ꓬꓲꓻ ꓡꓯꓼ ꓟꓰꓼ ꓔꓯ ꓠꓽ ꓡꓰ ꓝꓲˍ ꓟ

ꓐꓯ ꓧꓪꓸ ꓘꓶꓽ ꓕꓲ ꓘꓶꓽ ꓙꓳˍ ꓡꓳ= ꓠꓲꓽ ꓢ-ꓓꓯ ꓠꓬ ꓠꓴ ꓠꓬ ꓪꓴ-ꓢ ꓔꓯ ꓟꓷꓽ ꓠꓷꓹ ꓘꓶꓽ ꓗꓪ ꓐꓰ ꓡꓰꓽ ꓙꓵꓻ ꓔꓬ ꓕꓺ ꓑꓳꓸꓼ ꓬꓲ ꓠꓬ ꓠꓴ ꓔꓯ ꓮ ꓡꓰ ꓟꓽ ꓬꓰ ꓡ= ꓖꓳ ꓡꓱ ꓥˍ ꓟꓲ ꓠꓴ ꓙꓵꓻˍ ꓟ ꓡꓰ ꓐꓰ ꓠꓴ ꓛꓳ ꓫꓱꓽˍ ꓕꓯ ꓠꓽ ꓬꓲ ꓠꓬ ꓠꓴ ꓔꓯ ꓤꓹ ꓠꓬꓲ ꓡˍ ꓥꓳ꓾ ꓐꓰ ꓐꓯ ꓘꓶꓽ ꓙꓳˍ ꓡꓳ= ꓠꓲꓽ ꓢ-ꓓꓯ ꓠꓬ ꓣꓳ ꓔꓯ ꓣꓳꓽ ꓙꓵꓻˍ ꓟ ꓡꓰ ꓐꓰ ꓟꓽ ꓛꓳ ꓫꓱꓽ ꓕ ꓑꓳꓸꓼ꓾ ꓣꓳ ꓟꓷꓽ ꓠꓷꓹ ꓘꓶꓽ ꓗꓪ ꓡꓰꓽ ꓙꓵꓻˍ ꓡꓳ ꓐꓰ ꓣꓷꓠꓸ ꓔꓬ ꓕꓺ ꓑꓳꓸꓼ꓾ ꓬꓲ ꓠꓬ ꓣꓳ ꓔꓯ ꓮ ꓡꓰ ꓟꓽ ꓬꓰ ꓡ= ꓮ ꓡꓲꓳ ꓐꓯ ꓠꓬ ꓠꓲꓽ ꓢ-ꓓꓯ ꓥˍ ꓟꓲ ꓪꓴ-ꓢ ꓔꓯ ꓙꓵꓻˍ ꓡꓳ ꓟꓽ ꓥ ꓡ= ꓬꓲ ꓠꓬ ꓣꓳ ꓢꓲꓸ ꓟꓽ ꓞꓲꓺ ꓙꓵꓻ ꓠꓲꓹ ꓙꓳˍ ꓡꓳ= ꓕꓱ ꓟˍ ꓡꓰ ꓐꓰ ꓬꓲ ꓠꓬ ꓣꓳ ꓔꓯ ꓣꓳ ꓟꓷꓽ ꓠꓷꓹ ꓘꓶꓽ ꓗꓪ ꓐꓰ ꓡꓰꓽ ꓙꓵꓻ ꓔꓬ ꓕꓯ꓾ ꓣꓳ ꓙꓵꓻˍ ꓟ ꓡꓰ ꓟꓽ ꓛꓳ ꓫꓱꓽ ꓕꓯ ꓠꓽ ꓬꓲ ꓠꓬ ꓣꓳ ꓔꓯ ꓮ ꓡꓲ ꓐꓰ ꓟꓽ ꓤꓹ ꓠꓬꓲ ꓡ꓾ ꓐꓰ ꓐꓯ ꓧꓪꓸ ꓘꓶꓽ ꓕꓱ ꓟ ꓬꓲꓸ ꓬꓲ ꓢꓲꓺ ꓥ ꓡꓳ=

ꓣꓳ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓔꓬ ꓕꓯ ꓚꓵꓺ ꓚꓵꓺ ꓪꓴ-ꓢ ꓔꓯ ꓙꓵꓻˍ ꓡ꓾ ꓐꓯ ꓟ ꓝꓮꓲ ꓕꓲ ꓧꓪꓹ ꓓꓵꓽ ꓙ ꓠꓬꓲ ꓓꓴ ꓥ ꓡꓳ= ꓪꓴ-ꓢ ꓔꓯ ꓙꓵꓻˍ ꓕꓯ ꓠꓽ ꓠꓲꓹ ꓟ ꓠꓯꓸꓼ ꓗꓪ ꓪꓴ-ꓢ ꓔꓬ ꓟ꓾ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓐꓱ ꓶ ꓢꓯꓼ ꓟꓬ ꓖꓶ ꓗꓷ ꓟ꓾ ꓣꓳ ꓐꓱ ꓶ ꓬꓲ ꓫꓵꓽ ꓧꓳꓸ ꓗꓷ ꓟ꓾ ꓣꓳ ꓔꓯ ꓮ ꓕꓯ ꓟꓲ ꓠꓬꓲꓺ ꓙ ꓡꓳꓸ ꓙ ꓢꓲ ꓠꓲꓹ ꓠꓵꓻ ꓔꓬ ꓟ ꓔꓯ ꓙꓵꓻˍ ꓕꓯ ꓠꓽ ꓣꓳ ꓗꓳꓸ ꓘꓳ ꓔꓬ ꓪˍ ꓟ ꓫꓸ ꓙꓵ ꓟꓷꓽ ꓙꓵꓻ ꓓꓴ ꓔꓯ ꓢꓻ ꓢꓻ ꓡꓰ ꓗꓳꓸ ꓙꓰˍ ꓡꓳ꓾ ꓟꓽ ꓥ ꓡ=

ꓠꓬꓲꓸ ꓠꓬꓲ ꓟꓸ ꓟꓲꓽ ꓕꓳ ꓶ (ꓟ-ꓕꓲ 8ꓽ23-27) ꓗꓪ ꓝꓲ ꓓꓴ ꓐꓴ ꓐꓰ ꓢꓲꓺ ꓒ ꓬꓰ-ꓢꓴ ꓠꓬ ꓡꓲꓺ ꓘꓴꓽ ꓗꓪ ꓔꓬ ꓕꓯ ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼ ꓡˍ ꓟ ꓟꓸ ꓟꓲꓽ ꓥ ꓡꓳ= ꓬꓲ ꓝꓲ ꓓꓴ ꓐꓴ ꓠꓬ ꓢꓲꓺ ꓒ ꓬꓰ-ꓢꓴ ꓡꓲꓺ ꓘꓴꓽ ꓗꓪ ꓔꓬ ꓥ ꓟꓲ꓾ ꓡꓲꓺ ꓖꓳ ꓟ ꓬꓲꓻ ꓙꓬ ꓓꓵꓽ ꓙꓰ꓾ ꓡꓱꓸ ꓙꓰ꓾ ꓐꓱꓽ ꓙꓰˍ ꓟ ꓔꓯ ꓙꓳꓺˍ ꓡꓳ= ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓪꓴ-ꓢ ꓠꓬ ꓬꓲ ꓪ ꓐꓰ ꓕꓲ ꓪ ꓙꓰ ꓔꓬ ꓥ ꓟꓲ ꓬꓲ ꓪ ꓠꓬ ꓮ ꓘꓶꓸ ꓙꓳꓺˍ ꓡꓳ= ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓪ ꓔꓯ ꓟꓸ ꓖꓶˍ ꓟ ꓠꓬ꓾ ꓙꓵꓻ ꓠꓲꓹ ꓣꓳ ꓢꓴ ꓐꓴꓳ꓾ ꓮ ꓫꓵꓽ ꓪꓴꓸ ꓠꓬꓲ ꓙꓳꓺˍ ꓡ꓾ ꓐꓯ ꓢꓲ ꓟꓲꓽ ꓦꓲ ꓕꓳꓽ ꓥꓳꓽ ꓔꓯ ꓠꓽ ꓗꓷ ꓝꓲˍ ꓡꓳ=

ꓝꓲ ꓓꓴ ꓐꓴ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓘꓶꓽ ꓗꓪ ꓔꓬ ꓥ ꓟꓲ ꓙꓵꓻ ꓠꓲꓹ ꓮ ꓘꓶꓸ ꓣꓳˍ ꓟ ꓣꓳꓽ ꓟꓳꓻˍ ꓡꓳ= ꓙꓵꓻ ꓠꓲꓹ ꓣꓳˍ ꓟ ꓑꓶꓸ ꓓꓴ ꓙꓳꓺ ꓡˍ ꓡꓳ= ꓜꓲꓻ ꓣꓴꓽ ꓡˍ ꓡꓳ= ꓠꓲꓹ ꓟ ꓠꓯꓸꓼ ꓗꓪ ꓮ ꓫꓵꓽ ꓥˍ ꓟꓲ ꓗꓷ ꓡꓰˍ ꓡꓳ ꓐꓰ ꓣꓳ ꓡꓳꓸ ꓟꓳꓻ ꓪ ꓓꓹ ꓡꓳ= ꓣꓳ ꓤꓶꓻ ꓥ ꓟꓲ ꓡꓲꓺ ꓕꓲ ꓟˍ ꓡꓰ ꓐꓰ ꓥꓳ= ꓣꓳ ꓕꓱ ꓡꓰ ꓙꓰ ꓔꓬ ꓟ ꓦꓬꓼ ꓠꓬꓲ ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓔꓬ ꓡꓳ= ꓖꓳ ꓡꓱ ꓥ ꓟꓲ ꓣꓳꓽ ꓕꓲ ꓖ ꓕꓲ ꓧꓪꓹ ꓠꓬ ꓢꓲꓺ ꓒ ꓬꓰ-ꓢꓴ ꓔꓬ ꓟ ꓡꓰ ꓐꓰ ꓟꓽ ꓘꓳꓸ ꓣꓴ ꓟ ꓦꓬꓼ ꓠꓬꓲ ꓥˍ ꓟꓲ ꓙꓳꓻ ꓗꓴꓸˍ ꓡꓳ=

ꓢꓲꓺ ꓒ ꓠꓬ ꓣꓳ ꓐꓰ ꓔꓬ ꓡꓳ= ꓣꓳ ꓤꓶꓻ ꓗꓪ ꓟꓲꓽ ꓦꓲ ꓕꓳꓽ ꓥꓳꓽ ꓬꓲ ꓫꓵꓽ ꓬꓲ ꓙꓰꓽ ꓮ ꓟꓬꓹ ꓙꓱꓼ ꓡ ꓥ ꓟꓲ꓾ ꓠꓲꓹ ꓫ ꓓꓴ ꓔꓳꓹ ꓜꓳꓽˍ ꓥ ꓟꓲ꓾ ꓫ ꓙꓵꓻ ꓓꓴ ꓔꓳꓹ ꓜꓳꓽˍ ꓥ ꓟꓲ ꓢꓲꓺ ꓒ ꓠꓬ ꓣꓳ ꓐꓰ ꓔꓬ ꓡꓳ ꓐꓯ ꓟ ꓔꓯ ꓕꓶꓺ ꓕꓶꓺ ꓡꓰꓽ ꓙꓵꓻ ꓠ ꓗꓹ ꓡꓳ= ꓕꓲ ꓖ ꓕꓲ ꓧꓪꓹ ꓣꓳ ꓡꓳꓸ ꓠꓬꓲˍ ꓕꓯ ꓢꓲꓺ ꓒ ꓬꓰ-ꓢꓴ ꓠꓬ ꓬꓲꓼ ꓟꓶ ꓔꓬ ꓟˍ ꓡꓰ ꓐꓰ ꓓꓹ ꓥ ꓟꓲ ꓬꓲ ꓠꓬ ꓣꓳ ꓐꓰ ꓔꓬ ꓡꓳ= ꓣꓳ ꓠꓬ ꓬꓲ ꓐꓰ ꓔꓬ ꓠꓬ ꓮ ꓕꓯꓽ ꓟꓲ ꓐꓬ ꓡꓰ ꓟꓽ ꓓ꓾ ꓐꓯ ꓟ ꓔꓯ ꓙꓵꓻ ꓠ ꓗꓹ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓠꓽ ꓠꓬꓲꓽ ꓠꓬꓲ ꓗꓪ ꓣꓳꓽ ꓦ ꓢꓯꓼ ꓪ ꓣꓴ ꓓꓴ ꓠꓬ ꓫ ꓙꓵ ꓟꓷꓽ ꓙꓵ ꓓꓴ ꓔꓳꓹ ꓜꓳꓽ ꓡ ꓕꓯ ꓕꓽ ꓙꓳꓺ= ꓠꓲꓹ ꓪꓴꓽ ꓪꓴꓽ ꓡꓰꓽ ꓔꓬ= ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓐꓰ ꓔꓬ ꓡꓳ= ꓮ ꓕꓯˍ ꓟꓲ ꓠꓬꓲꓺ ꓙ ꓡꓳꓸ ꓙ ꓔꓬ ꓡꓳ= ꓢꓲꓺ ꓒ ꓬꓰ-ꓢꓴ ꓢꓲꓺ ꓡꓲꓺ ꓡꓲˍ ꓐꓰ ꓗꓷ ꓡꓰ ꓝꓲ ꓟꓽ ꓐ ꓡ ꓟ ꓟꓲꓽ ꓦꓲ ꓕꓳꓽ ꓥꓳꓽ ꓟꓽ ꓙꓳ= ꓢꓲꓺ ꓒ ꓬꓰ-ꓢꓴ ꓠꓬ ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓥ ꓡꓳ= ꓖꓳ ꓡꓱ ꓠꓬꓲ ꓠꓲꓹ ꓪꓴꓽ ꓪꓴꓽ ꓡꓰꓽ ꓔꓬ ꓢꓲ꓾ ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻ ꓢꓲ ꓠꓬꓲ ꓛꓳꓻ ꓫꓱꓽ ꓢꓲ ꓠꓬꓲ ꓣꓳ ꓤꓶꓻ ꓡꓲꓺ ꓕꓱ ꓟ ꓔꓯ ꓟꓴꓽ ꓗꓪ ꓗꓴꓷꓼ ꓗꓪ ꓛꓲꓺ ꓬꓰˍ ꓗꓪ ꓛꓲꓺ ꓗꓹ ꓛꓲꓽ ꓛꓲꓽ ꓡꓰꓽ ꓜꓶꓽ ꓙꓰ ꓡꓯ ꓐꓰ ꓮ ꓙꓵꓽ ꓢꓴ ꓔꓯ ꓢꓯꓼ ꓪ ꓖꓶ ꓠꓲꓹ ꓫꓵˍ ꓡꓳ=