ꓬꓰˍ ꓟ ꓟꓬꓱꓽ ꓔꓯ ꓡꓳꓸ ꓢꓲ ꓙꓵꓻ ꓠ ꓗˍ ꓡꓳ꓾

ꓖꓳ ꓕꓯ ꓬꓴ-ꓔ ꓡ ꓞꓳ ꓠꓬ ꓝꓮꓲ ꓬꓲ ꓔꓯ ꓡꓳꓺ ꓠꓹ ꓟ Bꓸ ꓛꓲ ꓖꓳˍ ꓡꓳ꓿ꓬꓰ-ꓢꓴ ꓠꓽ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓐꓹ ꓐ ꓗꓪ ꓐꓰ ꓙꓲˍ ꓟ ꓟꓬꓱꓽ ꓮꓽ ꓟꓬꓹ ꓠꓴ ꓪꓽ ꓔꓯ ꓥꓪ ꓟꓳꓸ ꓖꓶ ꓗꓷꓳ꓿ ꓟꓬꓱꓽ ꓮ ꓡꓲ ꓕꓲ ꓫꓵ ꓟ ꓑꓶꓸ ꓓꓴ ꓠꓴ ꓪꓽ ꓥꓪ ꓔꓯ Bꓸ ꓛꓲ ꓡꓳˍ ꓐꓯˍ ꓡ? ꓐꓰ ꓐꓯ ꓖꓶˍ ꓕꓯ꓾ꓬꓴ-ꓔ ꓡ ꓞꓳ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓙꓲˍ ꓟ ꓟꓬꓱꓽ ꓑꓶꓸ ꓓꓴ ꓥꓪ ꓠꓴꓽ ꓠꓴ ꓔꓯ ꓭꓸ ꓛꓲ ꓡꓳˍ ꓐꓰ ꓬꓰˍ ꓟ ꓟꓽ ꓥ꓿ ꓠꓴ ꓠꓬ ꓐꓯ ꓟꓽ ꓚꓰꓼ ꓟ ꓐꓯˍ ꓟ ꓐꓰ꓾ ꓝꓮꓲ ꓠꓴ ꓠꓬ ꓡ ꓞꓳ ꓥ ꓢꓲ ꓚꓲꓸ ꓛꓬ ꓔꓯ ꓪꓴ-ꓢ ꓥ ꓡꓳ꓾ ꓐꓯˍ ꓠꓬꓲ ꓠꓴ ꓔꓯ Bꓸ ꓛꓲ ꓡꓳˍ ꓐꓰ ꓬꓰˍ ꓟ ꓥ ꓡꓳ꓾ ꓐꓯ ꓖꓶˍ ꓡꓳ꓿

ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓪꓽ ꓙꓵꓽ ꓗ ꓕꓳ ꓶ ꓗꓪ꓾ ꓥꓪ ꓡꓰ ꓠꓴ ꓪꓽ ꓔꓯ꓾ ꓢꓲꓺ ꓐꓴ꓾ ꓘꓴˍ ꓡꓳ꓾ ꓐꓰ ꓐꓳ ꓔ ꓡꓳ ꓟꓽ ꓥ ꓡ?ꓢꓲꓽ ꓫꓬ ꓕꓳ ꓶ ꓠꓽ ꓬꓲ ꓖꓳꓽ ꓗꓷ ꓡꓰ ꓟꓽ ꓓ ꓟ ꓣꓳꓽ ꓢꓷˍ ꓡꓳ꓿ ꓪꓴ-ꓢ ꓐꓯ ꓘꓶꓽ ꓟꓶꓺ ꓗꓷ ꓢꓴ ꓐꓴ ꓔꓯ ꓬꓲ ꓡꓰ꓾ ꓢꓲꓺ ꓐꓴ꓾ ꓘꓴˍ ꓠꓬ꓾ꓐꓹ ꓐ ꓡꓰ ꓢꓲ ꓚꓰꓸ ꓢꓲ ꓟꓲ ꓠꓯ ꓗꓪ ꓝꓲ ꓩꓴ ꓡ ꓢꓴ ꓥꓪ ꓡꓰ꓾ ꓥꓪ ꓠꓽ ꓪꓴ-ꓢ ꓮ ꓐꓲ ꓥ ꓡꓳ꓾ ꓐꓯˍ ꓠꓬꓲ ꓠꓴ ꓪꓽ ꓠꓽ ꓐꓯ ꓟꓽ ꓚꓰꓼ ꓟ ꓐꓯˍ ꓡꓳ꓾ ꓐꓰ ꓐꓯˍ ꓡ?ꓥꓪ ꓐꓹ ꓐ ꓟꓬꓱꓽ ꓥꓪ ꓟꓽ ꓬꓰˍ ꓠꓬ ꓥꓪ ꓔꓯ ꓕ ꓙꓵꓻ꓿ꓖꓳ ꓡꓱ ꓥ ꓟꓲ ꓥꓪ ꓬꓲ ꓟꓬꓱꓽ ꓬꓰˍ ꓕꓯ ꓠ꓾ ꓠꓴ ꓪꓽ ꓥꓪ ꓔꓯ ꓟꓽ ꓙꓵˍ ꓟꓲ꓾ ꓐꓹ ꓐ ꓥꓪ ꓠꓯꓸꓼ ꓔꓬ ꓟ ꓐꓰ ꓥꓪˍ ꓟꓲ ꓐꓹ ꓐ ꓠꓯꓸꓼ ꓔꓬ ꓟ ꓠꓴ ꓪꓽ ꓢꓷꓸ ꓡꓰ ꓢꓲ ꓙꓽ ꓜꓲꓼ ꓡꓰ ꓠꓹ ꓟ꓾ ꓓꓵꓽ ꓙꓽ ꓟꓶ ꓓꓴ ꓟꓬꓱꓽ ꓕꓱ ꓟꓬ ꓟ ꓔꓯ ꓙꓵꓻ ꓟꓴꓽ꓾ ꓐꓯˍ ꓡꓳ꓿

ꓬꓲ ꓪꓽ ꓠꓬ ꓝꓮꓲ ꓬꓲ ꓔꓯ ꓣꓴ ꓠꓹ ꓟ ꓚꓱꓹ ꓧꓪˍ ꓟꓲ꓾ ꓬꓰ-ꓢꓴ ꓠꓽ ꓬꓲ ꓪꓽ ꓔꓯˍ ꓐꓰ ꓓꓳ ꓙꓰꓳ꓿ꓬꓲ ꓠꓬ ꓬꓳ-ꓔ ꓬꓲꓽ ꓟ ꓖꓳ ꓐ ꓢꓲ꓾ ꓬꓳ-ꓦ ꓡꓰ ꓬꓲ ꓪꓴꓸ ꓖꓳ ꓓꓱ ꓔꓲꓹ ꓖꓶ ꓖꓴ ꓗꓪ ꓝꓮꓲ ꓙꓰ ꓢꓲ ꓖꓳ ꓗꓪ ꓔꓬ ꓬꓰˍ ꓡꓳ꓿ꓖꓳ ꓗꓪ ꓡ ꓞꓳ ꓮꓽ ꓟꓬꓹ ꓠꓬ ꓬꓲ ꓔꓯ ꓡ ꓡꓳ꓿ ꓬꓲ ꓪꓽ ꓠꓬ꓾ ꓬꓳ-ꓦ ꓠꓽ ꓓꓵꓽ ꓙ ꓟꓶˍ ꓟ ꓢꓷꓸ ꓡꓰ ꓓꓴ ꓮꓸ ꓫꓵ ꓟꓽ ꓬꓰ ꓠꓬꓲˍ ꓟꓲ꓾ ꓬꓲ ꓡꓰ ꓡ ꓞꓳ ꓕꓱ ꓕꓲ ꓣꓳ ꓔꓯ ꓖꓴꓺ ꓢꓲ ꓐꓯˍ ꓟ ꓮꓽ ꓙꓵ ꓡꓱꓸꓼ ꓠꓬ ꓔꓱꓹˍ ꓟ ꓥ ꓡꓳ꓾ ꓐꓰ ꓐꓯˍ ꓡꓳ꓿ꓖꓳ ꓗꓪ ꓡ ꓞꓳ ꓮꓽ ꓟꓬꓹ ꓬꓰ-ꓢꓴ ꓔꓯ ꓙꓵꓻˍ ꓡꓳ꓿

ꓶꓼ ꓓꓳꓽ ꓫꓱꓸ ꓓꓳꓽ ꓚꓺ ꓔꓬ ꓟ ꓢꓲꓺ ꓒ ꓬꓰ-ꓢꓴ ꓔꓯ ꓬꓳ-ꓔ ꓡ ꓞꓳ ꓐꓴ ꓡꓰ ꓐꓯ ꓔꓳꓹ ꓡꓯꓽ ꓘꓳ ꓫ ꓪ ꓟꓬꓽ ꓡꓯ ꓘꓳꓹ ꓟ ꓬꓲ ꓝꓲꓸ ꓠꓬꓲꓸ ꓠꓬꓲ ꓣꓳꓽ ꓑ ꓙˍ ꓡꓳ= ꓬꓳ-ꓔ ꓡ ꓞꓳ ꓐꓴ ꓠꓬ ꓘꓶꓽ ꓫꓵꓽ ꓡꓵꓺ ꓗꓪ ꓟ ꓟꓳ-ꓫꓲ ꓙꓵꓽ ꓗ ꓔꓯ ꓬꓲ ꓪ ꓛꓳ ꓢꓴ ꓥ ꓢꓲ ꓢꓲꓺ ꓒ ꓬꓰ-ꓢꓴ ꓬꓯꓼ ꓡ ꓗꓸ ꓠꓯꓸ ꓐꓲꓺ ꓜꓲꓼˍ ꓟ ꓟꓸ ꓟꓲꓽ꓾ ꓐꓲꓺ ꓜꓲꓼˍ ꓟ ꓢꓯꓼ ꓟꓬ ꓧꓪ ꓠꓹ ꓟ ꓚꓱꓹ ꓔꓯ ꓬꓲ ꓪ ꓟꓽ ꓢꓷꓸ ꓔ ꓟ ꓪꓴꓸ ꓠꓬꓲ ꓫ ꓪ ꓟꓬꓽ ꓡꓯ ꓘꓳꓹ ꓟ ꓥ ꓡꓳ= ꓮ ꓟꓬ ꓗꓪ ꓛꓲꓺ ꓫ ꓪ ꓟꓬꓽ ꓔꓬꓹ ꓥ ꓐꓯ ꓠꓬ ꓬꓰ-ꓢꓴ ꓔꓯ ꓭꓸ ꓡꓳ ꓓꓰ ꓡꓳ ꓓꓴ ꓙꓽ ꓖꓶˍ ꓗꓪ ꓛꓲꓺ ꓬꓲ ꓪ ꓫ ꓪ ꓟꓬꓽ ꓡꓯ ꓘꓳꓹ ꓟ ꓔꓯ ꓣꓳꓽ ꓠꓬꓲꓸ ꓠꓬꓲ ꓑ ꓙꓽˍ ꓟ ꓥ ꓡꓳ=

ꓶꓼ ꓓꓳꓽ ꓫꓱꓸ ꓓꓳꓽ ꓚˍ ꓟ ꓚꓱꓹ ꓗꓪ ꓬꓲ ꓚꓱꓹ ꓮ ꓟꓬꓹ ꓧꓪ ꓢꓲ ꓫ ꓪ ꓘꓶꓽ ꓗꓪ ꓐꓰ ꓟꓸ ꓟꓲꓽ ꓚꓺ ꓮ ꓟꓬꓹ ꓬꓰ ꓔꓬ ꓫꓵꓽ ꓟꓳꓻ ꓪ ꓓˍ ꓥꓳ= ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓐꓯ ꓟ ꓠꓬ ꓫ ꓪ ꓘꓶꓽ ꓗꓪ ꓐꓰ ꓚˍ ꓟ ꓕꓯꓽ ꓢꓲ ꓬꓲ ꓬꓰˍ ꓟ ꓟꓬꓱꓽ ꓔꓯ ꓟꓬꓽ ꓠꓬꓲ ꓛꓳꓽ ꓢꓲ ꓣꓳ ꓙ ꓫꓱꓽ ꓙꓰ ꓠ ꓗˍ ꓡꓳ꓾ ꓐꓯ ꓡꓳ= ꓖꓳ ꓕꓯ ꓣꓳꓽ ꓶꓼ ꓓꓳꓽ ꓫꓱꓸ ꓓꓳꓽ ꓕꓱ ꓟ ꓔꓯ ꓣꓳꓽ ꓟꓷꓽ ꓠꓷꓹ ꓗꓪ ꓐꓰ ꓚꓺ ꓟꓸ ꓖꓶˍ ꓟ ꓡꓰ ꓐꓰ ꓣꓳꓽ ꓛꓳꓽ ꓫꓱꓽˍ ꓟ꓾ ꓣꓱꓽ ꓬꓰˍ ꓟ ꓟꓬꓱꓽ ꓚꓱꓹ ꓗꓪ ꓐꓰ ꓥˍ ꓟꓲ ꓬꓰ-ꓢꓴ ꓔꓯ ꓟꓽ ꓢꓷꓸ ꓢꓴ ꓘꓴꓽ ꓠꓯꓸꓼ ꓗꓪ ꓣꓳꓽ ꓟꓳꓸ ꓖꓶ ꓠ ꓔ ꓡꓳ=

ꓣꓳꓽ ꓫꓷꓹ ꓐꓰ ꓣꓳꓽ ꓬꓰˍ ꓟ ꓟꓬꓱꓽ ꓚꓱꓹ ꓗꓪ ꓐꓰ ꓟꓬꓽ ꓠꓬꓲ ꓶꓼ ꓓꓳꓽ ꓫꓱꓸ ꓓꓳꓽ ꓬꓰ ꓙꓲꓽ ꓙꓳˍ ꓡꓳ= ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓐꓯ ꓖꓶꓽ ꓡˍ ꓟ ꓕꓱ ꓡꓰ ꓥꓳ= ꓥꓪ ꓬꓰˍ ꓟ ꓟꓬꓱꓽ ꓔꓯ ꓡꓳꓸ ꓢꓲ ꓠꓴ ꓪ ꓙꓵꓻ ꓠ ꓗˍ ꓡꓳ꓾ ꓐꓯ ꓟ ꓠꓬ ꓟꓷꓽ ꓠꓷꓹ ꓗꓪ ꓐꓰ ꓕꓱˍ ꓟ ꓕꓯꓽ ꓢꓲ ꓣꓳ ꓞꓳ ꓙꓳ ꓔꓬ ꓟ ꓤꓶꓻ꓾ ꓝꓮꓲ ꓣꓳꓽ ꓡꓰ ꓔꓱꓹ ꓟ ꓟꓬꓱꓽ ꓔꓯ ꓬꓰ ꓟꓸ ꓖꓶˍ ꓟ ꓖꓳ ꓟ ꓔꓯ ꓡꓳꓸ ꓢꓲ ꓠꓱꓸ ꓐꓯ ꓢꓴ ꓠꓬ ꓣꓳꓽ ꓶꓼ ꓓꓳ ꓫꓱꓸ ꓓꓳ ꓔꓯ ꓬꓲ ꓪ ꓘꓳꓹ ꓣꓴ ꓡˍ ꓥꓳ= ꓟꓷꓽ ꓠꓷꓹ ꓘꓴꓽ ꓗꓪ ꓚˍ ꓟ ꓕꓯꓽ ꓢꓲꓺ ꓣꓳ ꓛꓳ ꓫꓱꓽˍ ꓟ ꓤꓶꓻ ꓦꓬꓼ ꓠꓬꓲ ꓗꓪ ꓣꓳ ꓬꓰˍ ꓟ ꓟꓬꓱꓽ ꓗꓪ ꓐꓰ ꓟꓬꓽ ꓠꓬꓲ ꓶꓼ ꓓꓳ ꓫꓱꓸ ꓓꓳ ꓔꓯ ꓬꓰ ꓐ ꓡ ꓝꓲ= ꓕꓱ ꓟꓵꓽ ꓠꓯꓸꓼ ꓗꓪ ꓪꓴ-ꓢ ꓔꓯ ꓫꓱꓸ ꓖꓶ ꓐ ꓡ ꓢꓴ ꓮ ꓟꓬꓹ ꓒꓬꓱꓼ ꓡ ꓝꓲ= ꓪꓴ-ꓢ ꓶꓼ ꓓꓳ ꓫꓱꓸ ꓓꓳ ꓔꓯ ꓚꓺ ꓒꓬꓱ ꓢꓴ꓾ ꓪꓴ-ꓢ ꓶꓼ ꓓꓳ ꓫꓱꓸ ꓓꓳ ꓠꓯꓸꓼ ꓗꓪ ꓙ ꓫꓱꓽ ꓢꓴ ꓒꓬꓱꓼ ꓡ ꓝꓲ=

Add new comment

8 + 0 =