ꓞꓲꓽ ꓫꓬꓹ ꓟ꓾ ꓪꓽ ꓘꓴˍ ꓟ ꓐꓰ ꓜ ꓚꓵꓸ ꓚꓵꓸ ꓔ ꓟ (Dialogue with other Religions)

ꓲ-ꓢ-ꓡꓮꓟ ꓙꓵ ꓠꓲꓹ ꓔꓯ ꓙꓵ ꓔꓬꓹ ꓢꓴ ꓟꓴ-ꓢ-ꓡꓲꓟ ꓐꓴ ꓠꓬ ꓞꓲꓽ ꓫꓬˍ ꓟ ꓟꓬꓱꓽ ꓬꓰ ꓠ ꓡꓳꓹ ꓥ= ꓪꓽ ꓘꓴ ꓙꓵꓹ ꓠꓯꓸꓼ ꓗꓪ ꓙꓵꓹ ꓕꓯ ꓢꓲꓽ ꓫꓬˍ ꓟ ꓟꓬꓱꓽ ꓕꓯ ꓬꓰ ꓠ ꓡꓳꓹ ꓥ= ꓟꓴ-ꓢ-ꓡꓲꓟ ꓐꓴ ꓬꓲ ꓪꓽ ꓪꓽ ꓘꓴ ꓦꓲ ꓑꓶ-ꓡꓲ ꓥ ꓠꓬ ꓟꓳ-ꓢꓲ ꓐꓯꓹ ꓟ ꓠꓯꓸꓼ ꓗꓪ ꓓꓵ ꓓꓴ ꓬꓰꓹ ꓕꓯ ꓡꓯ ꓔꓳꓹ ꓗꓪ ꓛꓲ ꓬꓲꓺ ꓙꓬ ꓞꓲꓽ ꓠ ꓡꓳꓹ ꓥ= ꓒꓬꓱꓽ ꓟꓬ ꓔꓯ ꓥˍ ꓟꓲ ꓞꓲꓽ ꓠ ꓡꓳꓹ ꓥ= ꓒꓬꓱꓽ ꓟꓬ ꓔꓯ ꓞꓲꓽˍ ꓕꓯ ꓟꓬꓽ ꓠꓬꓲ ꓐꓶꓹ ꓠꓬꓲ ꓟꓬ ꓢꓷꓽ ꓠ ꓘꓵ ꓐꓰ ꓟꓷꓽ ꓠꓷꓹ ꓔꓯ ꓮꓽ ꓙꓬ ꓐꓰ ꓞꓲꓽ ꓠ ꓡꓳ ꓥ= ꓛꓳ ꓒꓯꓹ ꓔꓯ ꓥˍ ꓟꓲ ꓮ ꓙꓬꓹ ꓐꓰ ꓞꓲꓽ ꓠ ꓡꓳꓹ ꓥ= ꓤꓽ ꓑꓸ ꓤꓼ ꓐꓰ ꓤꓽ ꓟꓶꓼ ꓤꓼ ꓧꓪꓽ ꓗꓳ ꓓꓱꓽ ꓐꓯꓹ ꓡꓯꓽ ꓘꓳˍ ꓟ ꓬꓰ ꓢꓴ ꓟꓽ ꓢꓲꓽ ꓟꓽ ꓫꓬˍ ꓟ ꓙꓶꓽ ꓤꓼ ꓟ ꓞꓲ ꓔꓯ ꓜꓱꓽ ꓢꓴ ꓮꓽ ꓟ ꓥˍ ꓟꓲ ꓐꓲ ꓜꓲꓼˍ ꓟ ꓞꓲꓽ ꓫꓬꓹ ꓟ ꓟꓬꓱꓽ ꓔꓯ ꓬꓰ ꓠ ꓡꓳꓹ ꓥ= ꓐꓲ ꓜꓲꓼˍ ꓟ ꓞꓲꓽ ꓫꓬꓹ ꓟ ꓟꓬꓱꓽ ꓐꓯꓹ ꓟ ꓠꓬ ꓕꓲꓽ ꓗꓳ ꓓꓱꓽ ꓡꓱꓸꓼ ꓬꓲꓺ ꓙꓬ ꓞꓲꓽˍ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓔꓱ ꓡꓰ ꓞꓲꓽ ꓫꓬˍ ꓟ ꓟꓬꓱꓽ ꓬꓰˍ ꓟ ꓬꓲ ꓟꓸ ꓟꓲ ꓠꓬ ꓚꓵꓸ ꓚꓬꓽ ꓠꓲꓹ ꓟ ꓐꓰ ꓦ ꓔꓯ ꓞꓲꓽ ꓫꓬ ꓡꓰ ꓝꓲˍ ꓟ ꓥ ꓢꓲ ꓪꓴ-ꓢ ꓡꓰ ꓙꓽ ꓖꓶ ꓔ ꓟ ꓟꓵꓽ ꓘꓳꓼ ꓡꓰ ꓐꓰ ꓕꓲꓽ ꓡꓰ ꓬꓲ ꓡꓰ ꓚꓰꓼ ꓔ ꓟ ꓟꓵꓽ ꓘꓳꓼ ꓡꓰ ꓐꓰ ꓕꓲꓽ ꓡꓰ ꓪꓽ ꓘꓴˍ ꓟ ꓥˍ ꓡꓳ ꓐꓰ ꓐꓯˍ ꓡꓳ= ꓕꓱ ꓡꓰ ꓞꓲꓽ ꓫꓬˍ ꓟ ꓬꓰˍ ꓟ ꓥˍ ꓟꓲ ꓪꓽ ꓘꓴˍ ꓟ ꓕꓲꓽ ꓫꓵꓽ ꓥˍ ꓡꓳ= ꓪꓽ ꓘꓴ ꓦꓲ ꓑꓶ-ꓡꓲ ꓥ ꓠꓬ ꓟꓳ-ꓢꓲ ꓗꓪ ꓓꓽ ꓪꓴꓸ ꓓꓵꓽ ꓡꓰꓹ ꓕꓯ ꓪꓴ-ꓓꓴ ꓐꓯ ꓕꓲꓽ ꓔꓶꓸ ꓙꓳ ꓡꓳ= ꓖꓳ ꓕꓲꓽ ꓘꓴꓸ ꓗꓪ ꓛꓳ ꓒꓯꓹ ꓡꓯꓽ ꓒꓯꓹ ꓒꓬꓱꓽ ꓟꓬ ꓠꓸ ꓑ ꓗꓪ ꓛꓲ ꓞꓲꓽ ꓠꓬꓲ ꓔ ꓟ ꓬꓲ ꓔꓶ ꓙꓳˍ ꓡꓳ= ꓕꓱ ꓡꓰ ꓪꓴ-ꓓꓴ ꓔꓯ ꓪꓽ ꓘꓴ ꓦꓲ ꓥ ꓕ ꓑꓳꓸ ꓗꓪ ꓫꓬ ꓦꓹ ꓟ ꓥˍ ꓡꓳ=

ꓑꓶ-ꓡꓲ ꓥꓹ ꓠꓬ ꓟꓳ-ꓢꓲ ꓬꓲ ꓘꓴꓽ ꓗꓪ ꓓꓵꓽ ꓡꓰ ꓕꓯꓽ ꓬꓲ ꓔꓶꓸ ꓠꓬꓲꓽ ꓔꓶꓸ ꓙꓳˍ ꓡꓳ= ꓟꓲ-ꓣꓮꓐ ꓐꓯꓹ ꓟ ꓢꓲꓽ ꓫꓬˍ ꓟ ꓟꓯ-ꓗ ꓡꓳ ꓒꓱ ꓕꓲꓽ ꓛꓱꓽ ꓔꓯ ꓢꓲ ꓟꓸ ꓖꓶˍ ꓟ ꓔꓶꓸ ꓟꓲ-ꓐ ꓐꓯꓹ ꓟ ꓠꓽ 5 ꓠꓬꓲ ꓕꓲꓽ ꓦꓬꓼ ꓡꓰ ꓕꓲꓽ ꓦꓬ ꓗꓪ ꓪꓽ ꓘꓴˍ ꓕꓯ ꓟꓸ ꓟꓲ ꓚꓹ ꓟ ꓔꓶꓸ ꓕꓱ 2 ꓟ ꓠꓬ ꓟꓽ ꓓ ꓬꓳꓸ ꓚꓵꓹ ꓟ ꓔꓶꓸ ꓥˍ ꓡꓳ= ꓪꓽ ꓘꓴ ꓙꓵꓹ ꓗꓪ ꓚꓵ ꓠꓲꓹ ꓚꓵ ꓔꓼ ꓢꓧꓳꓢꓰ ꓠꓲ ꓟꓽ ꓓ꓾ ꓓꓱꓼ ꓟꓽ ꓓ꓾ ꓔꓼ  ꓟꓽ ꓓ= ꓙꓵꓽ ꓪꓽ ꓟ ꓙꓳ= ꓮꓽ ꓟ ꓥˍ ꓟꓲ ꓔꓼ ꓟ ꓓ꓾ ꓠꓲ ꓟꓽ ꓓ= ꓪꓽ ꓘꓴ ꓦꓲ ꓘꓴꓽ ꓗꓪ ꓠꓬ ꓘꓳꓽ ꓓꓳ ꓥˍ ꓠꓬ ꓫꓵꓸ ꓑꓱꓸ ꓥˍ ꓠꓬ ꓬꓲ ꓘꓳꓽ ꓓꓴ ꓘꓳꓽ ꓔ ꓡꓳ= ꓪꓽ ꓘꓴ ꓦꓲ ꓘꓴꓽ ꓗꓪ ꓬꓲ ꓐꓬꓱꓽ ꓐꓳ ꓔ ꓟ ꓠꓷꓼ ꓠꓹ ꓟ ꓙꓵ ꓪꓽ ꓟ ꓙꓳ= ꓪꓽ ꓘꓴ ꓦꓲ ꓘꓴꓽ ꓗꓪ ꓠꓬ ꓗꓴ-ꓣꓮꓠ ꓐꓯˍ ꓟ ꓢꓲꓽ ꓫꓬ ꓕꓳꓽ ꓶ ꓝꓲꓸ ꓡꓰ ꓐꓲ ꓫꓵꓽ ꓔ ꓡꓳ= ꓢ-ꓡꓮꓔ ꓐꓯꓹ ꓟ ꓪꓽ ꓘꓴ ꓙꓵꓹ ꓔꓯ ꓪꓴꓸ ꓓꓵ ꓣꓱꓽ ꓢꓴ ꓧꓳꓽ ꓢꓴ ꓔꓯ ꓲ-ꓟꓮꓠ ꓐꓯˍ ꓡꓳ= ꓲ-ꓟꓮꓠ ꓠꓬ ꓞꓳ ꓤꓽ ꓮꓽ ꓙꓵꓽ ꓧꓶꓸ ꓕꓯꓽ ꓗꓪ ꓟꓲ ꓙꓬ ꓢꓲ ꓗꓪ ꓦꓲꓼ ꓔꓬ ꓢꓲ ꓪꓽ ꓘꓴ ꓪꓴꓸ ꓓꓵ ꓧꓳꓽˍ ꓡꓳ= ꓪꓽ ꓘꓴ ꓠꓹ ꓟ ꓡ ꓢꓴ ꓮꓽ ꓟ ꓥˍ ꓟꓲ ꓢꓲꓽ ꓫꓬꓹ ꓟ ꓡꓳ ꓒꓱ ꓟꓯ-ꓗ ꓕꓲꓽ ꓛꓱꓽ ꓔꓯ ꓢꓲ ꓗ-ꓮ-ꓐ ꓐꓯꓹ ꓟ ꓙꓳꓹ ꓕꓲꓽ ꓛꓱꓽ ꓔꓯ ꓢꓲ ꓖꓳ ꓕꓲꓽ ꓛꓱꓽ ꓔꓯ ꓢꓲ ꓒꓳꓹ ꓠ ꓗˍ ꓡꓳ= ꓖꓳ ꓕꓲꓽ ꓛꓱꓽ ꓔꓯ ꓢꓲ ꓒꓳꓹ ꓢꓲ ꓕꓲꓽ ꓝꓯꓸ ꓖꓴ ꓕꓲꓽ ꓝꓯꓸ ꓕꓱ ꓡꓰ ꓦꓲꓼ ꓠ ꓗꓹ ꓡꓳ= ꓬꓲ ꓔꓶꓸ ꓣꓴ ꓠ ꓗꓹ ꓡꓳ= ꓖꓳ ꓟ ꓓꓳ ꓡꓰ ꓠꓬ ꓠꓲ-ꓬꓼ ꓐꓯꓹ ꓟ ꓧꓶꓸ ꓬꓰ ꓠꓬꓲ ꓔ ꓥ= ꓠꓲ-ꓬꓼ ꓐꓯꓹ ꓟ ꓠꓬ ꓩ-ꓔꓲ-ꓧ ꓐꓯꓹ ꓟ ꓗꓳ-ꓣꓮꓠ ꓢꓲꓽ ꓫꓬ ꓕꓳꓽ ꓶ ꓔꓯ ꓧꓶꓸ ꓕꓯ ꓗꓪ ꓟ ꓓꓽ ꓪꓴꓸ ꓕꓲꓽ ꓕꓱ ꓔꓯ ꓐꓯꓹ ꓟ ꓥ ꓪ= ꓖꓳ ꓟ ꓮꓽ ꓙꓵꓽ ꓔꓯ ꓬꓲ ꓢꓯꓸꓼ ꓟꓽ ꓓꓳ ꓓꓳ ꓠꓲꓹ ꓟ ꓗꓪ ꓐꓰ ꓵ ꓠ ꓡꓳꓹ ꓥ=

ꓪꓽ ꓘꓴ ꓙꓵꓹ ꓔꓯ ꓮꓽ ꓟꓬꓹ ꓝꓸ ꓕꓱ ꓡꓰ ꓘꓶꓽ ꓔ ꓟ ꓙꓳ ꓐꓶ= ꓕꓲꓽ ꓝꓸ ꓖꓴ ꓕꓲꓽ ꓝꓸ ꓔꓯ ꓪꓴꓸ ꓔꓴˍ ꓕꓯ ꓮ-ꓡ-ꓧꓴ ꓮ ꓘꓶ ꓐ ꓕꓱ ꓡꓰ ꓐꓯ ꓠ ꓗˍ ꓡꓳ= ꓪꓽ ꓘꓴꓹ ꓕꓯ ꓥꓶꓼ ꓫꓵ ꓥˍ ꓠꓬ ꓟꓬ ꓗꓷꓽ ꓫꓵ ꓥˍ ꓠꓬ ꓠ ꓖꓼ ꓾ ꓛꓵ ꓝꓲꓹ ꓐꓰ ꓡꓯꓽ ꓒꓯꓹ ꓕꓯ ꓘꓳꓽ ꓦꓹ ꓟ ꓘꓳꓽ ꓓꓳ ꓗꓪ ꓛꓲ ꓠꓷꓼ ꓡꓰ ꓠ ꓬꓰ ꓠ ꓗˍ ꓡꓳ= ꓕꓱ ꓡꓰ ꓬꓰꓹ ꓟ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓠ ꓠꓹ ꓔꓯ ꓟ꓾ ꓚꓵꓸ ꓛꓬꓽ ꓕꓲꓽ ꓞꓲꓹ ꓡꓱꓸꓼ ꓔꓯ ꓪꓴ-ꓢ ꓠꓯꓸꓼ ꓗꓪ ꓡꓯꓼ ꓙꓱˍ ꓟ ꓣꓱꓽ ꓙˍ ꓟ ꓠꓲꓹ ꓟ ꓙꓳˍ ꓟ ꓐꓯˍ ꓟ ꓬꓲ ꓢꓷꓸ ꓡꓰ ꓓꓴ ꓥˍ ꓡꓳ= ꓖꓳ ꓟ ꓡꓰ ꓟꓽ ꓞꓲ ꓪꓴ-ꓢ ꓫꓱ ꓤꓼˍ ꓟ ꓔꓯ ꓮ ꓕꓯ ꓥˍ ꓟꓲ ꓥꓳ ꓡꓳꓸ ꓔ ꓟ ꓬꓲ ꓢꓷꓸ ꓡꓰ ꓓꓴ ꓥˍ ꓡꓳ= ꓪꓽ ꓘꓴ ꓙꓵꓹ ꓦ ꓥ ꓗꓪ ꓢꓲꓽ ꓫꓬꓹ ꓟ ꓔꓶꓸ ꓟꓯ-ꓗ ꓡꓳ ꓒꓱ ꓕꓲꓽ ꓛꓱꓽ ꓔꓯ ꓢꓲ ꓮ ꓕꓯꓽ ꓥˍ ꓟꓲ ꓒꓳꓹ ꓢꓲ ꓪꓽ ꓘꓴ ꓠ ꓗˍ ꓡꓳ= ꓖꓳ ꓟ ꓑꓶꓸ ꓓꓴ ꓠꓲ ꓗ-ꓮ-ꓐ ꓠꓬ ꓟꓴ-ꓢ-ꓡꓲꓟ ꓐꓴ ꓪꓽ ꓡꓯꓽ ꓘꓳ ꓫꓱꓹ ꓡꓯꓽ ꓘꓳˍ ꓟ ꓕꓲꓽ ꓠꓲꓹ ꓟ ꓡꓰ ꓥˍ ꓟ ꓬꓲ ꓢꓓꓸ ꓡꓰ ꓓꓴ ꓬꓲ ꓢꓷꓸ ꓡꓰ ꓓꓴ ꓕꓲꓽ ꓟ ꓗꓷꓹ ꓓꓴ ꓟ ꓥ ꓪ= ꓤꓽ ꓑ ꓤꓼ ꓐꓴ ꓠꓬ ꓑꓶ-ꓡꓲ ꓥ ꓹ ꓠꓬ ꓟꓳ-ꓢꓲ ꓘꓴꓽ ꓗꓪ ꓮꓽ ꓙꓵꓽ ꓕꓲꓽ ꓠꓲꓹ ꓕꓲꓽ ꓪꓼ ꓖꓳ ꓡꓰ ꓪꓽ ꓘꓴꓹ ꓟ ꓥ ꓪ= ꓖꓳ ꓡꓰ ꓢꓲ ꓠꓬꓲ ꓟꓸ ꓟꓲ ꓚꓹ ꓟ ꓔꓯ ꓥˍ ꓟꓲ ꓠ ꓠꓹ ꓔ ꓡꓳ= ꓟꓬꓽ ꓠꓬꓲ ꓐꓶꓹ ꓠꓬꓲ ꓠꓽ 5 ꓠꓬꓲ ꓕꓯ ꓕꓲꓽ ꓟꓽ ꓙꓳ ꓪꓽ ꓘꓴ ꓦꓲ ꓗꓪ ꓙꓵ ꓠ ꓗˍ ꓡꓳ= ꓤꓽ ꓟꓶꓼ ꓤꓼ ꓐꓴ ꓠꓬ ꓟꓽ ꓙꓵ ꓟꓽ ꓓ ꓐꓯꓹ ꓟ ꓶ ꓟ ꓙꓳ=