ꓬꓰ ꓠ ꓔ ꓟ ꓟꓬꓱꓽ ꓔꓯ ꓟꓽ ꓬꓰ ꓟ ꓠꓬ꓾ ꓟꓽ ꓬꓰ ꓠ ꓔ ꓟ ꓔꓯ ꓬꓰˍ ꓟ ꓥ ꓡꓳ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓔꓯꓺ ꓥꓳꓽ ꓕꓲ ꓟ ꓣꓱꓽ ꓢꓲ ꓮ ꓡꓲ ꓐꓰ ꓬꓰ ꓙꓲ ꓙꓳˍ ꓟ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓠꓬꓲꓸ ꓠꓬꓲ ꓐꓯ ꓖꓶ ꓡ ꓔꓬ ꓟ ꓔꓯꓺ ꓥꓳꓽ ꓠꓬ ꓡ-ꓢ-ꓣꓴ ꓐꓰ ꓞꓳ ꓐꓳ ꓒ ꓕꓲ ꓣꓳ ꓟꓸ ꓟꓲꓽ ꓥ ꓡꓳ= ꓡ-ꓢ-ꓣꓴ ꓠꓬ ꓜꓽ ꓓꓴ ꓟꓽ ꓙꓳ= ꓕꓲ ꓖꓳ ꓓꓱꓽ ꓡꓱꓸꓼ ꓗꓪ ꓠꓻ ꓓꓴ ꓬꓲ ꓑ ꓓꓴ ꓠꓬꓲ ꓐꓰ ꓜ ꓓꓰꓽ ꓢꓴ ꓕꓲ ꓣꓳˍ ꓡꓰ ꓐꓰ ꓓꓹ ꓢꓲ ꓬꓲ ꓠꓬ ꓞꓳ ꓐꓳ ꓒ ꓦꓲꓻ ꓗ ꓘꓶꓽ ꓓꓴꓽ ꓒ ꓕꓲꓺ ꓗꓪ ꓔꓬ ꓢꓲ ꓠꓬꓲ ꓬꓲ ꓔꓯ ꓞꓳ ꓐꓳ ꓒ ꓬꓰ ꓙ ꓖꓶ ꓡˍ ꓟ ꓔꓯ ꓥꓳ ꓡꓳꓸ ꓔꓬ ꓡꓳ= ꓖꓳ ꓡꓱ ꓥˍ ꓟꓲ ꓞꓳ ꓐꓳ ꓒ ꓠꓬ ꓐꓵ ꓞꓶꓽ ꓐ ꓢꓽ ꓓ ꓟ ꓖꓪꓽ ꓔ ꓢꓲ ꓠꓬꓲ ꓜꓽ ꓠꓬꓲ ꓓꓳ ꓠꓬꓲ꓾ ꓜꓽ ꓡꓷꓹ ꓓꓳ ꓡꓷꓹ꓾ ꓜꓽ ꓐꓳ ꓓꓳ ꓐꓳ ꓟꓬꓽ ꓓꓹ ꓟ ꓜꓽ ꓫꓵꓽ ꓜꓽ ꓙꓰꓽ ꓮ ꓟꓬꓹ ꓗꓪ ꓐꓰ ꓟꓰ-ꓝꓳꓹ ꓕꓯꓽ ꓢꓲ ꓗꓪ ꓗꓷ ꓔ ꓢꓲ ꓗꓹ ꓛꓲꓽ ꓔꓬ ꓡꓳ= ꓖꓳ ꓕꓯ ꓞꓳ ꓐꓳ ꓒ ꓠꓬ ꓡ-ꓢ-ꓣꓴ ꓔꓯ ꓟꓳˍ ꓥ ꓟꓲ ꓟꓽ ꓟꓳ ꓗꓶˍ ꓐꓰ ꓬꓰˍ ꓡꓳ= ꓖꓳ ꓗ ꓠꓯꓸ ꓠꓬ ꓡ-ꓢ-ꓣꓴˍ ꓟꓲ ꓫꓵꓳ꓾ ꓞꓳ ꓐꓳ ꓒˍ ꓟꓲ ꓫꓵꓳ= ꓬꓲ ꓪ ꓫꓵꓻ ꓗꓷ ꓗ ꓠꓯꓸ ꓡ-ꓢ-ꓣꓴ ꓠꓬ ꓮ-ꓐ-ꓡ-ꓦ ꓡꓯꓼ ꓖꓳ ꓗꓪ ꓔꓬ ꓟꓶ ꓢꓲ ꓠꓬꓲ ꓞꓳ ꓐꓳ ꓒ ꓠꓬ ꓮ ꓔꓳꓸ ꓛꓬ ꓟꓵꓽ ꓗꓪ ꓔꓬ ꓪˍ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓔꓯꓺ ꓥꓳꓽ ꓐꓯ ꓟꓳꓸ ꓖꓶ ꓡ ꓔꓬ ꓟ ꓠꓬ ꓬꓰ ꓠ ꓔ ꓟ ꓔꓯ ꓣꓳꓽ ꓟꓽ ꓬꓰ ꓥꓳ ꓐꓯ ꓠꓬ ꓟꓽ ꓬꓰ ꓠ ꓔ ꓟ ꓔꓯ ꓣꓳ ꓬꓰ ꓪ ꓡꓰˍ ꓥꓳ= ꓖꓳ ꓡꓱ ꓠꓬ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓟ ꓞꓳ ꓐꓳ ꓒ ꓡꓰ ꓐꓰ ꓗꓷ ꓡꓰˍ ꓥꓳ= ꓧˍ ꓟ ꓙꓲˍ ꓟ꓾ ꓬꓰ ꓠ ꓔ ꓟ ꓔꓯ ꓣꓳ ꓬꓰ ꓐ ꓡˍ ꓠꓬ꓾ ꓕꓱ ꓟ ꓔꓯ ꓣꓳ ꓬꓰ ꓠ ꓗˍ ꓡꓳ= ꓖꓳ ꓡꓱ ꓟꓽ ꓥ ꓠꓬ ꓟꓽ ꓬꓰ ꓠ ꓔ ꓟ ꓔꓯ ꓣꓳ ꓬꓰ ꓗꓷ ꓟ ꓥ ꓟ ꓔꓯ ꓣꓳ ꓢꓷꓸ ꓠ ꓗˍ ꓡꓳ= ꓬꓰ ꓠ ꓔ ꓟ ꓔꓯ ꓟꓽ ꓬꓰ ꓬꓰ ꓟꓽ ꓬꓰ ꓠ ꓔ ꓟ ꓔꓯ ꓬꓰˍ ꓠꓬ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓟ ꓞꓳ ꓐꓳ ꓒ ꓡꓰ ꓐꓰ ꓗꓷ ꓡꓰˍ ꓥꓳ=

ꓖꓳ ꓡꓱ ꓠꓬꓲ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓟ ꓠꓬ ꓣꓳ ꓬꓰ ꓠ ꓔ ꓟ ꓔꓯ ꓬꓰ꓾ ꓟꓽ ꓥ ꓠꓬ ꓟꓽ ꓬꓰ ꓠ ꓔ ꓟ ꓔꓯ ꓣꓳ ꓬꓰ ꓪ ꓡꓰˍ ꓥꓳ꓾ ꓐꓯ ꓟ ꓥ ꓡꓳ= ꓡꓯ ꓫꓵ ꓝ ꓢꓲ ꓥˍ ꓟꓲ ꓞꓳ ꓐꓳ ꓒ ꓠꓬ ꓮ ꓔꓳꓸ ꓛꓬ ꓟꓵꓽ ꓗꓪ ꓮ ꓘꓶꓸ ꓫ ꓙꓵ ꓟꓶ ꓙꓵ ꓔꓬ ꓕꓯ ꓡ-ꓢ-ꓣꓴ ꓔꓯ ꓓꓰꓽˍ ꓡꓳ= ꓡ-ꓢ-ꓣꓴ ꓗꓪ ꓐꓰ ꓬꓲꓻ ꓙꓬ ꓕꓲ ꓙꓬ ꓪ ꓓꓳꓻ ꓠꓹ ꓟ ꓓꓰꓽˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲꓻ ꓙꓬ ꓠꓬ ꓬꓲ ꓔꓬ ꓗꓪ ꓟꓽ ꓑꓰ꓾ ꓟꓽ ꓛꓲ ꓬꓰ= ꓛꓬ ꓟꓵꓽ ꓗꓪ ꓮ ꓘꓶꓸ ꓫ ꓙꓵˍ ꓟ ꓪꓴꓸ ꓠꓬꓲ ꓞꓳ ꓐꓳ ꓒ ꓡꓰ ꓮ-ꓐ-ꓡ-ꓦ ꓔꓯ ꓕꓱ ꓡꓱ ꓓꓰꓽˍ ꓡꓳ= ꓡ-ꓢ-ꓣꓴ ꓔꓯ ꓟꓲ ꓠꓯ ꓗꓪ ꓝꓮꓲ ꓔꓲ ꓧꓪꓹ ꓝꓲ ꓩꓴ ꓗꓷ ꓢꓲ ꓬꓲ ꓬꓲꓼ ꓠꓬꓲ ꓐꓴ ꓔꓯ ꓬꓲ ꓮ ꓡꓲ ꓟꓬ ꓛꓲ ꓫ ꓙꓵ ꓔꓬ ꓟ ꓐꓯ ꓟꓸ ꓖꓶ ꓙꓰ ꓝꓲ꓾ ꓐꓰ ꓓꓰꓽˍ ꓡꓳ= ꓖꓳ ꓕꓯ ꓮ-ꓐ-ꓡ-ꓦ ꓡꓰ ꓬꓲ ꓚꓱꓹ ꓬꓲ ꓙꓰ ꓟꓽ ꓛꓵ꓾ ꓟꓲ ꓠꓯ ꓗꓪ ꓟꓳ-ꓫꓲ ꓡꓰ ꓐꓰ ꓟꓷꓽ ꓠꓷꓹ ꓝ ꓖꓶ ꓢꓴ ꓮ ꓟꓬꓹ ꓔꓬ ꓡꓳ= ꓟꓲ ꓠꓯ ꓗꓪ ꓔꓬ ꓟ ꓟꓷꓽ ꓠꓷꓹ ꓝ ꓒ꓾ ꓟꓸ ꓒ ꓟꓸ ꓟ ꓐꓴ ꓔꓯ ꓠ ꓠꓹ ꓠꓬ ꓬꓲ ꓪ ꓟꓴꓽ ꓗꓪ ꓗꓴꓷꓼ ꓗꓪ ꓛꓲꓺ ꓬꓰˍ ꓥꓳ꓾ ꓐꓯ ꓖꓶ ꓡꓳ=

ꓠꓲꓹ ꓠꓵˍ ꓟ ꓬꓲ ꓤ ꓠꓬꓲ ꓤ ꓐꓴꓳ꓾ ꓣꓳ ꓔꓯ ꓟꓸ ꓖꓶ ꓑꓱ ꓖꓶ ꓔꓬ ꓟ ꓟꓸ ꓒ ꓐꓴ꓾ ꓔꓲꓺ ꓒ ꓔꓲꓺ ꓟ ꓐꓴ꓾ ꓬꓲ ꓪ ꓐꓯ ꓘꓶꓽ ꓠꓬ ꓬꓲ ꓪ ꓟꓽ ꓒꓵꓽ ꓥˍ ꓟꓲ ꓬꓲ ꓪ ꓔꓯ ꓣꓱꓽ ꓔꓬ ꓟ ꓐꓹ ꓐ ꓪꓴ-ꓢ ꓠꓬ ꓮ ꓫꓵꓽˍ ꓟꓲ ꓬꓰ ꓐ ꓡˍ ꓟ ꓑꓶ ꓓꓴ ꓬꓲ ꓪ ꓗꓪ ꓐꓰ ꓣꓳ ꓔꓯ ꓟꓷꓽ ꓠꓷꓹ ꓝ ꓘꓶꓽ꓾ ꓕꓲ ꓞꓲꓼ ꓢꓯꓼ ꓟꓬ ꓟꓶ ꓠꓹ ꓟ ꓐꓯ ꓘꓶꓽ ꓣꓳ ꓔꓯ ꓐꓯ ꓟꓸ ꓖꓶ ꓡ ꓔꓬ ꓡꓳ= ꓖꓳ ꓡꓱ ꓠꓬꓲ ꓬꓲ ꓪ ꓐꓯ ꓘꓶꓽ ꓔꓯ ꓣꓳ ꓬꓲ ꓙꓲꓻ ꓠ ꓠꓹ ꓠ ꓗˍ ꓡꓳ= ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓕꓱ ꓡꓱ ꓐꓯ ꓔ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓠꓲꓹ ꓠꓵˍ ꓟ ꓬꓲ ꓤ ꓠꓬꓲ ꓤ ꓐꓴꓳ꓾ ꓬꓰ ꓠ ꓔ ꓟ ꓔꓯ ꓣꓳ ꓬꓰ ꓪ ꓡꓰ ꓠꓹ ꓟ ꓢꓯꓼ ꓕꓵꓼ= ꓖꓳ ꓡꓱ ꓥ ꓠꓬ ꓣꓳ ꓐꓱ ꓶ ꓙꓲˍ ꓥꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓪꓴ-ꓢ ꓡꓰ ꓢꓲꓺ ꓚꓰꓸ ꓔ ꓢꓴ ꓐꓯ ꓘꓶꓽ ꓔꓯ ꓥˍ ꓟꓲ ꓘꓳꓹ ꓣꓴˍ ꓟ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓘꓳꓹ ꓣꓴ ꓔꓬ ꓟ ꓥ ꓡꓳ= ꓖꓳ ꓡꓱ ꓠꓬ ꓡ-ꓢ-ꓣꓴˍ ꓡꓰ ꓐꓰ ꓪꓴ-ꓢ ꓡꓯꓼ ꓖꓳ ꓗꓪ ꓣꓳ ꓛꓲꓺ ꓬꓰˍ ꓥꓳ=