ꓘꓴ ꓜꓲꓼ ꓞꓳ ꓡꓰ ꓟꓸ ꓖꓶ ꓡ ꓟ ꓡꓲꓽ ꓒꓰꓼ ꓐꓰ ꓫꓸ ꓕꓱ_ ꓟ ꓚꓱꓹ

ꓘꓴ ꓜꓲꓼ ꓞꓳ ꓡꓰ ꓟꓸ ꓖꓶ ꓡ ꓟ ꓡꓲꓽ ꓒꓰꓼ ꓐꓰ ꓫꓸ ꓕꓱ_ ꓟ ꓚꓱꓹ

ꓠꓬꓲꓽ ꓧꓪꓹ ꓕꓲ ꓧꓪꓹ ꓟ ꓦꓮꓔꓲꓚꓮꓠ ꓖꓪ ꓙꓱꓻ ꓜꓲꓼ ꓓꓴ ꓗꓪ ꓡꓲꓽ ꓒꓰꓼ ꓔꓯ ꓣꓱꓽ ꓢꓲ꓾ ꓪꓴ-ꓢ ꓶꓼ ꓓꓳꓽ ꓫꓱꓸ ꓓꓳꓽ ꓔꓯ ꓚ_ ꓟ꓾ ꓪꓴ-ꓢ ꓟꓬꓱꓽ ꓬꓰ_ ꓟ ꓚꓱꓹ ꓔꓯ ꓕꓱ ꓡꓱ ꓟꓸ ꓖꓶ ꓡ ꓡꓳ= ꓘꓴ ꓜꓲꓼ ꓞꓳ ꓟꓬ ꓡ ꓠꓹ ꓟ ꓪꓴ-ꓢ ꓶꓼ ꓓꓳꓽ ꓫꓱꓸ ꓓꓳꓽ ꓔꓯ ꓚ ꓕꓯ ꓟꓽ ꓪ ꓡꓯꓼ ꓘꓳ ꓟꓽ ꓫꓱꓹ ꓡꓯ ꓘꓳ ꓟ ꓡꓲꓽ ꓒꓰꓼ ꓔꓯ ꓮ ꓘꓶꓸ ꓒꓵꓽ ꓢꓲ꓾ ꓧꓪ ꓟꓲꓹ ꓢꓲ ꓣꓱꓽ ꓠꓹ ꓟ꓾ ꓖꓳ ꓟ ꓡꓰ ꓟꓽ ꓞꓲ ꓮ ꓘꓶꓸ ꓒꓵꓽ_ ꓟ ꓡꓲꓽ ꓒꓰꓼ ꓘꓴꓽ ꓗꓪ ꓢꓲ ꓒꓽ ꓬꓰ-ꓢꓴ ꓶꓼ ꓓꓳꓽ ꓫꓱꓹ ꓓꓳꓽ ꓔꓯ ꓗꓷ ꓔ ꓢꓲ ꓠꓬꓲ ꓟꓸ ꓟꓲꓽ ꓚ ꓠꓹ ꓟ ꓘꓴ ꓜꓲꓼ ꓞꓳ ꓡꓰ ꓟꓸ ꓖꓶ ꓟ ꓥꓳ= ꓖꓳ ꓡꓱ ꓡꓲꓽ ꓒꓰꓼ ꓠꓯꓼ ꓗꓪ ꓶꓼ ꓓꓳꓽ ꓫꓱꓹ ꓓꓳꓽ ꓗꓷ ꓢꓲ ꓠꓬꓲ ꓚ ꓕꓯ ꓖꓳ ꓟ ꓞꓳ ꓫꓵ ꓐꓴ ꓠꓯꓼ ꓗꓪ ꓟꓬ ꓠꓬꓲ ꓬꓲꓸ ꓟꓸ ꓟꓲꓽ ꓔꓯ ꓢꓳ ꓣꓴ ꓐ ꓡ ꓟ ꓒꓬꓱꓼ ꓡ ꓢꓲ꓾ ꓪꓽ ꓘꓴ_ ꓟ ꓙꓵꓹ ꓔꓯ ꓥ ꓟꓲ ꓪꓴ-ꓢ ꓚꓱꓹ ꓔꓯ ꓥ ꓟꓲ ꓟꓬ ꓠꓬꓲ ꓬꓲꓸ ꓟꓸ ꓟꓲꓽ ꓠꓯꓸ ꓠ ꓠ ꓠꓹ ꓐ ꓡ ꓟ ꓢꓳ ꓣꓴ ꓐ ꓡ ꓟ ꓒꓬꓱꓼ ꓡ ꓓꓴ ꓥꓳ ꓐꓰ ꓕꓱ ꓡꓱ ꓐꓯ_ ꓡꓳ= ꓪꓴ-ꓢ ꓶꓼ ꓓꓳꓽ ꓫꓱꓸ ꓓꓳꓽ ꓠꓬ ꓝꓴꓲ ꓠꓯꓼ ꓗꓪ ꓢꓯꓸ ꓔꓬ ꓟ꓾ ꓞꓳ ꓫꓵ ꓡꓲꓽ ꓒꓰꓼ ꓐꓰ ꓞꓳ ꓤ ꓢꓯꓼ ꓟꓬ ꓔꓯ ꓝꓮꓲ ꓕꓲ ꓧꓪꓹ ꓬꓲꓸ ꓫꓵꓼ ꓒꓬꓱꓼ ꓡ ꓝꓲ_ ꓟ꓾ ꓢꓯꓸ ꓡ ꓝꓲ_ ꓟ ꓥ ꓡꓳ= ꓪꓴ-ꓢ ꓶꓼ ꓓꓳꓽ ꓫꓱꓸ ꓓꓳꓽ ꓠꓬ ꓝꓴꓲ ꓠꓯꓼ ꓗꓪ ꓛꓲ ꓡꓰ ꓝꓲ ꓟ꓾ ꓤ ꓠꓬꓲ ꓫꓵ ꓠꓬꓲ ꓡ_ ꓟ ꓮ ꓙꓵ ꓔꓯ ꓟꓶꓽ ꓡꓰ ꓝꓲ ꓢꓲ꓾ ꓟꓽ ꓙꓲ_ ꓟ ꓠꓯꓼ ꓗꓪ ꓐꓰ ꓟꓽ ꓢꓲ ꓟꓽ ꓫꓬꓹ ꓟ ꓔꓯ ꓣꓴ ꓓꓳꓺ ꓖꓶ ꓩꓴ ꓢꓲ ꓠꓬꓲ ꓞꓳ ꓤ ꓔꓯ ꓢꓲ ꓫꓬ ꓡꓰ ꓝꓲ_ ꓟ ꓙꓲ_ ꓟꓒꓬꓱꓼ ꓡ ꓝꓲ_ ꓟ ꓥ ꓡꓳ= ꓞꓳ ꓤ ꓕꓲ ꓣꓳ ꓡꓲ ꓕꓲ ꓣꓳ ꓛꓳ_ ꓟ ꓚꓱꓹ ꓔꓯ ꓟꓬ ꓠꓬꓲ ꓙꓲ_ ꓟ ꓠꓯꓼ ꓗꓪ ꓛꓲ ꓔꓴ ꓖꓶ_ ꓟ ꓐꓰ ꓢꓲ ꓫꓬ ꓡꓰ ꓠꓹ ꓟ ꓮ ꓕꓯ ꓥ ꓟꓲ ꓪꓴ-ꓢ ꓶꓼ ꓓꓳꓽ ꓫꓱꓸ ꓓꓳꓽ ꓠꓬ ꓮ ꓕꓯ ꓟꓲ ꓬꓰ ꓖꓶ ꓔꓬ ꓟ ꓥ ꓡꓳ= ꓖꓳ ꓟ ꓑꓶ ꓓꓴ ꓕꓯ ꓢꓲ ꓗꓪ ꓐꓰ ꓡ_ ꓟ ꓚꓬꓴ ꓙ ꓟ ꓣꓱ ꓛꓱ ꓔꓯ ꓡꓲꓽ ꓒꓰꓼ ꓔꓯ ꓣꓱꓽ ꓢꓲ ꓠꓬꓲ ꓪꓴ-ꓢ ꓶꓼ ꓓꓳꓽ ꓫꓱꓸ ꓓꓳꓽ ꓔꓯ ꓚ_ ꓠꓬ ꓞꓳ ꓫꓵ ꓕꓲ ꓫꓵ ꓬꓲꓸ ꓡꓲꓽ ꓒꓰꓼ ꓔꓯ ꓟꓬ ꓠꓬꓲ ꓬꓲꓸ ꓒꓵꓽ ꓒꓵ ꓡꓰ ꓝꓲ_ ꓟ꓾ ꓦ ꓕꓲ ꓒꓳꓹ ꓔꓯ ꓢꓲ ꓗꓪ ꓟꓬ ꓠꓬꓲ ꓬꓲꓸ ꓟꓸ ꓟꓲꓽ ꓠꓯꓸ ꓡꓰ ꓝꓲ_ ꓟ꓾ ꓖꓳ ꓟ ꓡꓰ ꓟꓽ ꓞꓲ ꓪꓴ-ꓢ ꓟꓸ ꓟꓲꓽ ꓔꓯ ꓬꓲꓸ ꓟꓸ ꓟꓲꓽ ꓠꓯꓸ ꓡꓰ ꓠ ꓠ ꓠꓹ ꓐ ꓡ ꓢꓲ ꓠꓬꓲ ꓡꓲꓽ ꓒꓰꓼ ꓔꓯ ꓥ ꓟꓲ ꓟꓬ ꓠꓬꓲ ꓬꓲꓸ ꓒꓵꓽ ꓐꓯ ꓞꓷꓹ ꓟꓽ ꓓ ꓟ ꓒꓬꓱꓼ ꓡ ꓝꓲ_ ꓟ ꓥ ꓡꓳ= ꓖꓳ ꓟ ꓑꓶ ꓓꓴ ꓡꓲꓽ ꓒꓰꓼ ꓔꓯ ꓣꓱꓽ ꓢꓲ꓾ ꓪꓴ-ꓢ ꓶꓼ ꓓꓳꓽ ꓫꓱꓸ ꓓꓳꓽ ꓔꓯ ꓚ ꓠ ꓗꓹ ꓡꓳ= ꓕꓱ ꓡꓱ ꓪꓴ-ꓢ ꓶꓼ ꓓꓳꓽ ꓫꓱꓸ ꓓꓳꓽ ꓔꓯ ꓣꓱꓽ ꓢꓲ ꓬꓰ ꓠꓬ ꓞꓳ ꓤ ꓡꓲꓽ ꓒꓰꓼ ꓔꓯ ꓥ ꓟꓲ ꓟꓬ ꓠꓬꓲ ꓜꓲ ꓞ ꓟ ꓒꓬꓱꓼ ꓡ ꓝꓲ_ ꓡꓳ=ꓟꓬ ꓠꓬꓲ ꓐꓲ ꓜꓲꓼ ꓡꓰ ꓝꓲ_ ꓡꓳ= ꓢꓲ ꓒ ꓬꓰ-ꓢꓴ ꓐꓰ ꓕꓲ ꓠꓲꓹ ꓕꓲ ꓪꓼ ꓗꓷ ꓡꓰ ꓝꓲ_ ꓡꓳ= ꓖꓳ ꓟ ꓑꓶ ꓓꓴ ꓡꓲꓽ ꓒꓰꓼ ꓠꓯꓼ ꓗꓪ ꓪꓴ-ꓢ ꓶꓼ ꓓꓳꓽ ꓫꓱꓸ ꓓꓳꓽ ꓔꓯ ꓗꓷ ꓢꓲ ꓪꓴ-ꓢ ꓟꓸ ꓟꓲꓽ ꓔꓯ ꓚ_ ꓟ ꓬꓰ ꓠꓬ ꓞꓳ ꓤ ꓠꓲꓹ ꓟ ꓔꓯ ꓟꓬ ꓠꓬꓲ ꓐꓷ ꓠꓬꓲ ꓚꓲ ꓛꓬ ꓙꓵꓻ ꓠꓲꓹ ꓡꓰ ꓐꓰ ꓓꓵꓽ ꓙ ꓛꓲ ꓡꓰ ꓝꓲ ꓢꓲ ꓧꓪꓸ ꓡꓰ ꓟ ꓔꓯ ꓟꓶ ꓡ ꓓꓴ ꓥꓳ ꓐꓰ ꓟꓸ ꓖꓶ ꓡ ꓡꓳ= ꓪꓴ-ꓢ ꓶꓼ ꓓꓳ ꓫꓱꓸ ꓓꓳ ꓐꓯ ꓟ ꓠꓬ ꓟꓽ ꓪ ꓡꓯ ꓘꓳ ꓟꓽ ꓫꓱꓸ ꓡꓯ ꓘꓳ ꓟ꓾ ꓞꓳ ꓫꓵ ꓞꓳ ꓙꓰ ꓐꓰ ꓡꓲꓽ ꓒꓰꓼ ꓠꓯꓼ ꓗꓪ ꓛꓲ ꓡꓰ ꓠ ꓮ ꓕꓯ ꓥ ꓟꓲ ꓢꓯꓼ ꓕꓵꓼ ꓠ ꓗꓹ ꓡꓳ=