ꓬꓰ‐ꓢꓴ ꓬꓲ. ꓒꓬꓱꓽ ꓑꓶ. ꓡꓰ ꓟ (Sunday Reflection)

Sunday, March 05, 2023

ꓬꓰ-ꓢꓴ ꓬꓲꓸ ꓒꓬꓱꓽ ꓑꓶꓸ ꓡꓰ ꓟ (Sunday reflection)

2 ꓘꓳ-ꓱ-ꓕꓱ ꓕꓳ ꓶ (5:7) ꓗꓪ "ꓣꓳꓽ ꓠꓬ ꓙꓵ ꓠꓲꓹ ꓗꓪ ꓐꓰ ꓙ ꓖꓴ ꓫꓱꓹ ꓔꓬ ꓡꓳ꓾ ꓟꓬꓺ ꓢꓲꓽ ꓟꓳ ꓟ ꓗꓪ ꓐꓰ ꓟꓽ ꓥ" ꓐꓰ ꓐꓯ ꓔ ꓡꓳ꓿ ꓣꓳ ꓟꓲ ꓠꓯꓺ ꓕꓱ ꓗꓪ ꓙ ꓖꓴ ꓫꓱꓽ ꓙꓰ ꓔꓬꓹ ꓟ ꓠꓬ ꓟꓬꓺ ꓢꓲ ꓗꓪ ꓐꓰ ꓟꓳ ꓓ ꓟ ꓗꓪ ꓐꓰ ꓟꓽ ꓥ ꓥ ꓙꓵ ꓠꓲꓹ ꓗꓪ ꓐꓰ ꓙ ꓖꓴ ꓫꓱꓽ ꓔꓬꓹ ꓟ ꓥ ꓡꓳ꓿

ꓙꓵꓹ ꓠꓲꓹ ꓗꓪ ꓐꓰ ꓙ ꓖꓴ ꓫꓱˍ ꓕꓯ ꓠꓬ ꓟꓬꓺ ꓢꓲ ꓟꓳ ꓟ ꓓ ꓟ ꓔꓯˍ ꓟꓲ ꓟꓳ ꓓ ꓡꓳ꓿ ꓣꓳꓽ ꓟꓬꓺ ꓢꓲ ꓠꓬ ꓶˍ ꓟ ꓗꓪ ꓟꓳ ꓟ ꓓ꓾ ꓖꓳ ꓡꓱ ꓥˍ ꓟꓲ ꓙꓵ ꓠꓲ ꓠꓬ ꓟꓬꓺ ꓢꓲ ꓟꓳ ꓟꓽ ꓓ ꓟ ꓗꓪ ꓥˍ ꓟꓲ ꓟꓳ ꓪ ꓓ ꓡꓳ꓿

ꓠꓬꓲꓸ ꓠꓬꓲꓸ ꓢꓲ ꓒ ꓦꓬꓼ ꓠꓬꓲ ꓗꓪ ꓣꓳ ꓑ ꓙ ꓪ ꓟ ꓠꓬ ꓮ-ꓐ-ꓡ-ꓦ ꓠꓬ ꓪꓴ-ꓢ ꓡꓰ ꓙꓰ ꓝꓲˍ ꓟ ꓗꓪ ꓬꓲꓸ ꓙꓰ ꓡꓳ꓿ ꓮ ꓡꓰ ꓗꓪ ꓙꓰ ꓔꓬ ꓟ ꓬꓲꓸ ꓟꓽ ꓢꓷꓸ꓾ ꓬꓲꓸ ꓢꓷꓸ ꓟ ꓠꓬ ꓪꓴ-ꓢ ꓔꓯ ꓙꓵ ꓠꓹ ꓟ ꓡꓰ ꓥꓳ꓿ ꓖꓳ ꓡꓱ ꓠꓬꓲ ꓬꓲꓸ ꓠꓬ ꓬꓲꓸ ꓔꓯ ꓙꓳˍ ꓟ ꓮ ꓙꓵꓽ ꓡꓳꓻ ꓗꓷ ꓢꓲ ꓪꓴ-ꓢ ꓡꓰ ꓖꓶ ꓙ ꓟꓳˍ ꓟ ꓗꓴꓓꓼ ꓗꓪ ꓬꓲꓸ ꓙꓰ ꓡꓳ꓿ ꓟꓲ ꓕꓯ ꓢꓲ ꓗꓪ ꓮ ꓫꓵꓽ ꓓ ꓥ ꓟꓽ ꓢꓷꓸ ꓥˍ ꓟꓲ ꓪꓴ-ꓢ ꓔꓯ ꓙꓵ ꓢꓲ ꓙꓰˍ ꓡꓳ꓿ ꓙꓵꓹ ꓠꓲ ꓟꓬꓺ ꓢꓲ ꓗꓪ ꓐꓰ ꓬꓲꓸ ꓠꓬ ꓪꓴ-ꓢ ꓐꓯ ꓘꓶ ꓗꓪ ꓐꓰ ꓙꓰˍ ꓡꓳ꓿ ꓬꓲꓸ ꓟꓶ ꓕꓯ ꓠꓬ ꓪꓴ-ꓢ ꓖꓶꓽ ꓙ ꓟꓳ ꓟ ꓗꓴꓷꓼ ꓗꓪ ꓬꓲꓸ ꓛꓲ ꓬꓰ ꓟ ꓥꓳ꓿

ꓠꓬꓲꓸ ꓠꓬꓲꓸ ꓶ ꓓꓳ ꓫꓱꓹ ꓓꓳꓽ (ꓟ-ꓕꓲ 17: 1-9) ꓗꓪ ꓢꓲ ꓒ ꓬꓰ-ꓢꓴ ꓠꓬ ꓪ ꓚꓲ ꓕꓯ ꓢꓲ ꓗꓪ ꓬꓲꓸ ꓛꓳ ꓒꓯ (3) ꓣꓳ ꓟꓲꓽ ꓙꓬ ꓗꓪ ꓶ ꓒꓬꓱꓽ ꓑꓶꓺ ꓡꓰ ꓟ ꓔꓯ ꓣꓳꓽ ꓑ ꓙ ꓡꓳ꓿

ꓪꓴ-ꓢ ꓠꓬ ꓮ-ꓐ-ꓡ-ꓦ ꓔꓯ ꓘꓴˍ ꓟ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓥˍ ꓟꓲ ꓬꓲꓸ ꓛꓳ ꓒꓯ ꓐꓴ ꓔꓯ ꓘꓴ ꓔ ꓟ ꓥ ꓡꓳ꓿ ꓟꓲ ꓕꓯ ꓢꓲ ꓗꓪ ꓮ ꓫꓵꓽ ꓓ ꓥ ꓟꓽ ꓢꓷ꓾ ꓬꓲꓸ ꓪ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓙꓵ ꓢꓲ꓾ ꓦ ꓡꓱ ꓢꓲ꓾ ꓖꓼ ꓛꓳ ꓔ ꓟ ꓥ ꓡꓳ꓿

ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓬꓲꓸ ꓗ ꓠꓯ ꓢꓲ ꓖꓼ ꓛꓳ ꓔꓬꓹ ꓢꓴ ꓔꓯ ꓾ ꓠꓴ ꓪ ꓥꓪ ꓔꓯ ꓙꓵ ꓢꓲ ꓖ ꓛꓳ ꓔꓬꓹ ꓟ꓾ ꓟꓽ ꓥꓳꓽ ꓡꓰ꓾ ꓥꓪ ꓠꓬ ꓦ ꓡꓱ ꓒꓵꓽˍ ꓟ ꓪꓴ-ꓢ ꓥꓳ ꓐꓯ ꓟ ꓬꓲꓸ ꓠꓬ ꓪ ꓚꓲ ꓕꓯ ꓢꓲ ꓗꓪ ꓓꓯ ꓙꓰ ꓢꓲ ꓶꓻ ꓒꓬꓱꓽ ꓑꓶꓺ ꓟꓳꓸ ꓖꓶꓽˍ ꓟ ꓥ ꓡꓳ꓿

ꓬꓲꓼ ꓤ ꓠꓬꓲ ꓤ ꓐꓴ-ꓳ꓾ ꓦ ꓢꓯꓼ ꓪ ꓣꓴ ꓓꓴ ꓬꓰ ꓡꓯ꓾ ꓕ ꓖ ꓕꓲꓽ ꓧꓪ ꓕꓯ ꓣꓳꓽ ꓠꓬ ꓣꓳꓽ ꓟꓬꓺ ꓢꓲꓽ ꓗꓪ ꓐꓰ ꓟꓳ ꓟꓽ ꓓ ꓕꓯ꓾ ꓠꓲꓹ ꓫ ꓟꓬꓺ ꓫ ꓓꓴ ꓟꓲ ꓗꓴꓸ ꓡꓰ ꓣꓳꓽ ꓔꓯ ꓢꓴꓸ ꓔꓲꓸ ꓓ ꓕꓯ꓾ ꓟꓲꓽ ꓕꓯ ꓢꓲ ꓗꓪ ꓮ ꓫꓵꓽˍ ꓟꓲ ꓟꓳ ꓟ ꓓ ꓕꓯ ꓣꓳꓽ ꓠꓬ ꓙꓵ ꓠꓲꓹ ꓗꓪ ꓐꓰ ꓙ ꓖꓴ ꓫꓱ ꓔꓬ ꓡꓳ ꓐꓯ ꓟ ꓔꓯ ꓕ ꓟꓲ ꓡꓰ꓿

ꓣꓳ ꓙꓵꓹ ꓟ ꓙꓵ ꓠꓲ ꓠꓬ ꓣꓳ ꓔꓯ ꓮ ꓕꓯˍ ꓟꓲ ꓠꓲꓹ ꓟ ꓟꓽ ꓐꓬꓺ ꓡꓰ ꓝꓲ꓾ ꓮ-ꓐ-ꓡ-ꓦ ꓠꓬ ꓬꓲꓸ ꓮ ꓡꓰ ꓗꓪ ꓙꓰ ꓪꓸ ꓟ ꓬꓲꓸ ꓟꓽ ꓢꓷꓸ ꓢꓷꓸ ꓥˍ ꓟꓲ ꓪꓴ-ꓢ ꓔꓯ ꓙꓵˍ ꓟ ꓡꓰ ꓐꓰ ꓛꓳ ꓫꓱꓽ ꓬꓰ ꓟ ꓡꓰ ꓐꓰ ꓣꓳ ꓥ ꓟꓲ ꓪꓴ-ꓢ ꓔꓯ ꓙꓵ ꓢꓲ ꓫꓱꓹ ꓙꓰ ꓡꓯ꓿

ꓙꓵ ꓠꓲꓹ ꓟꓬꓺ ꓢꓲꓽ ꓠꓬ ꓮ ꓫꓵꓽ ꓔꓯ ꓥˍ ꓟꓲ ꓟꓳ ꓓ ꓡꓳ꓿ ꓙꓵ ꓠꓲꓹ ꓗꓪ ꓐꓰ ꓙ ꓖꓴ ꓫꓱꓽ ꓙꓰ ꓡꓯ꓿