ꓞꓳ ꓤꓽ ꓟꓬꓱ ꓓꓳꓽ (X. ꓢꓴ ꓟꓶꓽ ꓢꓴ ꓐꓰ ꓫꓸ ꓕꓱˍ ꓟ)

ꓠꓬꓲꓽ ꓧꓪꓹ ꓕꓲꓽ ꓧꓪꓹ ꓟ ꓦꓮꓔꓲꓚꓮꓠ  ꓖꓪ ꓙꓱ ꓜꓲꓼ ꓓꓴ ꓗꓪ ꓠꓬ꓾ ꓞꓳ ꓤꓽ ꓟꓬꓱ ꓓꓳꓽ ꓐꓯˍꓟ ꓙꓱꓻ ꓮꓽ ꓟꓬꓻ ꓖꓪ ꓙꓱ ꓡꓳ ꓬꓰ ꓐꓶ= MI Nꓯ ꓞꓳ ꓤꓽ ꓠꓬ ꓚꓲ ꓛꓬꓽ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓗꓪ ꓐꓰ ꓝꓣꓰꓰꓓꓳꓟ ꓐꓯ_ꓟ ꓚꓲꓸ ꓛꓬꓽ ꓬꓰ ꓠꓲꓹ ꓫꓵ_ꓟ ꓮꓽ ꓙꓵꓽ ꓔꓯ ꓗꓽ ꓕꓸ ꓓꓴ ꓟꓽ ꓙꓳꓻ ꓢꓲ ꓐ ꓡꓹ ꓟ ꓓꓵꓽ ꓙꓽ ꓞꓲꓹ ꓐ ꓡꓹ ꓟ ꓮꓽ ꓙꓵꓽ ꓠꓸꓼ ꓗꓪ ꓢꓯꓼ ꓪꓽ ꓙꓵꓽ ꓪꓽ ꓐꓯ_ꓟ ꓙꓳ ꓡꓳ= ꓞꓳ ꓤꓽ ꓕꓲꓽ ꓣꓳ ꓡꓰꓸ ꓕꓲꓽ ꓣꓳ ꓠꓯꓸꓼ ꓗꓪ ꓚꓲꓸ ꓛꓬꓽ ꓬꓰ ꓐ ꓡꓹ ꓟ ꓚꓲꓸ ꓛꓬꓽ ꓓꓵꓽ ꓙꓽ ꓞꓰꓹ ꓐ ꓡꓹ ꓟ ꓡꓰꓽ ꓟꓽ ꓞꓲ ꓬꓲꓸ ꓔꓵꓹ ꓬꓲꓸ ꓢꓷꓸ ꓔ ꓟ꓾ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓠꓬ ꓚꓰꓼ ꓢꓴ ꓢꓲ-ꓒ ꓔꓯ ꓠꓲꓹ ꓠꓵ ꓗꓴꓸ ꓠˍꓟ ꓪꓴ-ꓢ ꓡꓰ ꓖꓶꓽ ꓔ ꓟ ꓡꓯꓽ ꓫꓴ ꓥ ꓡꓳ=

ꓞꓳ ꓤꓽ ꓕꓲꓽ ꓣꓳ ꓠꓬ ꓙꓲˍꓟ ꓐꓰ ꓟꓽ ꓙꓲˍꓟ ꓢꓲ ꓐ ꓡ ꓟ ꓙꓳˍ ꓡꓳ= ꓖꓳ ꓡꓱ ꓟꓽ ꓙꓲˍꓟ ꓐꓰ ꓙꓲˍꓟ ꓢꓲ ꓐ ꓡꓹ ꓟ ꓙꓳ ꓥ-ꓟꓲ ꓟꓽ ꓙꓲˍꓟ ꓕꓯ ꓠꓬ ꓤ ꓟꓳ ꓢꓲ꓾ ꓙꓲˍꓟ ꓔꓯ ꓠꓬ ꓘꓳꓹ ꓣꓴ ꓢꓲ ꓢꓯꓼ ꓕꓵꓼ ꓗꓴꓸ ꓠˍꓟ ꓣꓳ ꓔꓯ ꓮ ꓕꓯꓽ ꓥˍꓟꓲ ꓪꓴ-ꓢ ꓠꓬ ꓧꓪꓸ ꓛꓵꓽ ꓖꓶꓽ ꓡˍ ꓡꓳ= ꓖꓴ ꓟ ꓑꓶꓸ ꓓꓴ꓾ ꓚꓲꓸ ꓛꓬ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓗꓪ ꓐꓰ ꓢꓷꓸ ꓔ ꓟ ꓟꓽ ꓙꓲˍꓟ ꓔꓯ ꓢꓲ ꓚꓲ ꓢꓲ ꓙꓲˍꓟ ꓔꓯ ꓢꓲ ꓚꓲˍ ꓟ ꓔꓯ ꓞꓳ ꓤꓽ ꓟꓬꓱ ꓓꓳꓽ ꓐꓯ_ꓟ ꓥˍꓡꓳ= ꓖꓴ ꓟ ꓐꓶꓸ ꓓꓴ꓾ ꓞꓳ ꓤꓽ ꓕꓲꓽ ꓣꓳ ꓡꓰꓸ ꓕꓲꓽ ꓣꓳ ꓠꓬꓻ ꓚꓲꓸ ꓛꓬꓽ ꓔꓵꓹ ꓚꓲꓸ ꓛꓬꓽ ꓠꓲꓹ ꓫꓵꓹ ꓪˍ ꓡꓰ ꓐꓰ ꓢꓲ ꓐ ꓡꓹ ꓟ ꓚꓲꓸ ꓛꓬꓽ ꓕꓵꓹ ꓚꓲꓸ ꓛꓬꓽ ꓠꓲꓹ ꓫꓵˍꓟ ꓔꓯ ꓮꓽ ꓙꓲꓸ ꓐꓰ ꓢꓲ ꓐ ꓡ ꓠˍꓟ ꓮ ꓕꓯˍꓟꓲ ꓢꓯꓼ ꓕꓵꓼ ꓢꓲ ꓚꓲꓸ ꓚꓬ ꓟꓬꓱ ꓓꓳꓽ ꓔꓯ ꓟꓽ ꓐꓬ ꓡꓰ ꓠꓻ ꓗꓽ ꓕꓸ ꓠ ꓟ_ꓡꓰ ꓟꓽ ꓞꓲ ꓚꓲꓸ ꓛꓬꓽ ꓔꓱꓹ ꓚꓲˍꓟ ꓠꓯꓸꓼ ꓗꓪ ꓛꓳ ꓢꓲ ꓪꓴ-ꓢ ꓔꓯ ꓫꓱꓸ ꓖꓶꓽ ꓓꓳ ꓟꓳꓸ ꓐ ꓡ ꓠ꓾ ꓢꓯꓼ ꓕꓵꓼ ꓠ ꓗ ꓡꓳ=

ꓕꓱ ꓡꓱ ꓞꓳ ꓙꓳ ꓢꓯꓸꓔꓬ ꓟ ꓚꓱꓹ ꓗꓪ ꓐꓰˍ ꓡꓰꓽ ꓬꓲꓸ ꓒꓵꓽ ꓙꓳ ꓢꓲ ꓐꓲ ꓞꓹ ꓟ ꓞꓳ ꓤꓽ ꓞꓲ ꓔꓯ ꓐꓯꓹ ꓟꓶ ꓡ ꓓꓴ ꓥꓳ= ꓕꓱ ꓡꓰꓻ ꓞꓳ ꓙꓳ ꓢꓯꓸ ꓔꓬ ꓟ ꓠꓬ꓾ ꓹꓪꓴ-ꓢ ꓡꓰ ꓣꓳꓽ ꓔꓯ ꓘꓴ ꓔ ꓟ ꓔꓯ꓾ ꓒ ꓐꓲꓻ ꓘꓴꓹ ꓣꓴˍꓟ ꓚꓱꓹ ꓥˍ ꓡꓳ= ꓪꓴ-ꓢ ꓐꓬꓱꓽ ꓡꓰꓽ ꓐꓰꓻ ꓐꓯ ꓟ ꓔꓯ ꓪꓴ-ꓢ ꓐꓱ ꓶꓽ ꓢꓯꓼ ꓪꓽ ꓐꓰ ꓕꓱ ꓡꓰꓻ ꓬꓲꓸ ꓟꓸ ꓟꓬꓱꓽ ꓐꓯ ꓔ ꓟ ꓠꓬ꓾ ꓞꓳ ꓤꓽ  ꓮꓽ ꓙꓵꓽ ꓠꓬ ꓔꓱꓹ ꓚꓲˍ ꓟ ꓔꓯ ꓧꓪ ꓐ ꓡˍ ꓟ ꓢꓯꓼ ꓪꓽ ꓙꓳˍ ꓟ ꓔꓯ ꓐꓯ ꓠꓲꓹ ꓫꓵ ꓟ ꓥ ꓪ= ꓔꓱꓹ ꓚꓲˍ ꓟ ꓔꓯ ꓚꓲꓸ ꓛꓬꓽ ꓠꓲꓹ ꓟ ꓗꓪ ꓐꓰ ꓢꓲ ꓚꓰ ꓢꓲ꓾ ꓮꓽ ꓙꓲꓸ ꓐꓰ ꓙꓲˍ ꓟ ꓚꓱꓹ ꓗꓪ ꓞꓳ ꓙꓳ ꓢꓯꓸ ꓔꓬ ꓐ ꓠ꓾ ꓢꓯꓼ ꓪꓽ ꓐꓯˍ ꓟ ꓙꓳˍ ꓡꓳ= ꓕꓱ ꓡꓱ ꓔꓱ ꓚꓲˍ ꓟ ꓔꓯ ꓧꓪ ꓢꓲ꓾ ꓙꓲˍ ꓟ ꓚꓱꓹ ꓗꓪ ꓞꓳ ꓙꓳ ꓢꓯꓸ ꓔꓬ ꓟ ꓔꓯ ꓞꓳ ꓤꓽ ꓟꓬꓱ ꓓꓳꓽ ꓐꓯˍꓟ ꓥ ꓡꓳ=