ꓞꓳ ꓤꓽ ꓕꓲꓽ ꓣꓳ ꓪ ꓙꓵꓽ ꓪꓽ

ꓘꓴ ꓜꓲꓼ ꓞꓳ ꓡꓰ ꓟꓸ ꓖꓶꓽ ꓡꓹ ꓟ ꓠꓯꓸꓼ ꓗꓪ ꓞꓳ ꓤꓽ ꓐꓯꓹ ꓟ ꓠꓬ ꓪꓴ-ꓢ ꓒꓬꓱꓽ ꓡꓰꓽ ꓐꓰ ꓪꓽ ꓠ ꓚꓰꓼ ꓔ ꓟ ꓪꓴꓸ ꓠꓬꓲ ꓠꓲ ꓞꓳ ꓤꓽ ꓕꓲꓽ ꓣꓳ ꓪ ꓙꓵꓽ ꓪꓽ ꓥˍ ꓟꓲ ꓞꓳ ꓤꓽ ꓟꓬꓱ ꓓꓳꓽ ꓐꓰ ꓕꓲꓽ ꓪꓼ ꓫꓶꓸ ꓡꓹ ꓟ ꓥ ꓡꓳ꓾ ꓕꓲꓽ ꓪꓼ ꓙꓳꓹ ꓡˍ ꓟ ꓥˍ ꓡꓳꓻ ꓐꓰ ꓕꓱ ꓡꓲ ꓟꓸ ꓖꓶꓽ ꓡꓹ ꓡꓳ= ꓞꓳ ꓤꓽ ꓟꓬꓱ ꓓꓳꓽ ꓠꓬ ꓪꓴ-ꓢ ꓠꓯꓸꓼ ꓗꓪ ꓐꓰ ꓡꓹ ꓟ ꓥꓹ ꓟ ꓑꓶꓸ ꓓꓴ ꓠꓲ ꓞꓳ ꓤꓽ ꓕꓲꓽ ꓣꓳ ꓪ ꓙꓵꓽ ꓪꓽ ꓥˍ ꓟꓲ ꓪꓴ-ꓢ ꓗꓪ ꓐꓰ ꓡꓹ ꓟ ꓥˍ ꓡꓳ= ꓖꓳ ꓟ ꓑꓶꓸ ꓓꓴ ꓠꓲ ꓞꓳ ꓤꓽ ꓕꓲꓽ ꓣꓳ ꓪ ꓙꓵꓽ ꓪꓽ ꓐꓯ ꓟ ꓠꓬ ꓞꓳ ꓤꓽ ꓬꓲ ꓜꓴ ꓬꓲ ꓟꓯꓼ ꓙꓳ ꓟ ꓑꓶꓸ ꓓꓴ ꓠꓲ ꓪ ꓡꓹ ꓟ ꓟꓽ ꓥ= ꓙꓵꓽ ꓚꓱꓹ ꓑꓶꓸ ꓓꓴ ꓠꓲ ꓪ ꓡ ꓟˍ ꓟꓲ ꓟꓽ ꓥ= ꓶ ꓡꓯꓼ ꓟꓴ ꓢꓲ ꓪꓴꓽ ꓡ ꓟꓴ ꓡ ꓟ ꓑꓶꓸ ꓓꓴ ꓠꓲ ꓪ ꓡ ꓟˍ ꓟꓲ ꓟꓽ ꓥ= ꓕꓲꓽ ꓝꓸ ꓡꓲ ꓔꓲ ꓝꓸ ꓬꓲ ꓢꓲ ꓪ ꓡ ꓟˍ ꓟꓲ ꓟꓽ ꓥ= ꓣꓳꓽ ꓛꓱꓽ ꓟꓳ ꓕꓲꓽ ꓠꓬꓲꓹ ꓚꓳˍ ꓡꓰ ꓪꓴ-ꓢ ꓡꓰꓽ ꓖꓶꓽ ꓔ ꓟ ꓪ ꓙꓵꓽ ꓪꓽ ꓥ- ꓡꓳ= ꓗꓴꓷꓼ ꓙꓵꓽ ꓚꓱꓹ ꓞꓳ ꓙꓳ ꓢꓯ ꓔꓬ ꓚꓱꓹ ꓶ ꓡꓯꓼ ꓟꓴ ꓚꓱꓹ ꓕꓱ ꓟ ꓠꓬ ꓣꓳ ꓞꓳ ꓤꓽ ꓪ ꓙꓵꓽ ꓪꓽ ꓔꓯ ꓖꓶꓽ ꓔꓬ ꓟ ꓟꓽ ꓥ= ꓣꓳ ꓪ ꓠꓲ ꓫꓵꓹ ꓟ ꓣꓳ ꓓꓲꓽ ꓔꓬ ꓟ ꓓꓰꓟꓳꓚꓣAꓚꓬ Cꓱꓹ ꓥˍ ꓟꓲ ꓞꓳ ꓤꓽ ꓪ ꓙꓵꓽ ꓪꓽ ꓔꓯ ꓒꓬꓱꓼ ꓡ ꓠ ꓬꓲ ꓖꓶˍ ꓟ ꓟꓽ ꓥ= ꓞꓳ ꓤꓽ ꓕꓲꓽ ꓣꓳ ꓪ ꓙꓵ ꓪ ꓠꓬ ꓞꓳ ꓤꓽ ꓬꓲ ꓕꓲꓽ ꓤꓶ ꓡꓱꓸꓼ ꓬꓲ ꓟꓬꓱ ꓓꓳꓽ ꓐꓰ ꓕꓲꓽ ꓪꓼ ꓓꓳ ꓡꓹ ꓟ ꓒꓬꓱꓼ ꓡꓹ ꓟ ꓥˍ ꓡꓳ= ꓓꓰꓟꓳꓚꓣꓮꓚꓬ ꓔꓯ ꓮꓽ ꓘꓶꓸ ꓠꓵ ꓢꓲ ꓠꓲꓬꓲ ꓮꓽ ꓘꓶꓸ ꓪ ꓠꓲꓹ ꓫꓵ ꓢꓲ ꓠꓬꓲ ꓪ ꓠꓹ ꓟ ꓢꓯꓼ ꓕꓵꓹ ꓟ ꓠꓬ ꓕꓱ ꓟ ꓙꓵꓽ ꓚꓱꓹ ꓕꓱ ꓕꓲ ꓟ ꓗꓪ ꓐꓰ ꓞꓳ ꓤꓽ ꓟꓬꓱ ꓓꓳꓽ ꓐꓯˍ ꓟ ꓔꓯ ꓒꓵꓽ ꓗꓹ ꓬꓲ ꓖꓶꓽ ꓡ ꓟ꓾ ꓞꓳ ꓤꓽ ꓕꓲꓽ ꓣꓳ ꓪ ꓙꓵꓽ ꓪꓽ ꓔꓯ ꓚꓱ ꓚꓱꓺ ꓪ ꓐ ꓡꓹ ꓟ ꓚꓵ ꓚꓵꓺ ꓗꓽ ꓕꓸ ꓓꓴ ꓟ ꓙꓳ ꓒꓴ ꓒꓴ ꓡꓯꓽ ꓡꓯꓽ ꓚꓵꓸ ꓚꓬ ꓠꓲꓹ ꓫꓵˍ ꓟ ꓔꓯ ꓐꓯ ꓐ ꓡꓹ ꓟ ꓕꓱ ꓡꓱ ꓫꓵꓽ ꓬꓲ ꓙ ꓔ ꓙꓹꓟ ꓓꓰ ꓢꓲ ꓙꓳˍ ꓡꓳ= ꓚꓵ ꓚꓵꓺ ꓐꓯ ꓠꓬ ꓕꓱ ꓟ ꓠꓬ ꓞꓳ ꓤꓽ ꓕꓲ ꓣꓳ ꓪ ꓙꓵꓽ ꓪꓽ ꓔꓯ ꓖꓶꓽ ꓔ ꓟ ꓟꓽ ꓥ= ꓕꓱ ꓟ ꓬꓲ ꓛꓱꓼ ꓡ ꓠꓹ ꓟ ꓐꓱ ꓶꓽ ꓓꓰ ꓢꓲ ꓥ ꓪ= ꓚꓵ ꓚꓵꓺ ꓖꓶ ꓔ ꓟ ꓠꓬ ꓪꓴ-ꓢ ꓥˍ ꓡꓳ=

ꓕꓱ ꓡꓱ ꓞꓳ ꓤꓽ ꓟꓬꓱ ꓓꓳꓽ ꓔꓯ ꓒꓵꓽ ꓗꓹ ꓬꓰ ꓟ꓾ ꓞꓳ ꓤꓽ ꓕꓲꓽ ꓣꓳ ꓪ ꓙꓵꓽ ꓪꓽ ꓔꓯ ꓗꓽ ꓕꓸ ꓙꓹ ꓟ ꓡꓳꓸ ꓙ ꓑꓳꓽ ꓙ ꓔ ꓙꓹ ꓟ ꓠꓬ ꓚꓰꓼ ꓢꓴ ꓢꓲ ꓒꓽ ꓠꓲꓹ ꓫꓵꓹ ꓟ ꓚꓱꓹ ꓥˍ ꓡꓳ ꓠꓲꓹ ꓡꓶꓽ ꓥ ꓡꓳ= ꓘꓴ ꓜꓲꓼ ꓞꓳ ꓟꓸ ꓖꓶꓽ ꓡꓹ ꓟ ꓗꓪ ꓠꓬ꓾ ꓞꓳ ꓤꓽ ꓪ ꓙꓵꓽ ꓪꓽ ꓓꓽ ꓪꓴꓸ ꓒꓬꓱꓼ ꓡˍ ꓟ ꓠꓬ ꓪꓴ-ꓢ ꓗꓪ ꓐꓰ ꓥ ꓢꓲ ꓪꓴ-ꓢ ꓠꓬ ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤꓽ ꓔꓯ ꓬꓲ ꓒꓬꓱ ꓡꓰ ꓐꓰ ꓚꓰꓼ ꓔ ꓟ ꓥ ꓢꓲ ꓠꓬꓲ ꓪꓴ-ꓢ ꓡꓰ ꓚꓰꓼ ꓔ ꓟ ꓞꓳ ꓤꓽ ꓮꓽ ꓙꓵꓽ ꓠꓯꓼ ꓗꓪ ꓟꓬꓱ ꓓꓳꓽ ꓐꓯꓹ ꓟ ꓙꓳ ꓡꓳ ꓐꓰ ꓕꓱ ꓡꓱ ꓟꓸ ꓖꓶ ꓡˍ ꓡꓳ= ꓖꓳ ꓟ ꓑꓶ ꓓꓴ ꓠꓲ ꓞꓳ ꓤ ꓟꓬꓱ ꓓꓳ ꓙꓳ ꓟ ꓪꓴꓸ ꓠꓬꓲ ꓠꓲ ꓟꓲ ꓠꓯ ꓗꓪ ꓞꓳ ꓤꓽ ꓕꓲ ꓽ ꓣꓳ ꓐꓯꓹ ꓟ ꓕꓱ ꓡꓱ ꓢꓯꓸ ꓔꓬ ꓠꓹ ꓟ ꓐꓱ ꓶꓽ ꓞꓳ ꓤꓽ ꓕꓲꓽ ꓤꓳ ꓪ ꓙꓵꓽ ꓪꓽ ꓔꓯ ꓒ ꓐꓲ ꓒ ꓜꓲꓼ ꓣꓱꓽ ꓠꓬꓲ ꓔ ꓥ= ꓞꓳ ꓤꓽ ꓕꓲꓽ ꓣꓳ ꓪ ꓙꓵꓽ ꓪꓽ ꓪ ꓟ ꓠꓬ ꓔꓱꓹ ꓚꓵꓹ ꓟ ꓐꓰ ꓐꓲ ꓜꓲꓼ ꓟ ꓞꓳ ꓤꓽ ꓕꓲꓽ ꓣꓳ ꓐꓯꓹ ꓟ ꓢꓯ ꓔꓬ ꓠꓹ ꓟ ꓐꓱ ꓶꓽ ꓟꓽ ꓐ ꓟꓽ ꓙꓳ ꓟꓽ ꓓꓹ ꓟ ꓪ ꓙꓵꓽ ꓪꓽ ꓥ ꓡꓳ= ꓕꓱ ꓟ ꓪ ꓙꓵꓽ ꓪꓽ ꓔꓯ ꓪ ꓠꓹ ꓟ ꓙꓵꓽ ꓪꓽ ꓙꓵꓽ ꓪꓽ ꓙꓳ ꓥ ꓐꓰ ꓟꓽ ꓔꓶ ꓖꓶ ꓡ ꓟꓽ ꓖꓶꓽ ꓡ ꓕꓯꓽ ꓕꓱ ꓡꓱ ꓣꓱꓽ ꓠꓹ ꓟ ꓐꓱ ꓶꓽ ꓕꓱ ꓡꓱ ꓗ ꓔꓸ ꓟ ꓗꓶ ꓡꓰ ꓕꓯꓽ ꓐꓱ ꓓꓴꓽ ꓘꓴꓽ ꓗꓪ ꓡꓴꓽ ꓔ ꓟ ꓗꓶ ꓔ ꓟ ꓞꓳ ꓤꓽ ꓕꓲꓽ ꓣꓳ ꓡꓰ ꓐꓰ ꓗꓶ ꓡꓲꓳ=

ꓞꓳ ꓤꓽ ꓕꓲꓽ ꓤꓳ ꓪ ꓙꓵꓽ ꓪ ꓞꓳꓸ ꓡꓰ ꓢꓲ ꓢꓯꓸ ꓔꓬ ꓟ ꓠꓬ ꓮꓽ ꓠꓵ ꓔꓯꓽ ꓡꓰ ꓚꓰꓼ ꓢꓴ ꓢꓲ-ꓒ ꓡꓰ ꓙꓽ ꓖꓶꓽ ꓔ ꓟ ꓔꓯ ꓓꓽ ꓔꓳꓹ ꓔ ꓟ ꓐꓬ ꓡꓰ ꓝꓲˍ ꓟ ꓥˍ ꓡꓳ= ꓘꓴ ꓜꓲ ꓞꓳ ꓡꓰ ꓞꓳ ꓙꓳ ꓢꓯ ꓔꓬ ꓠꓹ ꓟ ꓟꓸ ꓖꓶꓽ ꓡꓹ ꓟ ꓠꓯꓸꓼ ꓗꓪ ꓟꓽ ꓓ ꓬꓳꓸ ꓚꓵꓹ ꓟ ꓕꓲꓽ ꓟ ꓠꓬ ꓞꓳ ꓤꓽ ꓕꓲ ꓣꓳ ꓡꓰ ꓕꓲꓽ ꓣꓳ ꓠꓬ ꓞꓳ ꓤꓽ ꓬꓲ ꓜꓴ ꓬꓲ ꓟꓯꓼ ꓬꓲ ꓟꓶꓽ ꓕꓲꓽ ꓠꓬꓲ ꓗꓪ ꓪ ꓠꓬꓲ ꓔ ꓟ ꓔꓶ ꓒꓬꓱꓽ ꓬꓲ ꓝꓳꓹ ꓟꓶ ꓥ ꓡꓳ ꓐꓰ ꓕꓱ ꓡꓱ ꓐꓯˍ ꓡꓳ= ꓶ ꓡꓯꓼ ꓟꓴꓹ ꓟ ꓞꓳ ꓙꓳ ꓢꓯ ꓔꓬ ꓠꓹ ꓟ ꓠꓬ ꓞꓳ ꓤꓽ ꓟꓬꓱ ꓓꓳꓽ ꓔꓯ ꓒꓵꓽ ꓗꓹ ꓬꓰ ꓠꓬꓲ ꓔ ꓥ= ꓞꓳ ꓤꓽ ꓕꓲꓽ ꓣꓳ ꓪ ꓙꓵꓽ ꓪꓽ ꓙꓳꓹ ꓟ ꓪꓴ-ꓢ ꓡꓰ ꓘꓴ ꓔ ꓟ ꓔꓯ ꓦˍ ꓟꓲ ꓒꓵꓽ ꓗꓴ ꓠꓬꓲ ꓔ ꓥ= ꓖꓳ ꓟ ꓑꓶꓸ ꓓꓴ ꓠꓲ ꓞꓳ ꓤꓽ ꓬꓲ ꓜꓴ ꓬꓲ ꓟꓯꓼ ꓐꓱ ꓶꓽ ꓟꓬꓱꓽ ꓬꓲ ꓢꓲ ꓠꓬꓲ ꓞꓳ ꓤꓽ ꓬꓲ ꓒꓵꓽ ꓔꓯ ꓟꓬꓱ ꓓꓳꓽ ꓔꓯ ꓟꓬ ꓠꓬꓲ ꓐꓶꓹ ꓠꓬꓲ ꓪꓴꓽ ꓡ ꓟꓴ ꓡ ꓠ ꓬꓲ ꓖꓶꓽ ꓠꓬꓲ ꓔ ꓥ= ꓮ ꓡꓲꓳ ꓐꓯ ꓠꓬ ꓞꓳ ꓤꓽ ꓓꓰ ꓢꓲ ꓠꓬꓲ ꓶ ꓡꓯꓼ ꓟꓴꓹ ꓟ ꓗꓴꓷꓼ ꓙꓵꓽ ꓚꓱꓹ ꓠꓯꓸꓼ ꓗꓪ ꓔꓶ ꓒꓬꓱꓽ ꓛꓹ ꓔ ꓟ ꓬꓲ ꓝꓳꓹ ꓟꓶ ꓥˍ ꓡꓳ= ꓮ ꓫꓵꓽ ꓙꓵꓽ ꓚꓱꓹ ꓗꓪ ꓥˍ ꓟꓲ ꓞꓳ ꓙꓳ ꓢꓯꓸ ꓔꓬ ꓠꓹ ꓟ ꓜꓴ ꓠꓯꓸꓼ ꓗꓪ ꓥˍ ꓟꓲ ꓶ ꓡꓯꓼ ꓟꓴ ꓟ ꓜꓴ ꓠꓯꓸꓼ ꓗꓪ ꓥˍ ꓟꓲ ꓞꓳ ꓤꓽ ꓐꓱ ꓶꓽ ꓬꓲ ꓠꓹ ꓟ ꓐꓯꓹ ꓟ ꓞꓳ ꓤꓽ ꓮꓽ ꓙꓵꓽ ꓢꓴ ꓐꓱ ꓶ ꓐꓯꓹ ꓟ ꓬꓲ ꓓꓵ ꓛꓹ ꓢꓲ ꓠꓬꓲ ꓟꓬꓱꓽ ꓬꓲ ꓠ ꓡꓳꓹ ꓥ=