ꓬꓰ‐ꓢꓴ ꓔꓯ ꓕꓯꓼ ꓔꓶ.ˍ ꓟ (Sunday reflection)

ꓬꓰ‐ꓢꓴ ꓔꓯ ꓕꓯꓼ ꓔꓶ.ˍ ꓟ

ꓑ ꓫꓬꓼ ꓐꓴ ꓠꓬ ꓖꓳ ꓗꓪ ꓦꓰꓼ ꓢꓲ ꓡꓳꓸ ꓔꓬ ꓡꓳ꓿ ꓢꓲꓽ ꓒ ꓐꓴˍ ꓟꓲ ꓬꓲ ꓔꓯ ꓪꓽ ꓫꓱ ꓢꓲ꓾ ꓢꓴ ꓢꓯꓼ ꓟꓬ ꓔꓯ ꓠꓽ ꓬꓲ ꓚꓬꓴˍ ꓡꓳ꓿ ꓬꓲ ꓠꓬ ꓪꓴ-ꓢ ꓡꓰ ꓢꓲ ꓔ ꓟ ꓙꓲ-ꓢꓴ ꓥ ꓐꓷˍ ꓠꓬ ꓬꓲ ꓚꓲꓸ ꓛꓬ ꓢꓯꓼ ꓟꓬ ꓔꓯ ꓚꓬꓴ ꓝꓲ꓾ ꓐꓯˍ ꓡꓳ꓿ 36 ꓟꓯꓼ ꓤ ꓐꓴˍ ꓟꓲ ꓬꓲ ꓔꓯ ꓤꓲꓺ ꓢꓲ꓾ ꓬꓲꓻ ꓚꓱꓺ ꓔꓯꓹ ꓖꓶ ꓡ ꓢꓲ ꓠꓬꓲ꓾ 37 ꓠꓴ ꓠꓬ ꓬꓴ-ꓔ ꓡꓽ ꓞꓳ ꓪ ꓔꓲꓸ ꓥ ꓐꓷˍ ꓠꓬ꓾ ꓠꓴ ꓚꓲꓸ ꓛꓬ ꓔꓯ ꓚꓬꓴ ꓟꓴ꓾ ꓐꓯˍ ꓡꓳ꓿ 38 ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓪꓴꓸ ꓗꓪ ꓕꓳ ꓶ ꓐꓳ ꓢꓲ꓾ ꓕꓱ ꓕꓲ ꓣꓳ ꓠꓬ ꓬꓴ-ꓔ ꓡꓽ ꓞꓳ ꓪ ꓔꓲꓸ ꓥ ꓡꓳ꓾ ꓐꓰ ꓐꓳ ꓔ ꓡꓳ꓿ 39 ꓖꓳ ꓗꓪ ꓥꓳꓺ ꓞꓹ ꓟ ꓛꓬꓻ ꓢꓴ ꓕꓲ ꓣꓳ ꓠꓬ ꓬꓲ ꓔꓯ ꓫꓸ ꓝꓲꓸ ꓢꓲ꓾ ꓠꓴ ꓠꓬ ꓙꓲ-ꓢꓴ ꓟꓽ ꓥ ꓡ? ꓠꓴ ꓚꓲꓸ ꓛꓬˍ ꓐꓰ ꓥꓪ ꓠꓴꓽ ꓔꓯ ꓚꓬꓴ ꓡꓯ ꓟꓴꓽ꓾ ꓐꓯˍ ꓡꓳ꓿ 40 ꓛꓬꓻ ꓢꓴ ꓠꓱꓸ ꓐꓯ ꓕꓲ ꓣꓳ ꓟ ꓠꓬ ꓬꓲ ꓔꓯ ꓕꓼ ꓢꓲ꓾ ꓣꓳꓽ ꓠꓽ ꓛꓬ ꓒꓵꓽ ꓕꓲꓽ ꓡꓰꓹꓼ ꓟꓶ ꓢꓴ ꓥ ꓢꓲ꓾ ꓪꓴ-ꓢ ꓔꓯ ꓠꓴ ꓟꓽ ꓙꓳ ꓡ? ꓣꓳꓽ ꓠꓽ꓾ ꓣꓳꓽ ꓬꓰ ꓗꓷ ꓟ ꓐꓰ ꓕꓲꓽ ꓡꓰꓹꓼ꓾ ꓔꓱꓹ ꓜꓳꓽˍ ꓟ ꓐꓯ ꓟꓴ ꓬꓲ ꓛꓬꓻ ꓒꓵꓽ ꓟꓶ ꓙꓲꓽ ꓙꓳ ꓢꓴ ꓥꓳ꓿ 41 ꓖꓳ ꓡꓱ ꓥ ꓟꓲ ꓡꓽ ꓞꓳ ꓕꓱ ꓕꓲ ꓣꓳ ꓠꓽ ꓟꓽ ꓙꓲ ꓟ ꓮꓸ ꓫꓵˍ ꓟꓲ ꓟꓽ ꓬꓰ ꓠꓬꓲ꓾ ꓐꓯ ꓖꓶˍ ꓡꓳ꓿ 42 ꓖꓳ ꓡꓱ ꓢꓲ ꓬꓲ ꓡꓰ꓾ ꓬꓰ-ꓢꓴꓳ꓾ ꓠꓴ ꓪꓽ ꓔꓲ ꓣꓱꓽ ꓡ ꓕꓯ ꓥꓪ ꓔꓯ ꓕꓽ ꓟꓲ ꓡꓰ ꓝꓲ꓾ ꓐꓯˍ ꓡꓳ꓿ 43 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓠꓬꓲꓸ ꓠꓬꓲ ꓠꓴ ꓠꓬ ꓥꓪˍ ꓐꓰ ꓕꓲꓽ ꓪꓺꓼ ꓒꓺ-ꓣ-ꓓꓲ ꓗꓪ ꓔꓬ ꓟꓶˍ ꓥꓳ꓾ ꓐꓯˍ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓟ. ꓖꓶ ꓡ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓪꓴ‐ꓢ ꓚꓵ ꓥ ꓟ ꓙꓵꓻ ꓠ, ꓟ ꓥ ꓡꓳ꓿ ꓗꓳ. ꓗꓷ ꓠ ꓙꓵ, ꓕꓯ ꓣꓳ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓪ ꓔꓲ ꓕꓲ ꓣꓳ ꓡꓰ ꓐꓰ ꓣꓳ ꓙꓵꓻ ꓗꓷ ꓡ ? ꓢꓲꓺ ꓒ ꓬꓰ‐ꓢꓴ ꓔꓯ ꓣꓳ ꓮ ꓡꓰ ꓐꓰ ꓘꓳˍ ꓣꓴ ꓗꓷ ꓡ? ꓢꓲꓺ ꓒ ꓬꓰ‐ꓢꓴ ꓔꓯ ꓬꓲ. ꓙꓵ, ꓖꓶ ꓗꓷ ꓡ ꓐꓰ ꓓꓴ ꓙ ꓠ, ꓙꓳ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓔꓯ ꓣꓳ ꓝꓴꓲ ꓙꓳ ꓢꓴ ꓟꓲ ꓠꓯ ꓡ ꓞꓳ ꓐꓱ ꓶ ꓫꓵꓻ ꓙ ꓗꓷ ꓢꓲ ꓠꓬꓲ ꓣꓳ ꓔꓯ ꓚꓬꓴ ꓙ ꓗꓷ ꓟ  ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓢꓯ. ꓔꓬ ꓟ ꓙꓵ, ꓕꓯ ꓢꓲꓺ ꓒ ꓬꓰ‐ꓢꓴ ꓣꓳ ꓠꓲ, ꓟ ꓘꓴꓽ ꓗꓪ ꓔꓬ ꓡ ꓠ, ꓟ ꓘꓴˍ ꓠ, ꓗ. ꓡꓳ꓿ ꓢꓲꓺ ꓒ ꓬꓰ‐ꓢꓴ ꓔꓯ ꓮ ꓕꓯ ꓥ ꓟꓲ ꓪꓽ ꓘꓴ ꓢꓲ ꓠꓬꓲ ꓞꓳ ꓙꓳ ꓢꓯ. ꓔꓬ ꓓꓴ ꓬꓰ ꓡꓯ ꓫ. ꓟꓳ ꓪ꓿