ꓬꓰ-ꓢꓴ ꓔꓬ ꓗꓪ ꓣꓳ ꓔꓯ꓾ Cꓵꓹ ꓧꓳꓽ ꓖꓶ ꓡ ꓢꓴ ꓠꓬ ꓐꓹ ꓐ ꓪꓴ-ꓢ ꓥ ꓡꓳ

ꓬꓳ-ꓦ 6ꓽ44-51

ꓥꓪ ꓔꓯ ꓝꓲ ꓩꓴ ꓡ ꓢꓴ ꓐꓹ ꓐ ꓡꓰ ꓟꓽ ꓚꓵꓹ ꓧꓳꓽ ꓡ ꓠꓬ꓾ ꓮꓽ ꓟˍ ꓟꓲ ꓥꓪ ꓔꓯ ꓡ ꓟꓽ ꓐ ꓡ꓿ ꓥꓪ ꓔꓯ ꓡ ꓢꓴ ꓔꓯ ꓠꓬ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓪ ꓥꓪ ꓡꓰ ꓢꓯꓸ ꓬꓲꓼ ꓡ ꓝꓲˍ ꓥꓳ꓿ ꓟꓷꓽ ꓠꓷꓹ ꓝꓸ ꓢꓴ ꓕꓳ ꓶ ꓗꓪ꓾ ꓬꓲ ꓪꓽ ꓮꓽ ꓙꓵ ꓠꓬ ꓪꓴ-ꓢ ꓡꓰ ꓟꓸ ꓔ ꓟ ꓗꓷ ꓡꓰˍ ꓥꓳ꓾ ꓐꓰ ꓐꓳ ꓔ ꓡꓳ꓿ ꓐꓹ ꓐ ꓔꓯ ꓑ ꓙꓽ ꓢꓲ ꓢꓳ ꓟꓶ ꓢꓴ ꓥ ꓕ ꓑꓳꓸ ꓠꓬ ꓥꓪ ꓔꓯ ꓡꓻˍ ꓥꓳ꓿ ꓪꓴ-ꓢ ꓔꓯˍ ꓐꓰ ꓡꓻ ꓢꓴ ꓖꓳ ꓕꓲ ꓣꓳ ꓟꓽ ꓥ ꓠꓬ꓾ ꓬꓲ ꓔꓯ ꓟꓳꓻ ꓠꓬꓲ ꓢꓴ ꓟꓽ ꓙꓳ꓿ ꓥꓪ ꓠꓽ ꓐꓹ ꓐ ꓔꓯ ꓟꓳꓻ ꓠꓬꓲꓳ꓿

ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓙꓵꓻ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓙꓳˍ ꓡꓳ꓿ ꓥꓪ ꓠꓽ ꓢꓯꓼ ꓟꓬ ꓑ ꓑ ꓥ ꓡꓳ꓿ 49 ꓠꓴ ꓪꓽ ꓒꓵꓽ ꓒ ꓐꓴ ꓠꓬ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓟ-ꓠ ꓑ ꓑ ꓜꓽ ꓢꓲ ꓫꓵꓻꓳ꓿ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓟ ꓑ ꓑ ꓕꓱ ꓟ ꓜꓽ ꓢꓴ ꓠꓬ ꓟꓽ ꓫꓵꓻ ꓡ꓿ ꓥꓪ ꓠꓽ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓟ ꓑ ꓑ ꓬꓲ ꓢꓯꓸ ꓥ ꓡꓳ꓿ ꓑ ꓑ ꓕꓱ ꓟ ꓜꓽ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓥꓳ꓿ ꓝꓮꓲ ꓠꓬ ꓟꓲ ꓠꓯ ꓡ ꓞꓳ ꓢꓯꓼ ꓟꓬ ꓐꓱ ꓶ꓾ ꓥꓪ ꓖꓶ ꓠꓹ ꓟ ꓑ ꓑ ꓠꓬ꓾ ꓥꓪ ꓧꓪꓽ ꓥ ꓡꓳ꓾ ꓐꓯˍ ꓡꓳ꓿

********

ꓠꓬꓲꓸ ꓠꓬꓲ ꓟ ꓶꓼ ꓓꓳꓽ ꓫꓱꓹ ꓓꓳꓽ ꓕꓳꓽ ꓶ ꓗꓪ ꓢꓲ ꓒ ꓬꓰ-ꓢꓴ ꓡꓰ ꓟꓲ ꓠꓯ ꓞꓳ ꓤ ꓔꓯ ꓚꓬꓴꓸ ꓙ ꓠꓹ ꓟ ꓟꓬꓱꓽ ꓐꓬꓱꓽ ꓘꓶꓽ ꓗꓪ ꓐꓹ ꓐ ꓪꓴ-ꓢ ꓬꓲ ꓟꓬꓱꓽ ꓬꓰ ꓚꓱꓹ ꓔꓯ ꓐꓯ ꓟꓸ ꓖꓶ ꓔ ꓡꓳ= ꓢꓲ ꓒ ꓬꓰ-ꓢꓴ ꓠꓬꓻ ꓖꓴ꓾ ꓔꓱꓹˍ ꓟ ꓐꓰ ꓢꓯꓼ ꓟꓬ ꓥ ꓕꓯ꓾ ꓢꓲ ꓒ ꓬꓰ-ꓢꓴ ꓔꓬ ꓗꓪ ꓣꓳ ꓔꓯ ꓚꓵꓹ ꓧꓳꓽ ꓖꓶ ꓡ ꓢꓴ ꓠꓬ ꓐꓹ ꓐ  ꓥ ꓡꓳ= ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓑ ꓑ ꓥ ꓟ ꓢꓲ ꓒ ꓬꓰ-ꓢꓴ ꓔꓬ ꓗꓪ ꓛꓲ ꓬꓰ ꓠꓹ ꓟ꓾ ꓐꓹ ꓐ ꓠꓬ ꓣꓳ ꓔꓯ ꓚꓵꓹ ꓧꓳꓽ ꓖꓶ ꓔꓬ ꓡꓳ= ꓢꓲ-ꓫꓬ-ꓟ-ꓦ ꓠꓬ ꓣꓳ ꓐꓴ ꓔꓯ ꓬꓰ-ꓢꓴ ꓐꓰ ꓙ ꓡꓯ ꓘꓳꓹˍ ꓟ ꓗꓪ ꓠꓬꓲ ꓟꓳꓻ ꓓꓴ ꓟꓶ ꓡꓰ ꓠꓹ ꓟ꓾ ꓢꓴ ꓔꓯ ꓬꓰ-ꓢꓴ ꓔꓬ ꓗꓪ ꓘꓴꓻ ꓧꓳꓽ ꓖꓶ ꓐ ꓡ ꓠꓹ ꓟ ꓐꓱ ꓶ꓾ ꓢꓲ-ꓫꓬ-ꓟ-ꓦ ꓠꓬ ꓐꓹ ꓐ ꓪꓴ-ꓢ ꓐꓰ ꓕꓲ ꓪꓽ ꓟꓬꓱꓽ ꓬꓰ ꓔꓬ ꓡꓳ=

ꓖꓳ ꓡꓱ ꓠꓬꓲ ꓙꓵꓻ ꓠꓲꓹ ꓐꓯ ꓟ ꓠꓬ ꓡꓯꓼ ꓫꓴ ꓕꓲ ꓟ ꓥ ꓡꓳ= ꓙꓵꓻ ꓠꓲꓹ ꓖꓳ ꓟ ꓙꓳ ꓡ ꓠꓹ ꓟ ꓣꓳ ꓚꓲꓸ ꓛꓬ ꓬꓰ ꓟꓽ ꓐ ꓡ= ꓪꓴ-ꓢ ꓠꓬ ꓬꓲ ꓐꓰ ꓙꓵꓻ ꓠꓲꓹ ꓡꓰ ꓙꓻ ꓡꓯ ꓘꓳ ꓠꓹ ꓟ ꓐꓱ ꓶ ꓬꓲ ꓠꓬ ꓢꓲ-ꓫꓬ-ꓟ-ꓦ ꓠꓯꓸꓼ ꓗꓪ ꓟꓬꓱꓽ ꓬꓰˍ ꓡꓳ= ꓢꓲ-ꓫꓬ-ꓟ-ꓦ ꓗꓪ ꓐꓰ ꓕꓲ ꓝꓸ ꓟꓬꓱꓽ ꓬꓰˍ ꓟ ꓥ ꓡꓳ= ꓪꓴ-ꓢ ꓘꓴꓻ ꓢꓯꓼ ꓔꓯ ꓣꓳ ꓓꓽ ꓔꓳꓹ ꓢꓲ ꓙꓲꓻˍ ꓟ ꓬꓰˍ ꓕꓯ ꓣꓳ ꓠꓬ ꓙꓵꓻ ꓠꓲꓹ ꓬꓲ ꓪꓴꓸ ꓔꓴˍ ꓟ ꓗꓪ ꓦꓰꓼ ꓔꓬ ꓟ ꓥ ꓡꓳ= ꓣꓳ ꓠꓬ ꓙꓵꓻ ꓠꓲꓹ ꓖꓳ ꓟ ꓔꓯ ꓪꓴꓽ ꓡ ꓟꓴ ꓡ ꓠꓹ ꓟ ꓬꓰ ꓢꓲ꓾ ꓪꓴ-ꓢ ꓐꓰ ꓮ ꓕꓯ ꓟꓲ ꓙꓻ ꓡꓯ ꓘꓳꓹˍ ꓕꓯ ꓣꓳ ꓙꓵꓻ ꓠꓲꓹ ꓠꓬ ꓪ ꓜꓲ ꓠꓯꓸ ꓡ ꓢꓲ꓾ ꓮ ꓘꓶꓸ ꓕꓶ ꓡˍ ꓡꓳ= ꓣꓳꓽ ꓠꓬ ꓪꓴ-ꓢ ꓐꓰ ꓠꓶꓽ ꓡꓰ ꓠꓹ ꓟ ꓢꓯꓼ ꓕꓵꓼˍ ꓕꓯ꓾ ꓣꓳ ꓪꓴ-ꓢ ꓔꓯ ꓙꓵꓻˍ ꓟ ꓙꓵꓻ ꓠꓲꓹ ꓥˍ ꓟꓲ ꓮ ꓘꓶꓸ ꓕꓶ ꓡˍ ꓡꓳ=

ꓣꓳ ꓠꓬ ꓣꓳ ꓠꓶꓽ ꓛꓳꓽ ꓐꓴ ꓔꓯ꓾ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓪꓴ-ꓢ ꓐꓰ ꓟꓬꓽ ꓠꓬꓲ ꓙꓻ ꓡꓯ ꓘꓳ ꓠꓹ ꓟ ꓐꓱ ꓶ ꓐꓯ ꓖꓶ ꓠꓹ ꓟ ꓣꓳ ꓔꓯ ꓶꓻ ꓙꓳˍ ꓡꓳ= ꓬꓲ ꓙꓵ ꓙꓳꓹ ꓕ ꓑꓳꓸꓼ꓾ ꓐ ꓡ ꓕ ꓑꓳꓸꓼ꓾ ꓣꓳ ꓙꓵꓻˍ ꓟ ꓡꓰ ꓣꓳ ꓠꓶꓽ ꓛꓳꓽ ꓥˍ ꓟꓲ ꓙꓵꓻ ꓠꓲꓹ ꓕꓶ ꓡꓰ ꓠꓹ ꓟ꓾ ꓪꓴ-ꓢ ꓐꓰ ꓟꓬꓽ ꓠꓬꓲ ꓠꓶꓽ ꓙꓰ ꓠꓹ ꓟ ꓐꓱ ꓶ ꓐꓯ ꓖꓶ ꓠꓹ ꓟ ꓣꓳ ꓔꓯ ꓶꓻ ꓙꓳˍ ꓟ ꓥ ꓡꓳ= ꓣꓳ ꓐꓯ ꓖꓶ ꓟꓶ ꓡꓰ ꓢꓴ ꓖꓳ ꓕꓲ ꓣꓳ ꓠꓬ ꓙꓲꓻˍ ꓟ ꓟꓬꓽ ꓠꓬꓲ ꓬꓰ ꓡ ꓕꓯ꓾ ꓬꓲ ꓠꓬ ꓙꓵꓻ ꓠꓲꓹ ꓠꓯꓸꓼ ꓗꓪ ꓮ ꓤ ꓤ ꓓꓵꓽ ꓡ ꓢꓲ꓾ ꓪꓴ-ꓢ ꓗꓴꓷꓼ ꓔꓯ ꓟꓳꓸ ꓙꓻ ꓫꓱꓽ ꓢꓴ ꓕꓲ ꓣꓳ ꓒꓬꓱꓼ ꓡˍ ꓥꓳ=

ꓥ ꓡꓳ꓾ ꓙꓵꓻ ꓠꓲꓹ ꓕꓱ ꓟ ꓠꓬ ꓣꓳ ꓔꓯ ꓟ ꓟꓽ ꓥ= ꓢꓲ-ꓫꓬ-ꓟ-ꓦ ꓠꓬ ꓙꓵꓻ ꓠꓲꓹ ꓖꓳ ꓟ ꓠꓯꓸꓼ ꓗꓪ ꓔꓬ ꓢꓲ꓾ ꓣꓳ ꓪꓴ-ꓢ ꓐꓰ ꓠꓶꓽ ꓙꓰ ꓠꓹ ꓟ ꓣꓳ ꓠꓲꓹ ꓟ ꓔꓯ ꓒꓴ ꓖꓶ ꓔꓬ ꓡꓳ= ꓖꓳ ꓟ ꓑꓶꓸ ꓓꓴ ꓣꓳ ꓐꓴ ꓠꓬ ꓚꓲꓸ ꓛꓬ ꓔꓯ ꓪꓴ-ꓢ ꓔꓬ ꓗꓪ ꓮ ꓕꓯ ꓟꓲ ꓡꓯꓼ ꓙꓱ ꓔ ꓢꓲ꓾ ꓠꓱꓸ ꓐꓯ ꓢꓴ ꓐꓴ ꓥˍ ꓟꓲ ꓖꓳ ꓡꓱ ꓬꓰ ꓠꓹ ꓟ ꓐꓯ ꓖꓶ ꓠ ꓔ ꓡꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓐꓴ ꓔꓯ ꓟꓸ ꓖꓶ ꓡ ꓔꓬ ꓡꓳ=