ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓐꓱ ꓶ ꓥꓴˍ ꓟ

ꓟꓲ ꓠꓯ ꓕꓱ ꓟ ꓗꓪ ꓟꓽ ꓓ ꓠꓲꓹ ꓫꓸ ꓟꓬ ꓫꓸ ꓟ ꓠꓬ ꓮ ꓡꓰ ꓫꓵꓽ ꓥ ꓡ? ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓥ ꓟ ꓡꓴ-ꓘ 19ꓽ41-44 ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓡꓳ ꓒꓱ ꓔꓯ ꓟꓳꓻ ꓡꓰ ꓕꓯ ꓥꓴꓻˍ ꓡꓳ= ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓔꓬ ꓟ ꓞꓳ ꓤ ꓐꓴ ꓬꓰ ꓔꓬ ꓟ ꓔꓯ ꓟꓽ ꓠꓲꓹ ꓒꓴ ꓟ ꓪꓴꓸ ꓠꓬꓲ ꓥꓴꓻˍ ꓡꓳ= ꓬꓲ ꓪ ꓐꓴ ꓠꓬ ꓪꓴ-ꓢ ꓐꓯ ꓘꓶꓽ ꓑ ꓙꓽˍ ꓟꓲ ꓟꓽ ꓙꓵꓻ꓾ ꓐꓹ ꓐ ꓪꓴ-ꓢ ꓠꓲꓹ ꓡꓶꓽ ꓔꓯ ꓟꓽ ꓛꓳ ꓛꓳ ꓬꓲ ꓪ ꓬꓰ ꓠꓲꓹ ꓫꓵˍ ꓟ ꓔꓯ ꓡꓰꓽ ꓬꓰˍ ꓡꓳ= ꓗꓸ ꓠꓯ ꓕꓯ ꓢꓲ ꓒ ꓬꓰ-ꓢꓴ ꓔꓯ ꓥˍ ꓟꓲ ꓟꓳꓻ ꓟꓽ ꓟꓵ ꓬꓰ ꓢꓲ ꓬꓲ ꓔꓯ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓕꓯꓼ ꓔꓶꓸ ꓗꓷ ꓢꓲ ꓢꓰꓼ ꓗꓷˍ ꓟ ꓔꓯ ꓢꓷꓸˍ ꓟ ꓪꓴꓸ ꓠꓬꓲ ꓬꓰ-ꓢꓴ ꓥꓴꓻˍ ꓟ ꓥ ꓡꓳ= ꓑ ꓫꓬ ꓐꓴ ꓝꓴꓲꓸ ꓬꓰˍ ꓟ ꓑꓶꓸ ꓓꓴ ꓬꓰ-ꓢꓴ ꓠꓲꓹ ꓟ ꓫꓸ ꓟ ꓥ ꓡꓳ=

ꓕꓲ ꓖ ꓕꓲ ꓧꓪꓹ ꓣꓳ ꓐꓴ ꓥˍ ꓟꓲ ꓬꓲ ꓪ ꓡꓰ ꓐꓰ ꓗꓹ ꓡꓳ= ꓣꓳ ꓐꓱ ꓶ ꓪꓴ-ꓢ ꓡꓰ ꓙꓽ ꓖꓶ ꓔ ꓟ ꓔꓯ ꓟꓳꓻ ꓠꓹ ꓟ ꓣꓳ ꓟꓬ ꓢꓶꓽ ꓔꓯ ꓚꓵꓸ ꓗꓷˍ ꓟ꓾ ꓣꓳ ꓔꓯ ꓟꓬ ꓛꓱꓼ ꓗꓷ ꓡꓰ ꓝꓲˍ ꓟ ꓣꓳ ꓓꓵꓽ ꓚꓱꓹ ꓐꓰ ꓣꓳ ꓠꓲꓹ ꓫꓸ ꓓꓴ ꓙꓳꓺ ꓓꓴ ꓪꓴꓸ ꓠꓬꓲ ꓣꓳ ꓠꓬ ꓟꓬꓻ ꓢꓶꓽ ꓟꓽ ꓟꓳꓻ ꓢꓴˍ ꓡꓰ ꓐꓰ ꓗꓷ ꓡꓰꓳ= ꓟꓬꓻ ꓛꓱꓼˍ ꓡꓰ ꓐꓰ ꓗꓷ ꓡꓰꓳ=

ꓖꓳ ꓡꓱ ꓠꓬꓲ ꓙꓲ-ꓢꓴ ꓢꓲ ꓤ ꓥ ꓟ ꓣꓳ ꓐꓴ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓠ ꓡꓳꓸ ꓠꓹ ꓟ ꓠꓲꓹ ꓡꓶꓽ ꓙꓳˍ ꓡ꓾ ꓐꓯ ꓟ ꓓꓵꓽ ꓙ ꓠꓬꓲ ꓡꓯ= ꓙꓲ-ꓢꓴ ꓢꓲ ꓤ ꓥ ꓟ ꓣꓳ ꓐꓴ ꓠꓬ ꓶꓼ ꓓꓳ ꓫꓱꓹ ꓓꓳ ꓐꓯ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓢꓯꓸ ꓔꓬ ꓟ꓾ ꓫꓵꓻˍ ꓟ꓾ ꓐꓰ ꓢꓯꓸ ꓬꓲꓼ ꓡ ꓟ꓾ ꓕꓱ ꓟ ꓮ ꓙꓵꓽ ꓔꓯ ꓐꓯ ꓔ ꓟ ꓔꓯ ꓣꓳ ꓐꓴ ꓚꓲꓸ ꓔ ꓠ ꓗꓹ ꓡꓳ= ꓕꓱ ꓟ ꓠꓬ ꓠꓱꓸ ꓐꓯ ꓙꓵꓻ ꓠꓲꓹꓔꓯ ꓟꓳꓸ ꓒꓶ ꓔ ꓟ ꓙꓵꓻ ꓠꓲꓹ ꓒꓶꓽ ꓘꓶꓽ ꓟꓽ ꓥ꓾ ꓕꓱ ꓟ ꓠꓬ ꓪꓴ-ꓢ ꓐꓯ ꓘꓶꓽ ꓥ ꓡꓳ= ꓚꓬꓴꓸ ꓙˍ ꓟ ꓐꓯ ꓘꓶꓽ ꓗꓪ ꓐꓰ ꓡꓰꓽ ꓮꓽ ꓟ ꓥˍ ꓟꓲ ꓔꓱꓹ ꓚꓵˍ ꓟ ꓢꓲꓺ ꓡꓲ ꓟ ꓐꓰ ꓪꓴ-ꓢ ꓐꓰ ꓬꓲ ꓠꓵꓻ ꓠꓲꓹ ꓔꓯ ꓢꓷꓸ ꓪˍ ꓟ ꓥ ꓡꓳ=