ꓞꓳ ꓤꓽ ꓮ ꓙꓵꓽ ꓐꓱ ꓶ ꓙꓲ ꓖꓴ ꓙꓳˍ ꓟ ꓠꓯꓸꓼ ꓗꓪ ꓐꓰ ꓪꓴꓽ ꓡ ꓟꓴ ꓡ ꓚꓱꓹ ꓔꓯ ꓟꓳꓸ

ꓞꓳ ꓤꓽ ꓪꓴꓽ ꓡ ꓟꓴ ꓡ ꓚꓱ ꓐꓱ ꓶ ꓟꓬꓱꓽ ꓬꓰꓹ ꓕꓯꓽ ꓞꓳ ꓤꓽ ꓕꓲꓽ ꓣꓳ ꓐꓱ ꓶ꓾ ꓥ ꓠꓬ ꓜꓴ ꓕꓲꓽ ꓜꓴ ꓐꓱ ꓶ ꓾ ꓥ ꓠꓬ ꓞꓳ ꓤꓽ ꓕꓲꓽ ꓣꓳ ꓐꓱ ꓶꓹ ꓡꓰꓽ ꓟꓬꓱꓽ ꓬꓰꓹ ꓠꓬ ꓑ ꓫꓬꓽ ꓐꓱ ꓶ ꓟꓬꓱꓽ ꓬꓰꓹ ꓟ ꓬꓲ ꓟꓸ ꓟꓲ ꓟꓽ ꓙꓳ= ꓖꓳ ꓟ ꓑꓶꓸ ꓓꓴ ꓠꓲ ꓑ ꓫꓬꓽ ꓐꓱ ꓶꓽ ꓪꓴꓽ ꓡ ꓟꓴ ꓡ ꓚꓱꓹ ꓐꓯꓹ ꓠꓬ ꓟꓬꓱꓽ ꓬꓰꓹ ꓕꓯ ꓞꓳ ꓤꓽ ꓕꓲꓽ ꓣꓳ ꓣꓳ ꓐꓱ ꓶ ꓡꓰ ꓬꓰꓹ ꓟ ꓟꓽ ꓥ ꓥ꓾ ꓞꓳ ꓤꓽ ꓔꓯ ꓒꓯꓽ ꓢꓲ ꓟꓽ ꓥ ꓥ꓾ ꓞꓳ ꓤꓽ ꓕ꓾ ꓐꓱ ꓔꓯ ꓝꓲ ꓦꓲꓹ ꓔꓸ ꓟ ꓟꓽ ꓥ ꓥ ꓞꓳ ꓤꓽ ꓮ ꓙꓵꓽ ꓢꓴ ꓙꓲ ꓖꓴ ꓙꓳꓹ ꓟ ꓐꓱ ꓶ ꓟꓬꓱꓽ ꓬꓲ ꓢꓯꓸ ꓕꓵꓼ ꓠ ꓗˍ ꓡꓳ= 2 ꓧꓪꓹ 1 ꓧꓪꓹ ꓟ ꓦꓮꓔꓲꓚꓮꓠ ꓖꓪ ꓚꓱ ꓜꓲꓼ ꓓꓴ ꓗꓪ ꓠꓬ ꓗꓴꓷꓹ ꓟꓬꓱꓽ ꓬꓰ ꓢꓴ ꓙꓵꓽ ꓢꓴ ꓢꓲꓽ ꓒꓽ ꓮꓽ ꓟ ꓥˍ ꓟꓲ ꓑ ꓫꓬꓽ ꓐꓴ ꓙꓲ ꓖꓴ ꓙꓳˍ ꓟ ꓐꓱ ꓶ ꓣꓱꓽ ꓬꓯꓼ ꓟ ꓥ ꓔ ꓑꓳꓸ ꓪꓴ ꓡ ꓟꓴ ꓡ ꓚꓱꓹ ꓔꓯ ꓬꓰ ꓠ ꓡꓳꓼ ꓥ= ꓞꓳ ꓤꓽ ꓮ ꓙꓵꓽ ꓢꓴ ꓐꓱ ꓶ ꓐꓯ ꓢꓲ ꓚꓵꓸ ꓛꓯꓽ ꓜꓴ ꓐꓱ ꓶ ꓡꓰ ꓪꓴꓽ ꓡ ꓟꓴ ꓡ ꓠ ꓙꓵꓸ ꓛꓬ ꓜꓴ ꓐꓱ ꓶ ꓡꓰ ꓢꓲ ꓠꓲꓹ ꓟ ꓐꓹ ꓟ ꓕꓱ ꓡꓰ ꓬꓰꓹ ꓟ ꓟꓬꓱꓽ ꓥ ꓔ ꓑꓳꓸ ꓔꓯ ꓤ ꓟꓴ ꓠ ꓡꓳꓼ ꓥ ꓐꓰ ꓕꓱ ꓡꓰ ꓐꓯ ꓔ ꓡꓳ=

ꓙꓵꓽ ꓪꓽ ꓑꓯꓹ ꓟꓶ ꓢꓴ ꓗꓴꓷꓼ ꓔꓯ ꓙꓵꓽ ꓢꓴ ꓐꓴ ꓠꓬ ꓕꓱꓹ ꓚꓵꓹ ꓟ ꓑ ꓫꓬ ꓮ ꓙꓵꓽ ꓪꓴꓽ ꓡ ꓟꓴ ꓡ ꓚꓱꓹ ꓥ ꓕ ꓑꓳꓸ ꓔꓯ ꓞꓳ ꓤꓽ ꓮꓽ ꓙꓵꓽ ꓪꓴꓽ ꓡ ꓟꓴ ꓡ ꓚꓱꓹ ꓔꓯ ꓚꓵ ꓚꓵ ꓪꓴꓸ ꓓꓵ ꓛꓹ ꓢꓲ ꓢꓯꓼ ꓕꓵꓼ ꓠ ꓡꓳꓼ ꓥ꓾ ꓬꓰ ꓠ ꓡꓳꓼ ꓥ= ꓙꓵꓽ ꓢꓴ ꓢꓲ ꓒꓽ ꓠꓬ ꓞꓳ ꓤꓽ ꓮ ꓙꓵꓽ ꓢꓴ ꓐꓱ ꓶ ꓟꓽ ꓙꓳ ꓟꓽ ꓓꓹ ꓟ ꓣꓱꓽ ꓬꓯꓹ ꓟ ꓥ ꓕ ꓑꓳꓸ ꓬꓰ ꓙ ꓔ ꓙ ꓠ ꓡꓳꓼ ꓥ= ꓜꓽ ꓪꓳ ꓡꓳꓸ ꓪꓳ ꓖꓪꓽ ꓓꓴ ꓖꓪꓽ ꓟꓶꓸ ꓙꓳ ꓢ ꓔꓬ ꓢ ꓠꓹ ꓟ ꓐꓱ ꓶ ꓟꓲ ꓠꓯ ꓢꓷꓸ ꓠꓲꓹ ꓐꓱ ꓶ ꓡꓲꓽ ꓒꓲꓼ ꓛꓳ ꓚꓱꓹ ꓐꓱ ꓶ ꓧꓪꓸ ꓧꓪꓼ ꓔꓬ ꓟꓶ ꓠꓹ ꓟ ꓐꓱ ꓶ ꓕꓱ ꓡꓰꓳ ꓫꓵꓽ ꓮ ꓙꓵꓽ ꓣꓱꓽ ꓬꓯꓹꓟ ꓥ ꓕ ꓑꓳꓸ ꓞꓳ ꓤꓽ ꓮ ꓙꓵꓽ ꓢꓷꓸ ꓡꓰ ꓠ ꓐꓯ ꓑꓶ ꓢꓲ ꓬꓰ ꓖꓶꓽ ꓠ ꓡꓳꓼ ꓥ=

ꓔꓲ ꓒꓽ ꓪꓸ ꓔꓲꓸ ꓒꓳ-ꓡꓳ 6 ꓡꓰ ꓐꓯꓹ ꓟ ꓠꓬ ꓑ ꓫꓬꓽ ꓪꓴꓽ ꓡ ꓟꓴ ꓡ ꓚꓱꓹ ꓔꓯ ꓶ ꓡꓯꓼ ꓟꓴꓹ ꓟ ꓚꓱ ꓕꓲꓽ ꓟ ꓔꓯꓹ ꓡꓰ ꓟꓳꓹ ꓟ ꓟꓽ ꓥ ꓥ ꓠꓱꓸ ꓐꓯꓼ ꓔꓯ ꓥˍ ꓟꓲ ꓟꓳ ꓠ ꓡꓳꓼ ꓥ= ꓶ ꓡꓯꓼ ꓚꓱꓹ ꓪꓴꓽ ꓡ ꓟꓴ ꓡ ꓟ ꓡꓰ ꓠꓬ ꓞꓳ ꓤꓽ ꓪꓴꓽ ꓡ ꓟꓴ ꓡꓹ ꓟ ꓟꓽ ꓥ= ꓐꓲ ꓜꓲꓼˍ ꓟ ꓪꓴꓽ ꓡ ꓟꓴ ꓡ ꓚꓱꓹ ꓥ ꓕꓯ ꓢꓲ ꓐꓯ ꓟꓵ ꓫꓱꓹ ꓟ ꓠꓬ ꓢꓷꓸ ꓠꓲꓹ ꓔꓯ ꓢꓲ꓾ ꓧꓪꓸ ꓧꓪꓼ ꓔꓬ ꓟꓶ ꓠꓹ ꓟ ꓾ ꓔꓬ ꓢ ꓙꓳ ꓢ ꓠꓹ ꓟ ꓕꓱ ꓡꓰꓳ ꓫꓵꓽ ꓮ ꓙꓵꓽ ꓥ ꓕꓯ ꓢꓲ ꓐꓲ ꓜꓲꓼ ꓟ ꓪꓴꓽ ꓡ ꓟꓴ ꓡꓹ ꓟ ꓐꓯꓹ ꓟ ꓥˍ ꓡꓳ= ꓞꓳ ꓤꓽ ꓕꓲꓽ ꓣꓳ ꓐꓱ ꓶ ꓪꓴꓽ ꓡ ꓟꓴ ꓡ ꓠ ꓬꓰ ꓐ ꓡꓹ ꓟ ꓥ ꓕꓯꓽ ꓢꓲ ꓐꓲ ꓜꓲꓼˍ ꓟ ꓐꓯ ꓬꓲꓸ ꓟ ꓟꓲꓽ ꓙꓳ_ ꓡꓳ= ꓶ ꓡꓯꓼ ꓟꓴꓹ ꓟ ꓠꓯꓸꓼ ꓗꓪ ꓪꓴꓽ ꓡ ꓟꓴ ꓡꓹ ꓟ꓾ ꓞꓳ ꓤꓽ ꓕꓲ ꓣꓳ ꓡꓰ ꓕꓲꓽ ꓣꓳ ꓪꓴꓽ ꓡ ꓟꓴ ꓡꓹ ꓟ ꓐꓯꓹ ꓟ ꓠꓬ ꓒꓯꓽ ꓟ ꓙꓵˍ ꓟ ꓚꓱꓹ ꓥˍ ꓡꓳ= ꓮ ꓡꓰꓳ ꓐꓯ ꓠꓬ ꓪꓴꓽ ꓡ ꓟꓴ ꓡ ꓐꓯ ꓠꓬ ꓶ ꓡꓯꓼ ꓟꓴꓹ ꓟ ꓚꓱꓹ ꓗꓪ ꓥˍ ꓟꓲ ꓠꓱꓸ ꓐꓯꓼ ꓚꓱꓹ ꓗꓪ ꓥˍ ꓟꓲ ꓮ ꓙꓵꓽ ꓪꓴꓽ ꓡ ꓟꓴ ꓡꓹ ꓟ ꓪꓴꓸ ꓠꓬꓲ ꓶ ꓡꓯꓼ ꓟꓴꓹ ꓟ ꓡꓰ ꓪꓴꓽ ꓡ ꓟꓴ ꓡꓹ ꓟ ꓕꓯ ꓪꓴꓽ ꓡ ꓟꓴ ꓡ ꓐꓯꓹ ꓟ ꓟꓽ ꓥ=