ꓐꓴꓓ-ꓓ ꓙꓵ ꓠꓲꓹ ( ꓓꓲꓮꓡꓳꓖꓴꓰ ꓪꓲꓔꓧ ꓳꓔꓧꓰꓣ ꓣꓰꓡꓲꓖꓲꓳꓠꓢ)

ꓐꓴꓓ-ꓓ ꓙꓵ ꓠꓲꓹ ꓠꓬ ꓙꓲ-ꓢꓴ ꓘꓴ ꓜꓲꓼ ꓞꓳ ꓟꓽ ꓛꓲ ꓡ ꓢꓰꓼ ꓕꓯ ꓧꓶꓸ ꓕꓯ 500 ꓘꓳꓼ ꓛꓲ ꓕꓯꓽ ꓡꓰ ꓲꓠꓓꓲꓮ ꓟꓵ ꓗꓪ ꓓꓳ ꓡꓹ ꓟ ꓙꓵ ꓠꓲꓹ ꓕꓲꓽ ꓟ ꓥ_ ꓡꓳ= ꓕꓱ ꓟ ꓙꓵ ꓠꓲꓹ ꓔꓯ ꓔꓶ ꓢꓴ ꓠꓬ ꓢꓲꓔ-ꓔ-ꓓ ꓖꓮꓴ-ꓔ-ꓟ ꓥ ꓐꓶ= ꓲꓠꓓꓲꓮ ꓗꓴꓷ ꓗꓪ ꓚꓳꓸ ꓠꓲ ꓮꓢꓲꓮ ꓟꓵꓽ ꓬꓲ ꓔꓲ ꓫꓵ ꓗꓪ ꓮꓢꓲꓮ ꓟꓵ ꓐꓶꓽ ꓓꓳ ꓕꓲꓽ ꓛꓱ ꓔꓯ ꓢꓲ ꓖꓳ ꓟ ꓡꓰ ꓟ ꓞꓲ ꓖꓳ ꓟꓶꓸ ꓕꓲꓽ ꓛꓱꓽ ꓔꓲ ꓢꓲ ꓖꓳ ꓟ ꓡꓰ ꓟ ꓞꓲ ꓲꓠꓓꓲꓮ ꓐꓰ ꓖꓳ ꓪꓴꓸ ꓠꓬꓲꓽ ꓗꓴ ꓚꓸ ꓗꓪ ꓕꓱ ꓟ ꓙꓵ ꓠꓲꓹ ꓠꓬ ꓟꓬ ꓡ ꓐꓶꓹ ꓡꓺꓳ ꓫꓵꓽ ꓥ ꓐꓶ= ꓐꓴꓓ-ꓓ ꓙꓵ ꓠꓲꓹ ꓠꓯꓸꓼ ꓗꓪ ꓟꓶ-ꓧ ꓬ-ꓠ ꓐꓯꓹ ꓟ꓾ ꓧꓲꓠ-ꓠ ꓬ-ꓠ ꓐꓯꓹ ꓟ꓾ ꓦꓲꓙ-ꓣ ꓬ-ꓠ ꓐꓯꓹ ꓟ ꓢ ꓫꓵꓽ ꓙꓳ ꓡꓳ= ꓬ-ꓠ ꓐꓯꓹ ꓟ ꓠꓬ ꓬꓲ ꓪꓳꓽ ꓬꓲ ꓚꓳ ꓟꓽ ꓥ ꓠꓬ ꓖꓽ ꓡꓲꓽ ꓕꓱ ꓡꓲꓳ ꓫꓵꓽ ꓬꓲ ꓟꓸ ꓟꓲ ꓙꓳ_ ꓡꓳ= ꓟꓶ-ꓧ ꓬ-ꓠ ꓐꓯꓹ ꓟ ꓠꓬ ꓪꓴꓹ ꓟ ꓬꓲ ꓪꓳꓽ ꓬꓲ ꓚꓳ ꓐꓯꓹ ꓟ ꓥ ꓡꓳ= ꓧꓲꓠ-ꓠ ꓬ-ꓠ ꓐꓯꓹ ꓟ ꓠꓬ ꓣꓳꓹ ꓟ ꓬꓲ ꓪꓳꓽ ꓬꓲ ꓚꓳ ꓥ_ ꓡꓳ= ꓦꓲꓙ-ꓣ ꓬ-ꓠ ꓐꓯꓹ ꓟ ꓠꓬ ꓪꓲꓸ ꓒꓴ ꓐꓯꓹ ꓟ ꓥꓳ=ꓧꓲꓠ-ꓠ ꓬ-ꓠ ꓔꓯ ꓣꓳ ꓢꓷꓸ ꓔ ꓟ ꓠꓬ ꓕꓯ-ꓣ-ꓪ-ꓓ ꓐꓰ ꓢꓷꓸ ꓔ ꓟ ꓥ_ ꓡꓳ= ꓢ-ꓣ-ꓪ-ꓗ-ꓬ-ꓠ ꓥ_ ꓟꓲ ꓐꓯ ꓐꓶ=

ꓕꓯ-ꓣ-ꓪ-ꓓ ꓐꓴꓓ-ꓓ ꓜꓴ ꓠꓬ ꓬꓲ ꓡꓵ ꓬꓲ ꓚꓲ ꓘꓴ ꓜꓲꓼ ꓞꓳ ꓥ ꓢꓲ ꓧꓡꓸ ꓕꓯ ꓬꓲ ꓡꓵ ꓬꓲ ꓚꓲ ꓛꓳ ꓡꓲ ꓔꓯ ꓗ ꓫꓵ ꓔꓯ ꓛꓳ_ ꓟ ꓙꓵ ꓠꓲꓹ ꓥ ꓡꓳ= ꓣꓳ ꓟꓬꓮꓠꓟꓮꓣ ꓗꓴꓷ ꓗꓪ ꓟ ꓐꓴꓓ-ꓓ ꓜꓴ ꓐꓴ ꓠꓬ ꓕꓱ ꓟ ꓡꓰ ꓐꓰ ꓥ ꓡꓳ= ꓟꓶ-ꓧ ꓬ-ꓠ ꓐꓯꓹ ꓟ ꓠꓬ ꓙꓲ-ꓢꓴ ꓢꓲ ꓤꓼ ꓐꓴ ꓔꓬ ꓡꓹ ꓟ ꓙꓵꓹ ꓗꓪ ꓐꓴꓓ-ꓓ ꓙꓵ ꓠꓲꓹ ꓬꓲ ꓪꓴꓸ ꓙꓳꓹ ꓟ ꓗꓪ ꓐꓰ 500 ꓗꓳꓼ ꓛꓲ ꓖꓼ ꓡꓯꓼ ꓖꓼ ꓙꓲ ꓔꓯ ꓙꓲ-ꓢꓴ ꓘꓴ ꓜꓲꓼ ꓞꓳ ꓙꓵ ꓠꓲꓹ ꓙꓳꓹ ꓡ ꓟ ꓙꓵ ꓗꓪ ꓙꓳ ꓡ ꓟ ꓙꓵ ꓠꓲ ꓥˍ ꓡꓳ= ꓚꓬꓴ ꓙꓹ ꓟ ꓣꓱꓽ ꓛꓲꓽ ꓐꓯꓹ ꓟ ꓡꓲꓹ ꓙꓲꓹ ꓟ ꓔꓯ ꓟꓬ ꓠꓬꓲ ꓐꓶꓹ ꓠꓬꓲ ꓮꓽ ꓙ ꓫꓵꓽ ꓓꓵꓽ ꓙꓽ ꓗꓴ ꓔ ꓟ ꓜꓴ ꓥˍ ꓡꓳ= ꓬꓲ ꓪꓽ ꓐꓯꓹ ꓟ ꓠꓬ ꓚꓬꓴ ꓙꓹ ꓟ ꓣꓱꓽ ꓛꓲꓽ ꓐꓯꓹ ꓟ ꓠꓬ ꓡ ꓟ ꓒꓽ ꓒꓴꓥ-ꓖꓲ ꓒꓽ ꓧꓳ-ꓢ ꓒꓽ ꓐꓱ ꓶ ꓡꓰ ꓟ ꓥ= ꓙꓵ ꓠꓲꓹꓢꓯꓼ ꓕꓵꓼ ꓢꓴ ꓮꓽ ꓙꓵꓽ ꓐꓱ ꓶꓽ ꓥ ꓡꓳ= ꓮ ꓡꓰꓳ ꓐꓯ ꓠꓬ ꓟꓬꓮꓠꓟꓮꓣ ꓗꓴꓷ ꓗꓪ ꓔꓬ ꓟ ꓕꓯ-ꓣ-ꓪ-ꓓ ꓐꓴꓓ-ꓓ ꓜꓴ ꓐꓴ ꓡꓰ ꓐꓯꓹ ꓟ ꓠꓬ ꓤꓽ ꓟꓶꓼ ꓤꓼ ꓐꓴ ꓠꓬ ꓮ ꓟꓬ ꓙꓵ ꓠꓲꓹ ꓙꓳ ꓥˍ ꓟꓲ ꓕꓲꓽ ꓕꓶꓹ ꓟꓴ ꓗꓪ ꓗꓴꓷ ꓗꓪ ꓛꓲ ꓪ ꓟ ꓓ= ꓛꓲ ꓡ ꓟ ꓕꓲꓽ ꓤꓶ ꓗꓪ ꓤꓽ ꓑꓸ ꓤꓼ ꓒꓬꓱꓼ ꓡ ꓡ-ꓟ ꓒꓽ ꓒꓬꓱ ꓡ ꓕꓯ ꓢꓲ ꓠꓲ-ꓦ-ꓠ ꓐꓯꓹ ꓟ ꓟꓴ ꓗꓪ ꓗꓴꓷ ꓗꓪ ꓛꓲ ꓪ ꓓˍ ꓡꓳ=

Add new comment

1 + 9 =