ꓑ ꓫꓬꓽ ꓮ ꓙꓵꓽ ꓐꓱ ꓶ ꓙꓲ ꓖꓴ ꓙꓳˍ ꓟ (ꓓꓲꓮꓡꓳꓖꓴꓰ ꓪꓲꓔꓧ ꓔꓧꓰ ꓑꓳꓳꓣ)

ꓑ ꓫꓬꓽ ꓮ ꓟꓬꓹ ꓐꓱ ꓶ ꓙꓲ ꓖꓴ ꓙꓳꓹ ꓟ ꓐꓯꓹ ꓟ ꓠꓬ ꓟꓬꓱꓽ ꓔꓯ ꓥˍ ꓟꓲ꓾ ꓶ ꓤꓼ ꓶ ꓟꓲ ꓔꓯ ꓥˍ ꓟꓲ꓾ ꓬꓲ ꓔꓶꓸ ꓬꓲ ꓖ ꓔꓯ ꓥˍ ꓟꓲ ꓐꓯ ꓠꓲꓹ ꓫꓵ ꓓꓴ ꓟ ꓥ ꓪ= ꓕꓱ ꓡꓰ ꓑ ꓫꓬꓽ ꓮ ꓟꓬ ꓐꓱ ꓶꓽ ꓙꓲ ꓖꓴ ꓙꓳˍ ꓟ ꓐꓯꓹ ꓟ ꓠꓬ ꓞꓳ ꓤꓽ ꓕꓲꓽ ꓣꓳ ꓡꓰꓸ ꓕꓲꓽ ꓣꓳ ꓐꓱ ꓶ ꓙꓲ ꓖꓴ ꓙꓳꓹ ꓟ ꓡꓰ ꓟ ꓞꓲ ꓑ ꓫꓬꓽ ꓮ ꓙꓵꓽ ꓐꓱ ꓶ ꓙꓲ ꓖꓴ ꓙꓳꓹ ꓟ ꓟꓬꓱꓽ ꓕꓲꓽ ꓫꓵꓽ ꓫꓵꓽ ꓕꓯ ꓐꓯ ꓠꓲꓹ ꓫꓵꓹ ꓟ ꓥ ꓪ= ꓖꓳ ꓟ ꓑꓶꓸ ꓓꓴ ꓠꓲ ꓞꓳ ꓤꓽ ꓮ ꓟꓬꓹ ꓐꓱ ꓶ ꓙꓲ ꓖꓴ ꓙꓳꓹ ꓟ ꓐꓯꓹ ꓟ ꓠꓯꓸꓼ ꓗꓪ ꓠꓬ ꓑ ꓫꓬꓽ ꓮ ꓟꓬꓹ ꓐꓱ ꓶ ꓟꓬꓱꓽ ꓬꓰꓹ ꓟ ꓙꓵꓹ ꓗꓪ ꓕꓲꓽ ꓣꓳ ꓡꓰ ꓟꓬꓱꓽ ꓬꓰ ꓢꓲꓸ ꓪ ꓓꓹ ꓟ ꓟꓽ ꓥ= ꓞꓳ ꓤꓽ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓠꓲꓹ ꓟ ꓓꓵꓽ ꓙꓽ ꓗꓴ ꓔ ꓟ꓾ ꓞꓳ ꓤꓽ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓬꓲ ꓠꓯꓸꓼ ꓗꓪ ꓬꓰ ꓐ ꓡꓹ ꓟ ꓫꓱꓸ ꓤꓼ ꓠꓲꓹ ꓠꓵ ꓠꓲꓹ ꓕꓱꓹ ꓚꓵˍ ꓟ ꓬꓰ ꓖꓶꓽ ꓐ ꓡꓹ ꓟ ꓕꓱ ꓟ ꓮ ꓙꓵꓽ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓡꓰ ꓙꓽ ꓖꓶꓽ ꓔ ꓟ ꓕꓯ ꓢꓲ ꓗꓪ ꓬꓳꓸ ꓚꓵˍ ꓡꓳ= ꓞꓳ ꓤꓽ ꓕꓲꓽ ꓣꓳ ꓡꓰ ꓟꓽ ꓥꓹ ꓠꓬ ꓞꓳ ꓜꓴ ꓕꓲꓽ ꓜꓴ ꓡꓰ ꓞꓳ ꓤꓽ ꓮ ꓟꓬꓹ ꓐꓱ ꓶ ꓟꓬꓱꓽ ꓬꓰ ꓟꓽ ꓐ ꓡ= ꓑ ꓫꓬꓽ ꓮ ꓙꓵꓽ ꓓꓵꓽ ꓙꓹ ꓟ ꓐꓰ ꓢꓯꓼ ꓕꓵꓼ ꓪꓴꓽ ꓧꓶˍ ꓟ ꓐꓰ ꓪꓽ ꓡꓯꓽ ꓘꓳ ꓫꓱꓹ ꓡꓯꓽ ꓘꓳꓹ ꓟ ꓙꓳ ꓠꓬꓲ ꓔ ꓡꓳ=

ꓔꓲ ꓒꓽ ꓪꓸ ꓔꓲꓸ ꓬꓳ-ꓦ ꓫꓫ ꓡꓰ ꓐꓯꓹ ꓟ ꓠꓬ ꓞꓳ ꓤꓽ ꓮ ꓟꓬ ꓐꓱ ꓶ ꓙꓲ ꓖꓴ ꓙꓳˍ ꓟ ꓐꓯꓹ ꓟ ꓬꓲ ꓟꓸ ꓟꓲ ꓗꓪ ꓠꓬ ꓑ ꓫꓬꓽ ꓠꓯꓸꓼ ꓗꓪ ꓟ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓚꓵꓸ ꓛꓬ ꓟꓬꓱꓽ ꓬꓲ ꓐꓵꓽ ꓐꓵꓹ ꓟ ꓐꓰ ꓕꓱ ꓡꓰ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓘꓳꓹ ꓟ ꓠꓯꓸꓼ ꓗꓪ ꓐꓰ ꓚꓵꓸ ꓛꓬ ꓐꓱ ꓶ ꓪ ꓙꓵꓽ ꓪꓽ ꓙꓳꓹ ꓟ ꓕꓱ ꓟ ꓔꓯ ꓐꓯ ꓠꓲꓹ ꓫꓵꓹ ꓟ ꓥˍ ꓡꓳ= ꓖꓳ ꓟ ꓑꓶꓸ ꓓꓴ ꓠꓲ ꓗꓴꓷ ꓔꓯ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓠꓬ ꓑ ꓫꓬ ꓮꓽ ꓟ ꓔꓯ ꓥˍ ꓟꓲ ꓟꓬ ꓠꓬꓲ ꓬꓲ ꓐꓶꓹ ꓙꓵꓽ ꓪ ꓠꓹ ꓟ꓾ ꓟꓬꓽ ꓠꓬꓲ ꓬꓲ ꓐꓶꓹ ꓪ ꓙꓵꓽ ꓪꓽ ꓑꓯꓹ ꓟꓶ ꓠꓹ ꓟ ꓕꓱ ꓡꓰꓳ ꓫꓵꓽ ꓠꓲꓹ ꓟ ꓐꓹ ꓟ ꓟꓽ ꓙꓳ ꓙꓳ ꓮꓽ ꓟ ꓔꓯ ꓥˍ ꓟꓲ ꓫꓵꓽ ꓘꓶꓽ ꓞꓳ ꓘꓶꓽꓹ ꓟ ꓟꓽ ꓙꓳ ꓙꓳ ꓮꓽ ꓙꓵꓽ ꓐꓱ ꓶ ꓙꓲ ꓖꓴ ꓙꓳˍ ꓟ ꓠꓯꓸꓼ ꓗꓪ ꓢꓯꓼ ꓕꓵꓼ ꓠꓹ ꓟ ꓟꓬꓱꓽ ꓬꓰ ꓠꓹ ꓗˍ ꓡꓳ= ꓢꓯꓼ ꓕꓵꓼ ꓠ ꓗˍ ꓡꓳ= ꓕꓱꓹ ꓚꓵꓹ ꓟ ꓐꓰ ꓕꓲꓽ ꓡꓰꓼ ꓪ ꓙꓵꓽ ꓪꓽ ꓙꓳˍ ꓟ ꓕꓱ ꓡꓰꓳ ꓫꓵꓽ ꓠꓯꓸꓼ ꓗꓪ ꓟꓬꓽ ꓠꓬꓲ ꓐꓶꓹ ꓠꓬꓲ ꓪ ꓠꓹ ꓟ ꓙꓵꓽ ꓪꓽ ꓟꓽ ꓙꓳꓹ ꓟ ꓞꓳ ꓤꓽ ꓔꓯ ꓟꓬꓽ ꓠꓬꓲ ꓢꓯꓼ ꓕꓵꓼ ꓖꓶꓽ ꓠ ꓗˍ ꓡꓳ= ꓬꓲ ꓪꓽ ꓐꓱ ꓶ ꓙ ꓖꓶ ꓠ ꓗˍ ꓡꓳ= ꓐꓯ ꓟꓴ ꓫꓱꓹ ꓟ ꓠꓬ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓠꓬ ꓫꓸ ꓢꓴ ꓟꓶ ꓢꓴ ꓔꓯ ꓟꓬꓽ ꓠꓬꓲ ꓐꓶ ꓠꓬꓲ ꓬꓰ ꓙ ꓠ ꓡꓳꓼ ꓥ꓾ ꓢꓯꓼ ꓕꓵꓼ ꓖꓶꓽ ꓠ ꓡꓳꓼ ꓥ꓾ ꓔꓳꓹ ꓙ ꓠ ꓡꓳ ꓥ ꓐꓯꓹ ꓟ ꓥˍ ꓡꓳ=

ꓦꓮꓔꓲꓚꓮꓠ ꓲꓲ ꓗꓪ ꓠꓬ ꓞꓳ ꓤꓽ ꓕꓲ ꓤꓳ ꓡꓰ ꓕꓲꓽ ꓣꓳ ꓞꓳ ꓦꓲ ꓕꓲ ꓦꓲ ꓡꓰ ꓕꓲꓽ ꓦꓲ ꓞꓳ ꓜꓴ ꓕꓲꓽ ꓜꓴ ꓡꓰ ꓕꓲꓽ ꓜꓴ ꓕꓱ ꓡꓰ ꓬꓲ ꓣꓳ ꓬꓲ ꓦꓲ ꓬꓲ ꓜꓴ ꓐꓰ ꓕꓱ ꓡꓰ ꓬꓲ ꓢꓲ ꓞꓳ ꓤꓽ ꓠꓬ ꓢꓯꓸ ꓔꓬꓹ ꓟ ꓥˍ ꓡꓳ꓾ ꓔꓶ ꓔꓸ ꓟ ꓥˍ ꓡꓳ= ꓬꓲꓸ ꓜꓴ ꓬꓲꓸ ꓟꓯꓸꓼ ꓠꓬ ꓚꓵꓸ ꓛꓬꓽ ꓢꓯꓼ ꓕꓵꓼ ꓟ ꓗꓪ ꓐꓰ ꓕꓱꓹ ꓚꓵꓹ ꓟ ꓞꓳ ꓤꓽ ꓕꓲꓽ ꓣꓳ ꓐꓰ ꓢꓯꓸ ꓔꓬꓹ ꓟꓶ ꓠꓹ ꓟ ꓢꓯꓼ ꓕꓵꓼ ꓠꓹ ꓟ ꓢꓯꓼ ꓪꓽ ꓙꓳꓹ ꓢꓲ ꓞꓳ ꓤꓽ ꓕꓲꓽ ꓣꓳ ꓡꓰ ꓕꓲ ꓦꓲ ꓡꓰ ꓕꓲ ꓦꓲ ꓬꓲꓸ ꓜꓴ ꓬꓲ ꓟꓯꓹ ꓮꓽ ꓙꓵꓽ ꓠꓬ ꓐꓲ ꓜꓲꓼ ꓟ ꓙꓲ ꓖꓴ ꓙꓳꓹ ꓟ ꓔꓯ ꓙꓲꓽ ꓢꓴ ꓢꓲꓽ ꓒꓽ ꓐꓴ ꓠꓬ ꓬꓲ ꓖꓶꓽ ꓠꓹ ꓟ ꓢꓯꓼ ꓕꓵꓼ ꓠ ꓡꓳꓼ ꓥ=