ꓶꓼ ꓘꓶꓽ ꓫꓱ, ꓘꓶꓽ

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓠꓬ ꓮꓽ ꓟ ꓥ ꓟꓲ ꓗ, ꓛꓲ ꓠꓲ, ꓫꓵ ꓫꓵ ꓡꓰ ꓥꓳ꓾ ꓟꓽ ꓗ, ꓛꓲ ꓠꓲ, ꓫꓵ ꓫꓵ ꓕꓲ ꓣꓳ ꓟꓲ ꓟꓽ ꓙꓳ꓾ ꓟꓲ ꓠꓯ ꓕꓱ ꓟ ꓗꓪ ꓒꓬꓱꓽ ꓟꓳ ꓡ ꓕ ꓑꓳ. ꓣꓱꓽ ꓬꓯꓼ ꓟ ꓮ ꓙꓵ ꓓꓵ ꓙ ꓟ ꓮ ꓙꓵ ꓠꓬ꓾ ꓗ, ꓛꓲ ꓓꓴ ꓐꓱ ꓶ ꓡꓰ ꓥ ꓡꓳ꓾ ꓖꓳ ꓡꓱ ꓠꓬ ꓕꓲ ꓐꓱ ꓠꓬ ꓕꓱ ꓡꓱ ꓗ, ꓛꓲ ꓓꓴ ꓧꓪ_ ꓟ ꓗꓪ ꓐꓰ ꓟꓽ ꓔꓱ, ꓜꓳ ꓟ꓾ ꓟꓽ ꓥ ꓟ ꓚꓱ, ꓗꓪ ꓙ ꓖꓴ ꓥꓳꓽ ꓡꓰ ꓫꓵ ꓙꓳ_ ꓡꓳ꓿ ꓕꓲ ꓡꓰ ꓐꓰ ꓚꓲ ꓛꓬ ꓗ, ꓛꓲ ꓓꓴ ꓔꓯ ꓟꓽ ꓔꓱ, ꓟ ꓗꓪ ꓐꓰ ꓧꓪ_ ꓟ ꓕꓱ ꓡꓱ ꓫꓵ ꓠꓬ ꓚꓲ ꓛꓬ ꓤꓶꓻ ꓐꓬ ꓡꓰ ꓟ ꓚꓱ, ꓔꓯ ꓢꓲ ꓔꓬ ꓟ ꓥ ꓡꓳ꓾ 

ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓙ ꓖꓴ ꓕꓲ ꓟ ꓟꓳ. ꓖꓶ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓠꓴ ꓪ ꓙ ꓖꓴ ꓕꓱ ꓟ ꓔꓯ ꓝ. ꓠꓬ ꓗ, ꓛꓲ ꓥꓳ ꓐꓰ ꓣꓳ ꓔꓯ ꓐꓯ ꓖꓶ ꓡꓳ꓿ ꓙ ꓖꓴ ꓕꓱ ꓟ ꓠꓬ ꓮ ꓫꓵ ꓥ ꓐꓯ ꓠꓬ꓾ ꓡꓴ‐ꓘ 6ꓽ 20‐26 ꓗꓪ ꓬꓲ ꓡꓰ ꓐꓯ ꓔ ꓟ ꓠꓬ ꓠꓴ ꓪ ꓫ. ꓢꓴ ꓟꓷꓼ ꓢꓴ ꓠꓬ ꓶ ꓙꓳ ꓫꓱ. ꓙꓳ ꓡꓳ꓾ ꓐꓰ ꓐꓯ ꓔ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓴ ꓗꓪ ꓗꓴꓷꓼ ꓠꓬ ꓠꓴ ꓔꓯ ꓟ ꓥ ꓡꓳ꓾ ꓠꓴ ꓪ ꓜ ꓦꓬꓼ ꓟꓷꓼ ꓢꓴ ꓠꓬ ꓶꓼ ꓙꓳ ꓫꓱ. ꓙꓳ_ ꓡꓳ꓾ ꓮ ꓡꓲꓳ ꓐꓯ ꓠꓬ ꓠꓴ ꓪ ꓠꓬ ꓐꓳ ꓡꓰ ꓥꓳ꓿ ꓮ ꓟꓶ ꓠꓲ, ꓥꓴꓻ ꓔꓬ ꓢꓴ ꓠꓬ ꓶꓼ ꓙꓳ ꓫꓱ, ꓙꓳ ꓥꓳ꓾ ꓮ ꓡꓲꓳ ꓐꓯ ꓠꓬ ꓠꓴ ꓪ ꓠꓬ ꓠꓴ ꓪ ꓠꓽ ꓪꓽ ꓧꓷꓼ ꓪꓽ ꓡꓰꓼ ꓗꓷ ꓡꓰ_ ꓥꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓾ ꓕꓲ ꓚꓱ, ꓐꓯ ꓠꓬ ꓣꓳ ꓗ, ꓛꓲ ꓟ ꓬꓲ ꓗ. ꓚꓵ ꓗ, ꓛꓲ ꓓꓴ ꓬꓲ. ꓚꓱ, ꓠꓬ ꓮ ꓫꓵ ꓥꓳ ꓐꓯ ꓠꓬ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓐꓯ ꓟ ꓥꓳ꓿ ꓠꓲ, ꓫ. ꓟꓬ ꓫ. ꓢꓴ ꓠꓬ ꓗ, ꓛꓲ ꓥꓳ ꓐꓰ ꓢꓲ ꓒ ꓬꓰ‐ꓢꓴ ꓮ ꓫꓵ ꓔꓯ ꓐꓯ ꓡ? ꓣꓳ ꓠꓲ, ꓟ ꓫ. ꓕꓯ꓾ ꓣꓳ ꓠꓯꓼ ꓗꓪ ꓮ ꓫꓵ ꓟꓲ ꓟꓽ ꓙꓳ ꓕꓯ꓾ ꓣꓳ ꓦꓲꓻ ꓗꓪ ꓜ ꓒꓴ ꓜ ꓓꓴ ꓟꓽ ꓙꓳ ꓟꓽ ꓥ ꓠꓬ ꓮ ꓘꓶ. ꓫ. ꓫꓵ ꓕꓲ ꓫꓵ ꓫꓵ ꓔꓳ, ꓜꓳ ꓕꓯ ꓣꓳ ꓠꓲ, ꓟ ꓮ ꓙꓵ ꓠꓬ ꓪꓴ‐ꓢ ꓔꓯ ꓡꓰ ꓠꓲ, ꓥꓳ_ ꓡꓳ꓿ ꓣꓳ ꓔꓯ ꓒꓬꓱꓼ ꓡ ꓟ ꓮ ꓙꓵ ꓪꓴ‐ꓢ ꓠꓲ, ꓡꓶꓽ ꓥꓳ ꓐꓯ ꓢꓲ꓾ ꓠꓲ, ꓟ ꓕꓲ ꓟ ꓡꓱꓼ ꓪꓴ‐ꓢ ꓔꓯ ꓖꓶ ꓔ ꓕꓯ ꓕꓱ ꓟ ꓠꓬ ꓣꓳ ꓐꓱ ꓶ ꓠꓲ, ꓘꓪ ꓫꓵ ꓓꓴ ꓗ, ꓛꓲ ꓓꓴ ꓚꓱ, ꓥ ꓡꓳ꓾ ꓕꓱ ꓟ ꓡꓰ ꓐꓰ ꓮ ꓟꓶ ꓠꓲ, ꓥꓴꓻ ꓢꓴ ꓠꓬ ꓶꓼ ꓙꓳ ꓫꓱ, ꓙꓳ_ ꓡꓳ꓾ ꓐꓰ ꓐꓯ ꓔ ꓡꓳ꓿ ꓕꓲ ꓚꓱ, ꓐꓯ ꓠꓬ ꓣꓳ ꓠꓲ, ꓟ ꓫ. ꓟ꓾ ꓠꓲ, ꓥꓴꓻ ꓓꓴ ꓙꓳ_ ꓟ꓾ ꓫꓵ ꓪꓴ ꓔꓳ, ꓜꓳ ꓟ꓾ ꓕꓱ ꓡꓱ ꓫꓵ ꓔꓳ, ꓜꓳ ꓕꓯ ꓣꓳ ꓠꓬ ꓣꓳ ꓠꓲ, ꓟ ꓖꓳ ꓓꓱ ꓮ ꓙꓵ ꓠꓬ ꓪꓴ‐ꓢ ꓔꓯ ꓖꓶ ꓔ ꓢꓲ ꓠꓬꓲ꓾ ꓙꓻ ꓣꓳ ꓟ ꓡꓰ ꓛꓳ ꓙꓳ ꓡꓳ꓿

ꓖꓳ ꓡꓱ ꓐꓯ ꓥ ꓟꓲ ꓣꓳ ꓔꓯ ꓒꓴ ꓫꓵꓻ ꓙꓳ ꓕꓯ ꓕꓲ ꓚꓱ, ꓐꓯ ꓠꓬ ꓮ ꓫꓵ ꓓꓵꓽ ꓙ ꓫ. ꓟꓽ ꓛꓲ ꓕꓯ ꓣꓳ ꓠꓲ, ꓟ ꓠꓬ ꓪꓴ‐ꓢ ꓔꓯ ꓥꓳ ꓡꓰ ꓠ, ꓟ ꓮ ꓔꓲ. ꓫ. ꓡꓳ꓿ ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓣꓳ ꓔꓯ ꓗ, ꓛꓲ ꓟ ꓗ. ꓛꓵ ꓪꓴ‐ꓢ ꓡꓰ ꓐꓯ ꓖꓶ_ ꓟ ꓠꓬ ꓠꓴ ꓐꓳ ꓡ ꓫ. ꓡ ꓢꓷ. ꓟꓽ ꓞꓲ꓾ ꓠꓴ ꓠꓲ, ꓟ ꓠꓬ ꓪꓴ‐ꓢ ꓔꓯ ꓮ ꓡꓲ ꓛꓲ ꓥꓳ ꓡ? ꓠꓴ ꓔꓯ ꓙꓳ_ ꓟ ꓮ ꓙꓵ ꓠꓴ ꓔꓯ ꓒꓬꓱꓼ ꓔꓬ ꓟ ꓫꓵ ꓪꓴ ꓮ ꓙꓵ ꓠꓬ ꓪꓴ‐ꓢ ꓔꓯ ꓐꓰ ꓗꓳ. ꓙꓰ ꓙꓳ ꓢꓲ ꓠꓬꓲ ꓛꓳ ꓫꓱꓽ ꓔꓬ ꓡ ꓐꓯ_ ꓟ ꓣꓳ ꓔꓯ ꓠ ꓠꓬꓲ ꓝꓲ_ ꓟ꓾ ꓓꓵꓽ ꓙ ꓠꓬꓲ ꓝꓲ_ ꓟ ꓥ ꓡꓳ꓾

ꓕꓲ ꓡꓰ ꓐꓰ ꓣꓳ ꓫ. ꓥ ꓟꓲ ꓐꓳ ꓥ ꓟꓲ ꓮ ꓙꓵ ꓠꓬ ꓪꓴ‐ꓢ ꓔꓯ ꓡꓰ ꓠꓲ, ꓟ ꓠꓯꓼ ꓗꓪ ꓥꓳ ꓔ ꓢꓲ ꓠꓬꓲ ꓛꓳ ꓙꓳ ꓥꓳ ꓐꓯ ꓠꓬ ꓚꓵ ꓚꓵ ꓣꓳ ꓗ, ꓛꓲ ꓓꓴ ꓥ ꓡꓳ꓿ ꓕꓲ ꓡꓰ ꓐꓰ ꓦ ꓗ, ꓛꓲ ꓓꓴ ꓦ ꓗꓪ ꓐꓰ ꓢꓲꓼ ꓟ ꓔꓯ ꓠꓬ ꓟꓲ ꓠꓯ ꓖꓴ ꓙꓴꓽ ꓡꓰ ꓐꓲ ꓝꓲ ꓟꓽ ꓐ ꓡ꓾ꓮ ꓡꓲꓳ ꓐꓯ ꓠꓬ ꓦꓻ ꓢꓲꓼ_ ꓟ ꓠꓬ ꓪꓴ‐ꓢ ꓔꓯ ꓢꓲꓼ_ ꓡꓳ꓿ ꓪꓴ‐ꓢ ꓠꓵ ꓠꓲ, ꓔꓯ ꓢꓲꓼ_ ꓡꓳ꓾ ꓟꓬ ꓠꓬꓲ ꓠꓬ꓾ ꓚꓲ ꓛꓬ ꓦ ꓢꓲꓼ_ ꓟ ꓔꓯ ꓧꓪ ꓖꓳ ꓓꓱ ꓢꓲꓼ_ ꓟ ꓥ ꓐꓰ ꓓꓵꓽ ꓙ ꓛꓬ ꓡꓰ ꓓꓵꓽ ꓙ ꓝꓳ. ꓡꓰ ꓢꓲ ꓠꓬꓲ ꓜ ꓠꓬꓲ ꓓꓳ ꓠꓬꓲ ꓗ, ꓛꓲ ꓠꓬꓲ ꓕꓱ ꓡꓱ ꓫꓵ ꓬꓰ ꓔꓬ ꓢꓲ ꓧꓪ ꓖꓳ ꓓꓱ ꓗ, ꓛꓲ ꓓꓴ ꓧꓪ ꓔꓬ ꓡꓳ꓾ ꓚꓵ ꓚꓵ ꓗ, ꓛꓲ ꓓꓴ ꓠꓬ ꓕꓱ ꓗꓪ ꓟꓽ ꓓꓯ,꓾ ꓦꓻ ꓗ, ꓛꓲ ꓠꓬ ꓪꓴ‐ꓢ ꓥ ꓡꓳ꓾ ꓪꓴ‐ꓢ ꓔꓯ ꓕꓲ ꓠꓲ, ꓟ ꓡꓱꓼ ꓕꓲ ꓶ ꓟꓬ ꓡꓱꓼ ꓥꓳꓻ ꓔ ꓢꓲ ꓠꓬ ꓛꓳ ꓙꓳ ꓐꓯ ꓠꓬ ꓟꓲ ꓠꓯ ꓕꓱ ꓟ ꓗꓪ ꓗ, ꓛꓲ ꓥꓳ ꓐꓰ ꓢꓲ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓟꓳ. ꓖꓶ ꓡ ꓡꓳ꓾