ꓮ ꓡꓰ ꓐꓰ ꓪꓽ ꓘꓴ ꓠꓯꓹ ꓟ

ꓮ ꓡꓰ ꓐꓰ ꓪꓽ ꓘꓴ ꓠꓯ, ꓟ

ꓬꓲ ꓤ ꓠꓬꓲ ꓤ ꓐꓴꓳ  “ꓥꓪ ꓠꓬ ꓪꓽ ꓘꓴ ꓟꓽ ꓗꓴ.” ꓐꓰ ꓟꓽ ꓠꓽ ꓠꓽ ꓐꓯ ꓔꓬ ꓫꓵꓽ ꓡ ꓞꓳ ꓣꓳꓽ ꓑ ꓙ ꓠꓬꓲˍ ꓡꓳ ꓟꓽ ꓥ ꓡ?꓿ ꓪꓽ ꓘꓴˍ ꓠꓬ ꓮ ꓡꓰ ꓐꓰ ꓘꓴ ꓓꓴ ꓥ ꓡ? ꓮ ꓡꓰ ꓐꓰ ꓘꓴˍ ꓠꓬ ꓪꓴ‐ꓢ ꓠꓲ, ꓟ ꓗꓪ ꓕꓲꓺ ꓙꓰ ꓡ?

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓥ ꓟ (ꓟ‐ꓕꓲ 6ꓽ7‐11) ꓗꓪ ꓢꓲ ꓒ ꓡꓰ ꓠꓴ ꓪ ꓪꓽ ꓘꓴ ꓠꓬ ꓠꓱ. ꓐꓯ ꓢꓴ ꓪꓽ ꓘꓴ ꓟ ꓡꓰ ꓐꓰ ꓮ ꓫꓵ ꓐꓯ ꓘꓶꓽ ꓮ ꓟꓬ ꓣꓱꓽ ꓢꓲ ꓕꓽ ꓘꓴ꓾ꓐꓰ ꓐꓯ ꓡꓳ꓿

ꓣꓳꓽ ꓠꓬ ꓐꓯ ꓘꓶꓽ ꓮ ꓟꓬ ꓣꓱꓽ ꓢꓲ ꓪꓽ ꓘꓴ ꓗꓴ. ꓟꓽ ꓛꓵ꓾ ꓣꓳꓽ ꓮ ꓫꓵꓽ ꓣꓱꓽ ꓞꓹ ꓔꓬ, ꓟ ꓔꓯ ꓪꓴ‐ꓢ ꓢꓷ. ꓡꓳ꓿ ꓬꓲ. ꓠꓬ ꓣꓳꓽ ꓪꓴ. ꓛꓱ ꓔꓯ.  ꓵ  ꓔ ꓢꓴ ꓥ ꓡꓳ꓿ ꓣꓳꓽ ꓠꓲ, ꓟ ꓠꓯ.ꓼ ꓗꓪ ꓮ ꓫꓵꓽ ꓓˍ ꓟ꓾ ꓣꓳꓽ ꓮ ꓫꓵꓽ ꓣꓱꓽ ꓬꓯꓼ ꓟ ꓬꓲ. ꓢꓷ. ꓡꓳ꓿

ꓣꓳꓽ ꓠꓲ, ꓫꓵˍ ꓟ ꓐꓰ ꓣꓳꓽ ꓚꓵ, ꓚꓵ, ꓣꓱꓽ ꓬꓯꓼ ꓟ꓾ ꓟꓽ ꓫꓱ. ꓡꓯ ꓘꓳ꓿ ꓪꓴ‐ꓢ ꓠꓬ ꓣꓳꓽ ꓟꓽ ꓣꓱꓽ ꓟꓽ ꓓ ꓟ ꓔꓯ ꓢꓷ. ꓡꓳ꓾ ꓟꓳˍ ꓡꓳ꓿ ꓣꓳꓽ ꓶ ꓓꓰꓽ ꓕꓯ꓾ ꓖꓶꓽ ꓟꓲ ꓖꓶꓽ ꓡꓳ꓿ ꓣꓳꓽ ꓠꓲ, ꓫꓵ ꓟ ꓔꓯ ꓠꓬ ꓣꓳꓽ ꓐꓱ ꓶ ꓟꓽ ꓙꓲ ꓕꓯ ꓬꓲ. ꓟꓽ ꓖꓶꓽ ꓖꓶꓽ ꓗꓶ ꓔ ꓗꓴ. ꓡꓳ꓿ ꓣꓳꓽ ꓪ ꓘꓴ ꓟ ꓕ ꓑꓳ. ꓟꓽ ꓟꓶ ꓥˍ ꓟꓲ ꓮ ꓫꓵꓽ ꓟꓽ ꓛꓵ꓾ ꓪꓽ ꓘꓴ ꓐꓯ ꓟ ꓠꓬ ꓪꓴ‐ꓢ ꓐꓰ ꓙ ꓡꓯ ꓘꓳˍ ꓟ ꓥ ꓟ ꓑꓶ. ꓓꓴ꓾ ꓪꓽ ꓘꓴ ꓕꓯ ꓡꓰ ꓬꓲ. ꓣꓱꓽ ꓛꓰ ꓐꓰ ꓢꓯꓼ ꓪ ꓠꓬ ꓣꓳ ꓟꓶ ꓡꓰ ꓟ ꓥꓳ꓿

ꓮ ꓠꓱ ꓕꓯ ꓕꓳꓽ ꓶ ꓟꓽ ꓢꓷ. ꓫꓵꓽ ꓮ ꓤ ꓟꓳ ꓕꓲꓽ ꓣꓳ ꓙꓳ ꓡꓳ꓿ ꓬꓲ. ꓠꓬ ꓪꓽ ꓮ ꓟꓬ ꓘꓴ ꓟꓽ ꓗꓴ.꓿ ꓬꓲ.  ꓠꓬ ꓠꓯꓼ ꓠꓯꓼ ꓔꓴ ꓡ ꓕꓯ “ꓪꓴ‐ꓢ ꓠꓴ ꓔꓯ ꓫ. ꓟꓳ꓾ ꓠꓴ ꓔꓯ ꓥꓪ ꓪꓴ. ꓓꓵ ꓕꓱˍ ꓥꓳ꓾ ꓠꓬꓲ. ꓠꓬꓲ. ꓟ ꓐꓱ ꓶ ꓢꓯꓼ ꓪ ꓖꓶꓽ ꓡꓯ” ꓐꓰ ꓐꓯ ꓢꓲ ꓪꓽ ꓘꓴ ꓡꓳ꓿ ꓟꓶꓽ ꓘꓶꓽ ꓛꓲ ꓡ ꓕꓯ ꓬꓲ. ꓠꓬ “ꓪꓴ‐ꓢ ꓳ ꓠꓬꓲ. ꓠꓬꓲ. ꓟ ꓐꓱ ꓶ ꓠꓴ ꓔꓯ ꓮ ꓘꓶ. ꓫ ꓟꓳ꓾ ꓟꓶꓽ ꓘꓶꓽ ꓗꓪ  ꓙꓳꓽ ꓙꓳ ꓬꓲꓼ ꓟꓶ ꓪ ꓠ, ꓟ ꓢꓯꓼ ꓪ ꓖꓶꓽ ꓡꓯ” ꓐꓰ ꓐꓯ ꓢꓲ ꓡꓰ ꓪꓽ ꓘꓴˍ ꓡꓳ꓿ ꓬꓲ. ꓪꓽ ꓘꓴ ꓘꓶꓽ ꓔꓯ ꓠꓬ ꓪꓴ‐ꓢ ꓮ ꓘꓶ. ꓠꓲ, ꓧꓳ ꓡꓳ꓿ ꓮ ꓡꓰꓳ ꓐꓯ ꓠꓬ ꓬꓲ. ꓠꓬ ꓬꓲ. ꓢꓷ. ꓕꓲꓽ ꓒꓳ, ꓬꓲ. ꓗꓴ. ꓕꓲꓽ ꓒꓳ, ꓗꓪ ꓐꓰ ꓪꓴ‐ꓢ ꓔꓯ ꓪꓽ ꓘꓴˍ ꓡꓳ꓿

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓽ ꓘꓴˍ  ꓐꓯ ꓟ ꓠꓬ ꓐꓯ ꓘꓶꓽ ꓐꓲ ꓐꓲ ꓮ ꓟꓬꓹ ꓣꓱꓽ ꓢꓲ ꓘꓴ ꓗꓴ. ꓟꓽ ꓛꓵ꓿ ꓠꓲ, ꓟ ꓠꓯ.ꓼ ꓗꓪ ꓐꓰ ꓙꓵꓻ ꓠꓲ, ꓡꓰ ꓘꓴˍ ꓠꓬ ꓪꓴ‐ꓢ ꓠ ꓡꓳ. ꓡˍ ꓥꓳ꓿ 

ꓪꓽ ꓘꓴˍ ꓐꓯ ꓟ ꓠꓬ ꓪꓴ‐ꓢ ꓐꓰ ꓫ. ꓕꓱˍ ꓟ ꓥꓳ꓿ ꓫ. ꓕꓱ ꓗꓴ. ꓢꓴ ꓮ ꓙꓵꓽ ꓠꓬ ꓪꓽ ꓘꓴ ꓗꓴ. ꓢꓴ ꓥꓳ꓿ ꓮ ꓐꓽ ꓐꓰ ꓮ ꓐꓲ ꓫꓸ ꓪ ꓕꓱ ꓡꓯ ꓘꓳꓹ ꓟ ꓡꓰ ꓐꓰ ꓣꓳꓽ ꓠꓬ ꓪꓴ‐ꓢ ꓐꓰ ꓫ. ꓪ ꓕꓱ ꓡꓯ ꓘꓳ ꓛꓵˍ ꓡꓳ꓿

ꓖꓳ ꓡꓱ ꓠꓬꓲ꓾ ꓠꓬꓲ. ꓠꓬꓲ ꓟꓬꓱꓽ ꓟꓽ ꓬꓰ ꓧꓶ. ꓕꓯ ꓪꓴ‐ꓢ ꓔꓯ ꓪꓽ ꓘꓴ ꓢꓲ ꓬꓰ꓾ ꓮ ꓫꓵꓽ ꓬꓰˍ ꓟꓲ ꓪꓴ‐ꓢ ꓐꓰ ꓖꓪ ꓙꓱꓻ ꓡꓯ ꓘꓳ ꓢꓲ. ꓬꓰˍ ꓥꓳ ꓐꓯˍ ꓠꓬ ꓪꓴ‐ꓢ ꓶ ꓤ ꓫꓱ, ꓤ ꓮ ꓟꓬꓹ ꓖꓶꓽ ꓡˍ  ꓥꓳ꓿