ꓪꓽ ꓘꓴ ꓠꓯꓹ ꓟ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓓꓰꓽ꓾ ꓖꓳ ꓡꓱ ꓠꓬ ꓠꓴ ꓪ ꓔꓯ ꓖꓶ ꓡˍ ꓥꓳ= ꓧꓪ꓾ ꓖꓳ ꓡꓱ ꓠꓬ ꓠꓴ ꓪ ꓧꓪ ꓟꓶˍ ꓥꓳ= ꓗ ꓘꓶꓽ ꓲ'꓾ ꓖꓳ ꓡꓱ ꓠꓬ ꓠꓴ ꓪ ꓔꓯ ꓒꓴ ꓖꓶ ꓡˍ ꓥꓳ꓾ ꓐꓰ ꓠꓬꓲ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ= ꓪꓴ-ꓢ ꓠꓬ ꓣꓳ ꓔꓯ ꓣꓳ ꓓꓰꓽˍ ꓕ ꓑꓳꓸꓼ ꓠꓬ ꓬꓲ ꓖꓶˍ ꓡꓳ ꓐꓯ ꓟ ꓮ ꓡꓰ ꓢꓷꓸ ꓓˍ ꓡ= ꓝꓮꓲ ꓢꓲꓺ ꓒ ꓬꓰ-ꓢꓴ ꓡꓰ ꓕꓱ ꓡꓰ ꓐꓯ ꓢꓰꓽ ꓡꓳ= ꓠꓴ ꓪ ꓗꓳ ꓡꓳ ꓗꓪ ꓟ ꓐꓹ ꓐ ꓕꓲ ꓣꓳ ꓠꓬ ꓬꓲ ꓤ ꓠꓱ ꓑ ꓑ ꓔꓯ ꓓꓰꓽˍ ꓠꓬ꓾ ꓭ ꓛꓲ ꓖꓶ ꓢꓴ ꓙꓳˍ ꓡ= ꓥꓪꓸ ꓓꓰꓽˍ ꓠꓬ ꓩꓴꓻ ꓔꓯ ꓮ ꓟ ꓖꓶˍ ꓥꓳ ꓪ= ꓟꓲ ꓠꓯ ꓗꓪ ꓟ ꓐꓹ ꓐ ꓡꓰ ꓬꓲ ꓤ ꓠꓱ ꓔꓯ ꓕꓱ ꓘꓶ ꓛꓲ ꓙꓲˍꓠꓬ ꓟꓴꓽ ꓗꓪ ꓗꓪ ꓔꓬ ꓟ ꓐꓹ ꓐ ꓪꓴ-ꓢ ꓠꓬ ꓣꓳ ꓐꓱ ꓶ ꓮ ꓫꓵꓽ ꓓꓰꓽˍ ꓥ ꓟꓲ ꓟꓽ ꓖꓶ ꓖꓶ ꓮ ꓡꓲ ꓐꓰ ꓬꓰ ꓓˍ ꓡ꓾ ꓐꓰ ꓐꓯ ꓟ ꓢꓲꓽ ꓫꓬ ꓕꓳꓽ ꓶ ꓥ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓐꓹ ꓐ ꓪꓴ-ꓢ ꓠꓬ ꓠꓵꓻ ꓠꓲꓹ ꓢꓲꓺ ꓒ ꓥ ꓡꓳ= ꓣꓳ ꓓꓰꓽˍ ꓕ ꓑꓳꓸꓼ ꓠꓬ ꓬꓲ ꓖꓶ ꓡˍ ꓟ ꓥ ꓡꓳ= ꓧꓪꓸ ꓕ ꓑꓳꓸꓼ ꓠꓬ ꓬꓲ ꓟꓳꓸ ꓖꓶ ꓡˍ ꓟ ꓥ ꓡꓳ= ꓗ ꓘꓶꓽ ꓲ'ˍ ꓠꓬ ꓬꓲ ꓒꓴ ꓖꓶ ꓡ ꓠꓹ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓬꓰ ꓠꓹ ꓟ ꓠꓬ ꓟꓽ ꓠꓽ ꓠꓽ ꓓꓰꓽ ꓠꓹ ꓟ ꓥ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓣꓳ ꓤꓶꓻ ꓠꓯꓸꓼ ꓗꓪ ꓕꓱ ꓡꓰ ꓔꓳꓹ ꓜꓳꓽ ꓪˍ ꓡꓳ= ꓕꓱ ꓟ ꓠꓬ ꓐꓹ ꓐ ꓪꓴ-ꓢ ꓠꓬ ꓣꓳ ꓔꓯ ꓓꓰꓽˍ ꓠꓬ ꓖꓶ ꓡˍ ꓥꓳ꓾ ꓐꓯ ꓔ ꓥˍ ꓟꓲ ꓕꓲ ꓖ ꓕꓲ ꓧꓪꓹ ꓣꓳ ꓓꓰꓽˍ ꓕꓯ ꓟꓽ ꓟꓶ ꓟ ꓙꓳ ꓗꓴˍ ꓡꓳ= ꓕꓱ ꓟ ꓠꓬ ꓮ ꓫꓵꓽ ꓪꓴꓸ ꓠꓬꓲ ꓥ ꓡ= ꓥ ꓠꓬ ꓣꓳ ꓙꓵꓻ ꓠꓲꓹ ꓟꓽ ꓑꓰ ꓟ ꓪꓴꓸ ꓠꓬꓲ ꓥ ꓡ꓾ ꓐꓰ ꓓꓵꓽ ꓙ ꓠꓬꓲ ꓗꓴˍ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓠꓯꓸꓼ ꓗꓪ ꓕꓲ ꓖ ꓕꓲ ꓧꓪꓹ ꓣꓳ ꓓꓰꓽˍ ꓟ ꓔꓯ ꓪꓴ-ꓢ ꓡꓰ ꓟꓽ ꓖꓶ ꓟ ꓪꓴꓸ ꓠꓬꓲ ꓠꓴ ꓪ ꓠꓲꓹ ꓟ ꓕꓽ ꓙꓽ ꓫ= ꓣꓳ ꓓꓰꓽˍ ꓟ ꓔꓯ ꓪꓴ-ꓢ ꓟꓽ ꓖꓶ ꓡ ꓟ ꓐꓱ ꓶ ꓪꓴ-ꓢ ꓔꓯ ꓫ ꓟꓳ ꓠ ꓗˍ ꓡꓳ= ꓕꓲ ꓖ ꓕꓲ ꓧꓪꓹ ꓣꓳ ꓓꓰꓽ ꓔꓬ ꓟ ꓠꓬ ꓣꓳ ꓐꓱ ꓶ ꓟꓽ ꓙꓲꓻ ꓟ ꓪꓴꓸ ꓠꓬꓲ ꓪꓴ-ꓢ ꓡꓰ ꓣꓳ ꓔꓯ ꓟꓽ ꓖꓶ ꓡ ꓟ ꓥ ꓡꓳ=