ꓬꓲ ꓛꓳ ꓒꓯꓹ ꓬꓰ ꓠꓲꓹ ꓫꓵ ꓢꓴ ꓔꓯ ꓤꓹ ꓠꓬꓲˍ ꓟ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓥꓪ ꓔꓯ ꓛꓳ ꓢꓴ ꓮ ꓙꓵꓽ ꓠꓬ ꓚꓲ ꓛꓬ ꓡꓯ ꓐꓳ ꓔꓶꓸ ꓓꓴ ꓑꓱꓸ ꓢꓲ ꓠꓬꓲ ꓛꓳ ꓠ ꓗˍ ꓡꓳ= ꓥꓪ ꓐꓱ ꓶ ꓢꓯꓼ ꓟꓬ ꓒꓲꓼ ꓬꓰ ꓢꓴ ꓠꓬ ꓢꓯꓼ ꓟꓬ ꓟꓶˍ ꓥꓳ= ꓚꓲ ꓛꓬ ꓐꓱ ꓶ ꓢꓯꓼ ꓟꓬ ꓟꓶ ꓢꓴ ꓠꓬ ꓢꓯꓼ ꓟꓬ ꓒꓲꓼ ꓬꓰ ꓪˍ ꓥꓳ꓾ ꓐꓰ ꓐꓯ ꓟ ꓶꓼ ꓓꓳ ꓫꓱꓹ ꓓꓳ ꓕꓳ ꓶꓽ ꓥ ꓡꓳ= ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶꓽ ꓗꓪ ꓠꓬ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓬꓲ ꓗ ꓠꓯꓸ ꓢꓲ ꓗꓪ ꓛꓳ ꓢꓴ ꓠꓬ ꓚꓲ ꓛꓬ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓠ ꓗˍ ꓡꓳ꓾ ꓐꓰ ꓐꓯ ꓟ ꓠꓬ ꓣꓳ ꓚꓲ ꓛꓬ ꓠꓲꓹ ꓡꓶꓽ꓾ ꓧꓪꓽ ꓖꓳ ꓓꓱꓽ ꓫꓵꓽ ꓠꓲꓹ ꓡꓶꓽ ꓔꓯ ꓟꓽ ꓛꓳ ꓛꓳ ꓢꓲꓺ ꓒ ꓬꓰ-ꓢꓴ ꓠꓲꓹ ꓡꓶꓽ ꓔꓯ ꓛꓳ ꓢꓲ ꓠꓬꓲ ꓫꓱꓽ ꓗꓳꓸ ꓙꓰˍ ꓟ ꓔꓯ ꓐꓯ ꓬꓯꓼ ꓡꓳ=

ꓢꓲꓺ ꓒ ꓬꓰ-ꓢꓴ ꓐꓯ ꓘꓶꓽ ꓔꓯ ꓣꓳ ꓠ ꓠꓹ ꓢꓲ꓾ ꓢꓲꓺ ꓒ ꓬꓰ-ꓢꓴ ꓕꓵꓼ ꓪ ꓡꓰ ꓐꓰ ꓛꓳ ꓫꓱꓽ ꓠꓬ ꓕꓱ ꓟ ꓠꓽ ꓣꓳ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓢꓲ ꓠꓬꓲ ꓢꓲꓺ ꓒ ꓬꓰ-ꓢꓴ ꓗ ꓠꓯꓸ ꓢꓲ ꓛꓳ ꓙꓰˍ ꓟ ꓔꓯ ꓫꓱˍ ꓡꓳ= ꓖꓳ ꓡꓱ ꓠꓬꓲ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓲꓹ ꓡꓶꓽ ꓐꓱ ꓶˍ ꓡꓰꓽ ꓟꓽ ꓥ ꓥ ꓪꓴ-ꓢ ꓠꓲꓹ ꓡꓶꓽ꓾ ꓪꓴ-ꓢ ꓐꓱ ꓶˍ ꓡꓰꓽ ꓛꓳ ꓫꓱꓽ ꓠ ꓗˍ ꓡꓳ=

ꓮ ꓟꓶ ꓠꓬ ꓜꓽ ꓓꓴ ꓚꓲꓸˍ ꓟ ꓦꓬꓼ ꓠꓬꓲ ꓗꓪ ꓠꓬ ꓪꓴ-ꓢ ꓡꓰ ꓛꓳ ꓝꓲ ꓠꓲꓹ ꓫꓵˍ ꓟ ꓬꓲ ꓠꓲꓹ ꓡꓶꓽ ꓠꓬ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓠꓵ ꓡꓯ ꓘꓳ꓾ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓧꓳꓹ ꓫꓵꓽ ꓧꓳꓹ ꓡꓯ ꓘꓳ꓾ ꓕꓲ ꓣꓳ ꓛꓳ ꓕꓲ ꓣꓳ ꓖꓼ ꓖꓶ ꓡꓯ ꓘꓳ ꓐꓯ ꓟ ꓬꓲ ꓕꓵꓼ ꓪ ꓔꓯ ꓣꓳ ꓛꓳ ꓫꓱꓽ ꓠ ꓗˍ ꓡꓳ= ꓕꓱ ꓡꓰ ꓛꓳ ꓫꓱꓽˍ ꓟ ꓗꓪ ꓠꓬ ꓠꓴ ꓠꓴ ꓥꓪ ꓥꓪ꓾ ꓟꓴ ꓟꓴ ꓱ ꓱ ꓟꓽ ꓐꓱ ꓡꓯ ꓘꓳ ꓘꓳ꓾ ꓢꓲꓺ ꓒ ꓬꓰ-ꓢꓴ ꓠꓲꓹ ꓟˍ ꓡꓰ ꓐꓰ ꓣꓳ ꓥˍ ꓟꓲ ꓠꓶꓽ ꓛꓳ ꓕꓲ ꓛꓳ ꓔꓯ ꓬꓰ ꓙ ꓔꓳꓹ ꓙ ꓠꓯꓹ ꓡꓳ= ꓮ ꓡꓲꓳ ꓐꓯ ꓠꓬ ꓣꓳ ꓠꓬ ꓣꓳ ꓚꓲ ꓛꓬ ꓠꓲꓹ ꓡꓶꓽ ꓔꓯ ꓟꓽ ꓛꓳ ꓔꓬ ꓟ ꓪꓴꓸ ꓠꓬꓲ ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓠꓲꓹ ꓡꓶꓽ ꓔꓯ ꓛꓳˍ ꓠꓬ ꓢꓲꓺ ꓒ ꓬꓰ-ꓢꓴ ꓮ ꓡꓲ ꓓꓵꓽ ꓙˍ? ꓢꓲꓺ ꓒ ꓬꓰ-ꓢꓴ ꓮ ꓡꓲ ꓡꓳꓸ ꓠꓬꓲ꓾ ꓢꓲꓺ ꓒ ꓬꓰ-ꓢꓴ ꓮ ꓡꓲ ꓢꓪꓸ ꓠꓬ ꓣꓳ ꓥˍ ꓟꓲ ꓢꓪꓸ ꓠ ꓗˍ ꓡꓳ= ꓕꓱ ꓟ ꓠꓬ ꓣꓳ ꓚꓲ ꓛꓬ ꓡꓯ ꓐꓳ ꓔꓶꓸ ꓓꓴ ꓔꓯ ꓑꓱꓸ ꓢꓲ ꓠꓬꓲ ꓢꓲꓺ ꓒ ꓬꓰ-ꓢꓴ ꓔꓯ ꓛꓳ ꓙꓰˍ ꓟ ꓔꓯ ꓫꓱꓸˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓟꓶ ꓜꓽ ꓓꓴ ꓚꓲꓸˍ ꓟ ꓦꓬꓼ ꓠꓬꓲ ꓗꓪ ꓣꓳ ꓟꓬꓽ ꓠꓬꓲ ꓧꓶꓸ ꓕꓯ ꓖꓼ ꓖꓶ ꓟꓽ ꓐ ꓡ ꓟ ꓔꓯ ꓣꓳ ꓖꓼ ꓖꓶ ꓠ ꓗˍ ꓡꓳ= ꓧꓶꓸ ꓕꓯ ꓣꓳ ꓠꓲꓹ ꓠꓵ ꓟꓽ ꓐ ꓡ ꓢꓴ ꓔꓯ ꓥˍ ꓟꓲ ꓣꓳ ꓟꓬꓽ ꓠꓬꓲ ꓠꓲꓹ ꓠꓵ ꓐ ꓡ ꓠꓹ ꓟ ꓢꓯꓼ ꓕꓵꓼ ꓙꓰ= ꓧꓶꓸ ꓕꓯ ꓣꓳ ꓢꓴ ꓔꓯ ꓟꓽ ꓬꓰ ꓙ ꓟ ꓗꓪ ꓬꓰ ꓙ ꓪ ꓡꓰ ꓝꓲ= ꓕꓱ ꓟ ꓮ ꓙꓵꓽ ꓠꓬ ꓢꓲꓺ ꓒ ꓬꓰ-ꓢꓴ ꓗ ꓠꓯꓸ ꓢꓲ ꓛꓳ ꓔꓬ ꓟ ꓔꓯ ꓫꓱꓸˍ ꓡꓳ= ꓖꓳ ꓡꓱ ꓟꓽ ꓥ ꓠꓬ ꓚꓲ ꓛꓬ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓑꓱꓸ ꓢꓲ ꓠꓬꓲ ꓢꓲꓺ ꓒ ꓬꓰ-ꓢꓴ ꓔꓯ ꓟꓽ ꓛꓳ ꓛꓳ ꓠꓱꓸ ꓐꓯ ꓕꓲ ꓚꓱꓹ ꓗꓪ ꓙꓰ ꓔꓬ ꓟ ꓔꓯ ꓫꓱꓸˍ ꓡꓳ=

ꓢꓲꓺ ꓒ ꓬꓰ-ꓢꓴ ꓠꓲꓹ ꓡꓶꓽ ꓔꓯ ꓟꓽ ꓛꓳ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓗ ꓠꓯꓸ ꓢꓲ ꓗꓪ ꓟꓽ ꓛꓳ ꓟ ꓔꓯ ꓫꓱꓸˍ ꓡꓳ= ꓣꓳ ꓚ ꓛꓬ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓔꓬ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓗ ꓠꓯꓸ ꓢꓲ ꓗꓪ ꓟꓽ ꓛꓳ ꓟ ꓡꓰ ꓗꓷ ꓡꓰˍ ꓥꓳ= ꓖꓳ ꓡꓱ ꓠꓬꓲ ꓣꓳ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓔ ꓥˍ ꓢꓲ ꓢꓲꓺ ꓒ ꓬꓰ-ꓢꓴ ꓗ ꓠꓯꓸ ꓛꓳ ꓙꓰ ꓠꓹ ꓟ ꓠꓬ ꓪ ꓙꓲ ꓬꓳꓸ ꓚꓵˍ ꓡꓳ= ꓢꓲꓺ ꓒ ꓬꓰ-ꓢꓴ ꓡꓳꓸ ꓠꓬꓲˍ ꓟ ꓡꓰ ꓐꓰ꓾ ꓢꓲꓺ ꓒ ꓬꓰ-ꓢꓴ ꓠꓲꓹ ꓠꓵˍ ꓟ ꓡꓰ ꓐꓰ ꓣꓳ ꓥˍ ꓟꓲ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓠꓵ ꓡꓯ ꓘꓳ ꓠ ꓗˍ ꓡꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ=