ꓮ ꓫꓵꓽ ꓗꓪˍ ꓟꓲ ꓠꓲꓹ ꓟ ꓫꓵ ꓠꓹ ꓟ

ꓡ ꓞꓳ ꓕꓲ ꓣꓳ ꓡꓰ ꓣꓳꓽ ꓔꓯ ꓟꓽ ꓘꓳ ꓣꓴ ꓡ ꓕꓯ꓾ ꓣꓳ ꓐꓯˍ ꓟ ꓔꓯ ꓟꓽ ꓠ ꓠꓹ ꓡ ꓕꓯ ꓣꓳꓽ ꓠꓬ ꓮ ꓡꓲ ꓓꓵꓽ ꓙ ꓟꓶˍ ꓡ? ꓖꓳ ꓟ ꓔꓯ ꓮ ꓡꓲ ꓒꓳꓹ ꓖꓶˍ ꓡ? ꓖꓳ ꓡꓱ ꓟꓽ ꓘꓳ ꓣꓴ ꓖꓶ ꓡ ꓟ ꓑꓶꓸ ꓓꓴ ꓠꓲꓹ ꓟ ꓦꓶ ꓔꓬ ꓡ? ꓟꓽ ꓥ ꓠꓬ꓾ ꓥ ꓝꓲ꓾ ꓐꓯ ꓢꓲ ꓝꓮꓲ ꓕꓲ ꓚꓱꓹ ꓗꓪ ꓐꓰ ꓢꓯꓼ ꓕꓵꓽˍ ꓡ?

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ ꓡꓴ-ꓘ 9ꓽ1-6 ꓗꓪ ꓢꓲ ꓒ ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓙꓰ ꓠꓹ ꓟ ꓢ-ꓟꓲ-ꓡꓲ ꓘꓹ ꓕꓲ ꓗꓹ ꓗꓪ ꓓꓵꓽ ꓙꓰˍ ꓡꓳ= ꓖꓳ ꓡꓱ ꓥ ꓟꓲ ꓢ-ꓟ-ꓡꓲ ꓡ ꓞꓳ ꓐꓴ ꓡꓰ ꓢꓲ ꓒ ꓬꓰ-ꓢꓴ ꓐꓰ ꓬꓲ ꓝꓲ ꓓꓴ ꓐꓴ ꓔꓯ ꓟꓽ ꓘꓳ ꓣꓴ= ꓢ-ꓟ-ꓡꓲ ꓡ ꓞꓳ ꓐꓴ ꓡꓰ ꓢꓲ ꓒ ꓬꓰ-ꓢꓴ ꓔꓯ ꓟꓽ ꓘꓳ ꓣꓴ ꓡ ꓟ ꓑꓶꓸ ꓓꓴ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓔꓯ ꓠꓲꓹ ꓟ ꓟꓽ ꓦꓶ꓾ ꓟꓽ ꓘꓳ ꓣꓴ ꓡ ꓟ ꓢ-ꓟ-ꓡꓲ ꓡ ꓞꓳ ꓐꓴ ꓔꓯ ꓤꓸ ꓗꓷ ꓢꓲ ꓝꓮꓲ ꓕꓲ ꓚꓱꓹ ꓗꓪ ꓐꓰ ꓙꓰˍ ꓡꓳ꓾ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓔ ꓡꓳ=

ꓥꓪ ꓕꓱ ꓟꓬ ꓗꓪ ꓛꓲ ꓠꓴ ꓪ ꓐꓱ ꓶ ꓬꓰ ꓙ ꓖꓶ ꓗꓷ ꓥˍ ꓟꓲ꓾ ꓠꓴ ꓪ ꓐꓱ ꓶ ꓢꓷꓸ ꓡꓰ ꓓꓴ ꓓꓵꓽ ꓙꓽ ꓟꓶ ꓓꓴ ꓬꓲ ꓓꓽ ꓟ ꓬꓰ ꓟꓸ ꓖꓶ ꓗꓷ ꓥ ꓟꓲ ꓠꓴ ꓪ ꓥꓪ ꓔꓯ ꓟꓽ ꓘꓳ ꓣꓴ꓾ ꓐꓯ ꓢꓲ ꓠꓲꓹ ꓟ ꓦꓶˍ ꓟ ꓬꓲ ꓟꓽ ꓬꓰ= ꓬꓲ ꓝꓲ ꓓꓴ ꓡꓰ “ꓢꓲ ꓒꓽꓳ꓾ ꓥꓪ ꓠꓴꓽ ꓠꓬ ꓟꓴꓽ ꓗꓪ ꓗꓪ ꓐꓰ ꓮ ꓔꓳꓸ ꓬꓯꓼ ꓡ ꓝꓲ ꓢꓲ ꓬꓲ ꓪ ꓔꓯ ꓛꓴ ꓖꓴ ꓡꓰ ꓝꓲˍ ꓟ ꓔꓯ ꓠꓴ ꓠꓲꓹ ꓒꓴˍ ꓡ?” ꓐꓰ ꓐꓯ ꓕꓯ꓾ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓪ ꓔꓯ “ꓠꓴ ꓪ ꓠꓲꓹ ꓟ ꓮ ꓡꓲ ꓗꓹ ꓟ ꓠꓴ ꓪ ꓟꓽ ꓢꓷꓸ= ꓮ ꓡꓲꓳ ꓐꓯ ꓠꓬ ꓡ-ꓞꓳ-ꓮ-ꓐꓲ ꓠꓽ ꓡ ꓞꓳ ꓢꓯꓼ ꓟꓬ ꓟꓶꓽ ꓬꓰ ꓝꓲ ꓠꓹ ꓟ ꓡˍ ꓟ ꓟꓽ ꓥ= ꓡ ꓞꓳ ꓢꓯꓼ ꓟꓬ ꓚꓬꓴꓸ ꓠꓹ ꓟ ꓡ ꓟ ꓥ ꓡꓳ=” ꓐꓰ ꓒꓳ ꓖꓶ ꓢꓲ ꓠꓵꓻ ꓠꓲꓹ ꓟꓸ ꓖꓶˍ ꓡꓳ= ꓛꓴꓽ ꓙꓳ ꓢꓴ ꓔꓯ ꓪꓽ ꓛꓴꓽ ꓟꓽ ꓚꓱꓹ ꓡꓲꓸ ꓖꓶ ꓠꓹ ꓟ ꓟꓸ ꓖꓶ ꓔꓬ ꓟ ꓥ ꓡꓳ=

ꓣꓳꓽ ꓤꓶꓻ ꓗꓪ ꓥ ꓟꓲ ꓣꓳ ꓮ ꓫꓵꓽ ꓬꓰˍ ꓥ ꓟꓲ ꓙꓲꓻˍ ꓟ ꓟꓽ ꓟꓳꓻ ꓢꓴ꓾ ꓣꓳ ꓙꓲꓻˍ ꓟ ꓬꓰˍ ꓟ ꓔꓯ ꓟꓽ ꓘꓳ ꓣꓴ ꓢꓴ ꓔꓯ ꓔꓳꓹ ꓜꓳꓽ ꓪˍ ꓥꓳ= ꓣꓳꓽ ꓔꓯ ꓟꓽ ꓒꓵꓽ ꓟꓽ ꓚꓬꓹ ꓐꓯ ꓡ ꓢꓴˍ ꓟꓲ ꓙꓳˍ ꓥꓳ= ꓖꓳ ꓕꓯ ꓣꓳꓽ ꓮ ꓡꓲ ꓬꓰ ꓠꓯꓹ ꓡ? ꓖꓳ ꓡꓱ ꓔꓳꓹ ꓜꓳꓽ ꓡ ꓕꓯ ꓣꓳꓽ ꓠꓬ ꓠꓲꓹ ꓟ ꓦꓶ ꓢꓲ ꓒꓳꓹ ꓖꓶ ꓟꓽ ꓓ= ꓠꓲꓹ ꓟ ꓔꓯ ꓢꓲ ꓡꓲ ꓐꓰ ꓗꓶ ꓔ ꓢꓲ ꓠꓲꓹ ꓟ ꓫꓵꓺ ꓠꓯꓹ ꓟ ꓥ ꓡꓳ=

ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓗꓪ ꓐꓰ ꓣꓳꓽ ꓐꓴ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ ꓠꓲꓹ ꓟ ꓫꓵꓺ ꓠꓹ ꓟ ꓐꓰ꓾ ꓬꓲ ꓓꓽ ꓟ ꓟꓽ ꓱꓽ ꓠꓱꓽ ꓠꓹ ꓟ ꓐꓯ ꓖꓶ ꓡ ꓔꓬ ꓡꓳ= ꓛꓴꓽ ꓙꓳ ꓢꓴ ꓔꓯ ꓥˍ ꓟꓲ ꓠꓲꓹ ꓟ ꓫꓵꓺ ꓢꓲ ꓙ ꓗꓳ ꓖꓶ ꓠꓹ ꓟ ꓟꓸ ꓖꓶ ꓡ ꓔꓬ ꓡꓳ= ꓟꓬꓽ ꓠꓬꓲ ꓣꓳꓽ ꓠꓲꓹ ꓫꓵˍ ꓟ ꓕꓲꓽ ꓫꓵꓽ ꓫꓵꓽ ꓪꓴ-ꓢ ꓔꓯ ꓓꓰꓽˍ ꓕꓯ ꓠꓲꓹ ꓟ ꓫꓵꓺ ꓠꓹ ꓟ ꓥ ꓡꓳ= ꓮ ꓡꓲꓳ ꓐꓯˍ ꓠꓬ ꓣꓳꓽ ꓓꓰꓽˍ ꓟ ꓔꓯ ꓬꓲ ꓡꓰ ꓖꓶ ꓡˍ ꓟ ꓪꓴꓸ ꓠꓬꓲ ꓥ ꓡꓳ=