ꓫꓵꓻ ꓢꓴ ꓢꓯ. ꓢꓴ ꓮ ꓙꓵꓽ ꓟ ꓪꓴ‐ꓢ (Sunday reflection)

#rvalisu #Lazurus #credit photo

Sunday, March 26, 2023

ꓫꓵꓻ ꓢꓴ ꓢꓯ. ꓢꓴ ꓮ ꓙꓵꓽ ꓟ ꓪꓴ‐ꓢ

ꓠꓬꓲ. ꓠꓬꓲ ꓢꓲ ꓒ ꓦꓬꓼ ꓠꓬꓲ ꓗꓪ ꓣꓳꓽ ꓠ, ꓠ ꓪ ꓟ ꓠꓬ ꓢꓲ ꓒ ꓬꓰ‐ꓢꓴ ꓡ‐ꓢ‐ꓣꓴ ꓔꓯ ꓫꓵˍ ꓟ ꓗꓪ ꓐꓰ ꓢꓯ. ꓬꓲꓼ ꓡ ꓝꓲˍ ꓟ ꓟ. ꓟꓲꓽ ꓚꓲ. ꓥꓳ꓿ ꓢꓲ ꓒ ꓬꓰ‐ꓢꓴ ꓡꓰ꓾ ꓥꓪ ꓠꓽ ꓢꓯ. ꓬꓲꓼ ꓡˍ ꓟ ꓐꓰ ꓢꓯꓼ ꓟꓬ ꓥ ꓡꓳ꓿ ꓥꓪ ꓔꓯ ꓙꓵ., ꓢꓴ ꓠꓬ ꓫꓵ.,ˍ ꓟꓲ ꓢꓯ. ꓬꓲꓼ ꓡˍ ꓥꓳ꓿ ꓢꓯ. ꓔꓬ, ꓢꓲ ꓥꓪ ꓔꓯ ꓙꓵ., ꓢꓴ ꓥ ꓕ ꓑꓳ ꓠꓬ ꓕꓲ ꓞꓲꓼ ꓟꓽ ꓫꓵ.,꓾ ꓐꓰ ꓐꓯ ꓡꓳ꓿ ꓬꓳ‐ꓦ 11ꓽ25

ꓮ ꓠꓱ ꓟꓵꓽ ꓚꓰꓼ ꓟꓲ ꓚꓰꓼ ꓕꓯ ꓡꓰ ꓫꓵˍ ꓗꓪ ꓐꓰ ꓢꓯ. ꓬꓲꓼ ꓡ ꓫꓵꓽ ꓕꓲꓽ ꓧꓪ, ꓟꓲ ꓣꓳꓽ ꓟꓽ ꓑ, ꓙ ꓠꓬꓲ꓿ ꓙꓳˍ ꓟꓲ ꓟꓽ ꓙꓳ ꓗꓳ. ꓡ꓿ ꓢꓯ. ꓬꓲꓼ ꓡ ꓐ, ꓡ ꓫꓵˍ ꓟꓲ ꓟꓽ ꓙꓳ꓿ ꓮ ꓡꓲꓳ ꓐꓯ ꓟ ꓫꓵ., ꓠ, ꓟ ꓐꓰ ꓢꓯ. ꓠ, ꓟ ꓮ ꓙꓵꓽ ꓠꓬ ꓪꓴ‐ꓢ ꓢꓲ. ꓡꓰ ꓬꓰ ꓐ, ꓡ ꓟ ꓥꓳ꓿ ꓫꓵꓻ ꓠ꓾ ꓢꓯ. ꓠ ꓮ ꓙꓵꓽ ꓠꓬ ꓪꓴ‐ꓢ ꓡꓯ ꓒꓯ, ꓗꓪ ꓓˍ ꓡꓳ꓿ ꓮ ꓙꓵꓽ ꓠꓬ ꓬꓲ. ꓡꓰ ꓚꓰꓼ ꓔ ꓢꓲ ꓞꓳ ꓤ ꓕꓲꓽ ꓣꓳ ꓔꓯ ꓢꓯ. ꓝꓲ ꓠ, ꓟ꓾ ꓫꓵꓻ ꓝꓲ ꓠ, ꓟ ꓮ ꓙꓵꓽ ꓠꓬ ꓬꓲ. ꓡꓯ ꓒꓯ ꓗꓪ ꓓˍ ꓡꓳ꓿ ꓖꓳ ꓡꓱ ꓠꓬꓲ ꓞꓳ ꓤ ꓕꓲꓽ ꓣꓳ ꓔꓯ ꓫꓵꓻ ꓝꓲ꓾ ꓢꓯ. ꓝꓲ ꓬꓰ ꓐ, ꓡ ꓠꓬ ꓪꓴ‐ꓢ ꓡꓰ ꓥꓳ꓿

ꓠꓬꓲ. ꓠꓬꓲ. ꓣꓳꓽ ꓑ, ꓙ ꓟ ꓢꓲꓽ ꓫꓬ, ꓕꓳ ꓶ (ꓬꓳ‐ꓦ 11ꓽ 1‐45) ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓫꓵꓻ ꓘꓪ ꓡꓰ ꓟ 3 ꓠꓬꓲ ꓙꓳˍ ꓟ ꓡ‐ꓢ‐ꓣꓴ ꓔꓯ ꓢꓯ. ꓬꓲꓼ ꓡ ꓝꓲ ꓠ, ꓟ ꓕꓵꓼ ꓪ ꓖꓶꓽ ꓟ ꓔꓯ ꓣꓳꓽ ꓵ ꓪ ꓡꓳ꓿ ꓫꓵꓻ ꓟ 3 ꓠꓬꓲ ꓙꓳˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓢꓯꓼ ꓑ ꓙ ꓕꓯ ꓡꓱ ꓜꓴ ꓗꓪ ꓐꓰ ꓔꓴ ꓡ ꓡꓳ꓿ ꓮ ꓘꓶ. ꓓꓵꓽ ꓙ ꓟꓶ ꓓꓴ ꓥꓳ꓿ ꓬꓲ. ꓠꓬ ꓪꓴ‐ꓢ ꓥꓳ ꓐꓯ ꓟ ꓟꓳ. ꓖꓶꓽ ꓟ ꓟꓲ ꓥꓳ꓿ ꓐ, ꓐ ꓠꓬ ꓪꓴ‐ꓢ ꓥ ꓟ ꓡꓰ ꓤ ꓔꓲ. ꓥˍ ꓟꓲ ꓐ, ꓐ ꓡꓰ ꓐꓰ ꓙꓵꓽ ꓪ ꓙꓳˍ ꓡꓳ ꓐꓯ ꓟ ꓣꓳꓽ ꓔꓯ ꓢꓷ. ꓡꓰ ꓝꓲ ꓟ ꓥꓳ꓿

ꓬꓲ. ꓔꓯ ꓙꓵ ꓢꓴ ꓠꓬ ꓫꓵꓻ ꓥˍ ꓟꓲ ꓢꓯ. ꓬꓲꓼ ꓡ ꓥꓳ ꓐꓰ ꓢꓲ ꓒ ꓡꓰ ꓐꓯ ꓔ ꓡꓳ꓿ ꓝꓮꓲ꓾ ꓬꓲ. ꓔꓯ ꓙꓵ ꓢꓴ ꓥˍ ꓟꓲ ꓕꓲꓽ ꓞꓲꓼ ꓟꓽ ꓫꓵꓻ ꓐꓰ ꓐꓯ ꓡꓳ꓿ ꓕꓱ ꓟ ꓮ ꓫꓵꓽ ꓔꓯ ꓐꓯ ꓡ?꓿ ꓞꓳ ꓤ ꓢꓯꓼ ꓟꓬꓺ ꓠꓬ ꓦ ꓗꓪ ꓓˍ ꓡꓳ꓿ ꓦ ꓓꓳ ꓙꓰ ꓠꓬ ꓛꓳ ꓤ ꓫꓵ‐ꓳ꓿ ꓖꓳ ꓡꓱ ꓠꓬ ꓢꓲ ꓒ ꓔꓯ ꓙꓵ ꓢꓴ ꓠꓬ ꓦ ꓚꓬꓴ ꓟꓶ ꓡꓳ꓿ ꓦ ꓕꓱ ꓟ ꓠꓬ ꓢꓲ ꓒ ꓔꓯ ꓣꓳꓽ ꓟꓽ ꓙꓵ ꓕꓯ ꓫꓵꓻ ꓡꓳ꓿ ꓦ ꓕꓱ ꓟ ꓠꓬ ꓛꓬ ꓟꓵꓽ ꓗꓪ ꓛꓲ ꓬꓰ ꓠꓬ ꓫꓵ ꓟ ꓥꓳ꓿

ꓬꓲꓼ ꓤ ꓠꓬꓲ ꓤ ꓐꓴ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓣꓳꓽ ꓞꓳ ꓙꓳˍ ꓟ ꓗꓪ ꓣꓳꓽ ꓬꓰˍ ꓟ ꓮ ꓙꓵꓽ ꓗꓪ ꓣꓳꓽ ꓙꓵˍ ꓟ ꓔꓯ ꓟꓳ. ꓖꓶꓽ ꓔꓬ, ꓡ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓡꓰ꓿ ꓣꓳꓽ ꓚꓬꓴ ꓢꓲ ꓒ ꓔꓯ ꓙꓵ ꓡꓯ꓿ ꓖꓳ ꓡꓱ ꓠꓬ ꓣꓳꓽ ꓕꓲꓽ ꓞꓲꓼ ꓢꓯ. ꓓ ꓥꓳ꓿ ꓬꓲ. ꓠꓬ ꓫꓵ ꓢꓴ ꓢꓯ. ꓢꓴ ꓮ ꓙꓵꓽ ꓟ ꓪꓴ‐ꓢ ꓥꓳ꓿