ꓬꓳ-ꓠ ꓢꓷꓸ ꓡꓰ ꓓꓴ

ꓡ ꓞꓳ ꓮ ꓙꓵ ꓠꓬ ꓓꓵꓽ ꓙ ꓟꓶ ꓓꓴ ꓢꓷꓸ ꓡꓰ ꓓꓴ ꓔꓯ ꓡꓰ ꓧꓪ ꓠꓲꓹ ꓫꓵ ꓢꓷꓸ ꓠꓲꓹ ꓫꓵ ꓟꓳ ꓠꓲꓹ ꓫꓵ_ ꓢꓴ ꓡꓰ ꓥꓳ= ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓝꓲꓸ ꓗꓪ ꓥ ꓟꓲ ꓜꓲꓼ ꓡ ꓢꓴ ꓞꓳ ꓜꓴ ꓐꓴ ꓠꓬ ꓬꓰ-ꓢꓴ ꓗꓪ ꓐꓰ ꓢꓷꓸ ꓡꓰ ꓓꓴ ꓔꓯ ꓡꓰ ꓧꓪ_ ꓟ ꓥꓳ= ꓐꓯ ꓘꓶꓽ ꓕꓲ ꓟ ꓙꓳ_ ꓡꓳ꓾ ꓕꓱ ꓟ ꓠꓬ ꓙꓵꓻ ꓠꓲꓹ ꓙꓳ ꓢꓴ ꓐꓴ ꓐꓱ ꓶ ꓠꓬ ꓢꓷꓸ ꓡꓰ ꓓꓴ ꓓꓵꓽ ꓙ ꓟꓶ ꓓꓴ ꓟꓽ ꓣꓱꓽ ꓬꓯꓼ꓾ ꓙꓵꓻ ꓠꓲꓹ ꓟꓽ ꓙꓳ ꓢꓴ ꓐꓱ ꓶ ꓠꓬ ꓟꓽ ꓡꓳꓼ ꓕꓲꓽ ꓟ ꓟꓸ ꓖꓶ ꓠꓬ ꓠꓬꓲꓽ ꓟ ꓢꓷꓸ ꓠꓲꓹ ꓫꓵ ꓕꓱ ꓡꓱ ꓮ ꓟꓬꓹ ꓢꓷꓸ ꓠꓲꓹ ꓫꓵ_ ꓟ ꓥꓳ= ꓣꓳ ꓤꓶꓻ ꓗꓪ ꓛꓳꓽ ꓥ ꓟꓲ ꓣꓳ ꓠꓯꓼ ꓗꓪ ꓢꓷꓸ ꓡꓰ ꓓꓴ ꓐꓰ ꓐꓲ ꓜꓲꓼ ꓔꓬ ꓟ ꓥꓳ= ꓣꓳ ꓚꓲ ꓛꓬ ꓥ ꓟꓲ ꓓꓵꓽ ꓙ ꓟꓶ ꓓꓴ ꓥ ꓡꓳ꓾ ꓙꓻ ꓫꓱꓽ ꓓꓴ ꓛꓲ ꓒꓯꓹ ꓙꓳ_ ꓟ꓾ ꓠꓬꓲ ꓟꓳ ꓓꓴ ꓟꓬ ꓢꓶꓽ ꓙꓳ_ ꓟ꓾ ꓜ ꓓꓴ ꓫꓸ ꓕꓱ ꓓꓴ ꓟꓶꓽ ꓠꓷꓹ ꓙꓳ_ ꓡꓳ꓾ ꓕꓱ ꓟ ꓮ ꓙꓵ ꓠꓬ ꓓꓵꓽ ꓙ ꓟꓶ ꓓꓴ ꓢꓷꓸ ꓡꓰ ꓓꓴ ꓡꓰ ꓥꓳ= ꓖꓳ ꓟ ꓑꓶ ꓓꓴ ꓣꓳ ꓮ ꓕꓯ ꓥ ꓟꓲ ꓫꓱꓸ ꓖꓶ ꓠꓹ ꓟ꓾ ꓢꓷꓸ ꓡꓰ ꓓꓴ ꓔꓯ ꓡꓰ ꓟꓽ ꓧꓪ ꓠꓹ ꓟ ꓥ ꓡꓳ= ꓓꓵꓽ ꓙ ꓟꓶ ꓡꓰ ꓓꓴ ꓕꓲ ꓟ ꓠꓬ ꓬꓰ-ꓢꓴ ꓢꓯꓸ ꓬꓯꓼ ꓡ_ ꓟ ꓥ ꓡꓳ= ꓫꓵꓻ ꓗꓪ ꓐꓰ ꓢꓯꓸ ꓬꓯꓼ ꓡ ꓟ ꓧꓪꓸ ꓡꓰ_ ꓟ ꓬꓰ-ꓢꓴ ꓔꓯ ꓙꓵꓻ ꓢꓴ ꓠꓬ ꓐꓯ ꓖꓴ ꓟꓽ ꓓ ꓟ ꓢꓷꓸ ꓡꓰ ꓓꓴ ꓔꓯ ꓪ ꓟꓶ ꓡꓰ ꓟ ꓥꓳ= ꓖꓳ ꓟ ꓑꓶ ꓓꓴ ꓓꓵꓽ ꓙ ꓟꓶ ꓓꓴ ꓡꓰ ꓕꓽ ꓧꓪ꓾ ꓪꓴ-ꓢ ꓠꓬ ꓣꓳ ꓠꓲꓹ ꓟ ꓘꓴꓽ ꓗꓪ ꓔꓬ ꓡꓳ= ꓚꓲ ꓛꓬ ꓔꓬ ꓟ ꓤꓶꓻ ꓗꓪ ꓐꓰ ꓪꓴ-ꓢ ꓔꓯ ꓫꓱꓸ ꓖꓶ_ ꓠꓬ ꓕꓱ ꓟ ꓠꓬ ꓓꓵꓽ ꓙ ꓟꓶ ꓓꓴ ꓢꓷꓸ ꓡꓰ ꓓꓴ ꓡꓰ ꓥ ꓡꓳ=