ꓪ ꓒꓵꓽˍ ꓟ ꓔꓯ ꓘꓳꓹ ꓣꓴ ꓟꓶˍ ꓟ ꓔꓯ ꓥꓳ

ꓘꓴ ꓜꓲ ꓞꓳ ꓟꓶꓽ ꓘꓳ 33 ꓫꓵꓽ ꓠꓽ

ꓪ ꓒꓵꓽˍ ꓟ ꓔꓯ ꓘꓳꓹ ꓣꓴ ꓟꓶˍ ꓟ ꓔꓯ ꓥꓳ

ꓥꓳꓽ ꓙꓱꓸꓹ ꓕꓳꓽ ꓶ 31: 10-13ꓹ 19-20ꓹ 30-31

ꓙꓲ_ ꓟ ꓐꓰ ꓔꓱꓹ_ ꓟ ꓤ ꓟꓶ ꓮ ꓟ ꓧꓪ ꓟꓶ ꓐ ꓡ_ ꓡꓳꓺꓽ꓿ ꓬꓲ ꓠꓬ ꓒꓵꓽ ꓡꓳ ꓢꓶꓸ ꓟꓽ ꓞꓲ ꓒꓵꓽ_ ꓡꓳ꓿ ꓬꓲ ꓤ ꓖꓴ ꓠꓲꓹ ꓟ ꓠꓬ ꓬꓲ ꓔꓯ ꓦ ꓡꓱ ꓐꓳ_ ꓡꓳ꓿ ꓬꓲ ꓤ ꓖꓴ ꓐꓶꓹ ꓟꓶ_ ꓟ_ ꓟꓲ ꓟꓽ ꓛ ꓡꓰ꓿ ꓬꓲ ꓠꓬ ꓬꓲ ꓕꓲ ꓤꓶ ꓡꓱꓸꓼ ꓗꓪ ꓬꓲ ꓤ ꓖꓴ ꓔꓯ ꓙꓲ_ ꓟ ꓬꓰ ꓖꓶ ꓢꓲ꓾ ꓥꓶ_ ꓟ ꓕꓲ ꓫꓵ_ ꓟꓲ ꓟꓽ ꓬꓰ ꓖꓶ꓿ ꓮ ꓣꓳ ꓟꓵ_ ꓐꓰ ꓪꓰ ꓜꓲꓽ ꓧꓪ ꓢꓲ꓾ ꓠꓲꓹ ꓒꓴ ꓒꓴ_ ꓐꓰ ꓟꓬꓱꓽ ꓬꓰ_ ꓡꓳ꓿ ꓬꓲ ꓡꓯ ꓒꓯ ꓗꓪ ꓠꓬ ꓗꓶꓺ ꓡꓶꓺ ꓔꓯꓹ ꓔ_ ꓡꓳ꓿ ꓛꓲ ꓤ ꓪꓳ ꓓꓴ ꓛꓬꓼ ꓡꓯ_ ꓟꓲ ꓪꓳ_ ꓡꓳ꓿ ꓬꓲ ꓠꓬ ꓞꓳ ꓫ ꓔꓯ ꓟꓽ ꓞꓲꓽ꓿ ꓣꓱ ꓟꓽ ꓡꓳꓼ ꓢꓴ ꓔꓯ ꓟꓳꓸ ꓡꓯ ꓒꓯ ꓒꓬꓱꓺ ꓔ_ ꓡꓳ꓿ ꓖꓪ ꓜꓳ_ ꓟ ꓠꓬ ꓗꓶꓸ_ ꓟ ꓥ ꓡꓳ꓿ ꓒꓬꓱꓽ ꓐꓲ_ ꓟ_ ꓟꓲ ꓬꓲ ꓖꓳꓽ ꓥ ꓡꓳ꓿ ꓖꓳ ꓡꓱ ꓥ_ ꓟꓲ ꓬꓰ-ꓧꓳ-ꓧꓪ ꓔꓯ ꓙꓳ ꓒꓵꓽ_ ꓟ ꓤ ꓟꓶ ꓤ ꓠꓽ ꓫꓱ ꓖꓶ_ ꓟ ꓟꓶ_ ꓥꓳ꓿ ꓬꓲ ꓡꓯꓼ ꓟꓬꓱꓽ ꓔꓯ ꓣꓷꓠꓸ ꓢꓲ꓾ ꓡꓳ ꓒꓱ ꓗ ꓘꓶ ꓗꓪ ꓬꓲ ꓚꓲ ꓛꓬ ꓟꓬꓱꓽ ꓡꓰ ꓬꓲ ꓔꓯ ꓓꓳꓹ ꓟꓴ ꓝꓲ꓿

1ꓕꓯ-ꓢ-ꓡꓳ-ꓠꓲ-ꓬ 5ꓽ 1-6

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓦꓬꓼ ꓠꓬꓲˍ ꓐꓰ ꓬꓲ ꓝꓲꓸ ꓔꓯ ꓐꓯˍ ꓠꓬ꓾ ꓠꓴ ꓪꓽ ꓔꓯ ꓮꓸ ꓫꓵꓽ ꓐꓳ ꓖꓶ ꓟꓽ ꓛꓵꓳ꓿ꓮ ꓡꓲꓳ ꓐꓯ ꓠꓬ ꓢꓲ ꓒꓽ ꓦꓬꓼ ꓠꓬꓲ ꓛꓲ ꓡ ꓟ ꓠꓬ꓾ ꓢ ꓘꓪ ꓞꓳ ꓘꓴꓽˍ ꓡꓰ ꓐꓰ ꓡꓻ ꓟ ꓠꓴ ꓪꓽ ꓢꓷꓸˍ ꓡꓳ꓿ꓞꓳ ꓤ ꓡꓰ꓾ ꓢꓲ ꓡꓲ ꓡꓲ ꓮꓸ ꓫꓵꓽ ꓟꓽ ꓘꓳ ꓟꓽ ꓟꓳ ꓥꓳ꓾ ꓐꓯ ꓔꓬ ꓕꓯ꓾ ꓤꓽ ꓠꓱ ꓶꓻ ꓞꓹ ꓟ ꓤꓽ ꓟꓶ ꓤ ꓬꓲ ꓤꓽ ꓠꓱ ꓦꓵ ꓠꓻ ꓛꓲ ꓡ ꓟ ꓡꓰ ꓐꓰ꓾ ꓬꓲ ꓪꓽ ꓛꓴꓻ ꓛꓰꓹ ꓡꓰ ꓓꓴ ꓞꓼ ꓐꓰ ꓛꓲ ꓡ ꓥꓳ꓿ ꓖꓳ ꓕꓯ ꓬꓲ ꓪꓽ ꓠꓬ ꓮ ꓡꓲ ꓗꓹˍ ꓟꓲ ꓛꓰꓹ ꓡꓲꓹ ꓗꓷ ꓟꓽ ꓓ꓿ꓖꓳ ꓡꓱ ꓥ ꓟꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓦꓬꓼ ꓠꓬꓲ ꓖꓳ ꓟ ꓠꓬ ꓞꓳ ꓘꓴꓽˍ ꓡꓰ ꓐꓰ ꓠꓴ ꓪꓽ ꓔꓯ ꓞꓼ ꓐꓰ ꓖꓼ ꓟꓶ ꓡ ꓠꓹ ꓟ꓾ ꓠꓴ ꓪꓽ ꓠꓬ ꓠꓯ ꓞꓲꓹ ꓟ ꓗꓪ ꓔꓬ ꓟ ꓟꓽ ꓥ꓿ꓠꓴ ꓪꓽ ꓮꓽ ꓙꓵ ꓠꓽ꓾ ꓠꓬꓲꓺ ꓟꓳꓻ ꓓꓴ ꓗꓪ ꓟˍ ꓐꓰ꓾ ꓟꓳꓼ ꓡꓳ ꓗꓪ ꓟ ꓤꓽ ꓐꓴ ꓥ ꓡꓳ꓿ ꓣꓳꓽ ꓠꓬ ꓢ ꓘꓪ ꓗꓪ ꓟ ꓟꓽ ꓥ꓾ ꓠꓯ ꓞꓲꓹ ꓟ ꓗꓪ ꓔꓬ ꓟˍ ꓟꓲ ꓟꓽ ꓥ꓿ꓖꓳ ꓡꓱ ꓠꓬꓲ ꓣꓳꓽ ꓠꓬ ꓠꓱꓸ ꓐꓯ ꓢꓴˍ ꓡꓰ ꓐꓰ ꓟꓽ ꓬꓲꓼ ꓟꓶ ꓟꓶ꓾ ꓧꓪꓸ ꓛꓲ ꓐꓰ ꓔꓬ ꓢꓲ ꓞꓳ ꓢꓲꓽ ꓬꓰ ꓡꓯ꓿

ꓟ-ꓕꓲ 25ꓽ 14- 30

ꓝꓮꓲ ꓟꓴꓽ ꓗꓪ ꓗꓴꓷꓼ ꓠꓬ꓾ ꓡ ꓞꓳ ꓕꓲ ꓣꓳ ꓬꓲ ꓚꓲꓸ ꓛꓬ ꓚꓳ ꓑꓸ ꓐꓴ ꓔꓯ ꓘꓴꓻ ꓔꓯꓹ ꓡ ꓢꓲ꓾ ꓬꓲ ꓖꓴꓽ ꓙꓴꓽ ꓠꓬ ꓬꓲ ꓪꓽ ꓔꓯ ꓡꓯꓼ ꓙꓱ ꓖꓶ ꓢꓲ ꓠꓬꓲ꓾ ꓠꓱꓸ ꓐꓯ ꓕꓲ ꓟꓵꓽ ꓗꓪ ꓙꓰ ꓢꓴˍ ꓡꓰ ꓐꓰ ꓗꓹ ꓡꓳ꓿ꓬꓲ ꓠꓬ ꓬꓲ ꓪꓽ ꓕꓲ ꓣꓳ ꓡꓰ ꓕꓲ ꓣꓳ ꓬꓰ ꓐ ꓡ ꓟ ꓔꓯ ꓛꓳ ꓢꓲ꓾ ꓕꓲ ꓣꓳ ꓔꓯ ꓒꓴ ꓥꓪꓽ ꓕ-ꓡꓰ-ꓔꓷ꓾ ꓕꓲ ꓣꓳ ꓔꓯ ꓠꓬꓲꓽ ꓕ-ꓡꓰ-ꓔꓷ꓾ ꓕꓲ ꓣꓳ ꓔꓯ ꓕꓲꓽ ꓕ-ꓡꓰ-ꓔꓷ ꓖꓶ ꓢꓲ ꓓꓴꓻ ꓓꓳ ꓙꓰˍ ꓡꓳ꓿ꓥꓪꓽ ꓕ-ꓡꓰ-ꓔꓷ ꓟꓶ ꓢꓴ ꓖꓳ ꓕꓲ ꓣꓳ ꓠꓬ꓾ ꓞꓼ ꓐꓰ ꓶ ꓡꓯꓼ ꓟꓴ ꓙꓰ ꓢꓲ꓾ ꓬꓲ ꓐꓶꓹ ꓥꓪꓽ ꓕ-ꓡꓰ-ꓔꓷ ꓒꓳꓹ ꓟꓶˍ ꓡꓳ꓿ꓠꓬꓲꓽ ꓕ-ꓡꓰ-ꓔꓷ ꓟꓶ ꓢꓴˍ ꓟꓲ ꓖꓳ ꓟ ꓡꓰ ꓐꓰ꓾ ꓬꓲ ꓐꓶꓹ ꓠꓬꓲꓽ ꓕ-ꓡꓰ-ꓔꓷ ꓒꓳꓹ ꓟꓶˍ ꓡꓳ꓿ꓖꓳ ꓡꓱ ꓥ ꓟꓲ ꓕꓲꓽ ꓕ-ꓡꓰ-ꓔꓷˍ ꓡꓰꓽ ꓟꓶ ꓢꓴ ꓖꓳ ꓕꓲ ꓣꓳ ꓠꓽ ꓙꓰ ꓢꓲ꓾ ꓟꓲ ꓘꓴꓻ ꓚꓴꓸ ꓢꓲ ꓬꓲ ꓢꓲ ꓒꓽ ꓒꓴ ꓔꓯ ꓔꓵꓸ ꓗꓷˍ ꓡꓳ꓿ꓟꓶ ꓤ ꓗ ꓠꓯꓸ ꓚꓳ ꓑꓸ ꓖꓳ ꓕꓲ ꓧꓳꓽ ꓟ ꓬꓲ ꓪꓽ ꓢꓲ ꓒꓽ ꓬꓲꓼ ꓡ ꓢꓲ꓾ ꓬꓲ ꓪꓽˍ ꓐꓰ ꓶꓻ ꓡꓯꓼ ꓢꓪꓸˍ ꓡꓳ꓿ꓥꓪꓽ ꓕ-ꓡꓰ-ꓔꓷ ꓟꓶ ꓢꓴ ꓖꓳ ꓕꓲ ꓣꓳ ꓠꓬ꓾ ꓬꓲ ꓔꓱꓹ ꓬꓲ ꓥꓪꓽ ꓕ-ꓡꓰ-ꓔꓷ ꓔꓯꓹ ꓡ ꓢꓲ꓾ ꓢꓲ ꓒꓽꓳ꓾ ꓠꓴ ꓠꓬ ꓥꓪ ꓔꓯ ꓒꓴꓻ ꓥꓪꓽ ꓕ-ꓡꓰ-ꓔꓷ ꓡꓯꓼ ꓙꓱ ꓖꓶ ꓔ ꓡꓳ꓿ ꓠꓬꓲ ꓠꓹ꓾ ꓥꓪ ꓠꓬ ꓬꓲ ꓐꓶꓹ ꓥꓪꓽ ꓕ-ꓡꓰ-ꓔꓷ ꓒꓳꓹ ꓟꓶ ꓡꓰꓳ꓾ ꓐꓯˍ ꓡꓳ꓿ꓖꓳ ꓡꓱ ꓠꓬ ꓬꓲ ꓢꓲ ꓒꓽ ꓡꓰ ꓬꓲ ꓔꓯ꓾ ꓠꓴ ꓬꓰ ꓜꓳꓽ ꓡꓰꓳ꓿ ꓙꓲꓻˍ ꓟ ꓐꓰ ꓦ ꓡꓱ ꓐꓳˍ ꓟ ꓚꓳ ꓑꓸ ꓠꓴ ꓠꓬ ꓕꓱ ꓡꓱ ꓫꓵꓽ ꓟꓬꓱꓽ ꓤ ꓗꓪ ꓦ ꓡꓱ ꓐꓳˍ ꓠꓬꓲ꓾ ꓥꓪ ꓠꓬ ꓠꓴ ꓔꓯ ꓮꓽ ꓟꓬꓹ ꓫꓵꓽ ꓔꓯ ꓙꓵꓽ ꓝꓲˍ ꓥꓳ꓿ ꓠꓴ ꓢꓲ ꓒꓽ ꓗꓹ ꓛꓲ ꓓꓴ ꓗꓪ ꓓꓵꓽ ꓡꓯ꓾ ꓐꓯ ꓖꓶˍ ꓡꓳ꓿ꓠꓬꓲꓽ ꓕ-ꓡꓰ-ꓔꓷ ꓟꓶ ꓢꓴˍ ꓟꓲ ꓡ ꓢꓲ꓾ ꓢꓲ ꓒꓽꓳ꓾ ꓠꓴ ꓠꓬ ꓥꓪ ꓔꓯ ꓠꓬꓲꓽ ꓕ-ꓡꓰ-ꓔꓷ ꓡꓯꓼ ꓙꓱ ꓖꓶ ꓔ ꓡꓳ꓿ ꓠꓬꓲ ꓠꓹ꓾ ꓥꓪ ꓠꓬ ꓬꓲ ꓐꓶꓹ ꓠꓬꓲꓽ ꓕ-ꓡꓰ-ꓔꓷ ꓒꓳꓹ ꓟꓶ ꓡꓰꓳ꓾ ꓐꓯˍ ꓡꓳ꓿ꓖꓳ ꓡꓱ ꓠꓬ ꓬꓲ ꓢꓲ ꓒꓽ ꓡꓰ ꓬꓲ ꓔꓯ꓾ ꓠꓴ ꓬꓰ ꓜꓳꓽ ꓡꓰꓳ꓿ ꓙꓲꓻˍ ꓟ ꓐꓰ ꓦ ꓡꓱ ꓐꓳˍ ꓟ ꓚꓳ ꓑꓸ ꓠꓴ ꓠꓬ ꓕꓱ ꓡꓱ ꓫꓵꓽ ꓟꓬꓱꓽ ꓤ ꓗꓪ ꓦ ꓡꓱ ꓐꓳˍ ꓠꓬꓲ꓾ ꓥꓪ ꓠꓬ ꓠꓴ ꓔꓯ ꓮꓽ ꓟꓬꓹ ꓫꓵꓽ ꓔꓯ ꓙꓵꓽ ꓝꓲˍ ꓥꓳ꓿ ꓠꓴ ꓢꓲ ꓒꓽ ꓗꓹ ꓛꓲꓽ ꓓꓴ ꓗꓪ ꓓꓵꓽ ꓡꓯ꓾ ꓐꓯ ꓖꓶˍ ꓡꓳ꓿ꓕꓲ ꓕ-ꓡꓰ-ꓔꓷ ꓟꓶ ꓢꓴˍ ꓟꓲ ꓡ ꓢꓲ꓾ ꓢꓲ ꓒꓽꓳ꓾ ꓠꓴ ꓠꓽ ꓞꓳ ꓦꓶꓻ ꓥ ꓢꓲ꓾ ꓟꓽ ꓫꓵꓸ ꓔ ꓟ ꓗꓪ ꓶꓼ ꓢꓲ ꓠꓬꓲ꓾ ꓟꓽ ꓓꓳꓽ ꓔ ꓟ ꓗꓪ ꓫꓺˍ ꓟ ꓥꓪ ꓢꓷˍ ꓡꓳ꓿ꓖꓳ ꓡꓱ ꓠꓬꓲ ꓥꓪ ꓠꓬ ꓠꓴ ꓔꓯ ꓙꓳꓺ ꓠꓬꓲ꓾ ꓠꓴ ꓒꓴ ꓕꓲ ꓕ-ꓡꓰ-ꓔꓷ ꓟ ꓠꓬ ꓟꓲ ꓠꓯ ꓗꓪ ꓔꓵꓸ ꓔ ꓡꓳ꓿ ꓕꓱꓻꓽ꓾ ꓠꓴ ꓔꓯ ꓟ ꓓꓹ ꓢꓰꓽ ꓡꓳ꓾ ꓐꓯˍ ꓡꓳ꓿ꓖꓳ ꓡꓱ ꓠꓬ ꓬꓲ ꓢꓲ ꓒꓽ ꓡꓰ ꓒꓳꓹ ꓖꓶ ꓢꓲ꓾ ꓥꓶˍ ꓟ ꓐꓰ ꓐꓴꓻˍ ꓟ ꓚꓳ ꓑꓸꓳ꓾ ꓥꓪ ꓠꓬ ꓟꓽ ꓫꓵꓸ ꓔ ꓟ ꓗꓪ ꓶꓼ ꓢꓲ꓾ ꓟꓽ ꓓꓳꓽ ꓔ ꓟ ꓗꓪ ꓫˍ ꓟ ꓠꓴ ꓢꓷˍ ꓠꓬ꓾ꓥꓪ ꓒꓴ ꓕꓱ ꓟ ꓒꓴ ꓞꓳꓽ ꓦꓲ ꓗꓪ ꓩꓴꓺ ꓔ ꓖꓶ ꓙꓲꓽ ꓙꓳˍ ꓡꓳ꓿ ꓖꓳ ꓡꓱ ꓬꓰ ꓔ ꓐꓷˍ ꓠꓬ ꓥꓪ ꓬꓲꓼ ꓡ ꓕꓯ꓾ ꓥꓪ ꓒꓴ ꓬꓲ ꓗꓪꓺꓫ ꓟꓲ ꓟꓶꓺˍ ꓡꓳ ꓫꓵ ꓥꓳ꓿ꓖꓳ ꓡꓱ ꓠꓬꓲ ꓒꓴ ꓖꓳ ꓕꓲ ꓕ-ꓡꓰ-ꓔꓷ ꓟ ꓬꓲ ꓔꓯˍ ꓐꓰ ꓣꓴꓻ ꓔꓯꓹ ꓬꓲꓼ ꓡ ꓢꓲ꓾ ꓞꓲꓻ ꓕ-ꓡꓰ-ꓔꓷ ꓙꓳ ꓢꓴ ꓖꓳ ꓕꓲ ꓣꓳ ꓔꓯ ꓖꓶ꓿ꓮ ꓡꓲꓳ ꓐꓯ ꓠꓬ ꓙꓳ ꓢꓴ ꓥ ꓕ ꓑꓳꓸ ꓔꓯ ꓠꓬ ꓡꓴꓽ ꓖꓶ ꓢꓲ ꓬꓲ ꓠꓽ ꓮꓽ ꓟꓬꓹ ꓙꓳˍ ꓥꓳ꓿ ꓟꓽ ꓙꓳ ꓢꓴ ꓔꓯ ꓠꓽ ꓬꓲ ꓙꓳ ꓞꓹ ꓟˍ ꓟꓲ ꓣꓴ ꓔꓯꓹ ꓙꓰˍ ꓥꓳ꓿ꓖꓳ ꓡꓱ ꓢꓲ ꓠꓴ ꓪꓽ ꓠꓬ ꓣꓱꓽ ꓟꓽ ꓬꓯꓼ ꓟ ꓚꓳ ꓑꓸ ꓕꓱ ꓕꓲ ꓣꓳ ꓔꓯ꓾ ꓠꓱ ꓫꓱꓸ ꓟꓸꓼ ꓠꓯ ꓞꓲꓹˍ ꓟ ꓗꓪ ꓡꓳ ꓩꓴ ꓗꓷ꓿ ꓖꓳ ꓗꓪ ꓥꓴꓻ ꓠꓬꓲ ꓢꓶꓽ ꓛꓲꓽ ꓠꓬꓲ ꓗꓷ ꓡꓰˍ ꓥꓳ꓾ ꓐꓯˍ ꓡꓳ꓿

Add new comment

20 + 0 =