓯ ꓟꓽ ꓢꓲ ꓧꓶꓸ ꓕꓯ ꓕꓲꓽ ꓦꓬꓼ ꓡꓱꓸꓼ ꓪꓽ ꓘꓴˍ ꓡꓳ꓾ ꓐꓰ ꓐꓯ ꓔ ꓡꓳ= ꓬꓲ ꓠꓬ ꓕꓲ ꓦꓬꓼ ꓡꓱꓸꓼ ꓪꓽ ꓘꓴ ꓢꓲ ꓬꓲ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓔꓯ ꓢꓲˍ ꓟ ꓟꓸ ꓟꓲꓽ ꓔꓯ ꓣꓳ ꓑ ꓙꓽ ꓪˍ ꓟ ꓥ ꓡꓳ=

ꓢꓲ ꓒ ꓬꓰ-ꓢꓴ ꓠꓬ ꓕꓲ ꓦꓬꓼ ꓡꓱꓸꓼ ꓪꓽ ꓘꓴ ꓔ ꓐꓰ ꓐꓯ ꓥˍ ꓟꓲ ꓬꓲ ꓡꓰ ꓢꓲꓺ ꓔ ꓟ ꓠꓬ ꓒꓴ ꓙꓳ꓾ ꓫꓵꓺ ꓙꓳ꓾ ꓢꓷꓸ ꓠꓲꓹ ꓢꓷꓸ ꓢꓴ ꓐꓴ ꓔꓯ ꓢꓲꓺ ꓔ ꓟ ꓟꓽ ꓥ= ꓢꓷꓸ ꓠꓲꓹ ꓟꓽ ꓢꓷꓸ ꓢꓴ꓾ ꓠꓲꓹ ꓟ ꓣꓳ ꓢꓴ꓾ ꓙꓳꓺ ꓗꓴꓸ ꓢꓴ꓾ ꓒꓴ ꓫꓵ ꓟꓽ ꓙꓳ ꓮ ꓫꓵꓽˍ ꓟꓲ ꓬꓰ ꓟꓽ ꓗꓴꓸ ꓢꓴ ꓐꓴ ꓔꓯ ꓬꓲ ꓡꓰ ꓢꓲ ꓔ ꓟ ꓥ ꓡꓳ= ꓬꓲ ꓠꓬ ꓓꓻ ꓢꓴ꓾ ꓐꓳ ꓶ ꓙꓳ ꓢꓴ ꓐꓴ ꓔꓯ ꓢꓲꓺ ꓔ ꓟ ꓟꓽ ꓥ꓾ ꓫꓸ ꓢꓴ꓾ ꓮ ꓫꓵꓽˍ ꓟꓲ ꓟꓽ ꓢꓷꓸ ꓢꓴ ꓔꓯ ꓢꓲꓺ ꓢꓲ ꓠꓬꓲ꓾ ꓢꓷꓸ ꓡ ꓠꓹ ꓟ ꓐꓱ ꓶ ꓬꓲ ꓡꓰ ꓟꓸ ꓖꓶ ꓑꓱ ꓖꓶˍ ꓡꓳ= ꓟꓸ ꓖꓶ ꓑꓱ ꓖꓶ ꓠꓹ ꓟ ꓐꓱ ꓶ ꓬꓲ ꓡꓰ ꓢꓲꓺ ꓔ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓪꓴ-ꓢ ꓟꓬꓱꓽ ꓬꓰ ꓢꓴ ꓟꓬꓽ ꓠꓬꓲ ꓠꓬ ꓞꓳ ꓐꓳ꓾ ꓟꓽ ꓥ ꓠꓬ꓾ ꓢꓷꓸ ꓠꓲꓹ ꓮ ꓘꓶꓸ ꓙꓳˍ ꓟ ꓗꓪ ꓐꓰ ꓪꓴ-ꓢ ꓟꓬꓱꓽ ꓬꓰ ꓢꓴ ꓒꓬꓱꓼ ꓡ ꓢꓴ ꓖꓳ ꓟꓬ ꓟꓽ ꓙꓳ= ꓫꓸ ꓢꓴ ꓟꓷꓼ ꓢꓴ ꓐꓴ ꓗꓪ ꓐꓰ ꓪꓴ-ꓢ ꓡꓰ ꓘꓴ ꓔ ꓟ ꓠꓬ ꓟꓬꓽ ꓠꓬꓲ ꓥ ꓡꓳ=

ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓢꓲ ꓔ ꓟ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓘꓴꓽ ꓗꓪ ꓬꓲ ꓔꓯ ꓪꓴꓽ ꓜꓽ ꓢꓴ ꓥ ꓟ ꓘꓹ-ꓡꓲꓳ ꓬꓴ-ꓓ ꓔꓯ ꓥˍꓟꓲ ꓬꓲ ꓡꓰ ꓢꓲꓺ ꓔ ꓟ ꓠꓬ ꓣꓳ ꓐꓱ ꓶ ꓓꓵꓽ ꓙꓽ ꓟꓶ ꓓꓴ ꓥ ꓡꓳ= ꓬꓲ ꓔꓯ ꓪꓴꓽ ꓜꓽ ꓢꓴ ꓥ ꓟ ꓔꓯ ꓢꓷꓸˍ ꓥ ꓟꓲ ꓬꓲ ꓡꓰ ꓬꓴ-ꓓ ꓔꓯ ꓢꓲꓺ ꓗꓷˍ ꓡꓳ= ꓕꓱ ꓟ ꓠꓬ ꓣꓳ ꓮ ꓫꓵꓽ ꓟꓬꓱꓽ ꓬꓰˍ ꓥ ꓟꓲ꓾ ꓮ ꓡꓲ ꓟꓬ ꓛꓲ ꓪꓽ ꓘꓴ ꓢꓲ ꓬꓰˍ ꓥ ꓟꓲ꓾ ꓕꓲ ꓖ ꓕꓲ ꓧꓪꓹ ꓗꓪ ꓣꓳ ꓔꓯ ꓪꓴꓽ ꓜꓽ ꓢꓴ꓾ ꓣꓳ ꓟꓬꓱ ꓓꓳꓽ ꓒꓬꓹ ꓢꓴ꓾ ꓣꓳ ꓔꓯ ꓟꓽ ꓙꓲꓻ ꓢꓴˍ ꓟꓲ ꓮ ꓟꓬꓹ ꓙꓳ ꓡˍ ꓥꓳ= ꓣꓳ ꓗ ꓠꓯꓸ ꓢꓲ ꓗꓪ ꓮꓸ ꓕꓽ ꓐꓰ ꓗꓸ ꓡ ꓢꓴˍ ꓟꓲ ꓙꓳˍ ꓥꓳ=

ꓖꓳ ꓡꓱ ꓠꓬꓲ ꓬꓴ-ꓓ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓪꓴꓽ ꓜꓽ ꓗꓷˍ ꓟ ꓗꓪ ꓐꓰ꓾ ꓢꓲ ꓒ ꓬꓰ-ꓢꓴ ꓠꓬ ꓟꓲ ꓠꓯ ꓞꓳ ꓤ ꓐꓴ ꓔꓯ ꓚꓬꓴꓸ ꓙ ꓖꓶ ꓟꓶˍ ꓟ ꓡꓰ ꓐꓰ꓾ ꓣꓳ ꓥˍ ꓟꓲ ꓕꓲ ꓖ ꓕꓲ ꓧꓪꓹ ꓘꓹ-ꓡꓲꓳ ꓬꓴ-ꓓ ꓔꓯ ꓫꓱꓸ ꓢꓴ ꓔꓯ ꓔꓳꓹ ꓜꓳꓽ ꓡˍ ꓕꓯ ꓣꓳ ꓠꓬ ꓬꓲ ꓪ ꓔꓯ ꓪꓽ ꓛꓴꓽ ꓚꓱꓹ ꓟ ꓟꓽ ꓬꓰ ꓬꓰ꓾ ꓐꓯ ꓗꓸ ꓟ ꓔꓯ ꓟꓽ ꓬꓰ ꓬꓰ꓾ ꓕꓱ ꓟ ꓠꓬ ꓣꓳ ꓐꓱ ꓶ ꓙꓲꓻ ꓓꓴ ꓕꓲ ꓫꓵꓽ ꓫꓵꓽ ꓓꓳ ꓡ ꓓꓴ ꓥꓳ ꓐꓰ ꓓꓵꓽ ꓙ ꓢꓲ ꓠꓬꓲ꓾ ꓢꓲ ꓒ ꓬꓰ-ꓢꓴ ꓐꓰ ꓕꓲ ꓡꓰꓹꓼ ꓖꓼ ꓖꓶ ꓢꓲ ꓠꓬꓲ꓾ ꓢꓲ ꓒ ꓬꓰ-ꓢꓴ ꓙ ꓫꓱꓽˍ ꓟ ꓚꓱꓹ ꓗꓪ ꓣꓳ ꓥˍ ꓟꓲ ꓫꓱꓽ ꓙꓰ ꓠꓹ ꓟ ꓮ ꓘꓶꓸ ꓬꓳꓸ ꓚꓵˍ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓮ ꓙꓵꓽ ꓔꓯ ꓠꓬ ꓪꓴ-ꓢ ꓡꓰ ꓘꓴꓻ ꓔ ꓡꓳ= ꓬꓲ ꓠꓬ ꓕꓲ ꓦꓬꓼ ꓡꓱꓸꓼ ꓪꓽ ꓘꓴ ꓢꓲ ꓠꓬꓲ ꓬꓲ ꓝꓲ ꓓꓴ ꓐꓴ ꓔꓯ ꓘꓴˍ ꓟ ꓡꓰ ꓐꓰ ꓣꓳ ꓠꓬ ꓣꓳ ꓓꓻˍ ꓟ꓾ ꓣꓳ ꓢꓷꓸˍ ꓟ꓾ ꓣꓳ ꓗꓴꓸˍ ꓟ ꓗꓪ ꓐꓰ ꓪꓴ-ꓢ ꓤ ꓮ ꓟꓲꓽ ꓒꓬꓱꓼ ꓡˍ ꓟ ꓟꓽ ꓥ ꓥ꓾ ꓬꓲ ꓫꓱꓸ ꓤ ꓠꓲꓹ꓾ ꓬꓲ ꓙꓽ ꓗꓳꓹ ꓠꓲꓹ ꓕꓲ ꓟˍ ꓗꓪ ꓐꓰ ꓡꓰꓽ ꓪꓴ-ꓢ ꓤ ꓮ ꓟꓲꓽ ꓒꓬꓱꓼ ꓡˍ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓕꓱ ꓟ ꓔꓯ ꓙꓽ ꓜꓲꓼ ꓢꓲ ꓠꓬꓲ ꓣꓳ ꓥˍ ꓟꓲ ꓢꓲ ꓒ ꓬꓰ-ꓢꓴˍ ꓡꓰ ꓐꓰ ꓮ ꓫꓵꓽ ꓬꓰˍ ꓥ ꓟꓲ ꓪꓽ ꓘꓴ ꓢꓲ ꓠꓬꓲ ꓞꓳ ꓙꓳ ꓗꓴꓸ ꓠꓹ ꓟ꓾ ꓘꓹ-ꓡꓲꓳ ꓬꓴ-ꓓ ꓔꓯ ꓫꓱꓸˍ ꓟ ꓡ ꓞꓳ ꓐꓴ ꓔꓯ ꓔꓳꓹ ꓜꓳꓽˍ ꓥ ꓟꓲ ꓪꓽ ꓛꓴꓽ ꓚꓱꓹ ꓠꓹ ꓟ꓾ ꓐꓯ ꓗꓸ ꓠꓹ ꓟ ꓟꓽ ꓬꓰ ꓬꓰ꓾ ꓢꓲ ꓡꓲ ꓡꓲ ꓐꓰ ꓪꓽ ꓘꓴ ꓢꓲ ꓞꓳ ꓙꓳ ꓙꓰˍ ꓠꓬ ꓮ ꓙꓵꓽ ꓐꓱ ꓶ ꓙꓲꓻ ꓖꓴ ꓙꓳˍ ꓥꓳ ꓐꓰ꓾ ꓢꓲꓽ ꓫꓬ ꓕꓳ ꓶ ꓕꓱ ꓟ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡ ꓔꓬ ꓡꓳ=