ꓮ-ꓪꓰꓠ-ꓔꓴ ꓠꓬꓲꓽ ꓫꓵꓽ ꓠ ꓟ ꓢꓲ-ꓒ ꓦꓬ ꓠꓬꓲ (Homily )

ꓮꓓ-ꓦꓰꓠ-ꓔꓴ (ꓗꓳꓸ ꓛꓲ ꓡˍ ꓟ ꓙꓵꓹ) -3 ꓫꓵꓽ ꓠ

ꓤꓷ-ꓩ-ꓠ-ꓬꓼ ꓕꓳꓽ ꓶ 3: 14-18

ꓜꓲ-ꓬꓴ ꓮ ꓟꓲꓽꓳ꓾ ꓟꓴ ꓖꓪ ꓖꓪꓺ꓿ ꓬꓲ-ꓢꓷ-ꓡꓰꓳ꓾ ꓘꓴ ꓐꓵꓻ ꓓꓳ ꓡꓯ꓿ ꓙꓱ-ꓣꓴ-ꓢ-ꓡꓱ ꓮ ꓟꓲꓽꓳ꓾ ꓠꓲꓹ ꓒꓴ ꓢꓲ꓾ ꓕꓲ ꓠꓲꓹ ꓟ ꓡꓱꓸꓼ ꓗ ꓛꓲ ꓔꓬ꓿ꓬꓰ-ꓧꓳ-ꓧꓪ ꓡꓰ ꓠꓴ ꓛꓬꓻ ꓒꓵ ꓔꓯ ꓣꓴ ꓦ ꓗꓷꓳ꓿ ꓠꓴ ꓔꓯ ꓛꓴꓽ ꓙꓳ ꓢꓴ ꓔꓯ ꓬꓲ ꓡꓰ ꓖꓼ ꓓꓳ ꓩꓴ ꓗꓷꓳ꓿ ꓬꓲ-ꓢꓷ-ꓡꓰ ꓪ ꓔꓲ ꓬꓰ-ꓧꓳ-ꓧꓪ ꓠꓬ ꓠꓴ ꓗꓳ ꓡꓳ ꓗꓪ ꓔꓬ_ ꓡꓳ꓿ ꓕꓱ ꓡꓱ ꓖꓳ ꓑꓳ ꓠꓴ ꓠꓬ ꓥꓶ_ ꓟ ꓔꓯ ꓙꓳꓺ ꓟꓽ ꓛꓵꓳ꓿ ꓖꓳ ꓕꓲ ꓠꓬꓲ ꓗꓪ ꓙꓱ-ꓣꓴ-ꓢ-ꓡꓱ ꓔꓯ ꓕꓱ ꓡꓱ ꓐꓯ ꓖꓶ_ ꓥꓳ꓾ ꓠꓴ ꓕꓽ ꓙꓳꓺ꓾ ꓜꓲ-ꓬꓴꓻꓳ꓾ ꓠꓴ ꓡꓯ ꓒꓯ ꓔꓯ ꓢꓯꓼ ꓕꓽ ꓐꓽ ꓡꓰ ꓝꓲ꓿ ꓬꓰ-ꓧꓳ-ꓧꓪ ꓠꓴ ꓪ ꓪꓴ-ꓢ ꓠꓬ ꓠꓴ ꓪ ꓗꓳ ꓡꓳ ꓗꓪ ꓔꓬ ꓢꓲ꓾ ꓢꓯꓼ ꓟꓬ ꓝ ꓖꓶ ꓢꓲ꓾ ꓢꓯꓼ ꓙꓳ ꓪ ꓠꓬꓲ ꓢꓴ ꓥ ꓡꓳ꓿ ꓬꓲ ꓠꓬ ꓠꓴ ꓑꓶ ꓓꓴ ꓠꓲꓹ ꓒꓴ ꓗꓹ ꓛꓲ_ ꓥꓳ꓿ ꓬꓲ ꓠꓵ ꓠꓲꓹ ꓗꓪ ꓠꓴ ꓔꓯ ꓪꓴꓽ ꓧꓶ ꓠ ꓝꓲ_ ꓥꓳ꓿ ꓬꓲ ꓠꓬ ꓠꓴ ꓑꓶ ꓓꓴ ꓗꓹ ꓛꓲ ꓠꓬꓲ ꓟꓴ ꓖꓪ ꓖꓪ_ ꓥꓳ꓿ ꓠꓴ ꓗꓳ ꓡꓳ ꓗꓪ ꓝꓰꓹ ꓔ_ ꓟ ꓑꓮꓲ ꓑꓶ ꓓꓴ ꓠꓲꓹ ꓟ ꓫꓸ ꓢꓴ ꓔꓯ ꓘꓴ ꓜꓲꓼ ꓡ_ ꓥꓳ꓿ ꓕꓱ ꓟ ꓠꓬ ꓠꓴ ꓑꓶ ꓓꓴ ꓫ ꓔꓳ ꓫ ꓒꓯ ꓟꓯꓻ ꓪ ꓢꓴ ꓥ ꓡꓳ꓿

ꓒꓲ-ꓡꓲ-ꓒꓲ 4ꓽ 4-7

ꓮ ꓕꓯˍ ꓟꓲ ꓢꓲ ꓒ ꓠꓯꓸꓼ ꓗꓪ ꓗꓹ ꓛꓲ ꓔꓬ꓾ ꓗꓹ ꓛꓲ ꓔꓬ꓾ ꓐꓰ ꓥꓪ ꓝꓮꓲ ꓐꓯˍ ꓥꓳ꓿ 5 ꓠꓴ ꓪꓽ ꓠꓲꓹ ꓟ ꓠꓴꓽˍ ꓟ ꓠꓬ ꓞꓳ ꓤ ꓮꓽ ꓙꓵ ꓡꓰ ꓡꓳꓸ ꓓꓳ ꓡ ꓝꓲ꓿ ꓢꓲ ꓒ ꓠꓬ ꓣꓳ ꓒ ꓕꓲꓺꓼ ꓗꓪ ꓔꓬ ꓡꓳ꓿ 6 ꓮꓸ ꓫꓵ ꓗꓪˍ ꓟꓲ ꓟꓽ ꓙꓽ ꓫꓸ ꓫꓸ꓾ ꓪꓽ ꓘꓴˍ ꓟ ꓐꓰ꓾ ꓶꓼ ꓓꓰꓽˍ ꓟ ꓐꓰ꓾ ꓫꓸ ꓟꓳˍ ꓟ ꓡꓰ ꓠꓴ ꓪꓽ ꓓꓰꓽˍ ꓟ ꓪꓴ-ꓢ ꓔꓯ ꓢꓷꓸ ꓡꓰ ꓝꓲ꓿ 7 ꓖꓳ ꓡꓱ ꓢꓲ ꓙꓽ ꓜꓲꓼˍ ꓟ ꓥ ꓕ ꓑꓳꓸ ꓕꓯ ꓢꓲ ꓘꓳꓻ ꓙꓰˍ ꓟ ꓪꓴ-ꓢ ꓬꓲ ꓢꓲ ꓡꓲ ꓟ ꓠꓬ꓾ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ꓾ ꓠꓴ ꓪꓽ ꓠꓲꓹ ꓟ ꓐꓰ ꓠꓴ ꓪꓽ ꓓꓵꓽ ꓙˍ ꓟ ꓔꓯ ꓔꓺ ꓙ ꓡꓳꓸ ꓙˍ ꓥꓳ꓿

ꓡꓴ-ꓘ 3ꓽ 10-18

ꓞꓳ ꓜꓴꓻ ꓡꓰ ꓬꓲ ꓔꓯ꓾ ꓖꓳ ꓡꓱ ꓥ ꓠꓬ ꓥꓪ ꓠꓴꓽ ꓮ ꓡꓲ ꓬꓰ ꓠꓯꓹ ꓡ?꓾ ꓐꓰ ꓠ ꓠꓬꓲˍ ꓕꓯ꓾ 11 ꓬꓳ-ꓦ ꓡꓰ ꓬꓲ ꓪꓽ ꓔꓯ꓾ ꓐꓵ ꓞꓶꓽ ꓠꓬꓲꓽ ꓘꓳꓹ ꓙꓳ ꓢꓴ ꓠꓬ ꓟꓽ ꓙꓳ ꓢꓴ ꓔꓯ ꓐꓱꓻ ꓖꓶ꓿ ꓜꓽ ꓓꓴ ꓙꓳ ꓢꓴˍ ꓟꓲ ꓟꓽ ꓙꓳ ꓢꓴ ꓔꓯ ꓖꓶ ꓜꓽ꓾ ꓐꓰ ꓒꓳꓹ ꓖꓶˍ ꓡꓳ꓿ 12 ꓝꓲꓸ ꓫ ꓢꓴˍ ꓟꓲ ꓖꓳ ꓓꓱꓽ ꓔꓲꓹ ꓟꓶ ꓠꓹ ꓟ ꓡ ꓢꓲ꓾ ꓟꓸ ꓒꓽꓳ꓾ ꓥꓪ ꓠꓴꓽ ꓮ ꓡꓲ ꓬꓰ ꓠ ꓗꓹ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 13 ꓬꓳ-ꓦ ꓡꓰ꓾ ꓠꓴ ꓪˍ ꓟꓲ ꓐꓯ ꓞꓷꓹ ꓔ ꓟ ꓕꓯꓽ ꓢꓲ ꓕꓽ ꓧꓪ꓾ ꓐꓯ ꓖꓶˍ ꓡꓳ꓿ 14 ꓟꓯꓼ ꓤˍ ꓟꓲ ꓬꓲ ꓔꓯ꓾ ꓥꓪ ꓠꓴꓽ ꓡꓲS꓾ ꓮ ꓡꓲ ꓬꓰ ꓠ ꓗꓹ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓬꓳ-ꓦ ꓡꓰ꓾ ꓢꓴ ꓔꓯ ꓜꓲꓽ ꓜꓲ ꓑꓰꓹ ꓑꓰ ꓕꓽ ꓬꓰ꓿ ꓢꓴ ꓔꓯ ꓮꓽ ꓔꓳ ꓕꓽ ꓓꓰꓺ꓿ ꓠꓴ ꓪꓽ ꓟꓶˍ ꓟ ꓪꓽ ꓒꓵꓽ ꓔꓯ ꓠꓲꓹ ꓘꓪꓽ ꓫꓵ꓾ ꓐꓯ ꓖꓶˍ ꓡꓳ꓿ 15 ꓑ ꓫꓬꓼ ꓐꓴ ꓠꓬ ꓙꓲ-ꓢꓴ ꓡ ꓠꓹ ꓟ ꓔꓯ ꓦꓴ ꓠꓬꓹ ꓔꓬ ꓟ ꓥ ꓠꓬꓲ꓾ ꓮꓽ ꓙꓵ ꓢꓴ ꓠꓲꓹ ꓟ ꓗꓪ꓾ ꓬꓳ-ꓦ ꓠꓬ ꓙꓲ-ꓢꓴ ꓖꓳ ꓕꓲ ꓣꓳ ꓥ ꓟꓽ ꓥ꓾ ꓐꓰ ꓓꓵꓽ ꓙ ꓠꓬꓲ ꓔꓬ ꓡꓳ꓿ 16 ꓬꓳ-ꓦ ꓡꓰ ꓬꓲ ꓪꓽ ꓮꓽ ꓙꓵ ꓢꓴ ꓔꓯ꓾ ꓥꓪ ꓠꓽ ꓠꓴ ꓪꓽ ꓔꓯ ꓬꓲꓻ ꓙꓬ ꓗꓪ ꓖꓳ ꓓꓱꓽ ꓔꓲꓹ ꓖꓶˍ ꓡꓳ꓿ ꓖꓳ ꓡꓱ ꓥ ꓟꓲ ꓥꓪ ꓢꓶꓸ ꓟꓽ ꓞꓲ ꓪꓽ ꓠꓬꓲˍ ꓟ ꓕꓲ ꓣꓳ ꓡꓻ ꓥꓳ꓿ ꓥꓪ ꓠꓬ ꓬꓲ ꓛꓲꓺ ꓠꓲ ꓦꓲ ꓚ ꓒꓶꓻ ꓖꓶ ꓠꓹ ꓟˍ ꓟꓲ ꓟꓽ ꓒꓵꓽ꓿ ꓬꓲ ꓠꓽ ꓢꓲ-ꓫꓬ-ꓟ-ꓦˍ ꓐꓰ ꓮꓸ ꓔꓳꓸ ꓡꓰ ꓠꓴ ꓪꓽ ꓔꓯ ꓔꓲꓹ ꓖꓶ ꓡ ꓥꓳ꓿ 17 ꓬꓲ ꓡꓯꓼ ꓒꓯꓹ ꓗꓪ ꓪꓺ ꓟ ꓔꓯꓹ ꓔ ꓢꓲ꓾ ꓫꓪ ꓓꓶꓽ ꓓꓰ ꓔꓯ ꓫꓬꓻ ꓡꓰ ꓝꓲˍ ꓥꓳ꓿ ꓫꓪ ꓠꓬ ꓫꓪ ꓗꓹ ꓗꓪ ꓫꓺ ꓔ ꓥꓳ꓿ ꓬꓲ ꓒꓲꓻ ꓠꓽ ꓟꓽ ꓫꓵꓻ ꓮ ꓔꓳꓸ ꓗꓪ ꓛꓴꓻ ꓗꓷˍ ꓥꓳ꓾ ꓐꓯˍ ꓡꓳ꓿ 18 ꓬꓳ-ꓦ ꓠꓬ ꓶꓼ ꓓꓳ ꓫꓱꓹ ꓓꓳ ꓟꓸ ꓟꓲꓽ ꓚ ꓟꓸ ꓖꓶˍ ꓟ ꓐꓰ ꓕꓲ ꓛꓳꓺꓼ꓾ ꓠꓱꓸ ꓐꓯ ꓐꓯ ꓘꓶꓽ ꓮꓽ ꓟꓬꓹ ꓡꓰ ꓑ ꓫꓬꓼ ꓐꓴ ꓔꓯ ꓘꓶꓸ ꓖꓶˍ ꓡꓳ꓿