ꓬꓰ-ꓢꓴ ꓪꓽ ꓘꓴ_ ꓟ

ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓝꓲꓸ ꓗꓪ ꓠꓬ ꓬꓰ-ꓢꓴ ꓡꓰ ꓟꓲ ꓠꓯ ꓞꓳ ꓤ ꓝꓴꓲ ꓙꓳ ꓢꓴ ꓐꓴ꓾ ꓝꓲ ꓓꓴ ꓐꓴ ꓐꓱ ꓶ ꓢꓲ ꓫꓬ ꓠꓹ ꓟ ꓐꓱ ꓶ ꓪꓽ ꓘꓴ ꓖꓶ_ ꓟ ꓚꓱꓹ ꓡꓳꓸ ꓟꓳ ꓪ ꓡꓳ= ꓣꓳ ꓠꓬ ꓪꓴ-ꓢ ꓐꓰ ꓕꓲ ꓠꓲꓹ ꓕꓲ ꓪꓼ ꓗꓷ ꓡꓰ ꓠꓹ ꓟ꓾ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠꓹ ꓟ ꓐꓱ ꓶ ꓢꓲ ꓫꓬ ꓠꓹ ꓟ ꓣꓱꓽ ꓬꓯꓼ ꓡꓳ= ꓖꓳ ꓡꓱ ꓥ ꓟꓲ ꓣꓳ ꓮ ꓟꓶ ꓤꓶꓻ ꓗꓪ ꓢꓲ ꓫꓬ ꓠꓹ ꓟ ꓬꓰ ꓐ ꓡ ꓡ? ꓟꓲ ꓠꓯ ꓞꓳ ꓤ ꓗꓪ ꓐꓰ ꓒꓬꓱꓼ ꓐ ꓡ ꓡ? ꓕꓱ ꓟ ꓠꓬ ꓟꓽ ꓒꓬꓱꓼ ꓡ꓾ ꓮ ꓫꓵ ꓑꓶ ꓓꓴ ꓐꓯ ꓠꓬ ꓬꓰ-ꓢꓴ ꓡꓰ ꓐꓯ ꓟ ꓢꓲ ꓫꓬ ꓟ ꓐꓯ_ ꓟ ꓠꓬ ꓪꓴ-ꓢ ꓢꓲ ꓫꓬ ꓟ ꓡꓰ ꓐꓰ ꓣꓳ ꓥ ꓟꓲ ꓬꓲ ꓐꓰ ꓕꓲ ꓪ ꓢꓲ ꓫꓬ ꓠꓹ ꓟ ꓥ ꓡꓳ= ꓕꓱ ꓟ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓓꓵꓽ ꓙ ꓟ ꓗꓷ ꓠꓲꓹ ꓫꓵ_ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓣꓳ ꓐꓴ ꓝꓲ ꓓꓴ ꓐꓴ꓾ ꓛꓳꓽ ꓒꓯꓹ ꓐꓴ꓾ ꓕꓱ ꓟ ꓗꓪ ꓛꓲ ꓟꓽ ꓒꓬꓱꓼ ꓡ ꓗꓴꓸ ꓟ ꓔꓯ ꓢꓷꓸ ꓔ ꓟ ꓪꓴꓸ ꓠꓬꓲ ꓠꓬꓲꓸ ꓠꓬꓲ ꓕꓱ ꓪꓽ ꓘꓴ ꓘꓶꓽ ꓔꓯ ꓪꓴ-ꓢ ꓠꓯꓼ ꓗꓪ ꓬꓰ-ꓢꓴ ꓡꓰ ꓪꓽ ꓘꓴ ꓖꓶ_ ꓟ ꓥ ꓡꓳ= ꓬꓰ-ꓢꓴ ꓠꓬ ꓕꓱ ꓡꓱ ꓖꓳ ꓑꓳꓸ ꓟꓲ ꓠꓯ ꓗꓪ ꓟꓽ ꓔꓬ= ꓪꓴ-ꓢ ꓠꓯꓼ ꓗꓪ ꓙꓰ ꓟ ꓥ ꓡꓳ=

ꓖꓳ ꓟ ꓑꓶ ꓓꓴ ꓝꓲ ꓓꓴ ꓐꓴ꓾ ꓛꓳꓽ ꓒꓯꓹ ꓐꓴ꓾ ꓣꓳ ꓟꓲ ꓠꓯ ꓞꓳ ꓤ ꓐꓴ ꓠꓬ ꓫꓸ ꓓꓴ ꓟꓷꓼ ꓓꓴ꓾ꓠꓲꓹ ꓫ ꓟꓬ ꓫ ꓓꓴ꓾ ꓗꓷ ꓡꓶꓽ ꓗꓽ ꓕ ꓓꓴ ꓮ ꓟꓬ ꓙꓳ_ ꓟ ꓕꓱ ꓟꓲ ꓠꓯ ꓗꓪ ꓔꓬ ꓢꓰꓽ ꓟ ꓥꓳ= ꓣꓳ ꓟꓽ ꓕꓶꓻ ꓟ ꓢꓯꓼ ꓪ ꓟꓽ ꓙꓳ ꓟ ꓝꓴꓲ ꓗꓪ ꓐꓰ ꓕꓱ ꓟꓲ ꓠꓯ ꓗꓪ ꓢꓯꓸ ꓔꓬ ꓠꓹ ꓟ ꓐꓱ ꓶ ꓢꓯꓼ ꓪ ꓟꓽ ꓡꓳꓼ ꓟ ꓔꓯ ꓬꓰ-ꓢꓴ ꓢꓷꓸ ꓔ ꓡꓳ= ꓖꓳ ꓟ ꓑꓶ ꓓꓴ ꓢꓲ ꓫꓬ ꓖꓶ ꓠꓹ ꓟ ꓔꓯ ꓬꓲ ꓡꓰ ꓪꓽ ꓘꓴ ꓖꓶ_ ꓟ ꓥ ꓡꓳ= ꓪꓽ ꓘꓴ ꓟ ꓗꓪ ꓢꓲ ꓫꓬ_ ꓟ ꓐꓹ ꓐꓽꓳ_ ꓐꓰ ꓐꓯ ꓔ ꓡꓳ= ꓕꓱ ꓟ ꓠꓬ ꓢꓲ ꓫꓬ ꓟ ꓪꓽ ꓘꓴ ꓘꓶꓽ ꓗꓪ ꓛꓳꓽ ꓒꓯꓹ ꓐꓴ ꓝꓲ ꓓꓴ ꓐꓴ ꓟꓲ ꓠꓯ ꓞꓳ ꓤ ꓝꓴꓲ ꓙꓳ ꓢꓴ ꓐꓴ ꓙꓲ ꓢꓴ ꓢꓲ ꓤ ꓐꓴ ꓔꓯ ꓥ ꓟꓲ ꓐꓯ ꓠꓲꓹ ꓫꓵ ꓟ ꓥ ꓡꓳ= ꓬꓲ ꓪ ꓮ ꓙꓵ ꓔꓯ ꓪꓴ-ꓢ ꓠꓯꓼ ꓗꓪ ꓡꓯꓼ ꓙꓱ ꓗꓷ ꓟ ꓥ ꓡꓳ= ꓬꓲ ꓪꓽ ꓘꓴ ꓘꓶꓽ ꓗꓪ ꓐꓰ ꓣꓳ ꓮ ꓙꓵ ꓠꓬ ꓢꓲ ꓫꓬ ꓡ ꓟ ꓥꓳ= ꓪꓴ-ꓢ ꓐꓰ ꓕꓲ ꓠꓲꓹ ꓕꓲ ꓪꓼ ꓗꓷ ꓡ ꓟ ꓥꓳ= ꓖꓳ ꓟ ꓑꓶ ꓓꓴ ꓬꓲ ꓪꓽ ꓘꓴ ꓘꓶꓽ ꓗꓪ ꓣꓳ ꓥ ꓟꓲ ꓐ ꓠꓹ ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓾