ꓬꓰ‐ꓢꓴ ꓢꓯꓼ ꓟꓬ ꓑ ꓑ ꓥ ꓟ (Holy Eucharist)

ꓬꓰ‐ꓢꓴ ꓢꓯꓼ ꓟꓬ ꓑ ꓑ ꓥ ꓟ

 ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓧꓪꓽ ꓖꓳ ꓓꓱꓽ ꓥ ꓟ ꓢꓲꓽ ꓫꓬ ꓑ ꓑ ꓑꓮꓲꓽ ꓦꓬꓼ ꓠꓬꓲ  ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ(6:51-58) ꓗꓪ ꓠꓬ ꓢꓲꓺ ꓒ ꓬꓰ‐ꓢꓴ ꓠꓬ ꓟꓴ ꓗꓪ ꓗꓪ ꓐꓰ ꓬꓯꓼ ꓡ ꓟ ꓑ ꓑ ꓥ ꓟ ꓚꓱ, ꓔꓯ ꓡꓳ. ꓟꓳ ꓪ ꓡꓳ꓿ ꓑ ꓑ ꓕꓱ ꓟ ꓔꓯ ꓜꓽ ꓢꓴ ꓠꓬ ꓟꓽ ꓫꓵꓻ ꓡ ꓐꓰ ꓢꓲꓽ ꓫꓬ ꓕꓳ ꓶ ꓗꓪ ꓡꓳ. ꓟꓳ ꓪ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓢꓯꓼ ꓟꓬ ꓑ ꓑ ꓥ ꓡꓳ ꓐꓰ ꓬꓲ ꓔꓯ ꓘꓳ ꓣꓴ ꓠ, ꓟ ꓣꓳ ꓚꓵ. ꓟ ꓚꓱ, ꓔꓯ ꓠꓬꓲ. ꓠꓬꓲ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓘꓶ ꓫꓵ ꓡꓵ ꓗꓪ ꓪꓴ‐ꓢ ꓡꓰ ꓬꓴ‐ꓔ ꓡ ꓞꓳ ꓐꓴ ꓔꓯ ꓟ‐ꓠ ꓑ ꓑ ꓖꓶ ꓜ ꓟ ꓚꓱ, ꓔꓯ ꓣꓳ ꓡꓳ. ꓟꓳ ꓪ ꓡꓳ꓿ ꓪꓴ‐ꓢ ꓡꓰ ꓣꓳ ꓮ ꓙꓵꓽ ꓔꓯ ꓣꓳ ꓚꓲ ꓛꓬ ꓢꓯꓼ ꓪ ꓗꓪ ꓐꓰ ꓬꓰ ꓐ ꓡ ꓟ ꓠꓬ ꓮ ꓫꓵ_ ꓟꓲ ꓟꓽ ꓙꓳˍ ꓟ ꓐꓰ ꓣꓳ ꓔꓯ ꓪꓴ‐ꓢ ꓡꓰ ꓖꓶ ꓡ ꓟ ꓣꓱ ꓛꓰ ꓗꓪ ꓐꓰ ꓣꓳ ꓬꓰ ꓐ ꓡ ꓚꓱ, ꓔꓯ ꓟꓽ ꓟꓲ ꓡꓰ ꓠ, ꓟ ꓐꓯ ꓔ ꓡꓳ꓿

ꓢꓲꓽ ꓫꓬ ꓑ ꓑ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓖꓶ ꓡ ꓟ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓕꓲ ꓣꓳ ꓛꓳ ꓕꓲ ꓣꓳ ꓦꓻ ꓕꓲ ꓒꓳ, ꓗꓪ ꓪꓽ ꓡꓯ ꓘꓳ ꓫꓱ ꓡꓯ ꓘꓳ ꓠ, ꓟ ꓪꓴ‐ꓢ ꓡꓰ ꓖꓶ ꓔ ꓟ ꓮ ꓘꓶ. ꓣꓳ ꓚꓵ. ꓟ ꓕꓲ ꓫꓵꓽ ꓥ ꓡꓳ꓿ ꓛꓱ ꓡꓱ ꓙꓵꓽ ꓐꓰ ꓑ ꓑ ꓠꓬ ꓢꓲꓺ ꓒ ꓬꓰ‐ꓢꓴ ꓬꓲ ꓢꓲ ꓬꓲ ꓧꓪ ꓖꓳ ꓓꓱꓽ ꓔꓯ ꓟꓳ ꓫꓱ ꓡꓯ ꓘꓳ, ꓟ ꓚꓱ, ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓢꓲꓽ ꓫꓬ ꓑ ꓑ ꓣꓳ ꓘꓳ ꓣꓴ ꓕꓯ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓢꓯ ꓙꓲ‐ꓢꓴ ꓠꓯ ꓗꓪ ꓕꓲ ꓠꓲ, ꓕꓲ ꓪ ꓒꓬꓱꓼ ꓡ ꓟ ꓥ ꓡꓳ꓿ ꓕꓱ ꓟ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓬꓲ. ꓡꓰ ꓖꓶ ꓔ ꓟ ꓑ ꓑ ꓔꓯ ꓘꓳ, ꓣꓴ ꓠ, ꓟ ꓐꓰ ꓢꓲꓽ ꓫꓬ ꓑ ꓑ ꓘꓳ, ꓣꓴ ꓟꓶ ꓡꓰ ꓠ, ꓟ ꓢꓯꓼ ꓕꓵꓼ ꓠ, ꓟ ꓣꓳ ꓚꓵ. ꓟ ꓚꓱ, ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓢꓲꓽ ꓫꓬ ꓑ ꓑ ꓠꓯ, ꓗꓪ ꓚꓵ ꓚꓵ ꓔꓬ ꓟ ꓚꓱ, ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓡꓳ. ꓟꓳ ꓪ ꓡꓳ꓿ ꓥꓪ ꓠꓽ ꓟꓴ ꓗꓪ ꓗꓪ ꓐꓰ ꓬꓯꓼ ꓡ ꓟ ꓑ ꓑ ꓬꓲ ꓢꓯ. ꓥ ꓡꓳ꓿ ꓑ ꓑ ꓕꓱ ꓟ ꓜꓽ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓢꓯ. ꓔꓬ ꓥꓳ ꓐꓰ ꓢꓲꓽ ꓫꓬ ꓕꓳ ꓶ ꓗꓪ ꓡꓳ. ꓟꓳ ꓪ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓢꓲꓽ ꓫꓬ ꓑ ꓑ ꓐꓰ ꓛꓱ ꓡꓱ ꓙꓵꓽ ꓠꓯ ꓗꓪ ꓚꓵ ꓚꓵ ꓔꓬ ꓟ ꓚꓱ, ꓔꓯ ꓗ‐ꓔꓳ‐ꓡꓲ ꓘꓴ ꓜꓲꓼ ꓞꓳ ꓠꓬ ꓟ. ꓖꓶ ꓔ ꓟ ꓥ ꓡꓳ꓿ 1 ꓘꓳ‐ꓡꓱ‐ꓕꓴ 10ꓽ 16‐17 ꓝꓲ ꓗꓪ ꓑ ꓑ ꓐꓰ ꓛꓱ ꓡꓱ ꓙꓵꓽ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓓꓵꓽ ꓙ ꓠ, ꓟ ꓬꓰ ꓔꓬ ꓟ ꓟꓽ ꓥ꓿ ꓑ ꓑ ꓠꓯ ꓗꓪ ꓢꓲꓺ ꓒ ꓬꓰ‐ꓢꓴ ꓚꓵ ꓚꓵ ꓔꓬ ꓟ ꓚꓱ, ꓔꓯ ꓡꓳ. ꓟꓳ ꓪ ꓡꓳ꓿ ꓛꓱ ꓡꓱ ꓙꓵꓽ ꓐꓰ ꓑ ꓑ ꓠꓯ ꓗꓪ ꓢꓲꓺ ꓒ ꓬꓰ‐ꓢꓴ ꓚꓵ ꓚꓵ ꓔꓬ ꓟ ꓙꓵꓻ ꓠꓲ, ꓠꓬ ꓗ‐ꓔꓳ‐ꓡꓲ ꓘꓴ ꓜꓲꓼ ꓞꓳ ꓠꓯ ꓗꓪ ꓪꓴ. ꓓꓲ ꓡꓰ ꓟ ꓙꓵꓻ ꓠꓲ, ꓥ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓣꓳ ꓐꓱ ꓶ ꓫꓵꓻ ꓙ ꓗꓷ ꓟ ꓔꓯ ꓓꓵꓽ ꓙ ꓛꓲ ꓠ, ꓟ ꓥ ꓡꓳ꓿

ꓕꓲ ꓞꓲꓼ ꓕꓲ ꓑ ꓐꓱ ꓶ ꓢꓲꓽ ꓫꓬ ꓑ ꓑ ꓣꓱ ꓬꓯꓼ ꓟ ꓚꓱ, ꓠꓬ ꓝꓲ ꓓꓴ ꓬꓳ‐ꓦ ꓡꓰ ꓐꓳ ꓔ ꓟ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓬꓲ. ꓧꓪ ꓖꓳ ꓓꓱꓽ ꓬꓲ. ꓢꓲ ꓐꓰ ꓬꓲ ꓧꓪ ꓜ ꓠ, ꓟ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓐꓱ ꓶ  ꓣꓳ ꓚꓵ. ꓟ ꓚꓱ, ꓔꓯ ꓢꓲꓽ ꓫꓬ ꓕꓳ ꓶ ꓗꓪ ꓐꓳ ꓔ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡ ꓟ ꓑ ꓑ ꓕꓱ ꓟ ꓜꓽ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓢꓯ. ꓔꓬ ꓥꓳ꓿ ꓝꓮꓲ ꓟꓲ ꓠꓯ ꓡ ꓞꓳ ꓢꓯꓼ ꓟꓬ ꓟꓶ ꓠ, ꓟ ꓥꓪ ꓡꓰ ꓖꓶ ꓠ, ꓟ ꓑ ꓑ ꓠꓬ ꓥꓪ ꓧꓪꓽ ꓥꓳ ꓐꓯˍ ꓡꓳ ꓐꓰ ꓐꓯ ꓔ ꓡꓳ꓿ ꓕꓱ ꓟ ꓠꓬ ꓗ‐ꓔꓳ‐ꓡꓲ ꓙꓲ‐ꓢꓴ ꓢꓲꓺ ꓤ ꓐꓴ ꓙꓵꓻ ꓠꓲ, ꓗꓪ ꓢꓲꓺ ꓒ ꓬꓰ‐ꓢꓴ ꓢꓲꓽ ꓫꓬ ꓖꓳ ꓓꓱꓽ ꓠꓬ ꓮ ꓟꓬ, ꓛꓲ ꓣꓳ ꓚꓵ ꓚꓱ, ꓔꓯ ꓟ. ꓖꓶ ꓔ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ  ꓦꓻ ꓢꓯꓼ ꓪ ꓟꓶ ꓠ, ꓟ ꓢꓲꓽ ꓫꓬ ꓑ ꓑ ꓔꓯ ꓢꓯꓼ ꓕꓵꓼ ꓢꓲ ꓠꓬꓲ ꓘꓳ, ꓣꓴ ꓟꓶ ꓠ, ꓟ ꓣꓳ ꓚꓵ ꓟ ꓚꓱ, ꓔꓯ ꓟ. ꓖꓶ ꓔ ꓡꓳ꓿ ꓫ. ꓟꓳ ꓪ꓿