ꓬꓰ-ꓢꓴ ꓠꓬ ꓙꓲꓻˍ ꓟ ꓮ ꓣꓳ ꓡꓳꓸ ꓒ ꓥ ꓟ

ꓬꓳ-ꓦ 10ꓽ22-30

ꓖꓳ ꓕꓯ ꓙꓱ-ꓣꓴ-ꓢ-ꓡꓱ ꓗꓪ ꓔꓲ-ꓚꓰꓸ-ꓑꓮꓲꓬꓰˍ ꓟ ꓝꓲꓸ ꓥ ꓢꓲ ꓟꓵꓽ ꓞꓴꓽ ꓥ ꓡꓳ꓿ ꓬꓰ-ꓢꓴ ꓠꓬ ꓢꓲꓽ ꓫꓬ ꓦꓲ ꓗꓪ ꓟ ꓢꓳ-ꓡꓳ-ꓟꓳ ꓡꓽ ꓦꓲ ꓘꓶꓽ ꓗꓪ ꓫꓱꓽ ꓚꓳ ꓔꓬ ꓕꓯ꓾ ꓬꓴ-ꓔ ꓡ ꓞꓳ ꓠꓬ ꓬꓲ ꓚꓳ ꓡꓳ ꓗꓪ ꓜꓲꓼ ꓡ ꓢꓲ ꓬꓲ ꓔꓯ꓾ ꓠꓴ ꓠꓬ ꓥꓪ ꓠꓴꓽ ꓔꓯ ꓮ ꓡꓲ ꓟꓶ ꓛꓲ ꓓꓵꓽ ꓙ ꓟꓬꓽ ꓔꓬ ꓝꓲˍ ꓐꓯˍ ꓡ? ꓙꓲ-ꓢꓴ ꓖꓳ ꓕꓲ ꓣꓳ ꓟ ꓠꓴ ꓥ ꓠꓬ ꓥꓪ ꓠꓴꓽ ꓔꓯ ꓔꓱꓹ ꓔꓱꓹꓼ ꓐꓯ ꓖꓶ ꓡꓯ꓾ ꓐꓯˍ ꓡꓳ꓿ 

ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶ ꓗꓷˍ ꓟꓲ ꓠꓴ ꓪꓽ ꓟꓽ ꓙꓵꓻ꓿ ꓥꓪ ꓐꓹ ꓐ ꓟꓬꓱ ꓗꓪ ꓐꓰ ꓥꓪ ꓬꓰˍ ꓟ ꓟꓬꓱꓽ ꓡꓰ ꓥꓪ ꓐꓱ ꓶ ꓢꓷꓸ ꓙ ꓟꓳ ꓙˍ ꓡꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓬ ꓥꓪ ꓮ ꓣꓳ ꓗꓪ ꓟ ꓟꓽ ꓥ ꓠꓬꓲ ꓟꓽ ꓙꓵꓻ꓿ ꓥꓪ ꓮ ꓣꓳ ꓠꓬ ꓥꓪ ꓢꓯꓼ ꓔꓯ ꓠ ꓠꓹ ꓗꓴˍ ꓡꓳ꓿ ꓥꓪˍ ꓟꓲ ꓬꓲ ꓪꓽ ꓔꓯ ꓢꓷꓸ ꓢꓲ꓾ ꓬꓲ ꓪꓽˍ ꓟꓲ ꓥꓪ ꓔꓯ ꓛꓳ ꓡ ꓡꓳ꓿ 

ꓥꓪ ꓡꓰ ꓬꓲ ꓪꓽ ꓔꓯ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓖꓶ ꓢꓲ꓾ ꓬꓲ ꓪꓽ ꓠꓬ ꓮ ꓕꓯˍ ꓟꓲ ꓟꓽ ꓟꓶꓽ ꓬꓰ ꓢꓲ ꓠꓬꓲ꓾ ꓮ ꓟˍ ꓟꓲ ꓥꓪ ꓡꓯꓼ ꓒꓯꓹ ꓗꓪ ꓐꓰ ꓬꓲ ꓪꓽ ꓔꓯ ꓦꓴ ꓔꓯꓹ ꓙꓰ ꓟꓽ ꓐ ꓡ꓿ ꓥꓪ ꓔꓯ ꓬꓲ ꓪꓽ ꓡꓯꓼ ꓙꓱ ꓖꓶ ꓡ ꓢꓴ ꓥꓪ ꓐꓹ ꓐ ꓠꓬ ꓮꓽ ꓙꓵ ꓕꓯꓽ ꓢꓲ ꓪꓴꓽˍ ꓟ ꓥ ꓡꓳ꓿ ꓖꓳ ꓡꓱ ꓢꓲ ꓮ ꓟˍ ꓟꓲ ꓐꓹ ꓐ ꓡꓯꓼ ꓒꓯꓹ ꓗꓪ ꓐꓰ ꓬꓲ ꓪꓽ ꓔꓯ ꓦꓴ ꓔꓯꓹ ꓙꓰ ꓟꓽ ꓐ ꓡ꓿ ꓥꓪˍ ꓐꓰ ꓐꓹ ꓐ ꓠꓬ ꓕꓲ ꓣꓳˍ ꓡꓰꓽ ꓥꓳ꓾ ꓐꓯˍ ꓡꓳ꓿

*********

ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡ ꓔꓬ ꓟ ꓠꓬ꓾ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓙꓳꓺ ꓛꓱꓽ ꓓꓴ ꓮ ꓙꓵꓽ ꓗꓪ ꓐꓰ ꓗꓽ ꓔ ꓙ ꓖꓶ ꓢꓲ꓾ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓬꓲ ꓐꓲ ꓜꓲꓼˍ ꓟ ꓗꓪ ꓧꓳꓽ ꓙꓰ ꓠꓲꓹ ꓫꓵˍ ꓡꓳ= ꓬꓲ ꓢꓯꓼ ꓔꓯ ꓠ ꓠꓹ ꓝꓲ ꓠꓲꓹ ꓫꓵˍ ꓡꓳ꓾ ꓐꓯˍ ꓟ ꓣꓳꓽ ꓔꓯ ꓐꓯ ꓖꓶ ꓡ ꓔꓬ ꓡꓳ= ꓣꓳ ꓠꓬ ꓢꓯꓼ ꓟꓬ ꓙ ꓖꓴ ꓗꓪ ꓙ ꓫꓱꓽ ꓠꓹ ꓟ ꓐꓱ ꓶ ꓬꓲ ꓠꓬ ꓣꓳ ꓐꓴ ꓔꓯ ꓡꓳꓸ ꓠꓬꓹ ꓔꓬ ꓡꓳ꓾ ꓦꓴ ꓠꓬꓹ ꓔꓬ ꓡꓳ=

ꓪꓴ-ꓢ ꓐꓯ ꓘꓶꓽ ꓠ ꓠꓹ ꓟ꓾ ꓬꓲ ꓐꓯ ꓘꓶꓽ ꓠ ꓠꓹ ꓢꓲ ꓐꓯ ꓘꓶꓽ ꓖꓳ ꓟ ꓬꓲ ꓟꓸ ꓟꓲꓽ ꓔꓯ ꓙꓽ ꓜꓲꓼ ꓡꓰ ꓠꓹ ꓟ ꓐꓱ ꓶ ꓜꓲ ꓜꓲ ꓟꓵ ꓟꓵ ꓓꓵꓽ ꓙꓽ ꓚꓬꓹ ꓠꓬꓲˍ ꓟ꓾ ꓟꓽ ꓥ ꓠꓬ꓾ ꓢꓲ ꓡꓲ ꓐꓰ ꓔꓬ ꓢꓲ ꓪꓽ ꓘꓴˍ ꓟ ꓗꓪ ꓐꓰ ꓣꓳ ꓢꓲ ꓒ ꓔꓯ ꓖꓶˍ ꓟ ꓣꓳ ꓬꓲ ꓙꓵꓹ ꓠꓬ ꓮ ꓕꓯ ꓟꓲ ꓮ ꓔꓳ ꓟꓽ ꓗꓷ ꓡꓰ=

ꓪꓽ ꓘꓴˍ ꓟ ꓠꓬ ꓣꓳ ꓮ ꓣꓳ ꓡꓳꓸ ꓒ ꓥ ꓟ ꓢꓲ ꓒ ꓬꓰ-ꓢꓴ ꓐꓰ ꓬꓲ ꓮ ꓣꓳ ꓥ ꓟ ꓣꓳꓽ ꓠꓬꓲꓽ ꓗꓴꓸ ꓚꓸꓼ ꓗꓪ ꓙꓻ ꓡꓯ ꓘꓳ ꓓꓴ ꓕꓲ ꓟ ꓥ ꓢꓲ ꓠꓬꓲ꓾ ꓢꓲ ꓡꓲ ꓡꓰ ꓝꓲˍ ꓟ ꓥ ꓡꓳ=

ꓖꓳ ꓡꓱ ꓠꓬ ꓙꓲˍ ꓟ ꓮ ꓣꓳ ꓡꓳꓸ ꓒ ꓥ ꓟ ꓢꓲ ꓒ ꓬꓰ-ꓢꓴ ꓬꓲ ꓐꓯ ꓘꓶꓽ ꓔꓯ ꓠ ꓠꓹ ꓢꓲ꓾ ꓬꓲ ꓠꓲꓹ ꓡꓶꓽ ꓛꓳ ꓫꓱꓽˍ ꓟ ꓗꓪ ꓐꓰ ꓣꓳ ꓐꓴ ꓥˍ ꓟꓲ ꓙꓲꓻˍ  ꓟ ꓮ ꓣꓳ ꓒꓬꓱꓼ ꓡ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ=