ꓬꓲ ꓟꓶꓽ ꓕꓲꓽ ꓠꓬꓲ ꓔꓯ ꓮ ꓡꓰ ꓐꓰ ꓙꓽ ꓖꓶꓽ ꓠꓬꓲ ꓔ ꓟ (Homily)

ꓘꓴ ꓜꓲꓼ ꓞꓳ ꓟꓶꓽ ꓘꓳꓼ 33 ꓫꓵꓽ ꓠ

ꓟꓯ-ꓡꓷ-ꓘꓶ 3ꓽ 19-20

ꓦꓬꓼ ꓠꓬꓲ ꓠꓬ ꓮꓸ ꓔꓳꓸ ꓕꓲꓽ ꓐꓲꓼ ꓡꓰ ꓐꓰ ꓬꓯꓼ ꓡ ꓔꓬ ꓡꓳ= ꓚꓵꓸ ꓛꓬꓽ ꓢꓯꓼ ꓪꓽ ꓔꓯ ꓘꓶꓽ ꓘꓹ ꓢꓴ ꓟꓽ ꓙꓲˍ ꓟ ꓔꓯ ꓬꓰ ꓢꓴ ꓐꓴ ꓠꓬ ꓜ ꓫ ꓦˍ ꓟ ꓡꓰ ꓐꓰ ꓓꓳꓽ ꓡꓰˍ ꓥꓳ= ꓛꓲ ꓡˍ ꓟ ꓦꓬꓼ ꓠꓬꓲ ꓖꓳ ꓟ ꓗꓪ ꓐꓰ ꓬꓲ ꓚꓰꓺ ꓬꓲ ꓪꓵꓽ ꓮꓽ ꓙꓵ ꓮꓸ ꓔꓳꓸ ꓐꓬ ꓡꓰˍ ꓥꓳ ꓐꓰ ꓪꓴ-ꓢ ꓐꓯˍ ꓡꓳ= ꓖꓳ ꓡꓰ ꓥˍ ꓟ ꓪꓴ-ꓢ ꓔꓯ ꓙꓳ ꓒꓵꓽ ꓢꓴ ꓠꓬ ꓔꓱꓹ ꓚꓵˍ ꓟ ꓟꓶꓽ ꓟꓲ ꓡꓰ ꓡꓬꓽ ꓓꓳ ꓡˍ ꓥꓳ= ꓮꓸ ꓔꓳꓸ ꓛꓵ ꓡꓯꓼ ꓡꓰ ꓠ ꓫꓬꓹ ꓒꓬꓽ ꓫꓬ ꓖꓶ ꓡˍ ꓟ ꓟꓶˍ ꓡꓳ= 

 2 ꓕꓰ-ꓢ-ꓡꓳ-ꓠꓲ-ꓬ 3ꓽ 7-12 

ꓥꓪ ꓠꓴꓽ ꓔꓯ ꓮ ꓡꓲ ꓐꓰ ꓔꓯꓺ ꓢꓳ ꓠ ꓗꓹ ꓟ ꓠꓴ ꓪꓽ ꓢꓷˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓠꓽ ꓠꓴ ꓪꓽ ꓗꓳ ꓡꓳ ꓗꓪ ꓞꓳ ꓐꓴꓻ ꓟꓽ ꓬꓰ ꓠꓬꓲ꓿ 8 ꓝꓮꓲ ꓠꓬ ꓮ ꓡꓲ ꓕꓲ ꓣꓳ ꓜꓽ ꓓꓴˍ ꓟꓲ ꓬꓲ ꓒꓵꓽ ꓟꓽ ꓐꓶꓻ ꓐꓶ꓾ ꓥꓪ ꓠꓴꓽ ꓮꓽ ꓔꓳ ꓟꓽ ꓜ ꓠꓬꓲ꓿ ꓥꓪ ꓠꓴꓽ ꓠꓽ ꓠꓴ ꓪꓽ ꓮꓽ ꓟ ꓔꓯˍ ꓟꓲ ꓟꓽ ꓪꓴꓽ ꓧꓶ ꓡꓰ ꓝꓲ ꓠꓹ ꓟ꓾ ꓟꓳ ꓡꓳ ꓢ ꓘꓪ ꓢꓯꓼ ꓕꓵꓼ ꓢꓲ ꓟꓬꓱꓽ ꓬꓰ ꓗꓷꓳ꓿ ꓥꓪ ꓠꓴꓽ ꓕꓱ ꓡꓱ ꓬꓰ ꓗꓷ ꓟ ꓠꓬ ꓙꓵꓽ ꓪꓽ ꓟꓽ ꓙꓳˍ ꓠꓬꓲ ꓟꓽ ꓥ꓿ ꓠꓴ ꓪꓽ ꓔꓯꓺ ꓢꓳ ꓓꓴ ꓬꓰ ꓠꓹ ꓟ ꓟꓳꓸ ꓖꓶ ꓗꓷ ꓟ ꓥ ꓡꓳ꓿ ꓧꓶꓸ ꓕꓯ ꓠꓴ ꓪˍ ꓐꓰ ꓥꓪ ꓠꓴꓽ ꓔꓬ ꓕꓯ꓾ ꓟꓬꓱꓽ ꓬꓰ ꓟꓽ ꓫꓳ ꓢꓴ ꓙꓳ ꓐꓷˍ ꓠꓬ ꓬꓲ ꓔꓯ ꓜ ꓕꓽ ꓜ ꓝꓲ꓾ ꓐꓰ ꓠꓴ ꓪꓽ ꓔꓯ ꓕꓵꓼ ꓪ ꓖꓶ ꓗꓷꓳ꓿ ꓠꓴ ꓪꓽ ꓗꓳ ꓡꓳ ꓗꓪ꓾ ꓐꓴꓻ ꓢꓲ ꓮꓸ ꓫꓵꓽ ꓟꓬꓱꓽˍ ꓟꓲ ꓟꓽ ꓬꓰ ꓬꓰ꓾ ꓢꓴ ꓫꓵꓽ ꓪꓴꓻ ꓗꓪˍ ꓡꓰꓽ ꓘꓶ ꓡꓶꓽ ꓔꓬ ꓢꓴ ꓙꓳˍ ꓟ ꓥꓪ ꓠꓴꓽ ꓑ ꓙꓽ ꓗꓷꓳ꓿ ꓡ ꓞꓳ ꓖꓳ ꓕꓲ ꓧꓳꓽ ꓠꓬ ꓢꓲ ꓡꓲ ꓐꓰ ꓟꓬꓱꓽ ꓬꓰ ꓢꓲ ꓚꓲ ꓛꓬ ꓖꓳ ꓓꓱ ꓦꓵ ꓠꓹ ꓟ꓾ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓟꓬꓱ ꓗꓪ ꓐꓰ ꓥꓪ ꓠꓴꓽ ꓡꓰ ꓕꓵꓼ ꓪ ꓖꓶꓽ ꓢꓲ ꓘꓶꓸ ꓖꓶ ꓠꓲꓹ ꓫꓵˍ ꓡꓳ꓿

ꓡꓴ-ꓘ 21ꓽ 5-19

ꓛꓳꓽ ꓒꓯꓹ ꓐꓴ ꓕꓲ ꓐꓱꓻ ꓠꓬ꓾ ꓢꓲꓽ ꓫꓬ ꓦꓲˍ ꓐꓰ꓾ ꓖꓳ ꓗꓪ ꓮꓽ ꓘꓶꓸ ꓐꓲꓻˍ ꓟ Bꓸ ꓛꓲˍ ꓐꓰ꓾ ꓔꓲ ꓖꓶ ꓡ ꓟ ꓖꓴꓽ ꓙꓴ ꓡꓰ ꓐꓲꓻ ꓫꓴꓽ ꓔ ꓟ ꓔꓯ ꓖꓴ ꓢꓲ ꓫꓸ ꓕꓱ ꓡꓯꓽ ꓘꓳ ꓔꓬ ꓕꓯ꓾ 6 ꓬꓰ-ꓢꓴ ꓡꓰ꓾ ꓠꓴ ꓪꓽ ꓡꓳꓸ ꓟꓳꓻˍ ꓟ꓾ ꓕꓱ ꓗꓪ ꓕꓲ ꓟ ꓕꓯꓽ ꓢꓲ ꓕꓲ ꓟ ꓜꓶꓻ ꓔ ꓟ Bꓸ ꓛꓲ ꓠꓬ ꓟꓽ ꓥꓸ ꓦ ꓟ ꓟꓽ ꓙꓳ ꓗꓷ ꓡꓰˍ ꓟ ꓦꓬꓼ ꓠꓬꓲ ꓛꓲ ꓡ ꓥꓳ꓾ ꓐꓯˍ ꓡꓳ꓿ 7 ꓖꓳ ꓡꓱ ꓠꓬ ꓬꓲ ꓪꓽ ꓬꓲ ꓔꓯ ꓠ ꓠꓬꓲ ꓢꓲ꓾ ꓟꓸ ꓒꓽꓳ꓾ ꓕꓱ ꓟꓬ ꓙꓰꓽ ꓟ ꓮ ꓕꓯꓽ ꓗꓷ ꓡꓰˍ ꓥꓳ ꓪ? ꓕꓱ ꓟꓬ ꓙꓰꓽ ꓛꓲ ꓡꓺˍ ꓐꓯˍ ꓕꓯ ꓮꓸ ꓫꓵ ꓢꓷꓸ ꓡꓰ ꓓꓴ ꓓꓳ ꓡ ꓥꓳ ꓪ?꓾ ꓐꓰ ꓠ ꓠꓬꓲˍ ꓡꓳ꓿ 8 ꓬꓰ-ꓢꓴ ꓡꓰ꓾ ꓢꓴ ꓠꓴ ꓪꓽ ꓔꓯ ꓟꓽ ꓧꓳꓽ ꓪꓴꓸ ꓙꓰ ꓠꓹ ꓟ ꓤ ꓟꓳ꓿ ꓮ ꓡꓲꓳ ꓐꓯ ꓠꓬ ꓢ ꓖꓪ ꓠꓽ ꓡꓽ ꓞꓳ ꓮꓽ ꓟꓬꓹ ꓥꓪ ꓟꓬꓱ ꓟꓯꓻ ꓢꓲ꓾ ꓥꓪ ꓠꓬ ꓙꓲ-ꓢꓴ ꓥ ꓡꓳ꓾ ꓐꓰ ꓐꓯ ꓡ ꓥꓳ꓿ ꓝꓮꓲ ꓠꓬ ꓦꓬꓼ ꓠꓬꓲ ꓛꓲ ꓡꓺꓳ꓾ ꓐꓯ ꓡ ꓥꓳ꓿ ꓠꓴ ꓪꓽ ꓠꓬ ꓬꓲ ꓪꓽ ꓔꓯ ꓕꓽ ꓛꓳ꓿ 9 ꓢꓰꓼ ꓡꓯꓽ ꓘꓳˍ ꓟ ꓐꓰ ꓢꓴꓺˍ ꓟ ꓓꓳꓽ ꓬꓲ ꓫꓵꓽ ꓬꓲ ꓙꓰ ꓠꓴ ꓪꓽ ꓑ ꓙꓽˍ ꓕꓯ ꓕꓽ ꓙꓳ꓿ ꓮ ꓡꓲꓳ ꓐꓯ ꓠꓬ ꓕꓱ ꓟꓬ ꓙꓰ ꓟ ꓠ ꓧꓶꓸ ꓕꓯ ꓡꓰ ꓒꓬꓱꓼ ꓡ ꓠ ꓗꓹ ꓡꓳ꓿ ꓖꓳ ꓡꓱ ꓥ ꓟꓲ ꓡꓳꓹ ꓬꓰ ꓝꓲꓸ ꓠꓬ ꓞꓼ ꓐꓰ ꓟꓽ ꓛꓲ ꓡ ꓢꓰ꓾ ꓐꓯˍ ꓡꓳ꓿ 10 ꓝꓮꓲ ꓬꓲ ꓡꓰ꓾ ꓞꓳ ꓫꓵꓽ ꓛꓳꓽ ꓞꓳ ꓫꓵꓽ ꓒꓳꓹ ꓡꓯꓽ ꓘꓳ ꓔꓴ ꓡ ꓥꓳ꓿ ꓗꓴꓷꓼ ꓛꓳ ꓗꓴꓷˍ ꓟꓲ ꓓꓶꓽ ꓡꓯꓽ ꓘꓳ ꓔꓴ ꓡ ꓥꓳ꓿ 11 ꓟꓵꓽˍ ꓟꓲ ꓮꓽ ꓘꓶꓸ ꓓꓵꓺ ꓡ ꓥꓳ꓿ ꓕꓲ ꓖ ꓕꓲ ꓔꓳꓸ ꓦꓰꓼ ꓟꓷ ꓘꓳꓼˍ ꓐꓰ ꓠꓻ ꓓꓱꓽˍ ꓟꓲ ꓓꓳ ꓡ ꓥꓳ꓿ ꓝꓮꓲ ꓠꓬ ꓟꓴꓽ ꓗꓪ ꓗꓪ ꓐꓰ ꓟꓬ ꓑꓬꓺ ꓓꓴˍ ꓐꓰ ꓢꓷꓸ ꓡꓰ ꓓꓴ ꓬꓲ ꓓꓽ ꓟ ꓟꓳꓸ ꓖꓶ ꓡ ꓥꓳ꓿ 12 ꓕꓱ ꓟꓬ ꓙꓰꓽ ꓟ ꓟꓽ ꓛꓲ ꓡ ꓕꓯˍ ꓡꓰ꓾ ꓢꓴ ꓠꓬ ꓠꓴ ꓪꓽ ꓔꓯ ꓣꓴ ꓡ ꓥꓳ꓿ ꓝꓮꓲ ꓠꓴ ꓪꓽ ꓔꓯ ꓗꓸ ꓧꓪ ꓢꓲ ꓜꓲꓼ ꓦꓲˍ ꓐꓰ ꓐꓱꓻ ꓓꓴꓽ ꓗꓪ ꓡꓯꓼ ꓙꓱ ꓗꓷ ꓢꓲ ꓠꓬꓲ꓾ ꓥꓪ ꓟꓬꓱ ꓪꓴꓸ ꓠꓬꓲ ꓠꓴ ꓪꓽ ꓔꓯ ꓪ ꓔꓲꓸ ꓐꓴˍ ꓐꓰ ꓢꓲꓽ ꓒ ꓓꓽ ꓟ ꓐꓴ ꓟꓲ ꓙꓬꓽ ꓗꓪ ꓧꓳꓽ ꓛꓲ ꓬꓰˍ ꓥꓳ꓿ 13 ꓕꓱ ꓟ ꓠꓽ ꓠꓴ ꓪꓽ ꓥꓪ ꓐꓱ ꓶ ꓢꓷꓸ ꓙ ꓟꓳ ꓙ ꓠꓹ ꓟ ꓬꓲ ꓙꓵꓹ ꓗꓷ ꓡꓰˍ ꓥꓳ꓿ 14 ꓖꓳ ꓕꓯ ꓮ ꓡꓲ ꓐꓰ ꓒꓳꓹ ꓖꓶ ꓠꓯꓹ ꓟ ꓧꓶꓸ ꓕꓯˍ ꓡꓰ ꓟꓽ ꓙꓽ ꓖꓶ ꓠꓹ ꓟ ꓓꓵꓽ ꓙ ꓞꓷꓹ ꓔ꓿ 15 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓛꓴꓽ ꓙꓳ ꓢꓴ ꓮ ꓡꓲ ꓕꓲ ꓣꓳˍ ꓟꓲ ꓗꓽ ꓔ ꓟꓽ ꓘꓴꓻ ꓟ ꓐꓰ꓾ ꓐꓯ ꓧꓪꓸ ꓡꓰ ꓟꓽ ꓓ ꓟ ꓐꓯ ꓙꓺˍ ꓐꓰ꓾ ꓙꓽ ꓗꓴ ꓠꓲꓹ ꓠꓴ ꓪꓽ ꓔꓯ ꓥꓪ ꓖꓶˍ ꓥꓳ꓿ 16 ꓠꓴ ꓪꓽ ꓐꓹ ꓐ ꓟꓹ ꓟ꓾ ꓬꓲꓼ ꓤ ꓠꓬꓲ ꓤ꓾ ꓫꓵꓽ ꓤ ꓧꓪ ꓤˍ ꓐꓰ ꓛꓳꓽ ꓒꓯꓹ ꓐꓴ ꓡꓰ ꓠꓴ ꓪꓽ ꓔꓯ ꓡꓯꓼ ꓙꓱ ꓗꓷ ꓡ ꓥꓳ꓿ ꓕꓲ ꓐꓱ ꓔꓯ ꓠꓬ ꓬꓲ ꓪꓽ ꓡꓰ ꓫꓵꓻ ꓝꓲˍ ꓥꓳ꓿ 17 ꓥꓪ ꓟꓬꓱ ꓪꓴꓸ ꓠꓬꓲ ꓮꓽ ꓙꓵ ꓢꓴ ꓠꓴ ꓪꓽ ꓔꓯ ꓠꓲꓹ ꓜꓳ ꓡ ꓥꓳ꓿ 18 ꓖꓳ ꓡꓱ ꓥ ꓟꓲ ꓠꓴ ꓪꓽ ꓪꓴꓸ ꓞꓱꓻ ꓕꓲ ꓚˍ ꓟꓲ ꓟꓽ ꓒꓲꓼ ꓬꓰ꓿ 19 ꓠꓴ ꓪꓽ ꓜꓲꓽ ꓘꓴꓻˍ ꓠꓬ ꓢꓯꓼ ꓟꓬ ꓟꓶˍ ꓥꓳ꓿