ꓬꓰ-ꓢꓴ ꓪꓽ ꓘꓴˍ ꓟ

ꓔꓱꓹ ꓟ ꓪꓴ-ꓢ ꓕꓲ ꓣꓳˍ ꓡꓰꓽ ꓙꓳˍ ꓟˍ ꓐꓰ꓾ ꓠꓴˍ ꓐꓰ ꓠꓴ ꓡꓰ ꓝꓲ ꓩꓴ ꓔ ꓟ ꓬꓰ-ꓢꓴ ꓙꓲ-ꓢꓴ ꓔꓯ ꓢꓷꓸˍ ꓟ ꓕꓱ ꓟ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓥ ꓡꓳ= ꓠꓴ ꓡꓰ ꓥꓪ ꓔꓯ ꓖꓶꓽ ꓔ ꓟ ꓟꓬꓱ ꓬꓰ ꓓꓳ ꓡꓰ ꓠꓬꓲ꓾ ꓥꓪ ꓠꓬ ꓟꓲ ꓠꓯ ꓗꓪ ꓠꓴ ꓔꓯ ꓟꓬꓱ ꓓꓳꓽ ꓖꓶˍ ꓡꓳ= (ꓬꓳ-ꓦ 17ꓽ3ꓹ4)

ꓢꓲ ꓒ ꓬꓰ-ꓢꓴ ꓠꓬ ꓬꓲ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓐꓯ ꓘꓶꓽ ꓕꓱ ꓟ ꓐꓯ ꓗꓷ ꓟ ꓥ ꓡꓳ= ꓬꓲ ꓠꓬ ꓐꓹ ꓐ ꓬꓲ ꓔꓯ ꓠꓲꓹ ꓠꓵˍ ꓟ ꓠꓵꓻ ꓠꓲꓹ ꓐꓰ ꓐꓹ ꓐ ꓕꓯꓽ ꓢꓲ ꓗꓪ ꓠꓲꓹ ꓠꓵˍ ꓟ ꓬꓲ ꓠꓵꓻ ꓠꓲꓹ ꓔꓯ ꓣꓳ ꓔꓯ ꓐꓯ ꓟꓸ ꓖꓶ ꓡ ꓔꓬ ꓡꓳ= ꓐꓹ ꓐ ꓠꓬ ꓬꓲ ꓡꓰ ꓚꓰꓼ ꓔ ꓟ ꓮ ꓙꓵꓽ ꓔꓯ ꓠꓲꓹ ꓠꓵˍ ꓟ ꓠꓵꓻ ꓠꓲꓹ ꓬꓲ ꓚꓰꓺ ꓥ ꓡꓳ= ꓐꓹ ꓐ ꓬꓲ ꓠꓵꓻ ꓠꓲꓹ ꓠꓬ ꓡꓳꓹ ꓬꓰˍ ꓗꓪ ꓛꓲ꓾ ꓢꓲꓺ ꓒ ꓬꓰ-ꓢꓴ ꓬꓲ ꓡꓯꓼ ꓐꓳ ꓔꓶꓸ ꓓꓴ ꓕꓯꓽ ꓢꓲ ꓗꓪ ꓫꓵꓻˍ ꓗꓪ ꓛꓲ꓾ ꓬꓰ-ꓢꓴ ꓬꓲ ꓕꓲ ꓤꓶꓻ ꓡꓱꓸꓼ ꓖꓶ ꓗꓷˍ ꓗꓪ ꓛꓲ ꓐꓹ ꓐ ꓬꓲ ꓠꓵꓻ ꓠꓲꓹ ꓠꓬ ꓝ ꓢꓲ ꓬꓰ-ꓢꓴ ꓐꓰ ꓕꓲ ꓪ ꓙꓳ ꓔꓬ ꓟ ꓥ ꓡꓳ=

ꓪꓴ-ꓢ ꓡꓰ ꓝꓲ ꓩꓴ ꓔ ꓢꓴ ꓕꓲ ꓣꓳˍ ꓡꓰꓽ ꓙꓳˍ ꓟ ꓐꓰ ꓬꓲ ꓡꓰ ꓝꓲ ꓩꓴ ꓔ ꓟ ꓬꓰ-ꓢꓴ ꓙꓲ-ꓢꓴ ꓔꓯ ꓢꓷꓸˍ ꓟ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓥꓳ꓾ ꓐꓰ ꓐꓯ ꓔ ꓡꓳ= ꓣꓳ ꓠꓬ ꓣꓳ ꓕꓲ ꓤꓶꓻ ꓡꓱꓸꓼ ꓗꓪ ꓪꓴ-ꓢ ꓐꓯ ꓘꓶꓽ ꓗꓪ ꓐꓰ꓾ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓬꓰˍ ꓟ ꓔꓯꓺ ꓥꓳꓽ ꓗꓪ ꓐꓰ  ꓣꓳ ꓐꓴ ꓠꓬ ꓣꓳ ꓔꓯ ꓖꓶꓽ ꓔ ꓟ ꓟꓲ ꓠꓯ ꓗꓪ ꓐꓰ ꓕꓲ ꓝꓸ ꓪꓴ-ꓢ ꓔꓯ ꓢꓷꓸ ꓠꓹ ꓟ ꓢꓯꓼ ꓕꓵꓼ ꓔꓬ ꓪ ꓡꓳ= ꓖꓳ ꓡꓱ ꓥ ꓟꓲ ꓣꓳ ꓠꓬ ꓪꓴ-ꓢ ꓔꓯ ꓢꓷꓸˍ ꓡꓳ꓾ ꓪꓴ-ꓢ ꓔꓯ ꓙꓽ ꓜꓲꓼˍ ꓡꓳ꓾ ꓐꓰ ꓮ ꓗꓪˍ ꓟꓲ ꓮ ꓕꓯ ꓟꓲ ꓐꓯ ꓟꓽ ꓐ ꓡ=

ꓙꓲꓻ ꓫꓬ ꓢꓴ Augustine ꓡꓰ “ꓙꓽ ꓜꓲꓼˍ ꓟ ꓠꓬ ꓙꓵꓻ ꓠꓲꓹ ꓬꓲ ꓣꓱꓽ ꓛꓰꓽ ꓡꓯꓼ ꓫꓴ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓙꓵꓻ ꓠꓹ ꓟ ꓐꓱ ꓶ ꓙꓽ ꓜꓲꓼ ꓠꓹ ꓟ ꓔꓯ ꓕꓽ ꓧꓪ꓾ ꓙꓽ ꓜꓲꓼ ꓠꓹ ꓟ ꓐꓱ ꓶ ꓧꓶꓸ ꓕꓯ ꓙꓵꓻ” ꓐꓰ ꓐꓳ ꓔ ꓡꓳ= ꓖꓳ ꓡꓱ ꓠꓬꓲ ꓣꓳ ꓟꓲ ꓠꓯ ꓞꓳ ꓤ ꓐꓴ ꓬꓰ ꓠ ꓔ ꓟꓬꓱꓽ ꓠꓬ ꓬꓲ ꓚꓱꓹ ꓮ ꓟꓬꓹ ꓣꓱꓽ ꓢꓲ ꓪꓴ-ꓢ ꓔꓯ ꓧꓪ ꓠꓹ ꓟ ꓥ ꓢꓲ ꓠꓬꓲ꓾ ꓬꓲ ꓠꓬ ꓣꓳ ꓔꓯ ꓒꓬꓱꓽ ꓔꓳꓹ ꓟꓬ ꓔꓳꓹ ꓟꓳꓸ ꓖꓶ ꓡˍ ꓟ ꓦꓬꓼ ꓠꓬꓲ ꓗꓪ ꓛꓲ ꓪꓴ-ꓢ ꓔꓯ ꓧꓪ ꓔꓬ ꓢꓴ ꓐꓴˍ ꓡꓰ ꓐꓰ ꓝ ꓢꓲꓸ ꓞꓳ ꓙꓳ ꓢꓯꓸ ꓔꓬ ꓠꓹ ꓟ ꓥ ꓡꓳ= ꓕꓱ ꓟ ꓠꓬ ꓣꓳ ꓬꓰ ꓙꓲ ꓙꓳˍ ꓟ ꓥ ꓡꓳ=