ꓪꓴ-ꓢ ꓶ: ꓓꓳꓽ ꓫꓱ, ꓓꓳꓽ (Homily)

ꓤ ꓚꓵꓸ ꓚꓵꓸ ꓙꓵꓹ 2 ꓫꓵꓽ ꓠꓽ

 

ꓬꓲ ꓚꓰꓸꓸ ꓬꓲ ꓪꓴꓸ ꓕꓳꓽ ꓶ 22: 1-2ꓹ9-13ꓹ 15-18

ꓕꓱ ꓟꓬ ꓫꓵꓽ ꓗ ꓠꓯ ꓪꓴ-ꓢ ꓠꓬ ꓮ-ꓐ-ꓡ-ꓦ ꓔꓯ ꓤꓹ ꓠꓬꓲ ꓢꓲ ꓬꓲ ꓔꓯ꓾ ꓮ-ꓐ-ꓡ-ꓦꓻꓳ꓾ ꓐꓰ ꓘꓴ_ ꓡꓳ꓿ ꓬꓲ ꓡꓰ꓾ ꓥꓪ ꓕꓻ ꓔꓬ_ ꓡꓳ꓾ ꓐꓯ_ ꓡꓳ꓿ ꓪꓴ-ꓢ ꓡꓰ꓾ ꓠꓴ ꓤ꓾ ꓠꓴ ꓠꓲꓹ ꓠꓵ_ ꓟ ꓤ ꓬꓲ-ꓢ ꓔꓯ ꓠꓴ ꓧꓳꓽ ꓔ ꓢꓲ꓾ ꓟꓳ-ꓡꓲ-ꓬꓼ ꓟꓵ ꓗꓪ ꓙꓰ ꓢꓲ ꓠꓬꓲ꓾ ꓥꓪ ꓠꓴ ꓔꓯ ꓟꓳꓸ ꓖꓶ ꓠꓹ ꓟ ꓪꓽ ꓚꓲ ꓕꓲ ꓚꓲ ꓗꓪ ꓬꓲ ꓔꓯ ꓛꓴꓻ ꓔꓲ ꓓꓴ ꓬꓰ ꓢꓲ ꓛꓴꓻ ꓔꓲ ꓖꓶ ꓡꓯ꓾ ꓐꓯ_ ꓡꓳ꓿ ꓪꓴ-ꓢ ꓡꓰ ꓮ-ꓐ-ꓡ-ꓦ ꓔꓯ ꓐꓯ ꓖꓶ_ ꓟ ꓟꓵꓽ ꓗꓪ ꓛꓲ ꓬꓰ ꓠꓬ꓾ ꓮ-ꓐ-ꓡ-ꓦ ꓡꓰ ꓖꓳ ꓗꓪ ꓔꓲ ꓖꓴ ꓕꓲ ꓟ ꓜꓶꓻ ꓢꓲ꓾ ꓖꓳ ꓟ ꓕꓯ ꓢꓲ ꓗꓪ ꓢꓲꓹ_ ꓟꓲ ꓬꓲ ꓖꓺ ꓙꓳ ꓙꓳ_ ꓡꓰ ꓙꓽ ꓖꓶ ꓢꓲ ꓠꓬꓲ꓾ ꓬꓲ ꓤ ꓬꓲ-ꓢ ꓔꓯ ꓞꓳꓹ ꓢꓲ꓾ ꓔꓲ ꓖꓴ ꓗꓪ ꓟ ꓢꓲꓹ ꓕꓯ ꓢꓲ ꓗꓪ ꓬꓲ ꓔ ꓯ ꓗꓶ ꓔ_ ꓡꓳ꓿ ꓮ-ꓐ-ꓡ-ꓦ ꓠꓬ ꓬꓲ ꓡꓯ ꓒꓯ ꓛꓱ ꓓꓳ ꓡ ꓢꓲ꓾ ꓬꓲ ꓤ ꓔꓯ ꓢꓰꓼ ꓠꓹ ꓟ ꓮ ꓕꓽ ꓣꓴ_ ꓡꓳ꓿ ꓖꓳ ꓕꓯ ꓬꓰ-ꓧꓳ-ꓧꓪ ꓝꓲ ꓓꓴ ꓠꓬ ꓟꓴ ꓗꓪ ꓕꓯ ꓢꓲ ꓗꓪ ꓐꓰ ꓬꓲ ꓔꓯ ꓘꓴꓻ ꓢꓲ꓾ ꓮ-ꓐ-ꓡ-ꓦꓻꓳ꓾ ꓮ-ꓐ-ꓡ-ꓦꓻꓳ꓾ ꓐꓰ ꓘꓴ_ ꓡꓳ꓿ ꓮ-ꓐ-ꓡ-ꓦ ꓡꓰ꓾ ꓥꓪ ꓕꓻ ꓔꓬ_ ꓡꓳ꓾ ꓐꓯ_ ꓡꓳ꓿ ꓬꓲ ꓡꓰ꓾ ꓤ ꓖꓴ ꓡꓯꓸ ꓔꓯ ꓕꓽ ꓡꓯꓼ ꓡꓵ꓾ ꓠꓴ ꓬꓲ ꓔꓯ ꓮ ꓫꓵ_ ꓟꓲ ꓕꓽ ꓬꓰ ꓖꓶ꓿ ꓠꓴ ꓠꓬ ꓪꓴ-ꓢ ꓔꓯ ꓙꓳ ꓒꓵꓽ ꓢꓴ ꓥ ꓡꓳ꓾ ꓐꓰ ꓮ ꓟꓶ ꓥꓪ ꓢꓷ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓮ ꓐꓲ꓾ ꓠꓴ ꓤ ꓔꓲꓸ ꓠꓬ ꓥꓪ ꓔꓯ ꓖꓶ ꓟꓽ ꓬꓯꓼ ꓐꓰ ꓠꓴ ꓟꓽ ꓬꓰ꓾ ꓐꓯ_ ꓡꓳ꓿ ꓮ-ꓐ-ꓡ-ꓦ ꓡꓳꓸ ꓠꓬꓲ ꓠꓬ꓾ ꓠꓬꓲ ꓠꓹ꓾ ꓬꓲ ꓗ ꓠꓯ ꓢꓲ ꓗꓪ ꓪꓴꓸ ꓛꓲ ꓡꓰ ꓢꓲꓹ ꓑꓳ ꓗꓪ ꓥꓳ ꓞ_ ꓟ ꓮ ꓣꓳ ꓑ ꓕꓲ ꓟ ꓙꓳ_ ꓡꓳ꓿ ꓮ-ꓐ-ꓡ-ꓦ ꓙꓰ ꓢꓲ ꓮ ꓣꓳ ꓑ ꓔꓯ ꓢꓲꓻ ꓔꓯꓹ ꓡ ꓢꓲ ꓠꓬꓲ꓾ ꓬꓲ ꓤ ꓬꓲ ꓛꓲ ꓛꓴꓻ ꓔꓲ ꓓꓴ ꓬꓰ ꓢꓲ ꓛꓴꓻ ꓔꓲ ꓖꓶ_ ꓡꓳ꓿ ꓬꓰ-ꓧꓳ-ꓧꓪ ꓝꓲ ꓓꓴ ꓠꓬ ꓟꓴ ꓗꓪ ꓕꓯ ꓢꓲ ꓗꓪ ꓐꓰ ꓮ-ꓐ-ꓡ-ꓦ ꓔꓯ ꓠꓬꓲꓽ ꓧꓪꓹ ꓕꓲ ꓧꓪ ꓘꓴꓻ ꓢꓲ ꓕꓱ ꓡꓱ ꓐꓯ_ ꓡꓳ꓾ ꓥꓪ ꓠꓬ ꓥꓪ ꓚꓲ ꓛꓬ ꓔꓯ ꓖꓴ ꓢꓲ ꓙꓱꓽ ꓘꓶ ꓪꓵꓼ ꓗꓷꓳ꓾ ꓐꓰ ꓬꓰ-ꓧꓳ-ꓧꓪ ꓡꓰ ꓐꓯ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓕꓱ ꓡꓱ ꓬꓰ ꓢꓲ꓾ ꓠꓴ ꓮ ꓐꓲ꓾ ꓠꓴ ꓤ ꓔꓲꓸ ꓔꓯ ꓠꓬ ꓥꓪ ꓔꓯ ꓖꓶ ꓟꓽ ꓬꓯꓼ꓾ ꓐꓰ ꓠꓴ ꓟꓽ ꓬꓰ ꓟ ꓑꓶ ꓓꓴ꓾ ꓥꓪ ꓚꓵ ꓚꓵ ꓠꓴ ꓔꓯ ꓶꓼ ꓤ ꓫꓱꓹ ꓤ ꓖꓶ_ ꓥꓳ꓿ ꓠꓴ ꓞꓲ ꓤ ꓡꓯ ꓤ ꓔꓯ ꓠꓬ ꓟꓴ ꓗꓪ ꓗꓪ ꓟ ꓗꓴ ꓤ_ ꓐꓰ ꓬꓲꓻ ꓡꓴ ꓐꓱ ꓘꓶꓽ ꓗꓪ ꓟ ꓧꓶꓽ ꓚꓲ_ ꓡꓰ ꓐꓰ ꓟꓬꓽ ꓡ ꓝꓲ_ ꓥꓳ꓿ ꓠꓴ ꓞꓲ ꓤ ꓡꓯ ꓤ ꓐꓴ ꓠꓬ ꓛꓴꓽ ꓙꓳ ꓢꓴ ꓗ ꓘꓶ ꓔꓯ ꓙꓵꓽ ꓟꓶ ꓡꓰ_ ꓥꓳ꓿ ꓠꓴ ꓞꓲ ꓤ ꓡꓯꓹ ꓤ ꓗꓪ ꓐꓰ ꓟꓲ ꓠꓯ ꓗꓪ ꓟ ꓞꓳ ꓫꓵꓽ ꓞꓳ ꓙꓰ ꓥ ꓕ ꓑꓳ ꓠꓬ ꓶꓼ ꓙꓳ ꓫꓱꓹ ꓙꓳ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓥꓪ ꓐꓯ ꓘꓶ ꓔꓯ ꓠ ꓡꓳ_ ꓡꓳ꓾ ꓐꓯ_ ꓡꓳ꓿

ꓣꓳ-ꓟ 8ꓽ 31-34

ꓧꓶꓸ ꓕꓯˍ ꓡꓰ ꓬꓲ ꓢꓲ ꓚꓰꓸ ꓔ ꓟ ꓡ ꓞꓳ ꓔꓯ ꓬꓲ ꓘꓴꓻ ꓢꓲ꓾ ꓬꓲ ꓡꓰ ꓘꓴꓻ ꓔ ꓟ ꓡ ꓞꓳ ꓔꓯ ꓔꓱꓹ ꓜꓳꓽ ꓟ ꓚꓬꓹ ꓟꓶ ꓡꓰ ꓝꓲ ꓢꓲ ꓠꓬꓲ꓾ ꓔꓱꓹ ꓜꓳꓽ ꓟ ꓚꓬꓹ ꓖꓶ ꓗꓷ ꓢꓴ ꓐꓴ ꓔꓯ ꓬꓲ ꓡꓰ ꓟꓬꓱ ꓓꓳꓽ ꓟꓶ ꓡꓰ ꓝꓲˍ ꓡꓳ꓿ 31 ꓖꓳ ꓡꓱ ꓥ ꓠꓬ ꓣꓳ ꓮꓸ ꓫꓵ ꓐꓯ ꓠꓯꓹ ꓡ? ꓪꓴ-ꓢ ꓣꓳ ꓔꓯ ꓙ ꓢꓴ ꓥ ꓕꓯ ꓠꓽ꓾ ꓣꓳ ꓔꓯ ꓔꓳꓹ ꓢꓴ ꓮ ꓟ ꓥ ꓡ? 32 ꓬꓲ ꓚꓲꓸ ꓛꓬ ꓮ ꓐꓲ ꓔꓯ ꓟꓽ ꓗꓹ ꓐꓽ ꓐ ꓣꓳ ꓮꓽ ꓙꓵ ꓢꓴ ꓐꓱ ꓶ ꓖꓶ ꓗꓷ ꓢꓴ ꓬꓲ ꓠꓬ꓾ ꓮꓸ ꓫꓵ ꓥ ꓟꓲ ꓬꓲꓸˍ ꓐꓰ ꓕꓲ ꓛꓳꓺꓼ ꓣꓳ ꓔꓯ ꓠꓲꓹ ꓡꓳꓻ ꓡꓳˍ ꓡꓰ ꓟꓽ ꓖꓶ ꓡ꓾ ꓐꓰ꓾ ꓮ ꓡꓲ ꓗꓷ ꓡꓰ ꓓ ꓢꓰ? 33 ꓪꓴ-ꓢ ꓡꓰ ꓢꓲ ꓔ ꓢꓴ ꓔꓯ ꓮꓽ ꓟ ꓡꓰ ꓓꓰꓺˍ ꓥꓳ ꓪ? ꓔꓱꓹ ꓜꓳꓽ ꓟ ꓚꓬꓹ ꓖꓶ ꓡ ꓢꓴ ꓠꓬ ꓪꓴ-ꓢˍ ꓡꓰꓽ ꓥꓳ꓿ 34 ꓖꓳ ꓡꓱ ꓠꓬ ꓣꓳ ꓔꓯ ꓮꓽ ꓟ ꓡꓰ ꓝꓴꓲ ꓐꓯ ꓞꓷꓹˍ ꓥꓳ ꓪ? ꓣꓳ ꓐꓱ ꓶ ꓫꓵꓻ ꓙ ꓗꓷ ꓢꓴ ꓠꓬ ꓬꓰ-ꓢꓴ ꓙꓲ-ꓢꓴ ꓥ ꓢꓲ꓾ ꓪꓴ-ꓢ ꓡꓰ ꓬꓲ ꓔꓯ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲꓳ꓿ ꓖꓳ ꓡꓱ ꓢꓲ ꓬꓲ ꓠꓬ ꓪꓴ-ꓢ ꓡꓯꓼ ꓙ ꓗꓪ ꓔꓬ ꓢꓲ ꓣꓳ ꓐꓱ ꓶ ꓶꓼ ꓓꓰꓽ ꓙ ꓔꓬ ꓡꓳ꓿

 

ꓟ-ꓘꓳ 9ꓽ 2-10

ꓛꓳꓼ ꓠꓬꓲ ꓗꓳꓸ ꓗꓷ ꓠꓬ꓾ ꓬꓰ-ꓢꓴ ꓠꓽ꓾ ꓒꓲ-ꓕꓱˍ ꓐꓰ ꓬ-ꓗꓴˍ ꓐꓰ ꓬꓳ-ꓦ ꓔꓯˍ ꓡꓰꓽ ꓟꓴꓺˍ ꓟ ꓪꓽ ꓚꓲ ꓗꓪ ꓧꓳꓽ ꓓꓯ ꓙꓰ ꓢꓲ꓾ ꓬꓲ ꓠꓬ ꓬꓲ ꓪꓽ ꓒꓬꓱꓽ ꓕꓯꓽ ꓗꓪ ꓬꓲ ꓒꓬꓱꓽ ꓑꓶꓸ ꓡꓰˍ ꓡꓳ꓿ 3 ꓬꓲ ꓐꓵ ꓞꓶꓽ ꓠꓬ ꓐꓬꓱꓼ ꓡꓱꓼ ꓡꓱ ꓗꓹ ꓢꓲ ꓮꓽ ꓘꓶꓸ ꓒꓴˍ ꓡꓳ꓿ ꓟꓲ ꓠꓯ ꓗꓪ ꓟꓶ ꓞꓲꓽ ꓢꓴ ꓮꓽ ꓟˍ ꓟꓲ ꓖꓳ ꓟꓬ ꓒꓴꓻ ꓡꓰ ꓗꓪ ꓛꓲ ꓞꓲꓽ ꓟꓽ ꓐ ꓡ꓿ 4 ꓬꓲ-ꓡꓲ-ꓬ ꓐꓰ ꓟꓳ-ꓫꓲˍ ꓟꓲ ꓬꓲ ꓪꓽ ꓔꓯ ꓟꓳꓸ ꓖꓶ ꓡ ꓢꓲ꓾ ꓬꓲ ꓪꓽ ꓠꓬ ꓬꓰ-ꓢꓴˍ ꓐꓰ ꓫꓸ ꓕꓱ ꓡꓯꓽ ꓘꓳˍ ꓡꓳ꓿ 5 ꓒꓲ-ꓕꓱ ꓡꓰ ꓬꓰ-ꓢꓴ ꓔꓯ꓾ ꓟꓸ ꓒꓽꓳ꓾ ꓕꓱ ꓗꓪ ꓔꓬ ꓟ ꓠꓬ ꓣꓳꓽ ꓐꓱ ꓶ ꓙꓲˍ ꓡꓳ꓿ ꓦꓲ ꓐꓱ ꓢ ꓟ꓾ ꓠꓴ ꓐꓱ ꓶ ꓕꓲ ꓟ꓾ ꓟꓳ-ꓫꓲ ꓐꓱ ꓶ ꓕꓲ ꓟ꓾ ꓬꓲ-ꓡꓲ-ꓬ ꓐꓱ ꓶ ꓕꓲ ꓟ꓾ ꓥꓪ ꓠꓴꓽ ꓔꓯ ꓫꓬꓹ ꓝꓲ ꓡꓯ꓾ ꓐꓯˍ ꓡꓳ꓿ 6 ꓬꓲ ꓕꓱ ꓡꓱ ꓐꓯˍ ꓟ ꓠꓬ꓾ ꓬꓲ ꓪꓽ ꓠꓽ ꓮꓽ ꓘꓶꓸ ꓙꓳ ꓡꓰ ꓢꓲ꓾ ꓒꓲ-ꓕꓱ ꓠꓬ ꓮꓸ ꓫꓵ ꓐꓯ ꓠꓯꓹ ꓡꓳ ꓟꓽ ꓢꓷꓸ ꓗꓷ ꓡꓰ ꓠꓬꓲ ꓥ ꓡꓳ꓿ 7 ꓖꓳ ꓡꓱ ꓠꓬ ꓟꓴ ꓗꓴꓸ ꓕꓲ ꓘꓴꓸ ꓢꓴꓸ ꓡ ꓢꓲ ꓬꓲ ꓪꓽ ꓔꓯ ꓛꓸ ꓡꓰ ꓠꓬ꓾ ꓟꓴ ꓗꓴꓸ ꓠꓯꓸꓼ ꓗꓪ ꓐꓰ ꓢꓯꓼ ꓕꓲ ꓟ ꓓꓳ ꓡ ꓢꓲ꓾ ꓕꓱ ꓟ ꓠꓬ ꓥꓪ ꓠꓲꓹ ꓠꓵˍ ꓟ ꓮ ꓐꓲ ꓥ ꓡꓳ꓾ ꓠꓴ ꓪꓽ ꓬꓲ ꓔꓯ ꓠ ꓠꓹ꓾ ꓐꓯˍ ꓡꓳ꓿ 8 ꓬꓲ ꓪꓽ ꓡꓰ ꓞꓼ ꓐꓰ ꓚꓳ ꓡꓳ ꓗꓪ ꓡꓳꓸ ꓠꓬꓲ ꓠꓬ꓾ ꓬꓰ-ꓢꓴ ꓬꓲ ꓕꓲ ꓣꓳˍ ꓡꓰ ꓟꓽ ꓥ ꓠꓬ ꓠꓱꓸ ꓐꓯꓼ ꓕꓲ ꓣꓳ ꓔꓯˍ ꓟꓲ ꓟ ꓟꓳꓻ꓿ 9 ꓪꓽ ꓚꓲ ꓗꓪ ꓐꓰ ꓬꓲ ꓪꓽ ꓬꓯꓼ ꓡ ꓔꓬ ꓕꓯ ꓬꓰ-ꓢꓴ ꓡꓰ꓾ ꓡ-ꓞꓳ-ꓮ-ꓐꓲ ꓫꓵꓻ ꓗꓪ ꓐꓰ ꓟꓽ ꓢꓯꓸ ꓬꓲꓼ ꓡ ꓕ ꓑꓳꓸ꓾ ꓠꓴ ꓪꓽ ꓟꓳꓻ ꓗꓷ ꓟ ꓮꓽ ꓟ ꓔꓯˍ ꓟꓲ ꓕꓽ ꓐꓯ ꓖꓶ꓾ ꓐꓰ ꓕꓵꓼ ꓪ ꓖꓶˍ ꓡꓳ꓿ 10 ꓫꓵꓻ ꓗꓪ ꓐꓰ ꓟꓽ ꓢꓯꓸ ꓬꓲꓼ ꓡ ꓕ ꓑꓳꓸ꓾ ꓐꓯˍ ꓟ ꓐꓯ ꓘꓶꓽ ꓕꓱ ꓟ ꓬꓲ ꓪꓽ ꓠꓲꓹ ꓟ ꓗꓪ ꓚꓲꓸ ꓔ ꓢꓲ꓾ ꓖꓳ ꓟ ꓮꓸ ꓫꓵ ꓔꓯ ꓐꓯˍ ꓟ ꓬꓲ ꓪꓽ ꓛꓳꓽ ꓬꓲ ꓪꓽ ꓠ ꓠꓬꓲ ꓡꓯꓽ ꓘꓳˍ ꓡꓳ꓿

Add new comment

9 + 7 =