ꓬꓰ-ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓑ ꓑ ꓥ ꓡꓳ꓾

ꓟꓲ ꓠꓯ ꓗꓪ ꓟ ꓞꓳ ꓤ ꓥ ꓕ ꓑꓳꓸꓼ ꓠꓬ ꓗꓹ ꓛꓲˍ ꓟ ꓔꓯ ꓡꓰꓽ ꓢꓲꓼˍ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓮ ꓕꓯ ꓟꓲ ꓗꓹ ꓛꓲꓽ ꓓꓴ ꓔꓯ ꓢꓲꓼ ꓔꓬ ꓡꓳ= ꓖꓳ ꓡꓱ ꓢꓲ ꓕꓲ ꓠꓬꓲ ꓗꓸ ꓠꓯꓸ ꓕꓲ ꓠꓬꓲ ꓗꓹ ꓛꓲ ꓓꓴ ꓔꓯ ꓡꓰꓽ ꓧꓪ ꓔꓬ ꓡꓳ= ꓟꓷꓽ ꓠꓷꓹ ꓗꓪ ꓐꓰ꓾ ꓟꓬ ꓢꓲꓽ ꓗꓪ ꓐꓰ꓾ ꓠꓲꓹ ꓟ ꓗꓪ ꓐꓰ ꓗꓹ ꓛꓲ ꓓꓴ ꓔꓯ ꓧꓪˍ ꓡꓳ= ꓖꓳ ꓡꓱ ꓠꓬꓲ ꓞꓳ ꓤ ꓮ ꓟꓬꓹ ꓠꓬ ꓕꓯꓽ ꓢꓲ ꓗꓪ ꓟ ꓗꓹ ꓛꓲ ꓓꓴ ꓔꓯ ꓡꓰꓽ ꓧꓪ ꓢꓲ ꓠꓲꓹ ꓟ ꓠꓯꓸꓼ ꓗꓪ ꓦ ꓡꓽ ꓡꓽ ꓠꓲꓹ ꓟ ꓟꓽ ꓐꓲ ꓐꓲ ꓓꓹ ꓡꓳ= ꓠꓯ ꓬꓲꓻ ꓗꓪ ꓟ ꓬꓲꓻ ꓙꓬ ꓔꓯ ꓓꓳ ꓗꓷ ꓠꓬ ꓮ ꓘꓶꓸ ꓓꓳ ꓮ ꓘꓶꓸ ꓢꓲꓼ ꓡˍ ꓟ ꓔꓯ ꓫꓱꓸˍ ꓡꓳ ꓟꓽ ꓥ ꓡ=

ꓕꓱ ꓟˍ ꓡꓰ ꓐꓰ ꓣꓳ ꓟꓲ ꓠꓯ ꓗꓪ ꓗꓹ ꓛꓲ ꓓꓴ ꓧꓪˍ ꓕꓯ ꓪꓴ-ꓢ ꓗꓪ ꓐꓰ ꓟꓽ ꓥ ꓐꓭˍ ꓠꓬ꓾ ꓠꓯ ꓬꓲꓻ ꓗꓪ ꓟ ꓬꓲꓻ ꓙꓬ ꓓꓳ ꓔꓬ ꓟ ꓔꓯ ꓫꓱꓸˍ ꓡꓳ= ꓮ ꓘꓶꓸ ꓓꓳ ꓮ ꓘꓶꓸ ꓢꓲꓼ꓾ ꓪ ꓙꓲ ꓙꓳ ꓪ ꓙꓲ ꓟꓶ ꓠꓲꓹ ꓫꓵˍ ꓟ ꓔꓯ ꓫꓱꓸˍ ꓡꓳ= ꓖꓳ ꓡꓱ ꓠꓬꓲ ꓞꓳ ꓤ ꓤꓶꓻ ꓗꓪ ꓪꓴ-ꓢ ꓡꓰ ꓖꓶ ꓔ ꓟ ꓗꓹ ꓛꓲꓽ ꓓꓴ ꓔꓯ ꓮ ꓡꓰ ꓗꓪ ꓧꓪ ꓠꓯꓹ ꓡ꓾ ꓐꓯˍ ꓟ ꓔꓯ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓡ ꓗꓪ ꓫꓬꓽ ꓫꓬꓽ ꓡꓰꓽ ꓟꓳꓸ ꓖꓶ ꓔ ꓡꓳ=

ꓬꓰ-ꓢꓴ ꓡꓰ꓾ ꓥꓪ ꓠꓬ ꓢꓯꓼ ꓟꓬ ꓑ ꓑ ꓥ ꓡꓳ= ꓥꓪ ꓔꓯ ꓡ ꓢꓴ ꓠꓬ ꓕꓲ ꓞꓲꓼ ꓟꓽ ꓦꓰꓼ ꓟꓷꓼ ꓡ꓾ ꓐꓰ ꓬꓲ ꓚꓲ ꓛꓬ ꓡꓰ ꓐꓯ ꓔ ꓡꓳ= ꓕꓱ ꓟ ꓡꓰꓽ ꓟꓽ ꓞꓲ ꓬꓰ-ꓢꓴ ꓡꓰ ꓢ-ꓟ-ꓡꓲ ꓤ ꓟꓶ ꓤ ꓐꓰ ꓫꓸ ꓕꓱˍ ꓕꓯ꓾ ꓥꓪ ꓖꓶˍ ꓟ ꓬꓲꓻ ꓙꓬ ꓓꓳ ꓗꓷ ꓠꓬ ꓕꓲ ꓞꓲꓼ ꓟꓽ ꓢꓲꓼ ꓡ꓾ ꓐꓰ ꓐꓯ ꓔ ꓡꓳ= ꓕꓱ ꓟ ꓠꓬ ꓬꓲ ꓫꓵꓽ ꓬꓲ ꓧꓪꓽ ꓔꓯ ꓖꓶ ꓔ ꓟ ꓬꓰ-ꓢꓴ ꓠꓬ ꓣꓳ ꓗꓹ ꓛꓲ ꓓꓴ ꓥ ꓡꓳ꓾ ꓐꓯˍ ꓟ ꓔꓯ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡ ꓔꓬ ꓟ ꓥ ꓡꓳ=

ꓣꓳ ꓠꓲꓹ ꓟ ꓠꓯꓸꓼ ꓗꓪ ꓬꓰ-ꓢꓴ ꓬꓲ ꓚꓲ ꓛꓬ ꓡꓰ ꓫꓬꓹ ꓔ ꓟ ꓔꓬꓹ ꓖꓴ ꓕꓲ ꓟ ꓙꓳˍ ꓡꓳ=ꓔꓬ ꓖꓴ ꓖꓳ ꓟ ꓘꓴꓽ ꓗꓪ ꓬꓰ-ꓢꓴ ꓟꓽ ꓔꓬ ꓠꓬ ꓠꓱꓸ ꓐꓯ ꓗꓹ ꓛꓲ ꓓꓴ ꓮ ꓡꓲ ꓟꓬ ꓧꓳꓽˍ ꓥ ꓟꓲ ꓦ ꓡꓽ ꓡꓽ ꓗꓹ ꓥꓳ= ꓟꓽ ꓐꓲ ꓙꓲꓼ ꓙꓲꓼ ꓓꓹ ꓥꓳ= ꓗꓹ ꓛꓲ ꓓꓴ ꓔꓯ ꓮ ꓘꓶꓸ ꓧꓪ ꓮ ꓘꓶꓸ ꓟꓽ ꓟꓶ ꓐꓰ ꓗꓹ ꓥꓳ=

ꓙꓲꓻ ꓫꓬ ꓓꓴ Augustine ꓔꓯ ꓡꓳꓸ ꓠꓬꓲ ꓡꓯ= ꓬꓲ ꓞꓲ ꓤꓶꓻ ꓡꓱꓸꓼ ꓗꓪ ꓗꓹ ꓛꓲ ꓓꓴ ꓔꓯ ꓡꓰꓽ ꓧꓪ ꓢꓲ ꓞꓳ ꓙꓳ ꓔꓬ ꓥ ꓟꓲ꓾ ꓬꓲ ꓠꓲꓹ ꓟ ꓠꓯꓸꓼ ꓗꓪ ꓔꓱꓹ ꓜꓳꓽˍ ꓟ ꓗꓹ ꓛꓲ ꓓꓴ ꓔꓯ ꓬꓲ ꓧꓪꓺ ꓟꓽ ꓟꓶ= ꓕꓲ ꓠꓬꓲ ꓙꓳˍ ꓠꓬ ꓬꓲ ꓡꓰ ꓬꓰ-ꓢꓴ ꓔꓯ ꓧꓪ ꓟꓶ ꓡꓰ ꓢꓲ꓾ ꓳ ꓪꓴ-ꓢꓺꓳ꓾ ꓮ ꓫꓵꓽ ꓪꓴꓸ ꓠꓬꓲ ꓥꓪ ꓠꓴ ꓔꓯ ꓠꓯꓼ ꓠꓯꓼ ꓟꓽ ꓢꓷꓸ ꓡ= ꓮ ꓟꓶ ꓥꓪ ꓠꓲꓹ ꓟ ꓠꓬ ꓠꓴ ꓠꓯꓸꓼ ꓗꓪ ꓐꓲ ꓙꓲꓼ ꓡꓰꓳ꓾ ꓐꓰ ꓐꓯ ꓔ ꓡꓳ=

ꓣꓳ ꓤꓶꓻ ꓗꓪ ꓥˍ ꓟꓲ ꓬꓰ-ꓢꓴ ꓟꓽ ꓔꓬ ꓠꓬ ꓠꓱꓸ ꓠꓯ ꓮ ꓡꓲ ꓗꓪ ꓙꓰ ꓢꓲ ꓗꓹ ꓛꓲ ꓓꓴ ꓧꓪˍ ꓥ ꓟꓲ꓾ ꓟꓽ ꓗꓹ ꓛꓲ ꓡ= ꓕꓲ ꓙꓰꓽ ꓬꓰ ꓗꓷ ꓠꓬ ꓠꓬꓲꓽ ꓙꓰꓽ ꓣꓱꓽ ꓞꓹ ꓡ ꓢꓲ꓾ ꓠꓬꓲꓽ ꓙꓰꓽ ꓬꓰ ꓗꓷ ꓠꓬꓲ ꓢꓽ ꓙꓰꓽ ꓣꓱꓽ ꓞꓹ ꓡ꓾ ꓢꓽ ꓙꓰꓽ ꓬꓰ ꓗꓷ ꓠꓬ ꓡꓲꓺ ꓙꓰꓽ ꓣꓱꓽ ꓞꓹ ꓡ ꓗꓷ ꓡꓰˍ ꓥꓳ= ꓕꓱ ꓟ ꓠꓬ ꓮ ꓕꓯˍ ꓟꓲ ꓐꓲ ꓙꓲꓼ ꓡ ꓟꓽ ꓘꓴ= ꓖꓳ ꓡꓱ ꓥ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓟꓳ ꓡꓰ ꓢꓴ꓾ ꓬꓰ-ꓢꓴ ꓖꓶ ꓡˍ ꓟ ꓢꓲꓺ ꓡꓲꓺ ꓟ꓾ ꓬꓰ-ꓢꓴ ꓖꓶ ꓡˍ ꓟ ꓬꓲꓸ ꓫꓵꓽ ꓬꓲꓸ ꓧꓪꓽ ꓔꓯ ꓜꓽ ꓓꓳ ꓢꓴ ꓐꓴ ꓠꓬ ꓠꓲꓹ ꓟ ꓠꓯꓸꓼ ꓗꓪ ꓗꓹ ꓛꓲ ꓢꓲ ꓠꓬꓲ꓾ ꓟꓲ ꓙꓬꓼ ꓙꓰˍ ꓟ ꓗꓪ ꓢꓯꓼ ꓪ ꓙꓳ ꓡˍ ꓥꓳ꓾ ꓐꓰ ꓠꓬꓲꓸ ꓠꓬꓲ ꓟꓸ ꓟꓲ ꓗꓪ ꓣꓳ ꓔꓯ ꓐꓯ ꓟꓳꓸ ꓖꓶ ꓔꓬ ꓡꓳ=

ꓢꓲꓽ ꓫꓬ ꓕꓳ ꓶ ꓬꓲꓸ ꓪꓴꓸ ꓕꓲ ꓕꓱ ꓗꓪ ꓠꓬ꓾ ꓙꓲꓻ ꓫꓬ ꓢꓴ Steven ꓠꓬ ꓬꓰ-ꓢꓴ ꓐꓱ ꓶ ꓢꓷꓸ ꓙ ꓟꓳ ꓙˍ ꓡꓳ= ꓢꓴ ꓡꓰ ꓬꓲ ꓔꓯ ꓡꓳꓺ ꓓꓰ ꓐꓰ ꓡꓳꓸˍ ꓥ ꓟꓲ ꓬꓲ ꓠꓬ ꓙꓳꓺ ꓛꓱꓽˍ ꓟ ꓟꓽ ꓙꓳ ꓙꓳ ꓐꓰ꓾ ꓟꓴꓽ ꓗꓪ ꓗꓴꓷꓼ ꓒꓴ ꓓꓹ ꓟ ꓔꓯ ꓥꓪ ꓟꓳˍ ꓡꓳ= ꓪꓴ-ꓢ ꓤ ꓔꓲ ꓠꓬ ꓐꓹ ꓐ ꓡꓯꓽ ꓙ ꓗꓪ ꓠꓬꓲ ꓠꓸ ꓔꓬ ꓡꓳ꓾ ꓐꓰ ꓐꓯ ꓒꓬꓱꓻ ꓗꓷꓳ= ꓕꓱ ꓟ ꓠꓬ ꓬꓰ-ꓢꓴ ꓠꓬ ꓪꓴ-ꓢ ꓥ ꓢꓲ꓾ꓠꓱꓸ ꓐꓯ ꓠꓬ ꓪꓴ-ꓢ ꓟꓽ ꓥ ꓟ ꓔꓯ ꓐꓯ ꓟꓳꓸ ꓖꓶ ꓔꓬ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓬꓰ-ꓢꓴ ꓡꓰ ꓬꓲ ꓚꓲ ꓛꓬ ꓡꓰ ꓥꓪ ꓠꓬ ꓢꓯꓼ ꓟꓬ ꓑ ꓑ ꓥ ꓡꓳ= ꓥꓪ ꓔꓯ ꓜꓽ ꓢꓴ ꓠꓬ ꓕꓲ ꓞꓲꓼ ꓟꓽ ꓦꓰꓼ ꓟꓷꓼ ꓡ꓾ ꓐꓰ ꓐꓯ ꓔ ꓡꓳ= ꓖꓳ ꓕꓯ ꓬꓴ-ꓔ ꓡ ꓞꓳ ꓐꓴ ꓡꓰ ꓑ ꓑ ꓕꓱ ꓟ ꓥꓪ ꓠꓴꓽ ꓔꓯ ꓮ ꓕꓯˍ ꓟꓲ ꓖꓶ ꓡꓯ꓾ ꓐꓰ ꓬꓰ-ꓢꓴ ꓔꓯ ꓓꓰꓽ ꓔ ꓡꓳ=

ꓮ ꓟꓶ ꓘ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓠꓬ ꓬꓰ-ꓢꓴ ꓬꓲꓸ ꓫꓵꓽ ꓬꓲꓸ ꓧꓪꓽ ꓔꓯ ꓜꓽ ꓪˍ ꓟ ꓑꓶꓸ ꓓꓴ ꓕꓱ ꓟ ꓠꓬ ꓪꓴ-ꓢ ꓚꓵꓺ ꓚꓵꓺ ꓡꓰ ꓫꓬꓹ ꓔ ꓟ ꓬꓲꓸ ꓫꓵꓽ ꓬꓲꓸ ꓧꓪꓽ ꓥ ꓟ ꓪꓴꓸ ꓠꓬꓲ ꓒꓵꓽ ꓒꓵꓽ ꓡꓰꓽ ꓘꓳꓹ ꓣꓴ ꓠꓹ ꓟ ꓬꓳꓸ ꓚꓵˍ ꓡꓳ= ꓠꓲꓹ ꓟ ꓠꓯꓸꓼ ꓗꓪ ꓕꓲ ꓞꓲ ꓕꓲ ꓑ ꓗꓹ ꓛꓲ ꓟ ꓔꓯ ꓟꓶ ꓠꓲꓹ ꓫꓵˍ ꓥꓳ ꓐꓯ ꓠꓬ ꓬꓰ-ꓢꓴ ꓔꓯ ꓧꓪ ꓠꓯꓹ ꓡꓳ= ꓠꓱꓸ ꓐꓯ ꓬꓲꓼ ꓡ ꓓꓴ ꓓꓳ ꓫꓵꓽ ꓓꓳ ꓙꓰꓽ ꓗꓪ ꓟꓽ ꓓꓹ= ꓢꓲꓺ ꓡꓲꓺ ꓟ ꓠꓬ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓓꓹ ꓡꓳ=

ꓖꓳ ꓡꓱ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓔꓬ ꓖꓴ ꓖꓶ ꓢꓲ ꓬꓲ ꓡꓰ ꓖꓶ ꓡˍ ꓟ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓑ ꓑ ꓔꓯ ꓗꓹ ꓛꓲꓽ ꓛꓲꓽ ꓡꓰ ꓘꓳꓹ ꓣꓴ ꓢꓲ ꓠꓬꓲ ꓞꓳ ꓙꓳ ꓙꓰ ꓡꓯ ꓐꓰ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓡ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡ ꓔꓬ ꓟ ꓥ ꓡꓳ=

Add new comment

14 + 1 =