ꓬꓰ-ꓢꓴ ꓠꓬ ꓠꓽ ꓠꓬꓲ ꓢꓲ ꓒꓽ ꓥ ꓟ

  ꓖꓳ ꓗꓸ ꓠꓯꓸ ꓠꓽ ꓦꓬꓼ ꓠꓬꓲ ꓗꓪ ꓬꓰ-ꓢꓴ ꓠꓬ ꓫꓪ ꓟꓲꓺ ꓗꓪ ꓐꓰ ꓗꓳꓸ ꓙꓰˍ ꓡꓳ꓿ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓦꓰꓼ ꓟꓷꓼ ꓠꓬꓲ ꓫꓪ ꓠꓱ ꓞꓷꓹ ꓜꓽˍ ꓡꓳ꓿  ꓖꓳ ꓟ ꓔꓯ ꓒ-ꓡꓲ-ꓢꓷ ꓐꓴ ꓟꓳꓻ ꓗꓷ ꓠꓬ ꓬꓰ-ꓢꓴ ꓔꓯ꓾ ꓠꓬꓲ ꓠꓹ꓾ ꓠꓴ ꓛꓳꓽ ꓒꓯꓹ ꓐꓴ ꓠꓬ ꓠꓽ ꓦꓬꓼ ꓠꓬꓲ ꓗꓪ ꓬꓰ ꓟꓽ ꓓ ꓟ ꓬꓰˍ ꓡꓳ꓾ ꓐꓯˍ ꓡꓳ꓿ ꓬꓲ ꓡꓰ ꓬꓲ ꓪꓽ ꓔꓯ꓾ ꓓ-ꓪꓵˍ ꓐꓰ ꓬꓲ ꓔꓯ ꓛꓳ ꓙꓰ ꓢꓴ ꓐꓴ ꓦꓰꓼ ꓟꓷꓼˍ ꓕꓯ꓾ ꓬꓲ ꓪꓽ ꓮ ꓡꓲ ꓬꓰ ꓗꓷ ꓟ ꓠꓴ ꓪꓽ ꓟꓽ ꓵ ꓠꓬꓲ ꓡ? ꓬꓲ ꓠꓬ ꓪꓴ-ꓢ ꓢꓲꓽ ꓫꓬ ꓦꓲ ꓗꓪ ꓓꓵꓽ ꓡꓰ ꓢꓲ꓾ ꓬꓲˍ ꓐꓰ ꓬꓲ ꓔꓯ ꓛꓳꓻ ꓢꓴ ꓐꓴ ꓠꓬ꓾ ꓔꓲ ꓒ ꓟꓽ ꓥ ꓠꓬ ꓮꓽ ꓟˍ ꓟꓲ ꓜꓽ ꓟꓽ ꓓꓻ ꓡꓳ ꓫꓵꓽ꓾ ꓲ'ꓺ ꓗꓶ ꓔ ꓟ ꓑ ꓑ ꓜꓽˍ ꓡꓳ꓿  ꓝꓮꓲ꓾ ꓔꓲ ꓒ ꓐꓴ ꓠꓬ ꓠꓽ ꓦꓬꓼ ꓠꓬꓲ ꓗꓪ ꓢꓲꓽ ꓫꓬ ꓦꓲ ꓔꓯ ꓛꓬꓻ ꓗꓷˍ ꓟꓲ ꓝꓴꓲ ꓟꓽ ꓙꓳ꓾ ꓐꓰ ꓙꓵꓽ ꓗ ꓕꓳ ꓶ ꓗꓪ ꓠꓴ ꓪꓽ ꓟꓽ ꓵ ꓠꓬꓲ ꓡ?  ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓢꓲꓽ ꓫꓬ ꓦꓲ ꓕꓯꓽ ꓢꓲ ꓪꓴꓽˍ ꓟ ꓕꓲ ꓣꓳ ꓕꓱ ꓗꓪ ꓔꓬ ꓡꓳ꓿  ꓥꓪ ꓠꓬ ꓫꓱꓸ ꓤˍ ꓟ ꓔꓯ ꓠꓵˍ ꓡꓳ꓾ ꓢꓰꓼ ꓔꓲ ꓓꓴ ꓔꓯ ꓟꓽ ꓠꓵ꓾ ꓐꓯˍ ꓟ ꓕꓱ ꓟ ꓠꓴ ꓪꓽ ꓢꓷˍ ꓕꓯ ꓠꓽ꓾ ꓝꓴꓲ ꓟꓽ ꓙꓳ ꓢꓴ ꓔꓯ ꓠꓴ ꓪꓽ ꓟꓽ ꓙꓽ ꓘꓶꓽ ꓡꓳ ꓫꓵꓽ ꓥ ꓡꓳ꓿  ꓮ ꓡꓲꓳ ꓐꓯ ꓠꓬ ꓡ-ꓞꓳ-ꓮ-ꓐꓲ ꓠꓽ꓾ ꓠꓽ ꓦꓬꓼ ꓠꓬꓲ ꓬꓲ ꓢꓲ ꓒꓽ ꓥ ꓡꓳ꓾ ꓐꓯˍ ꓡꓳ꓿