ꓮꓽ ꓟ ꓥˍ ꓟꓲ ꓬꓲꓻ ꓙꓬ ꓗꓪ ꓐꓰ ꓟꓽ ꓦꓵꓻ ꓡ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓢꓲꓺ ꓡꓲꓺ ꓟ ꓢꓯꓼ ꓟꓬ ꓟꓽ ꓟꓶ

ꓘ-ꓣꓲ-ꓢ-ꓔꓴ ꓢꓲꓺ ꓒ ꓠꓯꓸꓼ ꓗꓪ ꓟ ꓠꓲꓹ ꓠꓵˍ ꓟ ꓬꓲ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓠꓽ ꓠꓬꓲ ꓗꓪ ꓣꓳ ꓑ ꓙ ꓪˍ ꓟ ꓟꓸ ꓟꓲꓽ ꓬꓲꓸ ꓪꓴ ꓕꓲ ꓕꓱ ꓥ ꓟ ꓝꓲ ꓓꓴ ꓕꓳꓽ ꓶ ꓗꓪ꓾ ꓢꓲꓺ ꓒ ꓘ-ꓣꓲ-ꓢ-ꓔꓴ ꓢꓲ ꓤ ꓐꓴ ꓠꓬ ꓕꓲ ꓠꓲꓹ ꓟ ꓡꓱꓸꓼ ꓕꓲ ꓙꓽ ꓠꓲꓹ ꓡꓱꓸꓼ ꓬꓲ ꓪ ꓔꓯ ꓙꓳˍ ꓟ ꓖꓴ ꓙꓴ ꓐꓱ ꓡꓯꓽ ꓘꓳ ꓢꓲ ꓞꓳ ꓙꓳ ꓔꓬ ꓟ ꓔꓯ ꓣꓳ ꓑ ꓙˍ ꓡꓳ= ꓬꓲ ꓪ ꓔꓯ ꓙꓳˍ ꓟ ꓜꓽ ꓓꓴ ꓓꓳ ꓓꓴ꓾ ꓖꓴ ꓙꓴ ꓚꓬꓹ ꓢꓲꓸ ꓮ ꓙꓵꓽ ꓔꓯ ꓡꓳꓽ ꓗꓷ ꓢꓲ ꓕꓲ ꓡꓰꓹꓼ ꓣꓱꓽˍ ꓟ ꓔꓯ ꓑ ꓙˍ ꓡꓳ= ꓠꓴ ꓔꓯ ꓟ ꓥꓪ ꓔꓯ ꓟ ꓐꓯ ꓢꓲ ꓟꓽ ꓘꓶꓽ ꓘꓶꓽ ꓐꓰ ꓕꓲ ꓡꓰꓹꓼ ꓜꓽ꓾ ꓕꓲ ꓡꓰꓹꓼ ꓓꓳ꓾ ꓕꓲ ꓡꓰꓹꓼ ꓗꓹ ꓛꓲꓽ ꓛꓲꓽ ꓔꓬ ꓢꓲ ꓪꓴ-ꓢ ꓔꓯ ꓫꓱꓸ ꓖꓶ ꓔꓬ ꓟ ꓔꓯ ꓝꓲ ꓓꓴ ꓕꓳꓽ ꓶ ꓗꓪ ꓠꓬꓲꓸ ꓠꓬꓲ ꓣꓳ ꓑ ꓙˍ ꓡꓳ=

ꓶꓼ ꓓꓳ ꓫꓱꓹ ꓓꓳ ꓕꓳ ꓶ ꓗꓪ ꓥˍ ꓟꓲ꓾ ꓢꓲꓺ ꓒ ꓬꓰ-ꓢꓴ ꓠꓬ ꓠꓲ-ꓗꓳ-ꓓꓲ-ꓟꓴ ꓟꓸ ꓒ ꓐꓰ ꓟꓳ ꓡꓯꓽ ꓘꓳꓹ ꓟ ꓔꓯ ꓑ ꓙˍ ꓟ ꓥꓳ= ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓪ ꓠꓬ ꓕꓯꓽ ꓢꓲꓺ ꓗꓪ ꓐꓰ ꓟꓽ ꓦꓵꓻ ꓠꓬ ꓟꓴ ꓗꓪ ꓗꓷꓴꓼ ꓗꓪ ꓛꓲ ꓬꓰ ꓟꓽ ꓓ꓾ ꓐꓰ ꓬꓲ ꓔꓯ ꓐꓯ ꓖꓶˍ ꓡꓳ= ꓬꓲ ꓠꓬ ꓓꓵꓽ ꓙ ꓮ’ ꓡꓰ ꓢꓲ꓾ ꓞꓳ ꓤ ꓕꓲ ꓣꓳ ꓦꓵꓻ ꓡ ꓗꓸ ꓠꓯꓸ ꓮ ꓡꓰ ꓐꓰ ꓬꓲ ꓟꓹ ꓟ ꓤ ꓘꓶꓻ ꓗꓪ ꓓꓵꓽ ꓙꓰ ꓓꓹ ꓡ꓾ ꓐꓰ ꓬꓰ-ꓢꓴ ꓔꓯ ꓠ ꓠꓬꓲˍ ꓡꓳ=

ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓔꓯ꓾ ꓮꓽ ꓟ ꓥˍ ꓟꓲ ꓬꓲꓻ ꓙꓬ ꓗꓪ ꓐꓰ ꓟꓽ ꓦꓵꓻ ꓡ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓢꓲꓺ ꓡꓲꓺ ꓟ ꓢꓯꓼ ꓟꓬ ꓟꓽ ꓟꓶ= ꓟꓲ ꓦꓲ ꓠꓬ ꓬꓲ ꓙꓱꓼ ꓠꓲꓹ ꓫꓵˍ ꓟ ꓗꓪ ꓙꓱꓼˍ ꓥꓳ= ꓕꓱ ꓟ ꓡꓰ ꓐꓰ ꓢꓲꓽ-ꓫꓬ-ꓟ-ꓦˍ ꓟꓲ ꓟꓲ ꓦꓲ ꓔꓯ ꓫꓱꓸˍ ꓟ ꓥ ꓢꓲ꓾ ꓬꓲ ꓮ ꓡꓰ ꓗꓪ ꓡˍ ꓟ ꓣꓳ ꓟꓽ ꓢꓷꓸ꓾ ꓐꓰ ꓒꓳꓹ ꓖꓶˍ ꓡꓳ=

ꓠꓬꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡˍ ꓟ ꓠꓬ꓾ ꓢꓲꓺ ꓒ ꓬꓰ-ꓢꓴ ꓫꓸ ꓙꓵ ꓟꓶ ꓙꓵ ꓗꓷ ꓢꓲ ꓢꓽ ꓠꓬꓲ ꓕꓲ ꓠꓬꓲ ꓗꓪ ꓝꓮꓲꓸ ꓢꓯꓸ ꓬꓲꓼ ꓡ ꓗꓷ ꓢꓲ ꓠꓬꓲ꓾ ꓞꓳ ꓤ ꓮꓽ ꓙꓵꓽ ꓐꓱ ꓶ ꓬꓲ ꓡꓰ ꓚꓬꓴ ꓙˍ ꓟ ꓣꓱꓽ ꓛꓰꓽ ꓖꓶ ꓗꓷꓳ= ꓕꓱ ꓟ ꓗꓪ ꓐꓰ ꓞꓳ ꓤ ꓠꓬ ꓬꓲꓸ ꓫꓵꓼ ꓝꓮꓲ ꓕꓲ ꓧꓪꓹ ꓦꓵꓻˍ ꓟ ꓟꓶ ꓗꓷꓳ= ꓬꓰ-ꓢꓴ ꓠꓯꓸꓼ ꓗꓪ ꓞꓳ ꓫꓵꓼ ꓒꓬꓱꓼ ꓡ ꓗꓷꓳ= ꓢꓲꓺ ꓒ ꓬꓰ-ꓢꓴ ꓠꓯꓸꓼ ꓗꓪ ꓖꓳ ꓓꓱꓽ ꓔꓲꓹ ꓔ ꓢꓴ ꓮ ꓙꓵꓽ ꓠꓬ ꓞꓳ ꓫꓵꓼ ꓒꓬꓱꓼ ꓡꓻꓳ= ꓟꓴ ꓗꓪ ꓗꓴꓷꓼ ꓔꓯ ꓟ ꓞꓳ ꓤ ꓒꓬꓱꓼ ꓡꓻ ꓳ= ꓟꓲ ꓠꓯ ꓔꓯ ꓟ ꓟꓽ ꓥ ꓳ= ꓢꓲꓺ ꓒ ꓬꓰ-ꓢꓴ ꓫꓵꓽ ꓗꓪ ꓐꓰ ꓢꓲꓺ ꓔ ꓟ ꓣꓳ ꓠꓬ ꓟꓴꓽ ꓗꓪ ꓗꓪ ꓟ ꓒꓬꓱꓼ ꓡꓻ ꓳ= ꓠꓬꓲꓸ ꓠꓬꓲ ꓞꓳ ꓫꓵꓼ ꓕꓲ ꓣꓳ ꓒꓬꓱꓼ ꓡ ꓟ ꓑꓶꓸ ꓓꓴ ꓫꓵꓼˍ ꓟ ꓡ ꓞꓳ ꓕꓲ ꓣꓳ ꓡꓰ ꓐꓰ ꓛꓳ ꓫꓱꓽ ꓠ ꓗꓹ ꓡꓳ= 

ꓬꓰ-ꓢꓴ ꓫꓵꓻ ꓢꓲ ꓢꓯꓸ ꓬꓲꓼ ꓡ ꓗꓷ ꓗꓸ ꓠꓯꓸ ꓬꓲ ꓡꓰ ꓣꓳ ꓔꓯ ꓟꓸ ꓖꓶ ꓔꓬ ꓟ ꓙꓻ ꓖꓴ ꓠꓬ ꓢꓲꓽ-ꓫꓬ-ꓟ-ꓦ ꓠꓯꓸꓼ ꓗꓪ ꓛꓳ ꓫꓱꓽ ꓢꓲ ꓠꓵ ꓠꓲꓹ ꓙꓳ ꓠꓹ ꓟ ꓟꓳꓸ ꓖꓶ ꓡˍ ꓟ ꓥ ꓡꓳ=  ꓢꓲꓽ ꓫꓬ ꓕꓳ ꓶ ꓬꓲ ꓪꓴꓸ ꓕꓲ ꓕꓱ ꓗꓪ ꓠꓬ ꓧꓶꓸ ꓕꓯ ꓟ ꓔꓯ ꓟꓽ ꓫꓱꓸ ꓫꓱꓸ ꓾ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓠꓵ ꓡꓯ ꓘꓳ ꓢꓲ ꓠꓴ ꓔꓯ ꓙꓳˍ ꓟ ꓐꓰ ꓥꓪ ꓔꓯ ꓙꓳˍ ꓟ ꓮ ꓙꓵꓽ ꓔꓽ ꓧꓳꓽ ꓣꓱꓽˍ ꓟ ꓔꓯ ꓣꓳ ꓑ ꓙˍ ꓡꓳ= ꓕꓱ ꓟ ꓠꓬ ꓬꓰ-ꓢꓴ ꓫꓬꓹ ꓔꓶ ꓠꓲꓹ ꓫꓵˍ ꓟ ꓟꓴꓽ ꓗꓪ ꓗꓴꓷꓼ ꓥ ꓡꓳ=

ꓟꓲ ꓠꓯ ꓗꓪ ꓬꓲ ꓫꓬꓹ ꓔꓶ ꓠꓲꓹ ꓫꓵˍ ꓟ ꓠꓬ ꓗꓹ ꓛꓲˍ ꓟ ꓠꓵ ꓠꓲꓹ ꓙꓳˍ ꓟ ꓗꓴꓷꓼ ꓕꓲ ꓟ ꓒꓬꓱꓼ ꓡ ꓠꓹ ꓟ ꓥ ꓡꓳ= ꓕꓱ ꓟ ꓔꓯ ꓬꓰ-ꓢꓴ ꓫꓵꓻ ꓢꓲ ꓢꓯꓸ ꓬꓲꓼ ꓡ ꓗꓸ ꓠꓯꓸ ꓔꓶ ꓙꓱꓼ ꓕꓱ ꓟ ꓔꓯ ꓞꓳ ꓤ ꓐꓴ ꓡꓰ ꓧꓶꓸ ꓕꓯ ꓢꓷꓸ ꓡꓰ ꓠꓹ ꓟ ꓬꓰ ꓔ ꓡꓳ= ꓣꓳ ꓘ-ꓣꓲ-ꓢ-ꓔꓴ ꓢꓲ ꓤ ꓐꓴ ꓐꓱ ꓶ ꓦꓬꓼ ꓠꓬꓲ ꓢꓽ ꓟ ꓙꓳˍ ꓡꓳ= ꓦꓬꓼ ꓠꓬꓲ ꓬꓲꓸ ꓪꓴꓸ ꓕꓲꓽ ꓠꓬ ꓬꓰ-ꓢꓴ ꓟꓽ ꓦꓵꓻ ꓡ ꓕꓯ ꓟ ꓦꓬꓼ ꓠꓬꓲ꓾ ꓘꓶꓽ ꓫꓵꓽ ꓡꓵ ꓦꓬꓼ ꓠꓬꓲ ꓥ ꓡꓳ= ꓕꓱ ꓟ ꓔꓯ ꓐꓹ ꓐ ꓪꓴ-ꓢ ꓦꓬꓼ ꓠꓬꓲ ꓐꓰ ꓐꓯˍ ꓡꓳ= ꓬꓰ=ꓢꓴ ꓟꓲ ꓠꓯ ꓗꓪ ꓬꓯꓼ ꓡ ꓢꓲ ꓓꓵꓽ ꓙ ꓮ’ ꓡꓰ ꓓꓴ ꓟꓬꓱꓽ ꓬꓰˍ ꓟ ꓟꓸ ꓟꓲꓽ ꓚ ꓟ ꓦꓬꓼ ꓠꓬꓲ ꓔꓯ ꓠꓬ ꓢꓲꓺ ꓒ ꓬꓰ-ꓢꓴ ꓦꓬꓼ ꓠꓬꓲ ꓐꓰ ꓐꓯˍ ꓡꓳ= ꓬꓰ-ꓢꓴ ꓟꓴꓽ ꓗꓪ ꓗꓪ ꓓꓯ ꓙꓰ ꓗꓸ ꓠꓯꓸ ꓠꓬꓲꓸ ꓠꓬꓲ ꓗꓪ ꓛꓲ ꓔꓯ ꓠꓬ ꓢꓲꓽ-ꓫꓬ-ꓟ-ꓦ ꓦꓬꓼ ꓠꓬꓲ ꓐꓰ ꓐꓯˍ ꓡꓳ=

ꓮ ꓟꓶ ꓠꓬ ꓢꓲꓽ-ꓫꓬ-ꓟ-ꓦ ꓦꓬꓼ ꓠꓬꓲ ꓥ ꓢꓲ ꓢꓲ-ꓫꓬ-ꓟ-ꓦ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓘꓳꓹ ꓣꓴ ꓢꓲ ꓠꓬꓲ ꓠꓵ ꓠꓲꓹ ꓙꓻ ꓖꓴ ꓫꓱꓽ ꓠꓹ ꓟ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓬꓲꓼ ꓠꓬꓲꓸ ꓖꓶ ꓡ ꓔꓬ ꓟ ꓥ ꓡꓳ= ꓬꓰ-ꓢꓴ ꓗꓸ ꓠꓯꓸ ꓛꓳ ꓢꓴ ꓒꓲ-ꓕꓱ ꓐꓰ ꓬꓲ ꓝꓲ ꓓꓴ ꓐꓴ ꓠꓬ ꓢꓲꓽ-ꓫꓬ-ꓟ-ꓦ ꓟꓽ ꓬꓯꓼ ꓡꓰ ꓕꓯ ꓙꓳꓺ ꓠꓬꓲ ꓛꓱꓽ ꓠꓬꓲ ꓐꓰ ꓓꓹ ꓥ ꓟꓲ꓾ ꓢꓲꓽ-ꓫꓬ-ꓟ-ꓦ ꓬꓯꓼ ꓡ ꓗꓸ ꓠꓯꓸ ꓬꓲ ꓪ ꓐꓴ ꓠꓬ ꓑꓶꓸ ꓑꓶꓸ ꓡꓰꓽ ꓔꓼ ꓝꓲ ꓙꓳ ꓙꓳ ꓡꓰ꓾ ꓬꓰ-ꓢꓴ ꓟꓸ ꓟꓲꓽ ꓚꓺ ꓙꓰ ꓑꓶꓸˍ ꓟ ꓢꓯꓼ ꓪ ꓟꓶ ꓡꓰꓳ=

ꓕꓱ ꓟ ꓡꓰ ꓐꓰ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓣꓳ ꓔꓯ ꓐꓯ ꓟꓳꓸ ꓖꓶ ꓡꓔꓬ ꓟ ꓠꓬ ꓢꓲꓽ-ꓫꓬ-ꓟ-ꓦ ꓔꓯ ꓘꓳꓹ ꓣꓴ꓾ ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻ ꓠꓹ ꓟ꓾ ꓝꓮꓲ ꓪꓴ-ꓢ ꓟꓬꓱꓽ ꓬꓰ ꓠꓹ ꓟ ꓠꓬ ꓢꓲꓽ-ꓫꓬ-ꓟ-ꓦ ꓢꓯꓼ ꓪ ꓣꓱꓽ ꓞꓹ ꓡꓳ=  ꓢꓲꓽ-ꓫꓬ-ꓟ-ꓦ ꓠꓬ ꓟꓲꓽ ꓦꓲ ꓔꓯ ꓫꓱˍ ꓡꓳ= ꓢꓲꓽ-ꓫꓬ-ꓟ-ꓦ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓘꓳꓹ ꓣꓴ ꓢꓲ ꓠꓵ ꓠꓲꓹ ꓙꓻ ꓖꓴ ꓗꓪ ꓫꓱꓽ ꓙꓰ ꓠꓹ ꓟ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓟ ꓥ ꓡꓳ=

Add new comment

3 + 1 =