ꓬꓰ-ꓢꓴ ꓔꓯ ꓛꓳ ꓢꓴ ꓠꓬ ꓕꓱ ꓕꓲ ꓤꓶ ꓗꓪ ꓕꓲ ꓦꓬ ꓝꓸ꓾ ꓡ ꓠꓹ ꓟ ꓤꓶ ꓗꓪ ꓕꓲ ꓞꓲꓼ ꓕꓲ ꓑ ꓢꓲꓺ ꓡꓲꓺ ꓟ ꓢꓯꓼ ꓟꓬ ꓟꓶˍ ꓥꓳ

ꓟ-ꓘꓳ 10ꓽ28-31

ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓒꓲ-ꓕꓱ ꓡꓰ ꓬꓰ-ꓢꓴ ꓔꓯ ꓥꓪ ꓠꓴꓽ ꓠꓬ ꓠꓴ ꓐꓱ ꓶ ꓮ ꓫꓵˍ ꓟ ꓡꓳ ꓔ ꓬꓰ ꓗꓷꓳ= ꓥꓪ ꓠꓴ ꓤ ꓟꓶ꓾ ꓤ ꓠꓱ꓾ ꓐꓹ ꓐ ꓟꓹ ꓟ꓾ ꓮ ꓙꓵꓽ ꓔꓯ ꓡꓳ ꓗꓷ ꓢꓲ ꓠꓴ ꓗꓸ ꓠꓯꓸ ꓢꓲꓺ ꓗꓪ ꓖꓼ ꓛꓳ ꓗꓷꓳ= ꓥꓪ ꓠꓴ ꓠꓬ ꓮ ꓫꓵꓽ ꓟꓶˍ ꓡ꓾ ꓐꓰ ꓬꓰ-ꓢꓴ ꓔꓯ ꓠ ꓠꓬꓲˍ ꓡꓳ= ꓬꓰ-ꓢꓴ ꓡꓰ ꓥꓪ ꓗꓸ ꓠꓯꓸ ꓛꓳ ꓢꓴ ꓐꓴ ꓠꓬ ꓮ ꓟꓶ ꓠꓴ ꓪ ꓡꓳ ꓔ ꓬꓰ ꓗꓷ ꓟ ꓕꓯꓽ ꓢꓲ ꓕꓲ ꓦꓬ ꓝꓸ ꓟꓶˍ ꓥꓳ= ꓟꓽ ꓟꓶ ꓐꓰ ꓟꓽ ꓗꓷ ꓡꓰ꓾ ꓐꓰ ꓐꓯ ꓟꓸ ꓖꓶˍ ꓡꓳ=

ꓣꓳ ꓤꓶ ꓗꓪ ꓒꓲ-ꓕꓱ ꓡꓰ ꓐꓰ ꓕꓲ ꓖ ꓕꓲ ꓧꓪꓹ ꓓꓵꓽ ꓙ ꓟꓶ ꓗꓴˍ ꓡꓳ= ꓣꓳ ꓠꓬ ꓬꓰ-ꓢꓴ ꓐꓱ ꓶ ꓾ ꓥ ꓠꓬ꓾ ꓪꓴ-ꓢ ꓐꓱ ꓶ ꓮ ꓫꓵꓽˍ ꓟꓲ ꓬꓰ ꓔꓬ ꓥˍ ꓟꓲ꓾ ꓣꓳ ꓬꓰ ꓔꓬ ꓟ ꓠꓬ ꓬꓲꓸ ꓠꓬ ꓬꓲ ꓬꓰ ꓢꓲꓺ ꓟꓽ ꓙꓳ ꓐꓯ ꓢꓲ ꓓꓵꓽ ꓙ ꓟꓶ ꓔꓬ ꓗꓴˍ ꓡꓳ= ꓠꓱꓸ ꓐꓯꓼ ꓢꓴ ꓡꓰ ꓐꓰ ꓜꓽ ꓠꓲꓹ ꓫꓵˍ ꓟꓲ ꓣꓳ ꓟꓽ ꓜꓽ ꓪ= ꓙꓰ ꓠꓲꓹ ꓫꓵˍ ꓟꓲ ꓟꓽ ꓪ ꓙꓰ= ꓮ ꓡꓲꓳ ꓐꓯ ꓠꓬ ꓣꓳ ꓠꓽ ꓘ-ꓣꓲ-ꓢ-ꓔꓴ ꓢꓲꓺ ꓤ ꓥ ꓟ ꓪꓴꓸ ꓠꓬꓲ ꓪꓴ-ꓢ ꓐꓯ ꓘꓶꓽ ꓠ ꓠꓹ ꓪˍ ꓟ ꓑꓶꓸ ꓓꓴ ꓝꓴꓲꓸ ꓬꓰ ꓟꓽ ꓓ=

ꓕꓱ ꓟ ꓔꓯ ꓣꓳ ꓠꓬ ꓕꓲ ꓖ ꓕꓲ ꓧꓪꓹ ꓪꓴ-ꓢ ꓔꓯ ꓟꓽ ꓙꓵꓻ ꓢꓴ ꓐꓴ ꓠꓬ ꓗꓹ ꓛꓲꓽ ꓔꓬ ꓡꓳ= ꓬꓲ ꓪ ꓠꓲꓹ ꓫꓵˍ ꓟ ꓔꓯ ꓬꓰ ꓪ ꓓꓹ ꓡꓳ= ꓖꓳ ꓡꓱ ꓥˍ ꓟꓲ ꓪꓴ-ꓢ ꓔꓯ ꓙꓵꓻ ꓔꓬ ꓟ ꓣꓳ ꓐꓴ ꓠꓬ ꓪꓴ-ꓢ ꓙꓵꓽ ꓗ ꓔꓯ ꓛꓳ ꓢꓲ ꓣꓳ ꓠꓲꓹ ꓫꓵˍ ꓟ ꓬꓰ ꓪ ꓟꓽ ꓓ ꓐꓰ ꓓꓵꓽ ꓙ ꓛꓬ ꓡꓰ ꓗꓴˍ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓟ ꓒꓲ-ꓕꓱ ꓡꓰ ꓐꓰ ꓣꓳ ꓢꓲꓺ ꓒ ꓬꓰ-ꓢꓴ ꓔꓯ ꓠ ꓠꓬꓲˍ ꓕꓯ ꓬꓲ ꓡꓰ ꓣꓳ ꓔꓯ ꓕꓱ ꓡꓰ ꓐꓯ ꓖꓶ ꓡˍ ꓥꓳ= ꓥꓪ ꓤ ꓥꓪ ꓮꓸ ꓟꓲꓽ ꓐꓴꓳ꓾ ꓠꓴ ꓪ ꓠꓲꓹ ꓟ ꓕ ꓫꓸ= ꓠꓴ ꓪ ꓟꓶ ꓙꓲꓽ ꓙꓳˍ ꓟ ꓡꓯꓼ ꓪ ꓠꓬ ꓠꓴ ꓪ ꓬꓰ ꓔ ꓟ ꓟꓬꓱꓽ ꓥ ꓠꓬ꓾ ꓠꓴ ꓪ ꓬꓰ ꓗꓳꓸ ꓗꓷ ꓟ ꓢꓲꓸ ꓟꓽ ꓞꓲ ꓕꓲ ꓦꓬ ꓝꓸ ꓠꓴ ꓪ ꓟꓶˍ ꓥꓳ= ꓥꓪ ꓖꓶˍ ꓟ ꓗꓹ ꓛꓲ ꓓꓴ ꓠꓬ ꓠꓴ ꓪ ꓧꓪ ꓔ ꓟ ꓕꓯꓽ ꓢꓲ ꓮ ꓟꓬꓹ ꓪꓴꓽˍ ꓟ ꓑꓶꓸ ꓓꓴ꓾ ꓥꓪ ꓖꓶˍ ꓟ ꓔꓯ ꓮ ꓟꓶ ꓠꓴ ꓪ ꓢꓷꓸ ꓟꓽ ꓐ ꓡ ꓢꓰꓽ= ꓖꓳ ꓡꓱ ꓥˍ ꓟꓲ ꓕꓲ ꓞꓲꓼ ꓕꓲ ꓑ ꓢꓲꓺ ꓡꓲꓺ ꓟ ꓢꓯꓼ ꓟꓬ ꓠꓴ ꓪ ꓘꓳꓹ ꓣꓴ ꓒꓵꓽ ꓡˍ ꓕꓯ ꓠꓴ ꓪ ꓢꓷꓸ ꓥꓳ ꓐꓰ ꓣꓳ ꓔꓯ ꓬꓲ ꓡꓰ ꓐꓯ ꓖꓶ ꓡˍ ꓥꓳ=

ꓠꓬꓲ ꓠꓬꓲ ꓗꓪ ꓬꓰ-ꓢꓴ ꓠꓬ ꓬꓲꓸ ꓗꓸ ꓠꓯꓸ ꓢꓲꓺ ꓛꓳ ꓢꓴ ꓠꓬ ꓮ ꓡꓰ ꓥ ꓟ꓾ ꓬꓲ ꓔꓯ ꓛꓳ ꓢꓴ ꓠꓬ ꓮ ꓫꓵꓽ ꓟꓶˍ ꓐꓯ ꓟ ꓫꓬꓽ ꓫꓬꓽ ꓡꓰ ꓐꓯ ꓖꓶ ꓔ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓲꓹ ꓟ ꓕꓽ ꓙꓬ ꓡꓯ= ꓣꓳ ꓠꓬ ꓟꓲ ꓠꓯ ꓕꓱ ꓟ ꓗꓪ ꓪꓰ ꓤ ꓟꓳ ꓔꓬ ꓟ ꓑꓶꓸ ꓓꓴ ꓕꓲ ꓠꓬꓲ ꓙꓳˍ ꓠꓬ ꓟꓲ ꓠꓯ ꓗꓪ ꓐꓰ ꓓꓳ ꓙꓰˍ ꓕꓯ ꓠꓽ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰˍ ꓥꓳ= ꓟꓴꓽ ꓗꓪ ꓗꓴꓷꓼ ꓗꓪ ꓣꓳ ꓕꓲ ꓞꓲꓼ ꓕꓲ ꓑ ꓔꓬ ꓬꓰˍ ꓥꓳ ꓐꓯ ꓟ ꓔꓯ ꓬꓰ-ꓢꓴ ꓡꓰ ꓣꓳ ꓔꓯ ꓠꓬꓲꓸ ꓠꓬꓲ ꓐꓯ ꓖꓶ ꓔ ꓡꓳ=

ꓝꓮꓲ ꓠꓬꓲꓸ ꓠꓬꓲ ꓣꓳ ꓔꓯ ꓢꓯꓼ ꓖꓶ ꓡˍ ꓟ ꓠꓬ ꓮ ꓟꓶ ꓠꓴ ꓪ ꓥꓪ ꓐꓯ ꓘꓶꓽ ꓠ ꓠꓹ ꓕꓯ꓾ ꓥ ꓠꓬ ꓶꓼ ꓓꓳ ꓫꓱꓹ ꓓꓳ ꓐꓱ ꓶ ꓠꓴ ꓪ ꓢꓯꓼ ꓕꓵꓼˍ ꓕꓯ꓾ ꓟꓲ ꓠꓯ ꓗꓪ ꓠꓴ ꓪ ꓮ ꓫꓵꓽˍ ꓟꓲ ꓟꓽ ꓟꓶ ꓐꓰ ꓠꓱꓸ ꓐꓯ ꓡ ꓞꓳ ꓡꓰ ꓡꓳꓸ ꓟꓳˍ ꓟꓲ ꓠꓲꓹ ꓟ ꓕ ꓫ= ꓠꓴ ꓪ ꓟꓶ ꓙꓲ ꓙꓳˍ ꓟ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓡꓰꓽ ꓟꓽ ꓥ= ꓟꓲ ꓠꓯ ꓗꓪˍ ꓟꓲ ꓕꓲ ꓦꓬ ꓝꓸ ꓟꓶ ꓥꓳ꓾ ꓐꓰ ꓣꓳ ꓔꓯ ꓐꓯ ꓖꓶ ꓔꓬ ꓡꓳ=

ꓖꓳ ꓡꓱ ꓠꓬꓲ ꓚꓳ ꓡꓳ ꓚꓳ ꓫꓵ ꓐꓴ ꓔꓯ ꓣꓳ ꓡꓳꓸ ꓠꓬꓲˍ ꓠꓬ ꓪꓴ-ꓢ ꓟꓬꓱꓽ ꓬꓰ ꓢꓴ꓾ ꓪꓴ-ꓢ ꓟꓬꓱꓽ ꓔꓯ ꓪ ꓙꓲ ꓢꓯꓼ ꓕꓵꓼ ꓢꓴ ꓠꓬ ꓮ ꓘꓶꓸ ꓢꓯꓼ ꓙꓳ ꓢꓲ꓾ ꓬꓲ ꓪ ꓦꓲꓻ ꓗꓪ ꓢꓲꓺ ꓡꓲ ꓟ ꓙꓳ ꓢꓲ ꓠꓬꓲ꓾ ꓜꓽ ꓓꓴ ꓓꓳ ꓓꓴ ꓐꓱ ꓶ ꓫꓸ ꓟꓽ ꓛꓵ ꓛꓵ ꓐꓰ ꓟꓶ ꓜꓽ ꓟꓶ ꓓꓳ ꓟꓶ ꓖꓪꓽ ꓔꓬ ꓟ ꓣꓳ ꓟꓳ ꓪˍ ꓡꓳ ꓟꓽ ꓥ ꓡ= ꓕꓱ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓡꓰ ꓪꓵꓼ ꓔ ꓟ ꓪꓵꓼ ꓘꓶꓽ ꓥ ꓡꓳ=

ꓖꓳ ꓡꓱ ꓠꓬꓲ ꓬꓰ-ꓢꓴ ꓔꓯ ꓙꓵꓻ ꓢꓲ꓾ ꓬꓲ ꓠꓬ ꓗꓶꓸ ꓟꓽ ꓗꓴꓸ ꓟ ꓪꓴ-ꓢ꓾ ꓔꓱꓹ ꓚꓵˍ ꓟ ꓪꓴ-ꓢ ꓥ ꓟ ꓑꓶꓸ ꓓꓴ ꓬꓲ ꓔꓯ ꓮ ꓕꓯˍ ꓟꓲ ꓙꓵꓻ ꓔ ꓢꓲ ꓟꓲ ꓠꓯ ꓗꓪ ꓬꓲꓸ ꓝꓸ ꓕꓲ ꓦꓬ ꓡꓳꓹ ꓬꓰˍ ꓗꓪ ꓬꓲꓸ ꓟꓶꓽ ꓗꓪ ꓕꓲ ꓞꓲ ꓕꓲ ꓑ ꓢꓲꓺ ꓡꓲꓺ ꓟ ꓢꓯꓼ ꓟꓬ ꓟꓶ ˍ ꓥꓳ꓾ ꓐꓯ ꓟ ꓔꓯ ꓙꓵꓻ ꓔ ꓢꓲ ꓛꓳ ꓫꓱꓽˍ ꓕꓯ ꓣꓳ ꓠꓬ ꓢꓯꓼ ꓪ ꓙꓳ ꓙꓳ ꓡꓰꓽ ꓬꓰ ꓐ ꓡˍ ꓥꓳ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓟ ꓥ ꓡꓳ=