ꓐꓴꓓ-ꓓ ꓚ ꓟꓸ ꓟꓲ (ꓓꓲꓮꓡꓳꓖꓴꓰ ꓪꓲꓔꓧ ꓳꓔꓧꓰꓣ ꓣꓰꓡꓲꓖꓲꓳꓠꓢ)

ꓖꓮꓴ-ꓔ-ꓟ ꓒꓬꓱꓽ ꓟꓳ ꓓꓳ ꓗꓸ ꓠꓯꓸ 5 ꓦꓬꓼ ꓡꓳꓼˍ ꓕꓯ ꓟꓬꓱ ꓖꓶꓽ ꓠꓹꓟ ꓬꓰˍ ꓡꓳ= ꓖꓳ ꓡꓱ ꓑꓮꓲꓽ ꓓꓽ ꓟ ꓬꓰꓹ ꓕꓯ ꓦ ꓕꓲꓽ ꓒꓳꓹ ꓔꓯꓸ ꓢꓲ ꓗꓪ ꓢꓯꓼ ꓙꓳˍ ꓟ ꓧꓳꓼ ꓢꓹ ꓒꓽ ꓡ ꓟ ꓒꓽ ꓒꓴꓥ ꓖꓲ ꓒꓽ 8 ꓣꓳ ꓔꓯ ꓘꓴˍ ꓡꓳ= ꓕꓱ ꓕꓲꓽ ꓘꓴꓸ ꓗꓪ ꓮ ꓡ ꓮꓽ ꓙꓵꓽ ꓠꓬ ꓢꓲꓔ-ꓔ-ꓓ ꓖꓮꓴ-ꓔ-ꓟ ꓔꓯ ꓪꓸ ꓔꓲ> ꓒꓽ ꓟꓽ ꓥꓹ ꓠꓬ ꓢꓲ ꓫꓬ ꓢꓴ ꓗꓶ ꓡ ꓓꓴ ꓥꓳ ꓐꓰ ꓐꓯˍ ꓐꓶ= ꓖꓳ ꓡꓰ ꓥˍ ꓟꓲ ꓖꓳ ꓟ 8 ꓣꓳ ꓟ ꓠꓯꓸꓼ ꓗꓪ ꓟ ꓕꓲꓽ ꓣꓳ ꓥˍ ꓟ ꓖꓳꓠ-ꓓ-ꓠ ꓐꓯꓹ ꓢꓴ ꓟ ꓠꓬ ꓬꓲ ꓠꓬ ꓙꓵ ꓙꓵ ꓐꓴꓓ-ꓓ ꓪꓴ-ꓢ ꓒꓬꓱꓼ ꓡ ꓥꓳ= ꓐꓰ ꓐꓯ ꓔ ꓟ ꓙꓳˍ ꓡꓳ= ꓢꓲꓔ-ꓔ-ꓓ ꓖꓮꓴ-ꓔ-ꓟ ꓠꓬ ꓪꓸ ꓔꓲꓸ ꓤꓼ ꓠꓱ ꓥˍ ꓟ ꓪꓴꓸ ꓠꓬꓲ ꓮꓸ ꓫꓵꓽˍ ꓟꓲ ꓙꓽ ꓫꓸ ꓟ ꓛꓲ ꓣꓱꓽ ꓬꓯꓹ ꓟ ꓥ ꓕ ꓑꓳꓸ ꓒ ꓐꓲ ꓒ ꓜꓲꓼ ꓬꓲ ꓐꓹ ꓐꓽ ꓢꓴꓔ-ꓓꓳ-ꓓ-ꓟ ꓠꓬ ꓬꓲ ꓤꓽ ꓔꓯ ꓕꓱ ꓡꓰ ꓛꓹ ꓐꓶ= ꓖꓳ ꓟ ꓡꓰꓽ ꓟꓽ ꓞꓲ ꓫꓸ ꓓꓴ ꓟꓶꓽ ꓓꓴ ꓟꓽ ꓙꓳ ꓠ ꓗꓹ ꓛꓲꓽ ꓗꓹ ꓓꓴ ꓔꓯꓹ ꓡꓰ ꓬꓲ ꓭꓱ ꓶ ꓙ ꓖꓶꓽ ꓖꓴꓹ ꓡꓳ=

ꓖꓳ ꓟ ꓡꓰ ꓐꓰ ꓕꓲꓽ ꓡꓰ ꓬꓲ ꓐꓹ ꓐꓽ ꓠꓬ ꓟꓶꓽ ꓘꓳꓼ ꓒꓳꓹ ꓡꓹ ꓟ ꓔꓯ ꓛꓳ ꓢꓲ ꓪꓸ ꓔꓲꓸ ꓐꓱ 3 ꓐꓱ ꓕꓱ ꓡꓰ ꓬꓰ ꓔ ꓟ ꓙꓳ ꓐꓶ= ꓬꓲ ꓐꓹ ꓐꓽ ꓢꓴꓔ-ꓓꓳ-ꓓ-ꓟ ꓠꓬ ꓬꓲ ꓤꓽ ꓢꓲꓔ-ꓔ-ꓓ ꓖꓮꓴ-ꓔ-ꓟ ꓔꓯ ꓪꓸ ꓔꓲꓸ ꓓꓽ ꓟ ꓒꓬꓱꓼ ꓡ ꓠꓹ ꓟ ꓠꓲꓹ ꓫꓵˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓬꓲ ꓤꓽ ꓔꓯ ꓦ ꓕꓲꓽ ꓒꓳꓹ ꓔꓯ ꓢꓲ ꓟꓸ ꓖꓶꓹ ꓟ ꓟꓽ ꓬꓰ= ꓖꓳ ꓟ ꓡꓰ ꓟꓽ ꓞꓲ  ꓠ ꓓꓴ ꓒꓬꓽ ꓓꓴˍ ꓐꓰ ꓞꓳ ꓤꓽ ꓫꓵꓹ ꓟ ꓚꓱꓹ ꓔꓯ ꓥˍ ꓟꓲ꓾ ꓠꓲ ꓫꓸ ꓟꓬ ꓫꓸ ꓓꓴ ꓚꓱꓹ ꓔꓯ ꓥˍ ꓟꓲ ꓬꓲ ꓤꓽ ꓢꓲꓔ-ꓔ-ꓓ ꓔꓯ ꓟꓽ ꓟꓳ ꓠ ꓬꓰˍ ꓡꓳ= ꓢꓲꓔ-ꓔ-ꓓ ꓖꓮꓴ-ꓔ-ꓟ ꓠꓬ ꓬꓲ ꓟꓹ ꓟ ꓥꓹ ꓟ ꓟꓶ-ꓧ ꓑ-ꓙ-ꓑ-ꓔꓲ ꓡꓯꓽ ꓒꓯꓹ ꓗꓪ ꓪꓴꓽ ꓡꓺꓳ= ꓬꓲ ꓞꓲꓼ 16 ꓘꓳꓼ ꓡꓳꓼˍ ꓕꓯ ꓬꓲ ꓔꓯ ꓠꓬ ꓬꓲ ꓕꓲꓽ ꓫꓵꓽ ꓕ꓾ꓽ ꓪꓳꓼ ꓤꓽ ꓟꓶꓼ ꓤꓼ ꓕꓲꓽ ꓣꓳ ꓐꓰ ꓬꓲ ꓔꓯ ꓦꓲ ꓕꓴꓽ ꓖꓪ ꓕꓴ ꓖꓶˍ ꓡꓳ= ꓡꓯꓽ ꓒꓯꓹ ꓝꓸ ꓖꓶˍ ꓡꓳ= ꓕꓱ ꓟ ꓤꓽ ꓟꓶꓼ ꓟꓬꓱ ꓠꓬ ꓬ-ꓢꓳ-ꓓ-ꓣ ꓥˍ ꓡꓳ= ꓬ-ꓢꓳ-ꓓ-ꓣ ꓠꓬ ꓣ-ꓧꓴꓼ-ꓡ ꓔꓯ ꓛꓱꓽ ꓟꓳˍ ꓡꓳ=

ꓖꓮꓴ-ꓔ-ꓟ 29 ꓘꓳꓼ ꓡꓳꓼ ꓡ ꓕꓯ ꓗ-ꓑꓲ-ꓡ-ꓪ-ꓢꓔꓴ ꓐꓯˍ ꓟ ꓡꓳ ꓒꓱ ꓓ ꓪꓸ ꓔꓲꓸ ꓕꓲꓽ ꓣꓳ ꓡꓰ ꓐꓰ ꓔꓬꓹ ꓡꓳ= ꓬꓲ ꓐꓹ ꓐꓽ ꓠꓬ ꓬꓲ ꓤꓽ ꓔꓯ ꓮꓸ ꓫꓵꓽ ꓥˍ ꓟꓲ ꓙꓬꓽ ꓫꓸ ꓟꓽ ꓛꓵ ꓗꓹ ꓗ ꓛꓲ ꓛꓲ ꓐꓰ ꓔꓬ ꓝꓲꓹ ꓥˍ ꓟꓲ ꓬꓲ ꓠꓲꓹ ꓟ ꓘꓴꓽ ꓗꓪ ꓠꓬ ꓟꓲ ꓠꓯ ꓒꓴ ꓫꓵ ꓔꓯ ꓟꓽ ꓠꓲꓹ ꓫꓵ= ꓕꓲ ꓠꓬꓲ ꓙꓳꓹ ꓕꓯ ꓖꓮꓴ-ꓔ-ꓟ ꓠꓬ ꓬꓲ ꓐꓹ ꓐꓽ ꓟꓽ ꓢꓷꓸ ꓡꓰ ꓠ ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓙ ꓫꓱꓽ ꓡꓹ ꓡꓳ= ꓖꓳ ꓕꓯ ꓬꓲ ꓠꓬ ꓞꓳ ꓟꓳꓽ ꓞꓳ ꓔꓲ ꓬꓲ ꓓꓯ ꓝꓲꓸ ꓡꓰ ꓘꓴꓸ ꓔ ꓟ ꓕꓲꓽ ꓣꓳ ꓔꓯ ꓟꓳꓹ ꓡꓳ= ꓠ ꓢꓴ ꓕꓲꓽ ꓣꓳ ꓔꓯꓹ ꓟꓲ ꓟꓳ ꓡꓳ= ꓞꓳ ꓟꓳ ꓑꓱꓸ ꓡꓹ ꓟ ꓔꓯˍ ꓟꓲ ꓟꓳꓹ ꓡꓳ= ꓖꓳ ꓕꓯ ꓬꓲ ꓠꓬ ꓓꓵꓽ ꓙꓽ ꓒꓳꓹ ꓡꓲꓼ ꓡꓺꓳ=