28 ꓠꓽ ꓟ ꓢꓲ ꓒ ꓦꓬꓼ ꓠꓬꓲ

            ꓖꓳ ꓕꓯ ꓣꓳꓽ ꓔꓯ ꓮ ꓟꓽ ꓬꓰ ꓙ ꓡ ꓡ? ꓠꓬꓲ. ꓠꓬꓲ. ꓟ. ꓟꓲꓽ ꓗꓪ ꓣꓳꓽ ꓔꓯ ꓮ ꓟꓽ ꓬꓰ ꓙ ꓖꓶꓽ ꓡ ꓡ ꓐꓯ ꓟ ꓓꓵˍ ꓡꓳ꓿ ꓟ. ꓟꓲꓽ ꓬꓲ. ꓪꓴ. ꓕꓲꓽ ꓙꓰ ꓗꓪ (ꓪꓲꓢꓓꓳꓟ) ꓐꓯ ꓟ ꓢꓷ. ꓠꓲ, ꓕꓱ ꓶ ꓗꓪ ꓾ ꓢꓷ. ꓠꓲ, ꓠꓬ ꓥꓪ ꓔꓯ ꓙ ꓖꓴ ꓟꓳ. ꓖꓶꓽ ꓡ ꓡꓳ꓿ ꓥꓪ ꓠꓬ ꓢꓷ. ꓠꓲ ꓔꓯ ꓒꓴꓺ ꓫꓵꓺ ꓢꓶ. ꓟꓽ ꓢꓲ ꓒꓴꓽ ꓗ ꓚꓰˍ ꓡꓳ꓿ ꓥꓪ ꓜꓽ ꓟꓲ ꓔꓬ ꓢ ꓟ ꓔꓯ ꓠꓲ, ꓠꓵˍ ꓟ ꓢꓶ. ꓟꓽ ꓛꓲ ꓢꓷ. ꓠꓲ, ꓔꓯ ꓒꓴꓽ ꓗꓺ ꓚꓰˍ ꓡꓳ꓾ ꓐꓰ ꓐꓯ ꓔ ꓟ ꓥ ꓡꓳ꓿

            ꓕꓱ ꓢꓷ. ꓠꓲ, ꓠꓬ ꓮ ꓫꓵꓽ ꓥ ꓡ? ꓟ. ꓟꓲꓽ ꓠꓬꓲꓽ ꓙꓰ ꓥ ꓟ ꓦ‐ꓐꓱ‐ꓣꓴ ꓕꓳ ꓶ  4ꓽ12‐13 ꓗꓪ ꓓꓵꓽ ꓡꓳ꓿ ꓢꓷ. ꓠꓲ, ꓖꓳ ꓟ ꓠꓬ ꓐꓯ ꓘꓶꓽ ꓐꓯ ꓟ ꓪꓴ‐ꓢ ꓥꓳ꓿ ꓐꓯ ꓘꓶꓽ ꓖꓳ ꓟ ꓠꓬ ꓪꓳꓽ ꓔꓳ ꓐꓰ ꓬꓲ. ꓗꓳꓺ ꓑꓲꓽ ꓔꓯ ꓘꓶꓽ ꓐ ꓡ ꓡꓳ꓿ ꓶꓼ ꓟꓬꓺ ꓐꓯ ꓦ ꓓꓵꓽ ꓙ ꓚꓱ ꓔꓯ ꓢꓷ. ꓐ ꓡ ꓡꓳ꓿ ꓣꓳꓽ ꓠꓲ, ꓟ ꓗꓪ ꓓꓵꓽ ꓙ ꓔꓬ ꓟ ꓔꓯ ꓢꓷ. ꓐ ꓡ ꓡꓳ꓿

            ꓖꓳ ꓡꓱ ꓠꓬꓲ ꓒꓵꓽ ꓶ ꓖꓳ ꓟ ꓕꓯ ꓮ ꓡꓰ ꓐꓰ ꓧꓪ. ꓡ ꓐꓯ ꓠꓬ ꓶꓼ ꓓꓳꓽ  ꓫꓱ, ꓓꓳꓽ ꓗꓪ ꓓꓵˍ ꓡꓳ꓿ ꓟ‐ꓘꓳ 10ꓽ17‐30 ꓗꓪ ꓞꓳ ꓐꓳꓺ ꓒ ꓕꓲꓽ ꓣꓳ ꓟꓴ ꓗꓪ ꓗꓴꓷꓼ ꓗꓪ ꓮ ꓡꓰ ꓓꓵꓽ ꓙꓰ ꓠ ꓐ ꓡ ꓡ ꓐꓯ ꓟ ꓔꓯ ꓠ, ꓠꓬꓲ ꓕꓯ ꓢꓲ ꓒ ꓡꓰ ꓠꓴ ꓔꓯ ꓙꓳˍ ꓟ ꓮ ꓙꓵꓽ ꓪꓴꓽ ꓗꓷ ꓢꓲ ꓞꓳ ꓫ ꓔꓯ ꓖꓶꓽ ꓖꓳ ꓡꓱ ꓢꓲ ꓥꓪ ꓔꓯ ꓖꓼ  ꓡꓯ ꓐꓰ ꓒꓳ ꓖꓶꓽˍ ꓟ ꓟ. ꓟꓲꓽ ꓥˍ ꓡꓳ꓿

            ꓢꓲ ꓒ ꓬꓰ‐ꓢꓴ ꓒꓬꓱꓽ ꓟꓳ ꓡˍ ꓕꓯ  ꓐꓶꓽ ꓓꓳꓺ ꓗꓪ ꓐꓰ ꓪ ꓔꓲ. ꓢ ꓣꓳ ꓟ ꓠꓬ ꓬꓲ. ꓙꓳ ꓟ ꓮ ꓙꓵꓽ ꓔꓯ ꓕꓯ ꓢꓲ ꓗꓴꓺ ꓤ ꓗ. ꓠꓯꓺ ꓖꓼ ꓢꓲ ꓢꓲ ꓒ ꓬꓰ‐ꓢꓴ ꓔꓯ ꓧꓪ. ꓡꓳ꓿ ꓮ ꓘꓶ. ꓫ ꓟ ꓙ ꓖꓴ ꓗꓪ ꓔꓳ, ꓙꓳˍ ꓥˍ ꓟꓲ꓾ ꓙ ꓚꓱ, ꓗꓪ ꓮ ꓘꓶ. ꓙꓬ. ꓟ ꓔꓳ ꓙꓳ ꓥˍ ꓟꓲ ꓟꓽ ꓒꓳ ꓬꓰꓼ ꓙꓰ ꓙꓰ ꓢꓲ ꓒ ꓔꓯ ꓧꓪ. ꓕꓯ ꓧꓪ ꓟꓶ ꓡꓰꓳ꓿ ꓬꓲ. ꓪ ꓐꓴ ꓠꓬ ꓟꓲꓺ ꓠꓯꓺ ꓗꓪ ꓒꓴ ꓶ ꓮ ꓫꓵꓽ ꓥ ꓐꓯ ꓟ ꓔꓯ ꓢꓷ. ꓟ ꓑꓶ. ꓓꓴ ꓟꓲꓺ ꓠꓯ ꓗꓪ ꓮ ꓟ ꓥˍ ꓟꓲ ꓠꓲ, ꓠꓵ ꓟ ꓒꓴ ꓫꓵꓺ ꓔꓯ ꓢꓲ ꓒ ꓔꓯ ꓖꓶꓽ ꓡꓳ꓿ ꓒꓴ ꓫꓵꓺ ꓐꓯ ꓟ ꓠꓬ ꓚꓵꓺ ꓚꓵꓺ ꓒꓵꓽ ꓶ ꓟꓽ ꓥ ꓐꓯ ꓟ ꓬꓲ. ꓪ ꓢꓷ. ꓟ ꓑꓶ. ꓓꓴ ꓥꓳ꓿

            ꓕꓱ ꓟ ꓡꓰ ꓐꓰ ꓟ‐ꓡꓲ ꓟ‐ꓓ‐ꓡꓰ ꓠꓬ ꓢꓲ ꓒ ꓬꓰ‐ꓢꓴ ꓡꓱꓼ ꓜꓴ ꓗꓪ ꓛꓲ ꓬꓰˍ ꓕꓯ ꓟꓴ ꓗꓪ ꓝꓲ ꓓꓴ ꓔꓯ ꓟꓳˍ ꓥˍ ꓟꓲ꓾ ꓢꓲ ꓒ ꓬꓰ‐ꓢꓴ ꓔꓯ ꓧꓪ. ꓡꓳ꓿ ꓢꓲ ꓒ ꓬꓰ‐ꓢꓴ ꓢꓯꓼ ꓬꓰ ꓙꓰ ꓑꓶ. ꓓꓴ ꓬꓲ. ꓐꓵ ꓞꓶꓽ ꓡꓰ ꓙꓰꓺ ꓓꓰ ꓥˍ ꓟꓲ ꓠꓲ, ꓟ ꓟꓽ ꓐꓲꓺ ꓡꓶꓽ ꓡꓰ ꓢꓰ꓿ ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓟꓳ ꓟꓽ ꓞ ꓧꓪ. ꓡꓳ꓿ ꓖꓳ ꓡꓱ ꓧꓪ. ꓟ ꓑꓶ. ꓓꓴ ꓧꓪꓺ ꓟꓶ. ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓟꓳ ꓕꓯ ꓡꓰ ꓠꓲ, ꓟ ꓐꓲꓺ ꓡꓶꓽ ꓡꓰ ꓡꓳ꓿ ꓟꓲꓺ ꓠꓯ ꓗꓪ ꓠꓲ, ꓟ ꓔꓯ ꓗ ꓛꓲꓽˍ ꓟ ꓖꓶꓽ ꓐ ꓡ ꓢꓴ ꓠꓬ ꓢꓲ ꓒ ꓡꓰ ꓙꓳˍ ꓟ ꓐꓯ ꓟ ꓬꓲ. ꓢꓷ. ꓟ ꓑꓶ. ꓓꓴ ꓥꓳ꓿ ꓟꓲꓺ ꓠꓲꓺ ꓗꓪ ꓒꓵꓽ ꓓꓰ ꓡꓰ ꓟ ꓠꓬ ꓢꓲ ꓒ ꓬꓰ‐ꓢꓴ ꓥꓳ ꓐꓯ ꓟ ꓢꓷ. ꓟ ꓑꓶ. ꓓꓴ ꓥꓳ꓿

            ꓠꓲ, ꓟ ꓐꓯ ꓟ ꓠꓬ ꓮ ꓙꓵꓽ ꓓꓯ ꓖꓴ ꓥꓳ꓿ ꓮ ꓙꓵꓽ ꓟ ꓬꓲ. ꓚꓰꓺ ꓥꓳ꓿  ꓠꓵ, ꓠꓲ ꓥˍ ꓟꓲ ꓦꓶ ꓠꓲ, ꓥˍ ꓟꓲ ꓮ ꓙꓵꓽ ꓠꓬ ꓠꓲ, ꓟ ꓗꓪ ꓐꓰ ꓓꓳꓺ ꓡ ꓟ ꓥꓳ꓿  ꓖꓳ ꓡꓱ ꓠꓬꓲ ꓢꓲ ꓒ ꓠꓬ ꓠꓴ ꓪ ꓠꓬ ꓥꓪ ꓔꓯ ꓟꓷꓽ ꓠꓷ ꓗꓪ ꓐꓰ ꓡꓰ ꓫꓱ. ꓖꓶꓽˍ ꓡꓳ꓿ ꓠꓲ, ꓟ ꓠꓬ ꓥꓪ ꓐꓰ ꓷ ꓤ ꓗꓷꓻ ꓓ ꓡꓳ ꓐꓰ ꓐꓯ ꓟ ꓥˍ ꓡꓳ꓿ 

            ꓣꓳꓽ ꓤꓶ ꓗꓪˍ ꓟꓲ ꓓꓵꓽ ꓙ ꓡꓯ꓿ ꓣꓳꓽ ꓒꓴ ꓶ ꓠꓬ ꓮ ꓫꓵꓽ ꓥ ꓡ? ꓣꓳꓽ ꓠꓲ, ꓟ ꓓ ꓖꓴ ꓠꓬ ꓣꓳꓽ ꓒꓵꓽ ꓡ  ꓓ ꓖꓴ ꓥˍ ꓡꓳ꓿ ꓠꓬꓲ. ꓠꓬꓲ ꓟ. ꓟꓲ ꓗꓪ  ꓞꓳ ꓐꓳꓺ ꓕꓲꓽ ꓣꓳ ꓡꓰ ꓐꓰ ꓣꓳꓽ ꓠꓲ, ꓟ ꓗꓪ ꓠꓱ. ꓐꓯꓼ ꓕꓲꓽ ꓙꓰ ꓓꓵ ꓗꓴ. ꓡꓳ꓿ ꓣꓳ ꓒꓵꓽ ꓗ ꓚꓰꓺ ꓠ ꓔ ꓟ ꓠꓬ ꓢꓲ ꓒ ꓡꓰ ꓥꓳ꓿ ꓪꓴ‐ꓢ  ꓡꓰ ꓣꓳꓽ ꓔꓯ ꓢꓯꓼ ꓪ ꓖꓶꓽ ꓢꓴ ꓥꓳ꓿ ꓠꓲ, ꓟ ꓗˍ ꓛꓲ ꓡꓰ ꓝꓲ ꓥꓳ ꓐꓯ ꓟ ꓠꓬꓲ. ꓠꓬꓲ ꓟ. ꓟꓲꓽ ꓗꓪ ꓐꓰ ꓣꓳ ꓔꓯ ꓐꓯ ꓟ. ꓖꓶꓽ ꓡ ꓔꓬ, ꓟ ꓥˍ ꓡꓳ꓿