ꓘꓴ ꓜꓲꓼ ꓞꓳ ꓐꓰ ꓡꓲꓽ ꓒꓰꓼ ꓬꓲ ꓟꓸ ꓟꓲꓽ ꓚꓰꓹ (Dialogue with Culture)

ꓡꓳꓹ ꓬꓰˍ ꓟ ꓕꓲꓽ ꓫꓵꓽ ꓠꓽ ꓗꓪ ꓥˍ ꓟꓲ ꓦꓮꓔꓲꓚꓮꓠ ꓗꓪ ꓬꓰˍ ꓟ ꓠꓬꓲ ꓧꓪꓹ ꓕꓲꓽ ꓧꓪꓹ ꓟ ꓖꓪ ꓙꓱ ꓜꓲꓼ ꓓꓴ ꓓꓽ ꓟ ꓗꓪ ꓬꓲ ꓟꓸ ꓟꓲ ꓒꓶˍ ꓟ ꓔꓯ ꓐꓯ ꓟꓸ ꓖꓶ ꓡꓳ- ꓡꓰꓳ= ꓘꓴ ꓜꓲꓼ ꓞꓳ ꓡꓰ ꓐꓯ ꓟꓸ ꓔ ꓟ ꓡꓲꓽ ꓒꓰꓼ ꓬꓲ ꓟꓸ ꓟꓲꓽ ꓮꓽ ꓙꓵꓽ ꓔꓯ ꓬꓲ ꓧꓶꓹ ꓚ ꓢꓲ ꓛꓳꓽ ꓠꓬꓲ ꓠꓬ ꓟꓵꓽ ꓘꓳꓼˍ ꓐꓰ ꓟꓲ ꓠꓯ ꓔꓯ ꓒꓳꓹ ꓡꓶꓸ ꓠˍ ꓟ ꓐꓱ ꓶ ꓚꓵ ꓛꓬꓽ ꓞꓲꓼ ꓔꓯ ꓪꓴꓽ ꓡ ꓟꓴ ꓡ ꓠ ꓬꓰ ꓠˍ ꓟ ꓐꓱ ꓶ ꓕꓱ ꓡꓲꓳ ꓫꓵꓽ ꓔꓯ ꓐꓯˍ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ=ꓖꓳ ꓟ ꓪꓴꓸ ꓠꓬꓲ ꓡꓲꓽ ꓒꓰꓼ ꓐꓯˍ ꓕꓯ ꓠꓬ ꓟꓲ ꓠꓯ ꓞꓳ ꓤꓽ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓢꓯꓸ ꓔꓬˍ ꓟ ꓬꓰ ꓔꓬˍ ꓟ ꓫꓷ꓾ ꓚꓵꓸ ꓛꓬꓽ ꓘꓳˍ ꓣꓴ ꓔꓬ ꓟ ꓛꓳ ꓚꓱꓹ꓾ ꓚꓵꓸ ꓛꓬꓽ ꓔꓳꓹ ꓜꓳꓽ ꓔꓬˍ ꓟ ꓚꓱꓹ꓾ ꓢꓯꓸ ꓔꓬˍ ꓟ ꓚꓱꓹ꓾ ꓫꓸ ꓪ꓾ ꓫꓷꓸ ꓡˍ ꓟ ꓛꓳ ꓚꓱꓹ꓾ ꓘꓶꓸ ꓕꓯ ꓕꓲꓽ ꓞꓲꓼ ꓗꓪ ꓚꓳˍ ꓡꓰ ꓬꓰ ꓫꓷꓸ ꓡˍ ꓟ ꓚꓱꓹ꓾ ꓞꓳ ꓫꓵꓽ ꓕꓲꓽ ꓫꓵꓽ ꓠꓯꓸꓼ ꓗꓪ ꓬꓲ ꓒꓵꓽ ꓒꓵꓽˍ ꓟ ꓚꓱꓹ꓾ ꓐꓲ ꓜꓲꓽ ꓠꓴꓽ꓾ ꓮꓽ ꓗꓼ ꓗˍ ꓟ꓾ꓜꓽ ꓪꓳꓽ ꓡꓳ ꓪꓳꓽ꓾ ꓶ ꓖꓪꓽ ꓕꓱ ꓡꓲꓳ ꓫꓵꓽ ꓮꓽ ꓙꓵꓽ ꓔꓯ ꓐꓯˍ ꓟ ꓥˍ ꓪ= ꓕꓲꓽ ꓣꓳˍ ꓐꓰ ꓕꓲꓽ ꓣꓳ ꓕꓲꓽ ꓪꓼ ꓔꓬ ꓢꓲ ꓬꓰˍ ꓟ꓾ ꓕꓲꓽ ꓪꓼ ꓔꓬ ꓢꓲ ꓞꓳ ꓙꓳ ꓢꓯꓸ ꓔꓬ ꓚꓱꓹ꓾ ꓠꓲꓽ ꓖꓴˍ ꓟ꓾ ꓪꓴ-ꓢ ꓔꓯ ꓫꓱꓸ ꓖꓶˍ ꓟ꓾ ꓕꓱ ꓡꓲꓳ ꓫꓵꓽ ꓮꓽ ꓙꓵꓽ ꓙꓵ ꓠꓲꓹ ꓚꓱꓹ ꓮꓽ ꓙꓵꓽ ꓥˍ ꓟꓲ ꓡꓲꓽ ꓒꓰꓼ ꓠꓯꓸꓼ ꓗꓪ ꓐˍ ꓟ ꓥ ꓪ=

ꓞꓳ ꓤꓽ ꓠꓬ ꓧꓪꓽ ꓗꓳ ꓓꓱꓽ ꓕꓲꓽ ꓛꓱꓽ ꓔꓯ ꓢꓲ ꓟꓳꓸ꓾ ꓠꓲꓹ ꓟ ꓓꓵꓽ ꓙˍ ꓟ ꓕꓲꓽ ꓛꓱꓽ ꓔꓯ ꓢꓲ ꓟꓳꓸ꓾ ꓦꓺ ꓕꓲꓽ ꓒꓳꓹ ꓔꓯ ꓢꓲ ꓟꓳꓸ ꓣꓱꓽ ꓬꓯꓼˍ ꓟ ꓮꓽ ꓙꓵꓽ ꓜꓽ ꓪꓳꓽ ꓡꓳ ꓪꓳꓽ꓾ ꓶ ꓖꓪꓽ꓾ ꓔꓬˍ ꓔꓶꓸ꓾ ꓦꓱꓺ ꓔꓶꓸ꓾ ꓫꓵꓽ ꓤꓽ ꓧꓪꓽ ꓤꓽ ꓕꓯ ꓢꓲ ꓠꓱ ꓠꓲꓹ꓾ ꓠꓲꓹ ꓫꓵˍ ꓟ꓾ ꓕꓲꓽ ꓫꓵꓽ ꓫꓵꓽ ꓔꓯ ꓠꓲꓹ ꓫꓵˍ ꓟ꓾ ꓢꓷꓸ ꓠꓲꓹ꓾  ꓙꓽ ꓜꓲꓼ ꓠꓲꓹ꓾ ꓢꓳꓺ ꓣꓴˍ ꓟ꓾ ꓐꓲ ꓫꓵˍ ꓟ ꓐꓰ ꓙꓵꓽ ꓪꓽ ꓕꓱ ꓡꓲꓳ ꓫꓵꓽ ꓮꓽ ꓙꓵꓽ ꓔꓯ ꓒꓬꓱꓼ ꓠꓲꓹ ꓫꓵˍ ꓟ ꓞꓳ ꓤꓽ ꓥˍ ꓡꓳ= ꓕꓱ ꓡꓰ ꓚꓵꓸ ꓛꓬꓽ ꓢꓯꓸ ꓔꓬˍ ꓟ ꓤꓶ ꓗꓪ ꓣꓱꓽ ꓬꓯˍ ꓟ꓾ ꓥꓳ ꓡꓳꓸ ꓔ ꓟ ꓮꓽ ꓙꓵꓽ ꓕꓯ ꓐꓲ ꓜꓲꓼ ꓡꓰ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓢꓲ ꓟꓵꓽ ꓘꓳꓼ ꓐꓰ ꓟꓲ ꓠꓯ ꓔꓯ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓟꓬꓽ ꓠꓬꓲ ꓙꓵ ꓠ ꓒꓳꓹ ꓡꓶꓸ ꓔꓬˍ ꓟ ꓥ ꓪ= ꓟꓵꓽ ꓘꓳꓼ ꓐꓯˍ ꓟ ꓠꓬ ꓞꓳ ꓤꓽ ꓟꓬꓱ ꓬꓰ ꓐ ꓡ ꓠˍ ꓟ ꓐꓱ ꓶ ꓟꓽ ꓓ ꓬꓳꓸ ꓚꓵˍ ꓟ ꓕꓲꓽ ꓟ ꓥˍ ꓡꓳ= ꓟꓲ ꓠꓯ ꓞꓳ ꓤꓽ ꓕꓲꓽ ꓛꓱꓽ ꓗꓪ ꓚꓳꓸ ꓚꓵꓸ ꓛꓬꓽ ꓠꓲꓹ ꓫꓵˍ ꓟ ꓟꓬꓱꓽ ꓗꓪ ꓐꓰ ꓚꓵꓸ ꓛꓬ ꓐꓱ ꓶ ꓣꓱꓽ ꓬꓯˍ ꓟ ꓥ ꓕ ꓑꓳꓸ ꓔꓯ ꓐꓲ ꓜꓲꓼ ꓡꓰ ꓠˍ ꓟ ꓧꓪꓸ ꓕꓯ ꓖꓳ ꓟ ꓟꓵꓽ ꓘꓳꓼ ꓐꓰ ꓮ ꓡꓰ ꓢꓲ ꓕꓲꓽ ꓪꓼ ꓬꓰ ꓠˍ ꓟ ꓢꓯꓼ ꓕꓵꓼˍ ꓟ ꓥ ꓪ=

ꓟꓵꓽ ꓘꓳꓼ ꓕꓯ ꓢꓲ ꓗꓪ ꓣꓳꓽ ꓠꓬ ꓛꓳꓽ ꓢꓲ ꓚꓵꓸ ꓛꓬꓽ ꓣꓱꓽ ꓬꓯˍ ꓟ ꓔꓯ ꓧꓪ ꓢꓲ ꓟꓬꓱꓽ ꓬꓰˍ ꓕꓯ ꓚꓵꓸ ꓛꓬꓽ ꓥˍ ꓟꓲ ꓟꓵꓽ ꓘꓳꓼ ꓪꓴꓸ ꓠꓬꓲ ꓒꓳꓹ ꓡꓲꓼ ꓡˍ ꓟ ꓔꓯ ꓘꓳˍ ꓣꓴ ꓟꓶˍ ꓟ ꓥ ꓪ= ꓮ ꓡꓲꓳ ꓐꓯ ꓠꓬ ꓣꓳꓽ ꓟꓳꓹˍ ꓟ꓾ ꓣꓳꓽ ꓔꓳꓹ ꓜꓳˍ ꓟ꓾ ꓣꓳꓽ ꓓꓵꓽ ꓙˍ ꓟ ꓣꓳꓽ ꓟꓬꓱꓽ ꓬꓰˍ ꓟ꓾ ꓣꓳꓽ ꓫꓱꓹ ꓥ ꓕ ꓑꓳꓸ ꓮꓽ ꓙꓵꓽ ꓠꓬ ꓟꓵꓽ ꓘꓳꓼ ꓐꓰ ꓕꓲꓽ ꓪꓼ ꓟꓵꓽ ꓘꓳꓼ ꓔꓯ ꓛꓳꓽ ꓢꓲ ꓣꓳꓽ ꓒꓳꓹ ꓔ ꓟ ꓥ ꓕ ꓑꓳꓸ ꓔꓯ ꓡꓲꓽ ꓒꓰꓼ ꓐꓯˍ ꓟ ꓥ ꓪ= ꓔꓯ ꓥꓳꓽ ꓐꓯ ꓠꓬ ꓙꓬ ꓟꓵꓽ ꓗꓪ ꓔꓬ ꓢꓴ ꓠꓬ ꓙꓬ ꓟꓵꓽ ꓗꓪ ꓣꓱꓽ ꓬꓯˍ ꓟ ꓶ ꓖꓪꓽ ꓖꓪˍ ꓟ ꓕꓱ ꓡꓰ ꓒꓬꓱꓼ ꓡ꓾ ꓙꓬ ꓟꓵꓽ ꓗꓪ ꓔꓬ ꓢꓴ ꓡꓲꓽ ꓒꓰꓼ ꓠꓬ ꓞꓺ ꓟꓵꓽ ꓗꓪ ꓔꓬ ꓢꓴ ꓡꓲꓽ ꓒꓰꓼˍ ꓐꓰ ꓟꓽ ꓪꓽ ꓡꓰ ꓕꓱ ꓡꓰ ꓗꓷ ꓡꓰˍ ꓟ ꓡꓰ ꓐꓰ ꓟꓵꓽ ꓘꓳꓼ ꓔꓯ ꓛꓳꓽ ꓢꓲ ꓡꓲꓽ ꓒꓰꓼ ꓥˍ ꓟꓲ ꓒꓳꓹ ꓡꓰˍ ꓓꓴ ꓟ ꓥ ꓪ= ꓖꓳ ꓟ ꓑꓶꓸ ꓓꓴ ꓡꓲꓽ ꓒꓰꓼ ꓐꓯˍ ꓟ ꓠꓬ ꓞꓳ ꓤꓽ ꓕꓲꓽ ꓞꓲꓼ ꓠꓯꓸꓼ ꓗꓪ ꓟꓽ ꓓ ꓬꓳꓸ ꓚꓵˍ ꓟ ꓬꓲ ꓢꓷꓸ ꓡꓰ ꓓꓴ ꓓꓽ ꓟ ꓬꓲ ꓢꓷꓸ ꓡꓰ ꓓꓴ ꓓꓽ ꓟ ꓥ ꓢꓲ ꓚꓵꓸ ꓛꓬꓽ ꓕꓲꓽ ꓞꓲꓼ ꓐꓱ ꓶ꓾ ꓚꓵꓸ ꓛꓬꓽ ꓗꓴꓷꓼ ꓐꓱ ꓶ꓾ ꓚꓵꓸ ꓛꓬ ꓞꓳ ꓫꓵꓽ ꓐꓱ ꓶ ꓢꓓ> ꓙ ꓟꓴ ꓙ ꓓꓴ ꓟꓳ ꓪ ꓓˍ ꓟ ꓢꓷꓸ ꓡꓰ ꓓꓴ ꓓꓽ ꓟ ꓕꓲꓽ ꓟ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓥꓮꓔꓲꓚꓮꓠ ꓲꓲ ꓖꓪ ꓙꓱ ꓜꓲꓼ ꓓꓴ ꓗꓪ ꓠꓬ ꓡꓲꓽ ꓒꓰꓼ ꓐꓰ ꓚꓬꓴꓹ ꓙˍ ꓟ ꓐꓯˍ ꓟ ꓪꓴꓸ ꓓꓵ ꓛꓹ ꓢꓲ ꓙꓵ ꓠꓲꓹ ꓚꓱꓹ ꓔꓯ ꓟꓳꓸ ꓖꓪ ꓛꓱ ꓡꓳꓹ ꓬꓰ ꓟ ꓥ ꓪ= ꓞꓳ ꓤꓽ ꓐꓰ ꓕꓲꓽ ꓪꓼ ꓙꓳˍ ꓟ ꓡꓲꓽ ꓒꓰꓼ ꓠꓬ ꓪꓴ-ꓢ ꓡꓰ ꓖꓶ ꓡˍ ꓟ ꓡꓯꓽ ꓫꓵ ꓓꓽ ꓟ ꓥˍ ꓡꓳ= ꓠꓱꓸ ꓐꓯꓼ ꓞꓳ ꓫꓵꓽ ꓔ ꓔꓲ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓘꓳˍ ꓟ ꓚꓵꓸ ꓚꓻꓽ ꓡꓲꓽ ꓒꓰꓼ ꓗꓪ ꓙꓳ ꓢꓲ ꓖꓳ ꓟ ꓠꓬ ꓪꓴ-ꓢ ꓡꓰ ꓖꓶ ꓡꓰ ꓖꓶ ꓡˍ ꓟ ꓡꓯꓽ ꓢꓴ ꓥˍ ꓟ ꓔꓯ ꓟꓳ ꓪ ꓓˍ ꓟ ꓢꓷꓸ ꓡꓰ ꓓꓴ ꓟꓳꓸ ꓖꓶ ꓐ ꓡˍ ꓟ ꓥˍ ꓡꓳ ꓐꓰ ꓕꓱ ꓡꓰ ꓟꓸ ꓖꓶ ꓡˍ ꓟ ꓥˍ ꓡꓳ=