ꓪ ꓔꓲ. ꓩꓴ‐ꓡꓲ ꓓꓵꓽ ꓙꓽ ꓟꓬꓽˍ ꓟ (ꓡꓴ‐ꓘ꓿9ꓽ7‐9)

ꓫꓴ ꓙꓵꓽ ꓒ ꓩꓴ-ꓡꓲ ꓠꓬ ꓬꓳ-ꓦ ꓪꓴꓸ ꓓꓵ ꓓꓶ ꓗꓷ ꓢꓴ ꓥ ꓡꓳ= ꓮ ꓟꓶ ꓕꓯ ꓬꓲ ꓠꓬ ꓠꓲꓹ ꓟ ꓓꓵꓽ ꓙꓽ ꓪꓴꓽ ꓧꓶ ꓠꓬꓲ ꓐꓰ ꓮ ꓘꓶꓸ ꓙꓳꓺ ꓔꓬꓳ= ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ ꓡꓴ-ꓘ 9ꓽ7-9 ꓗꓪ ꓬꓲ ꓠꓬ ꓢꓲ ꓒ ꓬꓰ-ꓢꓴ ꓬꓰ ꓗꓷ ꓟ ꓮ ꓙꓵꓽ ꓔꓯ ꓑ ꓙꓽ ꓡꓰ ꓕꓯ ꓮ ꓘꓶꓸ ꓓꓵꓽ ꓙ ꓟꓬꓽˍ ꓡꓳ꓾ ꓐꓰ ꓐꓯ ꓔ ꓡꓳ= ꓮ ꓫꓵꓽ ꓪꓴꓸ ꓠꓬꓲ ꓥ ꓡ?

ꓬꓲ ꓠꓬ ꓝꓴꓲꓸ ꓙꓳ ꓢꓴ ꓥ ꓢꓲ꓾ ꓕꓱ ꓟ ꓠꓬ ꓬꓲ ꓔꓯ ꓮ ꓘꓶꓸ ꓠꓲꓹ ꓟ ꓫꓸ ꓡꓰ ꓝꓲˍ ꓡꓳ= ꓬꓲ ꓠꓬ ꓝꓴꓲꓸ ꓟꓽ ꓙꓳ ꓟ ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓔꓯ ꓢꓰꓼ ꓗꓷ ꓟ ꓑꓶꓸ ꓓꓴ ꓝꓴꓲꓸ ꓙꓳ ꓢꓴ ꓥ ꓡꓳ=

ꓩꓴ-ꓡꓲ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓟꓳꓻ ꓠꓲꓹ ꓫꓵˍ ꓡꓳ= ꓢꓲ ꓒ ꓬꓰ-ꓢꓴ ꓔꓯ ꓪ ꓜꓲ ꓢꓷꓸ ꓠꓲꓹ ꓫꓵˍ ꓡꓳ= ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓡꓳ ꓒꓱ ꓕꓲ ꓟ ꓗꓪ ꓐꓰ ꓕꓲ ꓟ ꓗꓪ ꓙꓰ ꓢꓲ ꓶꓼ ꓓꓳꓽ ꓫꓱꓹ ꓓꓳꓽ ꓚ ꓔꓬ ꓡꓳ= ꓩꓴ-ꓡꓲ ꓠꓬ ꓙꓵꓽ ꓪ ꓙꓳ ꓢꓴ ꓥ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓟꓳꓻ ꓠꓲꓹ ꓫꓵˍ ꓠꓬ ꓖꓳ ꓕꓯ ꓞꓼ ꓐꓰ ꓙꓰ ꓐ ꓡˍ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓔꓯ ꓟꓳꓻ ꓙꓰ ꓠꓹ ꓟ ꓬꓲ ꓔꓯ ꓮ ꓫꓵꓽ ꓗꓽ ꓔ ꓓꓴ ꓙꓳˍ ꓥ ꓟꓽ ꓢꓷꓸ= ꓢꓲ ꓒ ꓬꓰ-ꓢꓴ ꓔꓯ ꓟꓳꓻ ꓬꓰ ꓠꓹ ꓟ ꓬꓲ ꓚꓱꓹ ꓮ ꓟꓬꓹ ꓙꓳˍ ꓥ ꓟꓲ꓾ ꓖꓳ ꓡꓱ ꓬꓰ ꓠꓹ ꓟ ꓩꓴ-ꓡꓲ ꓠꓬ ꓮ ꓔꓲꓸ ꓤ ꓟꓲ ꓟꓽ ꓢꓯꓼ ꓕꓵꓼ ꓗꓷ ꓟ ꓔꓯ ꓢꓲꓽ ꓫꓬ ꓕꓳꓽ ꓶ ꓗꓪ ꓟꓳꓻ ꓪ ꓓꓹ ꓡꓳ= ꓚꓵ ꓚꓵ ꓠꓬ “ꓢꓲ ꓒ ꓬꓰ-ꓢꓴ ꓔꓯ ꓟꓳꓻ ꓠꓹ ꓟ ꓢꓯꓼ ꓕꓵꓼˍ ꓟ” ꓐꓰ “ꓢꓲ ꓒ ꓬꓰ-ꓢꓴ ꓔꓯ ꓟꓳꓻ ꓪ ꓠꓹ ꓟ ꓢꓯꓼ ꓕꓵꓼ ꓢꓲ ꓟꓳꓻ ꓐ ꓡ ꓗꓪ ꓛꓲ ꓬꓰˍ ꓟ” ꓠꓬꓲꓽ ꓗꓴꓸ ꓚꓸꓼ ꓗꓪ ꓟꓽ ꓫꓱꓸ ꓡꓯ ꓘꓳ ꓓꓴ ꓬꓲ ꓓꓽ ꓟ ꓙꓳˍ ꓡꓳ=

ꓢꓲ ꓒ ꓬꓰ-ꓢꓴ ꓔꓯ ꓟꓳꓻ ꓠꓹ ꓟ ꓢꓯꓼ ꓕꓵꓼˍ ꓟ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓚꓵ ꓚꓵ ꓟꓳꓻ ꓠꓲꓹ ꓫꓵ ꓢꓲ ꓬꓲ ꓔꓯ ꓢꓷꓸ ꓠꓲꓹ ꓫꓵˍ ꓕꓯ ꓢꓲ-ꓫꓬ-ꓟ-ꓦ ꓠꓬ ꓣꓳꓽ ꓔꓯ ꓙ ꓖꓴ ꓟꓸ ꓖꓶ ꓡˍ ꓥꓳ= “ꓠꓴ ꓪ ꓠꓬ ꓕꓲ ꓠꓲꓹ ꓟ ꓡꓱꓸꓼ ꓥꓪ ꓔꓯ ꓧꓪˍ ꓠꓬ ꓧꓪ ꓟꓶˍ ꓥꓳ ꓐꓰ ꓬꓰ-ꓡꓲ-ꓟꓲ 29ꓽ13 ꓗꓪ ꓐꓯ ꓔ ꓡꓳ= ꓝꓮꓲ ꓟ-ꓕꓲ 7ꓽ7 ꓗꓪ ꓥˍ ꓟꓲ “ꓓꓰꓽ꓾ ꓖꓳ ꓡꓱ ꓠꓬ ꓠꓴ ꓪ ꓔꓯ ꓖꓶ ꓡˍ ꓥꓳ= ꓧꓪ꓾ ꓖꓳ ꓡꓱ ꓠꓬ ꓠꓴ ꓪ ꓠꓽ ꓧꓪ ꓟꓶˍ ꓥꓳ= ꓗ ꓘꓶꓽ ꓲ’ꓼ꓾ ꓖꓳ ꓡꓱ ꓠꓬ ꓠꓴ ꓪ ꓔꓯ ꓒꓴ ꓖꓶ ꓡˍ ꓥꓳ” ꓐꓰ ꓐꓯ ꓔ ꓡꓳ=

ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓪ ꓜꓲ ꓢꓷꓸ ꓡꓰ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ= ꓣꓳ ꓐꓴ ꓠꓬ ꓢꓲ ꓒ ꓔꓯ ꓢꓷꓸ ꓠꓲꓹ ꓫꓵ ꓢꓲ꓾ ꓢꓲ ꓒ ꓐꓰ ꓟꓬꓽ ꓠꓬ ꓙ ꓡꓯ ꓘꓳ ꓠꓲꓹ ꓫꓵˍ ꓟ ꓠꓲꓹ ꓟ ꓙꓳ ꓡ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ= ꓬꓲ ꓠꓬ ꓣꓳꓽ ꓢꓲ ꓒ ꓥ ꓡꓳ= ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓬꓲ ꓚꓲꓸ ꓛꓬ ꓡꓰ ꓢꓲ ꓒ ꓙ ꓖꓴ ꓙꓽ ꓖꓶ ꓗꓷ ꓟ ꓟꓲ-ꓢ-ꓬ ꓥ ꓡꓳ=