ꓬꓰ-ꓢꓴ ꓠꓬ ꓚꓵ ꓚꓵ ꓛꓱꓼ ꓡꓱꓼ ꓚ ꓥ ꓟ꓾

ꓠꓬꓲꓸ ꓠꓬꓲ ꓟ ꓶ ꓓꓳ ꓫꓱ ꓓꓳ ꓕꓳ ꓶ ꓗꓪ꓾ ꓢꓲꓺ ꓒ ꓬꓰ-ꓢꓴ ꓠꓬ ꓚꓵ ꓚꓵ ꓛꓱꓼ ꓡꓱꓼ ꓚ ꓥ ꓢꓲ꓾ ꓣꓳ ꓠꓬ ꓬꓲꓸ ꓡꓯꓼ ꓗꓸ ꓥ  ꓡꓳ= ꓬꓲ ꓔꓯ ꓟꓽ  ꓠꓷꓼ ꓞꓹ ꓐꓯˍ ꓠꓬ꓾ ꓬꓲ ꓐꓰ ꓟꓽ ꓔꓬ꓾ ꓬꓲ ꓐꓰ ꓟꓽ ꓠꓷꓼ ꓓꓹ ꓠꓬ ꓮꓸ ꓫꓵꓽˍ ꓟꓲ ꓬꓰ ꓟꓽ ꓐ ꓡ ꓐꓰ꓾ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓙꓳꓺ ꓗꓽ ꓖꓶˍ ꓟ ꓟꓸ ꓟꓲꓽ ꓥ ꓡꓳ=  ꓢꓲꓺ ꓒ ꓬꓰ-ꓢꓴ ꓠꓬ ꓠꓴ ꓥꓪ ꓠꓯꓸꓼ ꓗꓪ ꓔꓬ꓾ ꓥꓪˍ ꓟꓲ ꓠꓴ ꓠꓯꓸꓼ ꓗꓪ ꓔꓬ ꓟ ꓡꓰ ꓐꓰ ꓥꓪ ꓐꓯ ꓘꓶꓽ ꓔꓯ ꓠꓴ ꓠꓲꓹ ꓟ ꓠꓯꓸꓼ ꓗꓪ ꓗꓶ ꓔ= ꓥꓪ ꓐꓯ ꓘꓶꓽ ꓔꓯ ꓠꓴ ꓠꓲꓹ ꓟ ꓠꓯꓸꓼ ꓗꓪ ꓫ ꓔ ꓢꓲ ꓛꓳ ꓫꓱꓽ= ꓖꓳ ꓡꓱ ꓬꓰˍ ꓠꓬ ꓠꓴ ꓠꓬ ꓬꓲꓸ ꓢꓶꓽ ꓮ ꓟꓬꓹ ꓓꓱꓼ ꓡˍ ꓥꓳ꓾ ꓐꓹ ꓐ ꓟꓬꓱꓺ ꓓꓳꓽˍ ꓟꓲ ꓓꓳ ꓡˍ ꓥꓳ= ꓠꓴ ꓥˍ ꓟꓲ ꓥꓪ ꓛꓳꓽ ꓒꓯꓹ ꓒꓬꓱꓼ ꓡˍ ꓥꓳ꓾ ꓐꓰ ꓬꓰ-ꓢꓴ ꓡꓰ ꓬꓳ-ꓦ ꓕꓳ ꓶ 15ꓽ1-8 ꓗꓪ ꓐꓯ ꓔ ꓡꓳ=

ꓒꓳ-ꓡꓳ ꓠꓬ ꓧꓶꓸ ꓕꓯ ꓢꓲꓺ ꓒ ꓬꓰ-ꓢꓴ ꓔꓯ ꓢꓰꓼ ꓢꓴ ꓥˍ ꓟꓲ ꓗꓸ ꓠꓯ ꓬꓰ-ꓢꓴ ꓡꓰ ꓬꓲ ꓔꓯ ꓘꓴˍ ꓟ ꓑꓶꓸ ꓓꓴ ꓬꓲ ꓠꓬ ꓬꓰ-ꓢꓴ ꓐꓯ ꓘꓶꓽ ꓠ ꓠꓹ ꓢꓲ ꓠꓲꓹ ꓟ ꓠꓯꓸꓼ ꓗꓪ ꓬꓰ-ꓢꓴ ꓐꓱ ꓶ ꓦꓲꓻ ꓫꓬ ꓔ ꓖꓶˍ ꓟ ꓑꓶꓸ ꓓꓴ꓾ ꓬꓲ ꓠꓬ ꓢꓲꓺ ꓒ ꓬꓰ-ꓢꓴ ꓐꓱ ꓶ ꓢꓷꓸ ꓙ ꓟꓳ ꓙ ꓢꓴ ꓕꓲ ꓣꓳ ꓒꓬꓱꓽ ꓡˍ ꓳ ꓐꓰ꓾ ꓢꓲꓽ ꓫꓬ ꓕꓳ ꓶ ꓬꓲ ꓪꓴꓸ ꓕꓲ ꓕꓱ ꓗꓪ ꓐꓯ ꓔ ꓡꓳ=

ꓠꓬꓲꓸ ꓠꓬꓲ ꓟ ꓟꓸ ꓟꓲ ꓠꓬꓲꓽ ꓙꓰꓽ ꓕꓲ ꓙꓰꓽ ꓗꓪ ꓥˍ ꓟꓲ ꓣꓳ ꓙꓵꓻ ꓔꓬ ꓟ ꓠꓬ꓾ ꓣꓳ ꓠꓲꓹ ꓠꓵ ꓔꓬ ꓟ ꓠꓬ ꓣꓳ ꓥꓳ ꓡꓳꓸ ꓔꓬ ꓟ ꓠꓬ꓾ ꓐꓯ ꓘꓶꓽ ꓗꓪ ꓡꓰꓽ ꓟꓷ ꓠꓷꓹ ꓗꓪ ꓐꓰ ꓡꓰꓽ ꓕ ꓬꓰ ꓡꓯ=  ꓣꓳ ꓙꓵꓻˍ ꓟ ꓡꓰ ꓐꓰ ꓛꓳ ꓫꓱꓽ ꓡꓯ= ꓠꓲꓹ ꓠꓵˍ ꓟ ꓗꓪ ꓐꓰˍ ꓟꓲ ꓟꓷ ꓠꓷꓹ ꓗꓴ ꓙꓲ ꓗꓪ ꓐꓰ ꓡꓰꓽ ꓟꓽ ꓥ ꓥ ꓧꓪ ꓖꓳ ꓓꓱ ꓗꓪ ꓐꓰ ꓛꓳ ꓫꓱꓽ ꓙꓰ ꓡꓯ ꓐꓰ ꓬꓲꓼ ꓠꓬꓲꓸ ꓖꓶ ꓡ ꓔꓬ ꓟ ꓥ ꓡꓳ=

ꓖꓳ ꓡꓱ ꓠꓬꓲ꓾ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓣꓳ ꓔꓯ ꓐꓯ ꓖꓶ ꓡˍ ꓟ ꓠꓬ ꓾ ꓬꓰ-ꓢꓴ ꓐꓯ ꓘꓶꓽ ꓠ ꓠꓹ ꓠꓹ ꓟ꓾ ꓬꓰ-ꓢꓴ ꓐꓯ ꓘꓶꓽ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓗꓶ ꓔ ꓢꓲ ꓛꓳ ꓫꓱꓽˍ ꓠꓬ ꓬꓰ-ꓢꓴ ꓬꓲ ꓛꓳ ꓒꓯꓹ ꓒꓬꓱꓼ ꓡ ꓢꓲ ꓐꓹ ꓐ ꓪꓴ-ꓢˍ ꓟꓲ ꓣꓳ ꓗꓪ ꓐꓰ ꓟꓬꓱꓺ ꓓꓳꓽ ꓓꓳˍ ꓥꓳ꓾ ꓐꓰ ꓐꓯ ꓔ ꓡꓳ=

Add new comment

10 + 1 =