ꓪꓽ ꓤ ꓧꓪ_ ꓟ ꓔꓯ ꓥꓳꓽ

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓦ ꓢꓯꓼ ꓪ ꓣꓴ ꓓꓴ ꓠꓬ꓾ ꓟ-ꓕꓲ 20ꓽ1-16 ꓥ ꓡꓳ꓾ ꓟꓸ ꓟꓲꓽ ꓖꓳ ꓗꓪ ꓠꓬ ꓟꓴ ꓗꓪ ꓗꓴꓷꓼ ꓠꓬ ꓮ ꓡꓰ ꓐꓰ ꓗꓹ ꓟ ꓔꓯ ꓔꓯ ꓥꓳꓽ ꓗꓪ ꓐꓰ ꓐꓯ ꓟꓳꓸ ꓖꓶ_ꓡꓳ=

ꓢꓲ ꓒ ꓬꓰ-ꓢꓴ ꓠꓬ ꓟꓴ ꓗꓪ ꓗꓴꓷꓼ ꓐꓯ_ ꓟ ꓠꓬ ꓡ ꓞꓳ ꓕꓲ ꓣꓳ ꓬꓲꓸ ꓐꓱ ꓗꓪ ꓟꓬꓱꓽ ꓬꓰ ꓠꓹ ꓟ ꓐꓱ ꓶ ꓥꓪꓸ ꓙꓰ ꓟ ꓡ ꓞꓳ ꓕꓲ ꓣꓳ ꓐꓰ ꓫꓱꓹ ꓡꓳ ꓐꓰ ꓐꓯ ꓖꓶ ꓡ_ ꓡꓳ= ꓕꓲ ꓣꓳ ꓟ ꓔꓯ ꓠꓬ ꓠꓯꓼ ꓠꓯꓼ ꓕꓲ ꓙꓵꓹ ꓗꓪ ꓐꓰ ꓟꓳ ꓢꓲ ꓠꓬꓲ ꓬꓲ ꓔꓯ ꓬꓲ ꓐꓱ ꓗꓪ ꓟꓬꓱꓽ ꓬꓰ ꓠꓹꓟ ꓝꓲ ꓩꓴ ꓖꓶ_ ꓡꓳ= ꓝꓮꓲ ꓕꓱ ꓟ ꓡꓰ ꓐꓰ ꓟꓳꓼ ꓡꓳ ꓕꓯ ꓬꓲ ꓙꓰ ꓕꓯ ꓡ ꓞꓳ ꓕꓲ ꓣꓳ ꓟꓬꓱꓽ ꓟꓽ ꓬꓰ ꓬꓰ ꓦꓵ ꓠꓬꓹ ꓔꓬ ꓟ ꓔꓯ ꓡꓳꓸ ꓟꓳ_ ꓡꓳ= ꓬꓲꓸ ꓠꓬ ꓖꓳ ꓟ ꓔꓯ ꓥ ꓟꓲ ꓬꓲ ꓐꓱ ꓗꓪ ꓙꓰ ꓟꓬꓱꓽ ꓬꓰ ꓠꓹ ꓟ ꓝꓲ ꓩꓴ ꓗꓷ_ ꓡꓳ= ꓕꓱ ꓟ ꓡꓰ ꓐꓰ ꓟꓶꓽ ꓘꓶꓽ ꓙꓵꓹ ꓛꓲ ꓡ ꓕꓯ ꓡ ꓞꓳ ꓕꓲ ꓣꓳ ꓟꓬꓱꓽ ꓟꓽ ꓬꓰ ꓔꓬ ꓟ ꓔꓯ ꓟꓳ ꓕꓯ ꓬꓲ ꓠꓬ ꓖꓳ ꓕꓲ ꓣꓳ ꓔꓯ ꓥ ꓟꓲ ꓬꓲ ꓐꓱ ꓗꓪ ꓟꓬꓱꓽ ꓬꓰ ꓠꓹ ꓟ ꓝꓲ ꓩꓴ ꓗꓷ_ ꓡꓳ= ꓖꓳ ꓡꓱ ꓠꓬꓲ ꓟꓶꓽ ꓘꓶꓼ ꓛꓲ ꓡ ꓢꓲ ꓒꓴ ꓖꓶ_ ꓕꓯ ꓕꓲ ꓐꓱ ꓟ ꓠꓬ ꓠꓯꓼ ꓠꓯꓼ ꓗꓪ ꓐꓰ ꓟꓬꓱꓽ ꓬꓰ ꓔꓬ ꓟ ꓕꓲ ꓣꓳ ꓟ ꓠꓬ ꓬꓲ ꓠꓬ ꓒꓴ ꓪ ꓙꓲ ꓪ_ ꓥꓳ ꓐꓰ ꓓꓵꓽ ꓙ_ ꓡꓳ= ꓖꓳ ꓡꓱ ꓥ ꓟꓲ ꓮ ꓙꓵ ꓢꓴ ꓔꓯ ꓓꓲ-ꓠ-ꓣꓲ ꓕꓲ ꓒꓯꓼ ꓡꓰ ꓖꓶ_ ꓡꓳ= ꓖꓳ ꓕꓯ ꓠꓯꓼ ꓠꓯꓼ ꓗꓪ ꓐꓰ ꓟꓬꓱꓽ ꓬꓰ ꓢꓴ ꓠꓬ ꓱ’ꓽ ꓠꓱꓽ_ ꓡꓳ= ꓕꓱ ꓟꓬ ꓠꓬ ꓟꓽ ꓙꓲ ꓐꓰ ꓟꓬꓱꓽ ꓢꓲ ꓒꓽ ꓔꓯ ꓐꓯ ꓖꓶ_ ꓡꓳ꓾ ꓖꓳ ꓡꓱ ꓥ ꓟꓲ ꓟꓬꓱꓽ ꓢꓲ ꓒꓽ ꓠꓬ ꓠꓯꓼ ꓠꓯꓼ ꓗꓪ ꓐꓰ ꓟꓬꓱꓽ ꓬꓰ ꓢꓴ ꓥ ꓟꓲ ꓟꓳꓼ ꓡꓳ ꓗꓪ ꓐꓰ ꓟꓬꓱꓽ ꓬꓰ ꓢꓴ ꓥ ꓟꓲ ꓟꓶꓽ ꓘꓶꓼ ꓗꓪ ꓐꓰ ꓟꓬꓱꓽ ꓬꓰ ꓢꓴ ꓥ ꓟꓲ ꓒꓴ ꓓꓲ-ꓠ-ꓣꓲ ꓕꓲ ꓒꓯꓼ ꓖꓶ_ ꓥꓳ ꓐꓰ ꓐꓯ ꓞꓷꓹ ꓔ ꓟ ꓑꓶ ꓓꓴ ꓮ ꓫꓵ ꓑꓶ ꓓꓴ ꓥꓪ ꓟꓽ ꓙꓲ ꓓ ꓫꓵ ꓟꓽ ꓬꓰ ꓐꓰ ꓐꓯ ꓖꓶ_ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ꓟꓸ ꓟꓲꓽ ꓕꓱ ꓟ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ_ ꓟ ꓠꓬ꓾ ꓠꓴ ꓪꓴ-ꓢ ꓐꓱ ꓶ ꓮ ꓟꓬ ꓢꓯꓼ ꓕꓵꓼ꓾ ꓝꓮꓲ ꓕꓲ ꓤꓶꓻ ꓡꓱꓼ ꓪꓴ-ꓢ ꓐꓱ ꓶ ꓖꓶ ꓔ ꓢꓴ ꓥ ꓟꓲ ꓟꓸ ꓒꓽ ꓥ ꓟꓲ꓾ ꓔꓲꓺ ꓒ ꓥ ꓟꓲ꓾ ꓮ ꓡꓰ ꓫꓵ ꓥ ꓟꓲ ꓣꓳ ꓠꓬ ꓒꓴ ꓶ ꓕꓲ ꓟ ꓐꓱ ꓶ ꓡꓰ ꓟꓬꓱꓽ ꓬꓰ ꓔꓬ ꓡꓳ ꓐꓯ_ ꓟ ꓐꓯ ꓟꓳꓸ ꓖꓶ ꓔꓬ ꓬꓰ_ ꓡꓳ= ꓠꓴ ꓠꓬ ꓪꓴ-ꓢ ꓐꓱ ꓶ ꓮ ꓟꓬ ꓛꓲ ꓟꓬꓱꓽ ꓬꓰ ꓢꓯꓼ ꓕꓵꓼ ꓢꓴ ꓥ ꓟꓲ ꓝꓮꓲ ꓪꓴ-ꓢ ꓐꓱ ꓶ ꓟꓬꓱꓽ ꓟꓲ ꓢꓯꓼ ꓕꓵꓼ꓾ ꓚꓲꓸ ꓛꓬ ꓪꓴ-ꓢ ꓟꓬꓱꓽ ꓟꓲ ꓢꓯꓼ ꓕꓵꓼ ꓕꓱ ꓡꓱ ꓐꓰ ꓬꓰ ꓔꓬ ꓢꓴ ꓥ ꓟꓲ ꓮ ꓡꓰ ꓫꓵ ꓡ ꓞꓳ ꓥ ꓟꓲ ꓣꓳ ꓠꓬ ꓪꓴ-ꓢ ꓟꓲ ꓙꓬ ꓗꓪ ꓡꓯꓼ ꓙꓱ ꓔ ꓟ ꓠꓲꓹ ꓧꓳꓹ ꓔ ꓟ ꓕꓲ ꓫꓵ ꓙꓳ_ ꓡꓳ= ꓕꓱ ꓟ ꓠꓬ ꓟꓴ ꓗꓪ ꓗꓴꓷꓼ ꓥ ꓡꓳ= ꓔꓯ ꓥꓳꓽ ꓡ ꓞꓳ ꓕꓲ ꓣꓳ ꓟ ꓪꓴ-ꓢ ꓔꓯ ꓟꓽ ꓙꓵꓻ ꓬꓲ ꓕꓲ ꓤꓶꓻ ꓡꓱꓼ ꓗꓪ ꓬꓲꓼ ꓓꓳ ꓠꓬꓲ ꓜ ꓠꓬꓲ ꓣꓱꓽ ꓠꓬꓲ ꓕꓱ ꓡꓰ ꓐꓰ ꓗꓳꓸ ꓙꓰ ꓓꓶꓽ ꓡꓯ ꓘꓳ ꓠꓬꓲ ꓢꓰꓼ ꓡꓯ ꓘꓳ ꓠꓬꓲ ꓕꓱ ꓡꓱ ꓐꓰ ꓗꓳꓸ ꓡꓱ ꓙꓰ ꓫꓵ ꓕꓲ ꓣꓳ ꓕꓱ ꓡꓱ ꓐꓰ ꓛꓳ ꓙꓰ ꓔꓬ ꓫꓵ ꓕꓲ ꓣꓳ ꓬꓲ ꓫꓵꓻ ꓠꓹ ꓟ ꓬꓲ ꓙꓵꓹ ꓛꓲ ꓡ ꓕꓯ ꓪꓴ-ꓢ ꓔꓯ ꓙꓵꓻ ꓡ ꓢꓲ ꓠꓬꓲ ꓖꓳ ꓓꓱꓽ ꓔꓲꓹ ꓗꓷꓳ ꓐꓯ ꓠꓬ ꓬꓲ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰ_ ꓡꓳ= ꓮ ꓫꓵ ꓑꓶ ꓓꓴ ꓥ ꓡ? ꓬꓲ ꓮ ꓡꓰ ꓐꓰ ꓪꓴꓸ ꓔꓴ ꓡ ꓟ ꓠꓬ ꓟꓽ ꓣꓳꓸ ꓚꓵ꓾ ꓬꓲ ꓮ ꓡꓰ ꓐꓰ ꓫꓱꓹ ꓟ ꓡꓰ ꓣꓳꓸ ꓚꓵ_ ꓡꓳ= ꓕꓱ ꓟ ꓡꓰ ꓐꓰ ꓣꓳ ꓦꓵꓻ ꓡ ꓕꓲ ꓠꓬꓲ ꓡꓰ ꓐꓰ ꓪꓴ-ꓢ ꓦ ꓡꓱ ꓢꓴ ꓥ ꓢꓲ ꓠꓬꓲ ꓪꓴ-ꓢ ꓐꓯ ꓘꓶꓽ ꓔꓯ ꓛꓳ ꓢꓴ ꓥ ꓟꓲ ꓟꓴ ꓗꓪ ꓗꓴꓷꓼ ꓐꓱ ꓶ ꓡꓰ ꓣꓳ ꓢꓯꓼ ꓕꓵꓼ ꓔꓬ ꓡꓳ=

ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓟꓽ ꓙꓲ ꓠꓯꓹ ꓟ ꓟꓽ ꓬꓰ꓾ ꓟꓽ ꓢꓲ ꓫꓬꓹ ꓟ ꓟꓽ ꓬꓰ꓾ ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓟ ꓠꓬ ꓣꓳ ꓮ ꓙꓵ ꓠꓬ ꓢꓲ ꓒꓽ ꓕꓲ ꓣꓳ ꓐꓱ ꓶ ꓡꓰ ꓟꓬꓱꓽ ꓬꓰ ꓔꓬ ꓡꓳ꓾ ꓝꓮꓲ ꓢꓲ ꓒꓽ ꓬꓲ ꓐꓱ ꓗꓪ ꓟꓬꓱꓽ ꓬꓰ ꓔꓬ ꓢꓲ ꓠꓬꓲ ꓣꓳ ꓡꓯꓼ ꓪ ꓣꓳ ꓟꓶ ꓠꓹ ꓟ ꓪꓽ ꓒꓵ ꓥ ꓟꓲ ꓕꓲ ꓡꓰ_ ꓥꓳ= ꓖꓳ ꓡꓱ ꓠꓬꓲ ꓣꓳ ꓕꓲ ꓣꓳ ꓛꓳ ꓕꓲ ꓣꓳꓟꓬ ꓔꓳꓹ ꓡꓯ ꓘꓳ_ ꓟ ꓟꓽ ꓙꓳ ꓙꓳ ꓐꓰ ꓮ ꓙꓵ ꓟꓬꓱꓽ ꓬꓰ ꓢꓴ ꓡꓰ ꓥ ꓟ ꓑꓶ ꓓꓴ ꓙꓲ_ ꓟ ꓕꓲ ꓒꓳꓹ ꓗꓪ ꓢꓯꓼ ꓕꓵꓼ ꓙꓰ ꓥꓳ ꓐꓯ ꓠꓬ ꓪꓴ-ꓢ ꓶꓼ ꓤ ꓫꓱꓸ ꓤ ꓪ ꓙꓲ ꓖꓶ ꓡ ꓥꓳ꓾ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓟ ꓥꓳ=