ꓞꓲꓽ ꓫꓬˍ ꓟ꓾ ꓪꓽ ꓘꓴˍ ꓟ ꓐꓰ ꓜꓺ ꓚꓲꓸ ꓚꓲ ꓔˍ ꓟ (2) (Dialogue with other Religions)

ꓞꓲꓽ ꓫꓬˍ ꓟ꓾ ꓪꓽ ꓘꓴˍ ꓟ ꓐꓰ ꓜꓺ ꓚꓲꓸ ꓚꓲ ꓔˍ ꓟ (2)

ꓜ-ꓗꓮꓔ ꓐꓯꓹ ꓟ ꓠꓬ ꓫꓸ ꓢꓴ ꓟꓶꓽ ꓢꓴ ꓐꓱ ꓶ ꓠꓲꓹ ꓡꓱꓹ ꓟ 10% ꓗꓶꓹ ꓟ ꓚꓱꓹ ꓥˍ ꓡꓳ= ꓜ-ꓗꓮꓔ ꓐꓯꓹ ꓟ ꓬꓲ ꓟꓸ ꓟꓲꓽ ꓠꓬ ꓞꓲꓽ ꓫꓬꓹ ꓟ ꓟꓬꓱ ꓐꓯꓹ ꓟ ꓬꓲ ꓟꓸ ꓟꓲꓽ ꓥ ꓐꓶ= ꓫꓸ ꓢꓴ ꓟꓶꓽ ꓢꓴ ꓐꓱ ꓶ ꓚꓵꓸ ꓛꓬꓽ ꓒꓴ ꓤꓼ ꓫꓵ ꓤꓼ ꓗꓪ ꓚꓳꓸ ꓠꓲꓹ ꓡꓱ ꓢꓲ ꓗꓶꓹ ꓟ ꓠꓬ ꓚꓵꓸ ꓛꓬꓽ ꓐꓱ ꓶ ꓝꓴꓲꓸ ꓞꓲꓽ ꓫꓬ ꓡꓰ ꓠꓹ ꓟ ꓞꓲꓽ ꓫꓬ ꓩꓴꓹ ꓟ ꓟꓬꓱꓽ ꓥˍ ꓡꓳ ꓐꓰ ꓙꓵ ꓔꓬˍ ꓡꓳ= ꓪꓽ ꓒꓵꓽ ꓟꓶ ꓤꓼ ꓢꓴ ꓠꓬ 2ꓸ5% ꓡꓰ ꓗꓶ ꓠ ꓔ ꓐꓶ= ꓖꓳ ꓡꓰ ꓥˍ ꓟꓲ ꓠꓱꓸ ꓐꓯꓼ ꓗꓪ ꓚꓳ ꓪꓸ ꓟ ꓠꓬ 10% ꓕꓱ ꓡꓰ ꓗꓶ ꓠ ꓔ ꓟ ꓥˍ ꓡꓳ= ꓕꓱ ꓟ ꓔꓶ ꓐꓬꓱ ꓠꓬ ꓮꓸ ꓫꓵꓽ ꓐꓱ ꓶ ꓥˍ ꓡ? ꓐꓯꓹ ꓠꓬ ꓫꓸ ꓢꓴ ꓟꓶꓽ ꓢꓴ ꓔꓯ ꓬꓲ ꓙ ꓔ ꓙ ꓠꓹ ꓟ ꓐꓱ ꓶ ꓥ ꓐꓶ= ꓕꓱ ꓡꓰ ꓜ-ꓗꓮꓔ ꓐꓯꓹ ꓟ ꓫꓸ ꓢꓴ ꓟꓶꓽ ꓢꓴ ꓐꓴ ꓐꓱ ꓶ ꓗꓶꓹ ꓟ ꓕꓱ ꓡꓰ ꓠꓲꓹ ꓡꓱꓹ ꓟ ꓚꓱꓹ ꓠꓬ ꓕꓲꓽ ꓗꓴꓷꓼ ꓐꓰ ꓕꓲꓽ ꓗꓴꓷꓼ ꓕꓲꓽ ꓟꓵꓽ ꓐꓰ ꓕꓲꓽ ꓟꓵꓽ ꓟꓽ ꓪꓽ ꓡꓯꓽ ꓘꓳˍ ꓟ ꓙꓳˍꓡꓳ ꓐꓰ ꓐꓯˍ ꓡꓳ= ꓑ-ꓗꓲ-ꓢ-ꓔꓮꓠ ꓗꓴꓷꓼ ꓗꓪ ꓠꓬ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓡꓰ ꓖꓳꓹ ꓟ ꓬꓲ ꓫꓴꓸ ꓐꓶ ꓠꓬꓲ ꓔ ꓟ ꓠꓯꓸꓼ ꓗꓪ ꓕꓲꓽ ꓪꓼ ꓖꓳˍ ꓟ ꓙꓳˍ ꓡꓳ= ꓞꓳ ꓘꓹ ꓗꓪ ꓠꓬ ꓜꓽ ꓪꓳ ꓡꓳꓸ ꓪꓳ ꓢꓲꓹ ꓢꓷꓽ ꓡꓳ ꓢꓷꓽ ꓕꓱ ꓡꓲꓹ ꓫꓵꓽ ꓥˍ ꓟꓲ ꓖꓳˍ ꓡꓳ= ꓠꓽ 5 ꓠꓬꓲ ꓟ ꓕꓲꓽ ꓠꓬꓲ ꓗꓪ ꓠꓬ ꓟꓳꓹ ꓡꓳ ꓔꓯꓹ ꓫꓵ ꓪꓽ ꓘꓴ ꓙꓵ ꓓꓳ ꓡꓰ ꓠꓬ ꓫꓸ ꓢꓴ ꓟꓶ ꓢꓴ ꓔꓯ ꓖꓶꓽ ꓜꓽ ꓠꓹ ꓟ ꓖꓶꓽ ꓓꓳ ꓠꓹ ꓟ ꓐꓱ ꓶ ꓙꓽ ꓖꓶ ꓠ ꓗˍ ꓡꓳ= ꓮꓽ ꓟ ꓥˍ ꓟꓲ ꓫꓸ ꓢꓴ ꓟꓶꓽ ꓢꓴ ꓔꓯ ꓜꓽ ꓓꓴ ꓓꓳ ꓓꓴ ꓖꓶꓽ ꓙꓵ ꓥ= ꓠꓬꓲꓸ ꓠꓬꓲ ꓕꓲꓽ ꓞꓲꓼ ꓗꓪ ꓠꓬ ꓪꓴꓽ ꓡ ꓟꓴ ꓡ ꓚꓱꓹ ꓠꓯꓸꓼ ꓗꓪ ꓬꓰꓹ ꓟ ꓟꓴ-ꓢ-ꓡꓲꓟ ꓪꓴꓽ ꓡ ꓟꓴ ꓡ ꓜꓴ ꓮꓽ ꓟꓬ ꓕꓱ ꓡꓰ ꓙꓳˍ ꓡꓳ= ꓕꓱ ꓟ ꓜꓴ ꓠꓯꓸꓼ ꓗꓪ ꓣꓳꓽ ꓠꓲꓹ ꓡꓱ ꓠꓲꓹ ꓫꓵˍ ꓟ ꓒꓴ ꓔꓯ ꓮ ꓕꓯꓽ ꓥˍ ꓟꓲ ꓗꓶ ꓐ ꓡꓹ ꓡꓳ= ꓕꓱ ꓡꓰ ꓠꓲꓹ ꓡꓱ ꓢꓲ ꓗꓶꓹ ꓟ ꓠꓬ ꓚꓵꓸ ꓛꓬꓽ ꓠꓲꓹ ꓟ ꓗꓪ ꓐꓰ ꓗꓶꓹ ꓟ ꓟꓽ ꓥ= ꓪꓴ-ꓢ ꓐꓯ ꓘꓶꓽ ꓔꓯ ꓠ ꓠꓹ ꓔ ꓟ ꓥˍ ꓡꓳ= ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳꓹ ꓟ ꓥˍ ꓡꓳ= ꓮ-ꓡ ꓪꓴ-ꓢ ꓡꓰ ꓓꓰꓽ ꓔ ꓟ ꓙꓳˍ ꓡꓳ= ꓪꓴ-ꓢ ꓟꓬꓱꓽ ꓟꓯꓹ ꓟ ꓪꓴꓸ ꓠꓬꓲ ꓪꓽ ꓘꓴꓹ ꓟ ꓠꓯꓸꓼ ꓗꓪ ꓢꓯꓼ ꓕꓵꓼ ꓔꓬˍ ꓟ ꓪꓴ ꓠꓬꓲ ꓥꓪ ꓠꓬ ꓗꓶ ꓟꓽ ꓛꓲ ꓐꓯˍ ꓟ ꓟꓽ ꓙꓳ= ꓮꓽ ꓙꓵꓽ ꓢꓴ ꓗꓶ ꓠ ꓡꓳꓼ ꓥ= ꓮꓽ ꓟ ꓥˍ ꓟꓲ ꓜ- ꓗꓮꓔ ꓐꓯꓹ ꓟ 10% ꓔꓯ ꓗꓶ ꓠ ꓡꓳꓼ ꓥ= 10% ꓔꓯ ꓟꓽ ꓗꓶ ꓗꓶ ꓡꓲꓹ ꓙꓰ ꓐ ꓡꓹ ꓟ ꓮꓽ ꓟ ꓥˍ ꓟꓲ ꓟꓽ ꓙꓳ= 

ꓣ-ꓟꓶ-ꓓꓮꓠ ꓐꓯꓹ ꓟ ꓜꓺ ꓚꓲꓸ ꓚꓲꓸ ꓙꓵ ꓖꓳ ꓕꓲꓽ ꓙꓵꓹ ꓗꓪ ꓠꓬ ꓜꓺ ꓚꓲꓸ ꓚꓲꓸ ꓢꓲ ꓪꓽ ꓘꓴˍ ꓟ ꓠꓬ ꓮ-ꓡ ꓪꓴ-ꓢ ꓡꓰ ꓦ ꓐꓱꓽ ꓟꓳ ꓖꓶ ꓡꓹ ꓟ ꓗꓪ ꓐꓰ ꓢꓲꓽ ꓫꓬ ꓕꓳꓽ ꓶ ꓔꓯ ꓣꓴ ꓟꓶˍ ꓟ ꓖꓳ ꓟ ꓔꓯ ꓓꓵꓽ ꓙ ꓚꓲ ꓠꓹ ꓟ ꓐꓱ ꓶ ꓥˍ ꓡꓳ= ꓪꓴ-ꓢ ꓔꓯ ꓫꓸ ꓟꓳ ꓐꓯꓹ ꓟ ꓥˍ ꓡꓳ= ꓠꓬꓲꓽ ꓟ ꓕꓲꓽ ꓟ ꓠꓬ ꓚꓵꓸ ꓛꓬꓽ ꓞꓲꓼ ꓔꓯ ꓓꓵꓽ ꓙꓽ ꓢꓲ ꓜꓺ ꓚꓲꓸ ꓚꓲꓸ ꓔ ꓟ ꓥˍ ꓡꓳ= 3ꓸ ꓕꓲꓽ ꓠꓲꓹ ꓕꓲꓽ ꓪꓼ ꓪꓽ ꓘꓴ ꓐ ꓡ ꓠꓹ ꓟ ꓬꓰꓹ ꓟ ꓥˍ ꓡꓳ= 4ꓸ ꓕꓱ ꓡꓰ ꓜꓺ ꓚꓲꓸ ꓚꓲꓸ ꓔ ꓟ ꓙꓵꓹ ꓔꓶ ꓔ ꓟ ꓠꓬ ꓢꓲꓽ ꓫꓬˍ ꓟ ꓙꓵ ꓐꓯꓹ ꓟ ꓕꓱ ꓡꓰ ꓔꓶ ꓔ ꓟ ꓥ ꓪ= 5ꓸ ꓮ-ꓡ ꓪꓴ-ꓢ ꓟꓲꓽ ꓙꓬꓽ ꓗꓪ ꓚꓵꓸ ꓛꓬꓽ ꓝꓴꓲꓸ ꓔꓯ ꓓꓵꓽ ꓙꓽ ꓢꓲ ꓠꓲꓹ ꓟ ꓒꓳꓹ ꓡꓰꓼˍ ꓟ ꓛꓲ ꓡꓹ ꓙꓵ ꓗꓪ ꓥˍ ꓟꓲ ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓓꓴ ꓥꓳꓻ ꓐꓰ ꓐꓯ ꓞꓲꓹ ꓔ ꓟ ꓚꓱꓹ ꓥˍ ꓡꓳ= 6ꓸ ꓜꓺ ꓚꓲꓸ ꓚꓲꓸ ꓔ ꓟ ꓠꓬ ꓟꓲ ꓠꓯ ꓗꓪ ꓫꓸ ꓙꓲ ꓟꓶ ꓙꓲ ꓓꓴ ꓔꓳꓹ ꓜꓳꓽ ꓔꓬ ꓢꓴ ꓮꓽ ꓟꓬꓹ ꓙꓳˍ ꓡꓳ ꓐꓯꓹ ꓟ ꓔꓯ ꓓꓵꓽ ꓙ ꓛꓲ ꓠꓹ ꓟ ꓐꓱ ꓶꓽ ꓥˍ ꓡꓳ= ꓣ-ꓟꓶ- ꓓꓮꓠ ꓜꓺ ꓚꓲꓸ ꓚꓲꓸ ꓔ ꓟ ꓙꓵꓹ ꓗꓪ ꓠꓬ ꓠꓯꓼ ꓠꓯꓼ ꓟꓶꓽ ꓕꓯꓽ ꓟꓽ ꓡꓯꓽ ꓡꓹ ꓢꓰꓼ ꓕꓯ ꓡꓰ ꓜꓺ ꓜꓽ ꓠ ꓡꓳꓼ ꓥ= ꓖꓳ ꓡꓰ ꓢꓲ ꓟꓶꓽ ꓘꓶꓼ ꓟꓶꓽ ꓟꓲ ꓓꓵ ꓡꓰ ꓗꓪ ꓛꓲ ꓜꓺ ꓚꓵꓸ ꓚꓵꓸ ꓠ ꓡꓳꓼ ꓥ= ꓜꓺ ꓚꓲꓸ ꓚꓲꓸ ꓔ ꓟ ꓕꓲꓽ ꓦꓬ ꓡꓱꓼ ꓗꓪ ꓮꓸ ꓫꓵꓽ ꓥˍ ꓟꓲ ꓜꓽ ꓟꓽ ꓓ= ꓖꓳ ꓟ ꓡꓰ ꓟꓽ ꓞꓲ ꓤꓽ ꓑꓸ ꓤꓼ ꓐꓰ ꓤ ꓟꓶꓼ ꓤꓼ ꓧꓪꓽ ꓗꓳ ꓓꓱꓽ ꓐꓯꓹ ꓡꓯꓽ ꓘꓳˍ ꓟ ꓕꓲꓽ ꓦꓲ ꓢꓴ ꓧꓪꓽ ꓗꓳ ꓓꓱꓽ ꓐꓯꓹ ꓡꓯꓽ ꓘꓳˍ ꓟ ꓕꓱ ꓡꓲꓳ ꓫꓵꓽ ꓥˍ ꓟꓲ ꓬꓰ ꓟꓽ ꓓ= ꓖꓳ ꓟ ꓪꓴꓸ ꓠꓬꓲ ꓠꓲ ꓟꓴ-ꓢ-ꓡꓲꓟ ꓐꓴ ꓠꓬ ꓜꓺ ꓚꓲꓸ ꓚꓲꓸ ꓔ ꓟ ꓙꓵꓹ ꓗꓪ ꓠꓯꓼ ꓠꓯꓼ ꓟꓶꓽ ꓕꓯꓽ ꓟꓽ ꓡꓯꓽ ꓡꓹ ꓢꓰ ꓕꓯꓽ ꓡꓰ ꓜꓺ ꓜꓽ ꓠ ꓗˍ ꓡꓳ= ꓟꓴ-ꓢ-ꓡꓲꓟ ꓐꓴ ꓠꓬ ꓢꓲꓽ ꓫꓬ ꓕꓳꓽ ꓶ ꓔꓯ 5 ꓣꓳ 10 ꓣꓳ ꓕꓱ ꓡꓰ ꓬꓲ ꓜꓴ ꓬꓲ ꓟꓯꓼ ꓤꓹ ꓤꓼ ꓕꓱ ꓡꓰ ꓬꓰ ꓢꓲ ꓗꓳ-ꓣꓮꓠ ꓢꓲꓽ ꓫꓬ ꓕꓳꓽ ꓶ ꓔꓯ ꓵ ꓢꓲ ꓢꓳꓹ ꓟ꓾ ꓔꓱꓹ ꓕꓽ ꓠꓬꓲꓹ ꓟ ꓕꓱ ꓡꓰ ꓬꓰˍ ꓟ ꓥˍ ꓡꓳ= ꓢꓲꓽ ꓫꓬ ꓕꓳꓽ ꓶ ꓔꓯ ꓕꓲꓽ ꓠꓲꓹ ꓕꓲꓽ ꓪꓼ ꓥˍ ꓟꓲ ꓵˍ ꓟ ꓬꓰˍ ꓡꓳ=

ꓣ-ꓟꓶ-ꓓꓮꓠ ꓐꓯꓹ ꓟ ꓜꓺ ꓚꓲꓸ ꓚꓲꓸ ꓔ ꓟ ꓬꓲ ꓟꓶꓽ ꓕꓲꓽ ꓫꓵꓽ ꓠꓽ ꓗꓪ ꓠꓬ ꓟꓴ-ꓢ-ꓡꓲꓟ ꓐꓴ ꓐꓱ ꓶ ꓢꓲꓽ ꓫꓬꓹ ꓟ ꓠꓽ ꓦꓬꓼ ꓠꓬꓲ ꓥˍ ꓡꓳ= ꓟꓬꓽ ꓠꓬꓲ ꓐꓶꓹ ꓠꓬꓲ ꓣ-ꓟꓶ-ꓓꓮꓠ ꓜꓺ ꓚꓲꓸ ꓚꓲꓸ ꓔ ꓟ ꓖꓳ ꓕꓲꓽ ꓦ 23 ꓠꓬꓲꓹ 25ꓹ 27 ꓠꓬꓲ ꓗꓪ ꓠꓬ ꓕꓲꓽ ꓢ ꓘꓪ ꓪꓽ ꓘꓴ ꓦꓲ ꓑ-ꓡꓲ ꓥꓹ ꓠꓬ ꓟꓳ-ꓢꓲ ꓗꓪ ꓪꓽ ꓘꓴꓹ ꓟ ꓬꓰˍ ꓡꓳ= ꓮ ꓡꓲꓳꓹ ꓐꓯ ꓠꓬ ꓖꓳ ꓕꓲ ꓠꓬꓲ ꓖꓳ ꓕꓲ ꓙꓵꓹ ꓗꓪ ꓚꓬꓴꓹ ꓢꓲꓺ ꓒꓽ ꓬꓯꓼ ꓡ ꓥꓳ ꓐꓰ ꓕꓱ ꓡꓰ ꓙꓵ ꓔꓬꓹ ꓟ ꓪꓴꓸ ꓠꓬꓲ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓕꓲꓽ ꓢ ꓘꓪ ꓡꓱꓸꓼ ꓧꓪꓸ ꓛꓲꓽ ꓢꓶꓸ ꓪꓽ ꓘꓴ ꓔꓬꓹ ꓟ ꓥ ꓪ= ꓣ-ꓟꓶ ꓓꓮꓠ ꓐꓯꓹ ꓟ ꓜꓺ ꓚꓲꓸ ꓚꓲꓸ ꓔ ꓟ ꓬꓲ ꓟꓶꓽ ꓕꓲꓽ ꓠꓬꓲ ꓗꓪ ꓠꓬ ꓦꓲꓼ ꓘꓳꓼ ꓑꓮꓲ ꓐꓯꓹ ꓟ ꓗꓳꓸ ꓙꓲꓹ ꓟ ꓑꓮꓲ ꓔꓯ ꓬꓰꓹ ꓟ ꓥ ꓪ= ꓖꓳ ꓕꓲꓽ ꓠꓬꓲ ꓗꓪ ꓠꓬ ꓞꓳ ꓜꓴ ꓞꓳ ꓟꓯꓼ ꓡꓰ ꓥˍ ꓠꓬ ꓚꓵꓸ ꓛꓬꓽ ꓕꓲꓽ ꓦꓲ ꓢꓴ ꓡꓰ ꓢꓴ ꓔꓯ ꓖꓶꓽ ꓜꓽ ꓖꓶꓽ ꓓꓳꓹ ꓟ ꓕꓱ ꓡꓲꓳꓹ ꓫꓵꓽ ꓑꓮꓲ ꓔꓯ ꓬꓰˍ ꓡꓳ= ꓟꓴ-ꓢ-ꓡꓲꓟ ꓐꓴ ꓐꓱ ꓶ ꓓꓽ ꓪꓴꓸ ꓕꓲꓽ ꓦ ꓐꓯꓹ ꓟ ꓮ-ꓫꓴ-ꓣ ꓦ ꓗꓪ ꓟ 10 ꓠꓬꓲ ꓕꓯ ꓜꓽ ꓚꓲꓸ ꓚꓲꓸ ꓢꓶꓸ ꓪꓽ ꓘꓴˍ ꓟ ꓬꓰˍ ꓡꓳ= ꓮ-ꓫꓴ-ꓣ ꓐꓯꓹ ꓟ ꓖꓳ ꓕꓲꓽ ꓠꓬ ꓬꓲ-ꓢꓷ-ꓡꓲꓼ ꓐꓴ ꓮꓔꓳꓠꓰꓟꓰꓠꓔ ꓐꓯꓹ ꓟ ꓑꓮꓲ ꓐꓰ ꓪꓽ ꓡꓯꓽ ꓘꓳˍ ꓡꓳ= ꓖꓳ ꓕꓲꓽ ꓠꓬꓲ ꓠꓬ ꓪꓴ-ꓢ ꓠꓬ ꓟꓴꓽ ꓗꓪ ꓐꓰ ꓟꓲ ꓠꓯ ꓔꓯ ꓚꓰꓼ ꓔ ꓟ ꓦꓬꓼ ꓠꓬꓲ ꓥˍ ꓡꓳ ꓐꓰ ꓕꓱ ꓡꓰ ꓙꓵ ꓔꓬˍ ꓡꓳ= ꓖꓳ ꓕꓲꓽ ꓠꓬꓲ ꓠꓬ ꓠꓳ-ꓪ ꓡꓲ ꓓꓽ ꓟ ꓠꓬ ꓬꓲ ꓙꓬ ꓢꓲꓼ ꓡꓰ ꓢꓲ ꓪꓽ ꓚꓵ ꓗꓪ ꓚꓰꓹ ꓡꓰꓹ ꓟ ꓦꓬꓼ ꓠꓬꓲ ꓥˍ ꓡꓳ ꓐꓰ ꓕꓱ ꓡꓰ ꓙꓵ ꓔꓬꓹ ꓟ ꓥˍ ꓡꓳ=  ꓫꓲ-ꓬ ꓟꓴ-ꓢ-ꓡꓲꓟ ꓐꓴ ꓠꓬ ꓬꓲ ꓪꓽ ꓧꓳꓽ ꓣꓱ ꓢꓴ ꓧꓴ-ꓢꓲꓠ ꓠꓬ ꓫꓸ ꓙꓵ ꓟꓶꓽ ꓙꓵ ꓓꓴ ꓔꓳꓹ ꓜꓳꓽ ꓢꓲ ꓫꓵ ꓙꓹ ꓟ ꓦꓬꓼ ꓠꓬꓲ ꓥˍ ꓡꓳ ꓐꓰ ꓕꓱ ꓡꓰ ꓙꓵ ꓔꓬꓹ ꓟ ꓥˍ ꓡꓳ=                                                                                                       

Add new comment

6 + 14 =