32 ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ (32 Week Sunday Homily 7.11.2021)

ꓠꓲꓹ ꓠꓵ ꓟ ꓬꓲꓼ ꓤ ꓠꓬꓲ ꓤ ꓐꓴ ꓠꓬꓲꓸ ꓠꓬꓲꓸ ꓠꓬ (32) ꓠꓬꓲꓽ ꓠ ꓟ ꓢꓲ ꓒ ꓦꓬꓼ ꓠꓬꓲ ꓥˍ ꓡꓳ= ꓣꓳ ꓤꓶ ꓗꓪ ꓮ ꓘꓶꓸ ꓢꓲꓺ ꓫ ꓫꓵꓽ ꓦꓬꓼ ꓠꓬꓲ ꓕꓲꓽ ꓧꓪ ꓧꓪ ꓔꓳꓹ ꓙꓳꓽ ꓡ ꓗꓴꓸ ꓡꓳ= ꓣꓳꓽ ꓞꓲꓼ ꓣꓳˍ ꓕꓯ ꓐꓹ ꓐ ꓟꓹ ꓟ ꓡꓰ ꓣꓳꓽ ꓔꓯ ꓙꓲ ꓟ ꓬꓰ ꓠꓹ ꓟ꓾ ꓧꓸ ꓟ ꓬꓰ ꓠꓹ ꓟ ꓐꓯ ꓟꓳꓸ ꓖꓶꓽ ꓡˍ ꓡꓳ= ꓣꓳꓽ ꓥˍ ꓟꓲ ꓖꓳ ꓟ ꓔꓯ ꓒꓵꓽ ꓛꓳ ꓗꓳꓸ ꓡˍ ꓡꓳ= 

ꓖꓳ ꓡꓱ ꓥˍ ꓟꓲ꓾ ꓣꓳꓽ ꓞꓲꓼ ꓪꓴ ꓡ ꓕꓯ ꓧꓸ ꓟ ꓐꓰ ꓟꓽ ꓧ ꓟ ꓢꓲꓺ ꓪꓸ ꓫꓵꓽ ꓦꓬꓼ ꓠꓬꓲ ꓔꓳꓹ ꓙꓳꓽ ꓡ ꓗꓴꓸ ꓡꓳ=

ꓔꓯꓺ ꓥꓳ ꓡ ꓞꓳ ꓕꓲꓽ ꓣꓳ ꓠꓬ ꓕꓲꓽ ꓠꓬꓲ ꓙꓳˍ ꓕꓯ ꓮ ꓘꓶꓸ ꓬꓮꓳꓸ ꓚꓲ ꓫꓵꓽ ꓖꓪ ꓙꓱ ꓜꓲꓼ ꓓꓴ ꓕꓲꓽ ꓟ ꓙꓳˍ ꓡꓳ꓾ ꓖꓳ ꓡꓱ ꓥˍ ꓟꓲ ꓬꓲꓸ ꓦꓲ ꓘꓶꓽ ꓗꓪ ꓡ ꓞꓳ ꓕꓲꓽ ꓣꓳ ꓟ ꓮ ꓘꓶꓸ ꓠ ꓔꓬˍ ꓡꓳ= ꓬꓲꓸ ꓡꓰ ꓖꓪꓽ ꓙꓱ ꓜꓲꓼ ꓓꓴ ꓗꓪ ꓟꓽ ꓙꓰ ꓥꓳ ꓐꓯ ꓠꓬ ꓟꓵꓽ ꓗꓪ ꓐꓰ ꓬꓲꓸ ꓔꓯ ꓡꓳꓺ ꓒꓰ ꓗꓓˍ ꓟ ꓟꓶ ꓥꓳ= ꓟꓵꓽ ꓬꓰ ꓖꓴ ꓙꓰ ꓥꓳ ꓐꓯ ꓠꓬ ꓬꓲꓸ ꓦꓲ ꓘꓶꓽ ꓒ ꓕꓲ ꓗꓪ ꓔꓬꓹ ꓟ ꓞꓳ ꓠ ꓖꓳ ꓕꓲꓽ ꓣꓳ ꓠꓬ ꓫꓵˍ ꓥꓳ=

ꓕꓱ ꓡꓱ ꓫꓵꓽ ꓦꓬꓼ ꓠꓬꓲ ꓔꓳꓹ ꓙꓳ ꓡˍ ꓠꓬ ꓠꓴ ꓮ ꓡꓰ ꓟ ꓔꓯ ꓢꓲꓺ ꓥꓳ ꓪ= ꓡ ꓞꓳ ꓟꓬꓽ ꓐꓱ ꓠꓬ ꓟꓵꓽ ꓬꓰ ꓖꓴˍ ꓙꓰ ꓥꓳ ꓟꓽ ꓥ ꓡ?

ꓠꓬꓲꓸ ꓠꓬꓲꓸ ꓟꓸ ꓟꓵꓽ ꓗꓪ ꓠꓬ ꓮ ꓡꓰ ꓟ ꓔꓯ ꓢꓲꓺ ꓠꓹ ꓟ ꓣꓳ ꓔꓯ ꓐꓯ ꓖꓶꓽ ꓡ ꓔꓬꓹ ꓡꓳ= ꓟꓸ ꓟꓲꓽ ꓬꓲꓸ ꓪꓴꓸ ꓕꓲꓽ ꓔꓳꓽ ꓗꓪ ꓟꓷ ꓠꓷ ꓝ ꓒ ꓰ-ꓡꓲ-ꓬ ꓔꓯ ꓟꓶꓽ ꓛꓵꓼ ꓟ ꓕꓲꓽ ꓣꓳ ꓟ ꓬꓲꓸ ꓙꓳˍ ꓟ ꓑꓺ ꓑꓺ ꓮ ꓙꓵꓽ ꓬꓲꓸ ꓔꓯ ꓖꓶꓽ ꓜˍ ꓕꓯ ꓬꓲꓸ ꓤꓶ ꓐꓴ ꓗꓪ ꓜꓽ ꓖꓴ ꓟꓽ ꓓ꓾ ꓫꓱꓹ ꓡꓰ ꓟꓽ ꓓ꓾ ꓐꓰ ꓓ ꓟ ꓣꓳ ꓑꓹ ꓙ ꓡꓳ= ꓶ ꓓꓳ ꓫꓱꓹ ꓓꓳ ꓗꓪ ꓥˍ ꓟꓲ ꓟꓶ ꓛꓵꓼ ꓟ ꓕꓲꓽ ꓣꓳ ꓠꓬ ꓬꓲꓸ ꓙꓳ ꓟ ꓮ ꓙꓵ ꓪꓴ-ꓢ ꓔꓯ ꓖꓶꓽ ꓕꓯ ꓠꓱꓸ ꓐꓯ ꓛꓳ ꓐꓳ ꓕꓯ ꓢꓲ ꓗꓪ ꓡꓴ ꓢꓴ ꓒꓬꓱꓼ ꓙꓰ ꓡꓳ ꓟꓽ ꓥ ꓡ=

ꓪꓴ-ꓢ ꓠꓬ ꓣꓳꓽ ꓮ ꓫꓵꓽ ꓖꓶꓽ ꓟ ꓔꓯ ꓟꓽ ꓡꓳꓸ ꓠꓬꓲ꓾ ꓣꓳꓽ ꓮ ꓡꓰ ꓖꓶꓽ ꓐꓯ ꓟ ꓔꓯ ꓡꓰ ꓡꓳꓸ ꓠꓬꓲ ꓡꓳ= ꓬꓲꓸ ꓠꓬ ꓣꓳ ꓔꓬꓹ ꓗꓪ ꓐꓰ ꓣꓳꓽ ꓙꓳ ꓟ ꓮ ꓙꓵꓽ ꓕꓲꓽ ꓙ ꓠꓲꓹ ꓡꓱꓸ ꓕꓲꓽ ꓠꓲꓹ ꓟ ꓡꓱꓸ ꓖꓶꓽ ꓠꓹ ꓟ ꓡꓰ ꓥꓳ ꓡꓳꓸ ꓔꓬꓹ ꓡꓳ꓾ ꓐꓯ ꓟ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶꓽ ꓡ ꓔꓬꓹ ꓟ ꓥˍ ꓡꓳ=