ꓬꓲꓸ ꓔꓯ ꓡ ꓡꓯ (Homily)

30 ꓫꓵꓽ ꓠꓽ ꓟ ꓠꓽ ꓦꓬꓼ ꓠꓬꓲ 

ꓬꓰ-ꓡꓲ-ꓟꓲ 31ꓽ 7-9

ꓮ ꓡꓲꓳ ꓐꓯ ꓠꓬ ꓬꓰ-ꓧꓳ-ꓧꓪ ꓡꓰ ꓕꓱ ꓡꓱ ꓐꓯ_ ꓡꓳ꓾ ꓗꓹ ꓛꓲ ꓠꓬꓲ ꓐꓰ ꓬ-ꓗꓴ ꓐꓱ ꓶ ꓟꓴꓽ ꓖꓪ ꓖꓪ ꓖꓶ꓾ ꓞꓳ ꓫꓵ ꓞꓳ ꓙꓰ ꓐꓴ ꓔꓯ ꓧꓳꓽ ꓪꓴꓸ ꓟꓴ ꓢꓴ ꓔꓯ ꓫꓱ ꓖꓶ ꓢꓲ ꓘꓴꓻ ꓔꓴ ꓡꓯ꓿ ꓠꓴ ꓪ ꓚ ꓟꓸ ꓖꓶ꓾ ꓠꓴ ꓪ ꓫꓱꓸ ꓖꓶ ꓢꓲ꓾ ꓬꓰ-ꓧꓳ-ꓧꓪꓳ꓾ ꓜꓰ ꓞ_ ꓢꓰꓽ ꓟ ꓠꓴ ꓑ ꓫꓬ ꓬꓲ-ꓢꓷ-ꓡꓰ ꓐꓴ ꓔꓯ ꓠꓴ ꓚꓬꓴ ꓗꓷꓳ꓾ ꓐꓰ ꓐꓯ ꓠ ꓗ_ ꓡꓳ꓿ꓠꓬꓲ ꓠꓹ꓾ ꓥꓪ ꓠꓬ ꓖꓴ ꓪꓴꓸ ꓟꓵꓽ ꓗꓪ ꓐꓰ ꓬꓲ ꓪ ꓔꓯ ꓧꓳꓽ ꓬꓲꓼ ꓡ_ ꓥꓳ꓿ ꓟꓲ ꓠꓯ ꓑꓶꓸ ꓗꓪ ꓐꓰ ꓬꓲ ꓪ ꓔꓯ ꓧꓪ ꓜꓲꓼ ꓡ_ ꓥꓳ꓿ ꓟꓬ ꓔꓶ_ ꓐꓰ꓾ ꓛꓲ ꓫꓳꓸ_ ꓐꓰ꓾ ꓤ ꓠꓱ ꓶꓻ ꓞ_ ꓟ_ ꓐꓰ꓾ ꓦꓵꓻ ꓠ ꓠ_ ꓟ ꓤ ꓟꓶ ꓤ ꓠꓬ ꓬꓲ ꓪ_ ꓐꓰ ꓕꓲ ꓛꓳ_ ꓡ ꓢꓲ꓾ ꓬꓲ ꓜꓴ ꓓꓽ ꓟ ꓕꓱ ꓗꓪ ꓚꓱꓹ ꓬꓲꓼ ꓡ_ ꓥꓳ꓿  ꓬꓲ ꓪ ꓠꓬ ꓥꓴ ꓠꓬꓲ ꓐꓰ ꓬꓲꓼ ꓡ_ ꓥꓳ꓿ ꓥꓪ ꓠꓬ ꓬꓲ ꓪ ꓶꓼ ꓓꓰꓽ_ ꓟ ꓔꓯ ꓛꓳ ꓢꓲ꓾ ꓧꓳꓽ ꓬꓲꓼ ꓡ_ ꓥꓳ꓿ ꓬꓲ ꓪ ꓟꓽ ꓡꓱꓸ ꓗꓷ ꓠꓹ ꓟ꓾ ꓥꓪ ꓬꓲ ꓪ ꓔꓯ ꓬꓲ ꓙꓬ ꓡꓳ ꓘꓶꓽ ꓚ ꓚꓺꓼ꓾ ꓔꓱꓹ_ ꓟ ꓙ ꓖꓴ ꓗꓪ ꓫꓱ ꓝꓲ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓬꓲ-ꓢꓷ-ꓡꓰ ꓐꓴ ꓐꓹ ꓐ ꓥ ꓡꓳ꓿ ꓬꓲ-ꓒ-ꓡꓲ ꓠꓬ ꓥꓪ ꓤꓽ ꓪꓴꓽ ꓥ ꓡꓳ꓿

ꓦꓲ-ꓐꓱ-ꓣꓴ 5ꓽ 1-6

ꓞꓳ ꓤ ꓗꓳ ꓡꓳ ꓗꓪ ꓐꓰ ꓢꓲ ꓓꓳ ꓡ ꓟ ꓔꓲ ꓒ ꓓꓽ ꓟ ꓮ ꓡꓲ ꓕꓲ ꓣꓳ ꓥ ꓟꓲ꓾ ꓝꓴꓲ ꓑꓶꓸ ꓓꓴ ꓪꓴ-ꓢ ꓟꓲꓽ ꓙꓬꓽ ꓗꓪ꓾ ꓮꓽ ꓙꓵ ꓢꓴ ꓬꓲꓸ ꓛꓲ ꓡꓯꓼ ꓫꓴˍ ꓐꓰ ꓔꓲ ꓓꓴ ꓔꓲ ꓖꓶ ꓠꓹ ꓟ ꓢꓲ ꓔ ꓟ ꓥ ꓡꓳ꓿ 2 ꓬꓲ ꓚꓲ ꓛꓬˍ ꓟꓲ ꓮꓽ ꓟꓬꓹ ꓫꓵꓽ ꓗꓪ ꓢꓯꓼ ꓐ ꓢꓴ ꓥ ꓠꓬꓲ꓾ ꓬꓲ ꓠꓬ ꓟꓽ ꓢꓷꓸ ꓢꓴ ꓐꓰ ꓥꓳꓽ ꓡꓰ ꓢꓴ ꓔꓯ ꓠꓴꓽ ꓠꓴ ꓐꓰ ꓜꓲꓽ ꓖꓶ ꓐ ꓡ ꓡꓳ꓿ 3 ꓖꓳ ꓟ ꓑꓶꓸ ꓓꓴ ꓬꓲ ꓠꓬ ꓑ ꓫꓬꓼ ꓐꓴ ꓐꓱ ꓶˍ ꓐꓰ꓾ ꓬꓲ ꓚꓲ ꓛꓬ ꓐꓱ ꓶˍ ꓟꓲ꓾ ꓝꓴꓲ ꓑꓶꓸ ꓓꓴ ꓢꓰꓼ ꓔꓲ ꓓꓴ ꓔꓲ ꓠ ꓗꓹ ꓟ ꓥ ꓡꓳ꓿ 4 ꓯ-ꓣꓷ ꓔꓯ ꓘꓴˍ ꓟ ꓡꓰ ꓐꓰ ꓪꓴ-ꓢ ꓡꓰ ꓘꓴ ꓔ ꓟ ꓟꓽ ꓥ ꓠꓬ꓾ ꓮꓽ ꓟˍ ꓟꓲ ꓔꓲ ꓒ ꓓꓽ ꓟ ꓟꓬꓱꓺ ꓓꓳꓽ ꓕꓱ ꓟ ꓔꓯ ꓚꓲ ꓛꓬ ꓣꓴ ꓢꓴ ꓟꓽ ꓙꓳ꓿ 5 ꓖꓳ ꓟ ꓡꓰ ꓐꓰ꓾ ꓙꓲ-ꓢꓴˍ ꓟꓲ ꓔꓲ ꓒ ꓓꓽ ꓟ ꓣꓱꓽˍ ꓟ ꓟꓬꓱ ꓓꓳꓽ ꓗꓪ ꓚꓲ ꓛꓬ ꓔꓯ ꓢꓲ ꓚꓰꓸˍ ꓟ ꓟꓽ ꓥ꓿ ꓠꓴ ꓠꓬ ꓥꓪ ꓮ ꓐꓲ ꓥ ꓡꓳ꓾ ꓠꓬꓲꓸ ꓠꓬꓲ ꓥꓪ ꓡꓰ ꓠꓴ ꓔꓯ ꓦꓵꓻ ꓗꓷꓳ꓾ ꓐꓰ ꓐꓯ ꓢꓴ ꓖꓳ ꓕꓲ ꓣꓳ ꓡꓰ ꓬꓲ ꓔꓯ ꓔꓲ ꓒ ꓓꓽ ꓟ ꓣꓱꓽ ꓝꓲˍ ꓟ ꓥ ꓡꓳ꓿ 6 ꓝꓮꓲ ꓠꓱꓸ ꓐꓯꓼ ꓕꓲ ꓖ ꓗꓪˍ ꓟꓲ ꓪꓴ-ꓢ ꓡꓰ꓾ ꓠꓴ ꓠꓬ ꓟꓷ-ꓚꓲ-ꓫꓲ-ꓔꓷ ꓕꓲ ꓫꓵꓽ ꓗꓪ ꓟ ꓕꓲ ꓞꓲꓼ ꓕꓲ ꓑ ꓟ ꓔꓲ ꓒ ꓥꓳ꓾ ꓐꓯˍ ꓟ ꓡꓰ ꓐꓰ ꓥ ꓡꓳ꓿

ꓟ-ꓘꓳ 10ꓽ 46-52

ꓮ ꓡꓲꓳ ꓐꓯ ꓠꓬ ꓡ-ꓞꓳ-ꓮ-ꓐꓲ ꓥꓪˍ ꓟꓲ꓾ ꓢꓴ ꓡꓰ ꓥꓪ ꓔꓯ ꓣꓱꓽ ꓙ ꓝꓲ ꓠꓹ ꓟ ꓡ ꓟ ꓟꓽ ꓥ꓿ ꓢꓴ ꓔꓯ ꓣꓱꓽ ꓙ ꓠꓹ ꓟ ꓐꓰ꓾ ꓥꓪ ꓢꓯꓼ ꓟꓬ ꓡꓰ ꓡꓽ ꓞꓳ ꓮꓽ ꓟꓬꓹ ꓔꓯ ꓫꓴꓹ ꓣꓴ ꓠꓹ ꓟ ꓡ ꓗꓷ ꓟ ꓥꓳ꓾ ꓐꓰ ꓐꓯ ꓖꓶˍ ꓡꓳ꓿ 46 ꓬꓲ ꓪꓽ ꓠꓬ ꓙꓱ-ꓡꓲ-ꓘꓳ ꓗꓪ ꓛꓲ ꓡ ꓢꓲ꓾ ꓬꓰ-ꓢꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴˍ ꓐꓰ꓾ ꓞꓳ ꓜꓴ ꓞꓳ ꓟꓯꓼ ꓠꓬ ꓙꓱ-ꓡꓲ-ꓘꓳ ꓗꓪ ꓐꓰ ꓓꓳ ꓙꓰˍ ꓕꓯ꓾ ꓕꓲ-ꓟꓲ-ꓪꓴ ꓬꓲ ꓮ ꓐꓲ꓾ ꓜ ꓓꓰꓽ ꓢꓴ ꓐ-ꓕꓲ-ꓟꓲ-ꓪꓴ ꓟꓬꓱ ꓔ ꓟ ꓟꓬꓺ ꓔꓶꓺ ꓕꓲ ꓣꓳ ꓠꓬ꓾ ꓙ ꓖꓴ ꓘꓶꓽ ꓗꓪ ꓠꓬꓲꓸ ꓠꓸ ꓔꓬ ꓡꓳ꓿ 47 ꓠ-ꓢ-ꓡꓱ ꓢꓴ ꓬꓰ-ꓢꓴ ꓡ ꓔꓬ ꓟ ꓬꓲ ꓢꓷꓸ ꓡꓰ ꓠꓬ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓬꓰ-ꓢꓴꓳ꓾ ꓥꓪ ꓔꓯ ꓫꓱꓸ ꓤ ꓙ ꓡꓯ꓾ ꓐꓰ ꓘꓴˍ ꓡꓳ꓿ 48 ꓡꓽ ꓞꓳ ꓮꓽ ꓟꓬꓹ ꓠꓬ ꓬꓲ ꓔꓯ ꓕꓼ ꓢꓲ꓾ ꓟꓽ ꓪꓳꓹ ꓔꓬ ꓠꓹ ꓟ ꓙꓳꓺ ꓗꓽ ꓖꓶˍ ꓟꓲ꓾ ꓬꓲ ꓠꓽ ꓟꓬꓽ ꓠꓬꓲ ꓮꓽ ꓘꓶꓸ ꓘꓴꓻ ꓢꓲ ꓠꓬꓲ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤꓽꓳ꓾ ꓥꓪ ꓔꓯ ꓫꓱꓸ ꓤ ꓙ ꓡꓯ꓾ ꓐꓰ ꓐꓯˍ ꓡꓳ꓿ 49 ꓖꓳ ꓕꓯ ꓬꓰ-ꓢꓴ ꓦꓰꓼ ꓡꓰ ꓢꓲ꓾ ꓬꓲ ꓔꓯ ꓘꓴꓻ ꓬꓰ꓾ ꓐꓯˍ ꓡꓳ꓿ ꓬꓲ ꓪꓽ ꓠꓬ ꓟꓬ ꓔꓶꓺ ꓔꓯ ꓘꓴꓻ ꓬꓰ ꓢꓲ꓾ ꓠꓴ ꓠꓲꓹ ꓟ ꓪꓳꓽ ꓡꓯꓻ ꓐꓰ ꓔꓬ꓿ ꓔꓴ ꓡꓯ꓾ ꓬꓲ ꓡꓰ ꓠꓴ ꓔꓯ ꓘꓴꓻˍ ꓡꓳ꓾ ꓐꓯ ꓖꓶˍ ꓡꓳ꓿ 50 ꓖꓳ ꓡꓱ ꓠꓬ ꓬꓲ ꓠꓽ ꓔꓷꓹ ꓔꓴ ꓡ ꓢꓲ ꓬꓲ ꓐꓵ ꓞꓶꓽ ꓐꓽ ꓢꓽ ꓶꓹ ꓔꓸ ꓬꓰ ꓢꓲ ꓠꓬꓲ ꓬꓰ-ꓢꓴ ꓔꓬ ꓗꓪ ꓡ ꓡꓳ꓿ 51 ꓬꓰ-ꓢꓴ ꓡꓰ ꓟꓬ ꓔꓶꓺ ꓔꓯ꓾ ꓥꓪ ꓡꓰ ꓠꓴ ꓐꓱ ꓶ ꓮꓸ ꓫꓵ ꓬꓰ ꓖꓶ ꓝꓲ ꓠꓲꓹ ꓫꓵˍ ꓡ?꓾ ꓐꓯˍ ꓕꓯ꓾ ꓟꓸ ꓒꓽꓳ꓾ ꓥꓪ ꓝꓮꓲ ꓠꓬꓲ ꓟꓳꓻ ꓡ ꓠꓲꓹ ꓫꓵˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 52 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓙꓰ ꓛꓵˍ ꓡꓳ꓿ ꓠꓴ ꓙꓵꓻ ꓠꓲꓹ ꓡꓰ ꓠꓴ ꓔꓯ ꓓ ꓡꓰ ꓝꓲꓳ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓞꓼ ꓐꓰ ꓠꓬꓲ ꓟꓳꓻ ꓡ ꓢꓲ꓾ ꓙ ꓖꓴ ꓗꓪ ꓬꓰ-ꓢꓴ ꓔꓯ ꓛꓳ ꓙꓰˍ ꓡꓳ꓿