daily reflection

ꓕꓲ ꓠꓬꓲ ꓙꓳˍ ꓠꓬ꓾ ꓬꓰ-ꓢꓴ ꓟꓸ ꓟꓲꓽ ꓟꓸ ꓔꓬ ꓕꓯ꓾ ꓖ-ꓡꓲ-ꓡꓲ ꓟꓵꓽ ꓕꓲ ꓘꓹ ꓡꓰ ꓕꓲ ꓘˍ ꓐꓰ ꓬꓴ-ꓔ ꓟꓵˍ ꓐꓰ꓾ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓡꓻ ꓟ ꓒ-ꓡꓲ-ꓢꓷ ꓐꓴˍ ꓐꓰ ꓙꓵ ꓗ ꓟꓸ ꓒ ꓐꓴ ꓠꓬ ꓖꓳ ꓗꓪ ꓠꓬꓲꓸ ꓠꓸ ꓔꓬ ꓡꓳ꓿ ꓠꓻ ꓒꓬꓽ ꓫꓬꓹ ꓖꓶ ꓠꓹ ꓟ ꓢꓲ ꓒꓽ ꓬꓲ ꓪꓽ ꓠꓬꓲˍ ꓟ ꓠꓬ ꓬꓰ-ꓢꓴ ꓔꓯ ꓛꓳ ꓞꓹ ꓡꓳ꓿ꓖꓳ ꓕꓯ ꓛꓲ ꓫꓵꓻ ꓡꓯꓼ ꓫꓵ ꓠꓬꓲ ꓬꓲꓼ ꓖꓴ ꓗꓪ ꓓꓳꓽ ꓞꓹ ꓢꓴ ꓕꓲ ꓣꓳ ꓔꓯ ꓢꓴ ꓡꓰ ꓑꓱꓸ ꓡ ꓡꓳ꓿ ꓬꓲ ꓪꓽ ꓠꓬ ꓬꓲ ꓔꓯ ꓑꓱꓸ ꓓꓵꓽ ꓙꓰ ꓢꓲ ꓬꓰ-ꓢꓴ ꓟꓲꓽ ꓙꓬ ꓗꓪ ꓗꓶ ꓔꓸ ꓠꓲꓹ ꓫꓵˍ ꓡꓳ꓿ꓖꓳ ꓡꓱ ꓥ ꓟꓲ ꓞꓳ ꓜꓴꓻ ꓞꓳ ꓟꓯꓼ ꓑꓶꓸ ꓓꓴ ꓑꓱꓸ ꓓꓵꓽ ꓙꓰ ꓚꓱꓹ ꓧꓪ ꓟꓽ ꓟꓳꓻ ꓠꓬꓲ꓾ ꓦꓲ ꓪꓴꓸ ꓓꓵ ꓓꓰꓺ ꓗꓪ ꓓꓯ ꓙꓰ ꓢꓲ꓾ ꓦꓲ ꓪꓵ ꓔ ꓟ ꓥꓼ ꓒꓲꓽ ꓥꓸ ꓗꓷ ꓢꓲ ꓠꓬꓲ꓾ ꓬꓲˍ ꓐꓰ ꓬꓲ ꓬꓲꓼ ꓖꓴ ꓔꓯ ꓮꓽ ꓙꓵ ꓢꓴ ꓗꓳ ꓡꓳ ꓗꓪ꓾ ꓬꓰ-ꓢꓴ ꓟꓲꓽ ꓙꓬꓽ ꓢꓲ ꓗꓪ ꓩꓴ ꓬꓯꓼ ꓗꓷˍ ꓡꓳ꓿ꓬꓲ ꓪꓽ ꓙꓵꓻ ꓠꓲꓹ ꓔꓯ ꓬꓰ-ꓢꓴ ꓟꓳꓻ ꓗꓷ ꓠꓬ꓾ ꓬꓲ ꓡꓰ ꓛꓲ ꓫꓵ ꓡꓯꓼ ꓫꓵ ꓢꓴ ꓔꓯ꓾ ꓞꓳ ꓑꓸ ꓤꓽꓳ꓾ ꓠꓴ ꓝꓴꓲ ꓖꓽ ꓖꓶ ꓗꓷꓳ꓾ ꓐꓯ ꓖꓶˍ ꓡꓳ꓿ꓙꓵ ꓗ ꓟꓸ ꓒ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓕꓱ ꓟ ꓔꓯ ꓑ ꓙꓽˍ ꓕꓯ꓾ ꓐꓯ ꓟꓽ ꓚꓰꓼ ꓟ ꓐꓯ ꓢꓴ ꓕꓱ ꓕꓲ ꓣꓳ ꓮꓽ ꓟ ꓥ ꓡ? ꓪꓴ-ꓢ ꓬꓲ ꓕꓲ ꓣꓳˍ ꓡꓰ ꓟꓽ ꓥ ꓠꓬ ꓝꓴꓲ ꓮꓽ ꓟ ꓖꓽ ꓖꓶ ꓐ ꓡ ꓡ?꓾ ꓐꓰ ꓓꓵꓽ ꓙ ꓔꓬ ꓡꓳ꓿ꓬꓲ ꓪꓽ ꓕꓱ ꓡꓱ ꓓꓵꓽ ꓙ ꓔꓬ ꓟ ꓔꓯ ꓬꓰ-ꓢꓴ ꓢꓷꓸˍ ꓠꓬꓲ ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓲꓹ ꓟ ꓗꓪ ꓮꓸ ꓫꓵ ꓪꓴꓸ ꓠꓬꓲ ꓕꓱ ꓡꓱ ꓓꓵꓽ ꓙ ꓔꓬ ꓡ?ꓠꓴ ꓝꓴꓲ ꓖꓽ ꓖꓶ ꓗꓷꓳ꓾ ꓐꓯˍ ꓟ꓾ ꓥ ꓠꓬ꓾ ꓔꓴ ꓢꓲ ꓙ ꓖꓴ ꓫꓱ꓾ ꓐꓯˍ ꓟ꓾ ꓮ ꓡꓲ ꓕꓲ ꓘꓶ ꓐꓯ ꓢꓻˍ ꓡ?ꓡ-ꓞꓳ-ꓮ-ꓐꓲ ꓠꓽ ꓟꓲ ꓠꓯ ꓗꓪ ꓝꓴꓲ ꓖꓽ ꓖꓶ ꓓꓴ ꓙꓵꓽ ꓪ ꓙꓳˍ ꓟ ꓠꓴ ꓪꓽ ꓢꓷꓸ ꓡꓰ ꓠꓹ ꓟ ꓕꓱ ꓡꓱ ꓬꓰˍ ꓥꓳ꓾ ꓐꓯ ꓢꓲ꓾ ꓬꓲ ꓡꓰ ꓛꓲ ꓫꓵꓻ ꓡꓯꓼ ꓫꓵ ꓢꓴ ꓔꓯ꓾ ꓠꓴ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓔꓴ꓾ ꓠꓴ ꓘꓳꓽ ꓓꓳ ꓔꓯꓹ ꓔ ꓢꓲ ꓠꓴ ꓦꓲ ꓗꓪ ꓬꓲꓼ ꓙꓰ G꓾ ꓐꓯ ꓖꓶˍ ꓡꓳ꓿ꓖꓳ ꓡꓱ ꓠꓬ ꓬꓲ ꓠꓽ ꓬꓲ ꓪꓽ ꓟꓲꓽ ꓙꓬ ꓗꓪ ꓞꓼ ꓐꓰ ꓔꓴ ꓡ ꓢꓲ꓾ ꓬꓲ ꓘꓳꓽ ꓓꓳꓻ ꓔꓯꓹ ꓔ ꓢꓲ ꓠꓬꓲ꓾ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓠꓬꓲ ꓐꓰ ꓬꓲ ꓦꓲ ꓗꓪ ꓬꓲꓼ ꓙꓰˍ ꓡꓳ꓿ꓖꓳ ꓡꓱ ꓠꓬ ꓮꓽ ꓙꓵ ꓢꓴ ꓮꓽ ꓘꓶꓸ ꓓꓵꓽ ꓙ ꓮ'ꓺ ꓡꓰ ꓢꓲ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶˍ ꓡꓳ꓿ ꓝꓮꓲ ꓬꓲ ꓪꓽ ꓠꓲꓹ ꓟ ꓗꓪ ꓙꓳ ꓒꓵꓽ ꓠꓲꓹ ꓐꓲ ꓡꓰ ꓢꓲ꓾ ꓠꓬꓲꓸ ꓠꓬꓲ ꓣꓳꓽ ꓠꓬ ꓓꓵꓽ ꓙ ꓟꓶ ꓓꓴ ꓟꓳꓻ ꓗꓷꓳ꓾ ꓐꓯˍ ꓡꓳ꓿