ꓬꓰ-ꓢꓴ ꓢꓯꓸ ꓬꓲꓼ ꓡ ꓟ

ꓟ-ꓡꓲ ꓠꓬ ꓢꓲꓺ ꓒ ꓬꓰ-ꓢꓴ ꓡꓱꓽ ꓜꓴ ꓗꓪ ꓙꓰ ꓢꓲ ꓢꓲꓺ ꓒ ꓬꓰ-ꓢꓴ ꓔꓯ ꓧꓪˍ ꓡꓳ= ꓡꓱꓽ ꓜꓴ ꓠꓬ ꓐꓶꓽ ꓓꓹ ꓢꓲ ꓬꓲ ꓘꓴꓽ ꓗꓪ ꓬꓰ-ꓢꓴ ꓔꓯ ꓟꓽ ꓟꓳꓻ= ꓖꓳ ꓡꓱ ꓠꓬꓲ ꓬꓲ ꓠꓬ ꓟꓬ ꓐꓲꓻ ꓞꓰꓹ ꓡꓳ= ꓥꓴꓻˍ ꓡꓳ= ꓖꓳ ꓕꓯ ꓢꓲꓺ ꓒ ꓬꓰ-ꓢꓴ ꓬꓲ ꓒ ꓕꓲꓺ ꓗꓪ ꓡ ꓢꓲ ꓤ ꓟꓶ ꓤꓽꓳ꓾ ꓠꓴ ꓮ ꓫꓵꓽ ꓪꓴꓸ ꓠꓬꓲ ꓥꓴꓻ ꓔꓬ ꓡ ꓐꓰ ꓬꓲ ꓔꓯ ꓠꓺ ꓠꓬꓲˍ ꓡꓳ= ꓤ ꓟꓶ ꓤ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓢꓲꓺ ꓒ ꓬꓰ-ꓢꓴ ꓥ ꓡꓳ꓾ ꓐꓰ ꓟꓽ ꓓꓵꓽ ꓙ= ꓢꓲꓺ ꓒ ꓬꓰ-ꓢꓴ ꓠꓬ ꓫꓵꓻꓳ꓾ ꓬꓲ ꓠꓬ ꓟꓽ ꓢꓯꓸ ꓬꓲꓼ ꓡꓻꓳ꓾ ꓐꓰ ꓓꓵꓽ ꓙꓽ ꓔ ꓡꓳ= ꓬꓲ ꓠꓬ ꓬꓰ-ꓢꓴ ꓔꓯ ꓐꓱ ꓦꓴꓻ ꓠꓬꓹ ꓢꓴ ꓥ ꓡꓳ꓾ ꓐꓰ ꓓꓵꓽ ꓙ ꓔꓬ ꓡꓳ= ꓖꓳ ꓡꓱ ꓠꓬꓲ ꓬꓲ ꓡꓰ ꓞꓳ ꓔꓲꓳ꓾ ꓠꓴꓻ ꓥꓪ ꓢꓲꓺ ꓒ ꓔꓯ ꓮ ꓡꓲ ꓗꓪ ꓗꓷ ꓔ ꓡ? ꓬꓲ ꓔꓯ ꓮ ꓡꓲ ꓗꓪ ꓗꓷ ꓔ ꓠꓬ ꓥꓪ ꓔꓯ ꓟꓳꓸ ꓖꓶ ꓡꓯ ꓐꓯ ꓖꓶˍ ꓡꓳ= ꓖꓳ ꓕꓯ ꓢꓲꓺ ꓒ ꓬꓰ-ꓢꓴ ꓡꓰ ꓟ-ꓡꓲꓸꓳ꓾ ꓐꓰ ꓘꓴˍ ꓕꓯ ꓬꓲ ꓠꓬ ꓢꓲꓺ ꓒ ꓥ ꓟ ꓢꓷꓸ ꓡꓰ ꓢꓲ ꓗꓹ ꓛꓲꓽ ꓠꓬꓲ ꓠꓲꓹ ꓒꓴ ꓠꓬꓲ ꓬꓰ-ꓢꓴ ꓔꓯ ꓪꓳ ꓫꓳꓸ ꓠꓹ ꓟ ꓬꓰˍ ꓡꓳ= ꓖꓳ ꓕꓯ ꓢꓲꓺ ꓒ ꓬꓰ-ꓢꓴ ꓡꓰ ꓥꓪ ꓔꓯ ꓕꓽ ꓕꓲꓺ ꓢꓰꓽ꓾ ꓥꓪ ꓠꓬ ꓪꓴ-ꓢ ꓔꓬ ꓗꓪ ꓟꓽ ꓛꓲꓺ ꓬꓰ ꓢꓰꓽ꓾ ꓐꓰ ꓐꓯ ꓖꓶˍ ꓟ ꓣꓳ ꓑ ꓙꓽˍ ꓡꓳ=

ꓣꓳ ꓡꓳꓸ ꓠꓬꓲˍ ꓕꓯ ꓬꓰ-ꓢꓴ ꓔꓯ ꓮ ꓡꓲ ꓘꓶ ꓛꓲꓺ ꓠꓲꓹ ꓠꓵˍ ꓟ ꓬꓲ ꓠꓵꓻ ꓠꓲꓹ ꓔꓯ ꓣꓳ ꓟꓳꓻ ꓪ ꓓꓹ ꓡꓳ= ꓬꓲ ꓠꓬ ꓢꓲꓺ ꓒ ꓬꓰ-ꓢꓴ ꓢꓯꓸ ꓬꓲꓼ ꓡ ꓟ ꓔꓯ ꓟꓽ ꓥꓳ ꓡꓳꓸ ꓔ= ꓖꓳ ꓡꓱ ꓥˍ ꓟꓲ ꓬꓲ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓮ ꓘꓶꓸ ꓠꓲꓹ ꓟ ꓐꓶꓽ ꓡꓰ ꓠ ꓛꓲꓺ ꓠꓲꓹ ꓠꓵˍ ꓟ ꓑꓶꓸ ꓓꓴ ꓬꓰ-ꓢꓴ ꓫꓵꓻ ꓗꓷ ꓥˍ ꓟꓲ ꓬꓲ ꓡꓱꓽ ꓜꓴꓻ ꓗꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓙꓰ ꓔꓬ ꓡꓳ= ꓢꓽ ꓠꓬꓲ ꓕꓲ ꓠꓬꓲ ꓗꓪ ꓠꓬ ꓧꓶꓸ ꓕꓯ ꓬꓲ ꓟꓳꓻ ꓔ ꓟ ꓡꓰ ꓟꓽ ꓥ ꓳ= ꓡꓱꓽ ꓜꓴꓻ ꓠꓬ ꓐꓶꓽ ꓓꓹ ꓢꓲ ꓢꓲꓺ ꓒ ꓬꓰ-ꓢꓴ ꓠꓬ ꓡꓱꓽ ꓜꓴꓻ ꓗꓪ ꓟꓽ ꓔꓬ ꓟ ꓔꓯ ꓟꓳˍ ꓡꓳ= ꓢꓲꓺ ꓒ ꓬꓰ-ꓢꓴ ꓠꓬ ꓢꓯꓸ ꓬꓲꓼ ꓡ ꓟ ꓔꓯ ꓬꓲ ꓟꓳꓻ ꓡꓰꓳ= ꓬꓲ ꓠꓬ ꓗꓹ ꓛꓲꓽ ꓠꓬꓲ ꓐꓰ ꓬꓲꓼ ꓙꓰ ꓢꓲ ꓢꓲꓺ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓡꓰ ꓐꓯ ꓟꓳꓸ ꓖꓶˍ ꓡꓳ= ꓢꓲꓺ ꓒ ꓬꓰ-ꓢꓴ ꓢꓯꓸ ꓬꓲꓼ ꓡ ꓟ ꓔꓯ ꓐꓯ ꓟꓳꓸ ꓖꓶˍ ꓡꓳ=

ꓖꓳ ꓡꓱ ꓠꓬꓲ ꓣꓳꓽ ꓕꓱ ꓟ ꓔꓯ ꓓꓵꓽ ꓙ ꓠꓬꓲˍ ꓕꓯ ꓟ-ꓡꓲ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓮ ꓘꓶꓸ ꓠꓲꓹ ꓠꓵˍ ꓟ ꓑꓶꓸ ꓓꓴ ꓬꓲ ꓠꓬ ꓬꓲ ꓝꓲ ꓓꓴ ꓢꓲꓸ ꓟꓽ ꓞꓲꓺ ꓬꓲ ꓠꓬ ꓧꓶꓸ ꓕꓯ ꓢꓲꓺ ꓒ ꓬꓰ-ꓢꓴ ꓔꓯ ꓪ ꓟꓳꓻ ꓡꓰꓳ= ꓬꓰ-ꓢꓴ ꓢꓯꓸ ꓬꓲꓼ ꓡ ꓟ ꓔꓯ ꓬꓲ ꓧꓶꓸ ꓕꓯ ꓪ ꓟꓳꓻ ꓡꓰꓳ= ꓬꓲ ꓠꓬ Apostle of the Apostles ꓝꓲ ꓓꓴ ꓐꓴ ꓔꓯ ꓝꓲ ꓓꓴ ꓕꓲ ꓣꓳ ꓒꓬꓱꓼ ꓡꓰꓳ= ꓢꓲꓺ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓞꓲꓺ ꓠꓬꓲꓽ ꓣꓳ ꓔꓯ ꓢꓲꓺ ꓒ ꓬꓰ-ꓢꓴ ꓓꓳꓽ ꓐꓯ ꓟꓳꓸ ꓖꓶ ꓢꓴ ꓝꓲ ꓓꓴ ꓤ ꓟꓶ ꓤ ꓒꓬꓱꓼ ꓬꓰꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓗꓹ ꓛꓲꓽ ꓛꓲꓽ ꓡꓰꓽ ꓙꓰˍ ꓟ ꓔꓯ ꓣꓳ ꓢꓷꓸ ꓪ ꓓꓹ ꓡꓳ=

ꓣꓳ ꓤꓶꓻ ꓗꓪ ꓥˍ ꓟꓲ ꓣꓳ ꓠꓬ ꓢꓲꓺ ꓒ ꓬꓰ-ꓢꓴ ꓢꓯꓸ ꓬꓲꓼ ꓡ ꓟ ꓔꓯ ꓚꓵꓺ ꓚꓵꓺ ꓙꓵˍ ꓡ꓾ ꓐꓰ ꓣꓳ ꓚꓲꓸ ꓛꓬ ꓔꓯ ꓠꓺ ꓠꓬꓲ ꓠ ꓗꓹ ꓡꓳ= ꓣꓳ ꓠꓬ ꓢꓲꓺ ꓒ ꓬꓰ-ꓢꓴ ꓢꓯꓸ ꓬꓲꓼ ꓡ ꓟ ꓙꓵˍ ꓡꓳ= ꓢꓲꓺ ꓒ ꓬꓰ-ꓢꓴ ꓚꓵꓺ ꓚꓵꓺ ꓢꓯꓸ ꓬꓲꓼ ꓡꓻꓳ= ꓬꓲ ꓠꓬ ꓡꓱꓽ ꓜꓴꓻ ꓗꓪ ꓟꓽ ꓔꓬꓳ꓾ ꓐꓯ ꓟ ꓔꓯ ꓙꓵˍ ꓕꓯ ꓠꓽ ꓣꓳ ꓠꓬ ꓠꓲꓹ ꓫ ꓟꓬ ꓫ ꓓꓴ ꓔꓳꓹ ꓜꓳꓽˍ ꓕꓯ ꓪꓴ-ꓢ ꓔꓬ ꓡꓳ꓾ ꓐꓯ ꓟ ꓔꓯ ꓓꓵꓽ ꓙ ꓠ ꓔ ꓡꓳ= ꓢꓯꓼ ꓣꓴ ꓠ ꓔ ꓡꓳ= ꓣꓳ ꓮ ꓡꓲ ꓘꓶ ꓛꓲꓺ ꓟꓬ ꓐꓲꓻ ꓞꓰꓻ ꓓꓴ ꓙꓳˍ ꓥ ꓟꓲ꓾ ꓠꓲꓹ ꓟ ꓐꓶꓽ ꓡꓰ ꓓꓴ ꓙꓳˍ ꓥ ꓟꓲ꓾ ꓠꓲꓹ ꓫ ꓟꓬ ꓫ ꓓꓴ ꓙꓳˍ ꓥ ꓟꓲ ꓪꓴ-ꓢ ꓠꓬ ꓣꓳ ꓐꓰ ꓔꓬ ꓡꓳ꓾ ꓪꓴ-ꓢ ꓠꓬ ꓢꓯꓸ ꓬꓲꓼ ꓡꓻꓳ꓾ ꓪꓴ-ꓢ ꓠꓬ ꓡꓱꓽ ꓜꓴꓻ ꓘꓴꓽ ꓗꓪ ꓟꓽ ꓔꓬꓳ꓾ ꓪꓴ-ꓢ ꓠꓬ ꓟꓽ ꓫꓵꓻꓳ꓾ ꓬꓲ ꓠꓬ ꓢꓯꓸ ꓬꓲꓼ ꓡꓻꓳ ꓐꓯ ꓟ ꓔꓯ ꓚꓵꓺ ꓚꓵꓺ ꓙꓵˍ ꓡ ꓐꓰ ꓓꓵꓽ ꓠꓬꓲ ꓡꓯ= ꓢꓯꓼ ꓪ ꓣꓴ ꓓꓴ ꓬꓰ ꓡꓯ= ꓣꓳ ꓟꓬ ꓐꓲꓻ ꓔꓯ ꓫꓵꓹ ꓗꓷ ꓡꓯ=

ꓠꓬꓲꓸ ꓠꓬꓲ ꓟ-ꓡꓲꓸ ꓡꓰ ꓬꓲ ꓟꓬ ꓐꓲꓻ ꓔꓯ ꓫꓵꓹ ꓗꓷ ꓢꓲ ꓗꓹ ꓛꓲꓽ ꓛꓲꓽ ꓡꓰꓽ ꓬꓲꓼ ꓙꓰˍ ꓟ ꓡꓰ ꓐꓰ ꓣꓳ ꓥˍ ꓟꓲ ꓢꓯꓸ ꓬꓲꓼ ꓡ ꓑꓮꓲꓽ ꓦꓬꓼ ꓠꓬꓲ ꓗꓪ ꓠꓲꓹ ꓫ ꓟꓬ ꓫ ꓓꓴ ꓙꓳˍ ꓥ ꓟꓲ ꓟꓬ ꓐꓲꓻ ꓫꓵꓹ ꓗꓷ ꓢꓲ ꓢꓯꓸ ꓬꓲꓼ ꓡ ꓟ ꓣꓳꓽ ꓢꓲꓺ ꓒ ꓔꓯ ꓠꓲꓹ ꓟ ꓘꓴꓽ ꓗꓪ ꓘꓳꓹ ꓣꓴ ꓢꓲ ꓗꓹ ꓛꓲꓽ ꓛꓲꓽ ꓡꓰꓽ ꓟꓲ ꓙꓬ ꓙꓰ ꓡꓯ=