ꓠꓱꓸ ꓐꓯꓼ ꓙꓵꓸꓹ ꓠꓲꓹ ꓗꓪ ꓐꓰ ꓦ ꓡꓱ ꓚꓱꓹ ꓙꓵꓸꓹ ꓠꓲꓹ ꓚꓱꓹ ꓬꓴ-ꓓ ꓙꓵꓸꓹꓠꓲꓹ ꓐꓰ ꓙꓲ ꓢꓴ ꓢꓲ ꓤ ꓐꓴ ꓙꓵꓸꓹ ꓠꓲꓹ ꓠꓯꓼ ꓗꓪ ꓓꓵꓽ ꓡ ꓟ ꓚꓱꓹ

ꓠꓱꓸ ꓐꓯꓼ ꓙꓵꓸꓹ ꓠꓲꓹ ꓗꓪ ꓐꓰ ꓦ ꓡꓱ ꓚꓱꓹ ꓙꓵꓸꓹ ꓠꓲꓹ ꓚꓱꓹ ꓬꓴ-ꓓ ꓙꓵꓸꓹꓠꓲꓹ ꓐꓰ ꓙꓲ ꓢꓴ ꓢꓲ ꓤ ꓐꓴ ꓙꓵꓸꓹ ꓠꓲꓹ ꓠꓯꓼ ꓗꓪ ꓓꓵꓽ ꓡ ꓟ ꓚꓱꓹ

ꓠꓱꓸ ꓐꓯꓼ ꓙꓵꓸꓹ ꓠꓲꓹ ꓗꓪ ꓐꓰ ꓦ ꓡꓱ ꓚꓱꓹ ꓙꓵꓸꓹ ꓠꓲꓹ ꓚꓱꓹ ꓬꓴ-ꓓ ꓙꓵꓸꓹꓠꓲꓹ ꓐꓰ ꓙꓲ ꓢꓴ ꓢꓲ ꓤ ꓐꓴ ꓙꓵꓸꓹ ꓠꓲꓹ ꓠꓯꓼ ꓗꓪ ꓓꓵꓽ ꓡ ꓟ ꓚꓱꓹ ꓔꓯ ꓟꓳꓸ ꓣꓱꓽ ꓡ ꓟ ꓚꓱꓹ ꓔꓯ ꓟꓳꓸ ꓐꓯ ꓟ ꓖꓶ ꓡ ꓥꓳ= ꓓ ꓪꓴꓸ ꓬꓲ ꓚꓰ ꓬꓲ ꓪꓴꓸ ꓕꓳ ꓶ ꓗꓪ ꓟꓵꓽ ꓚꓰꓼ ꓟꓲ ꓚꓰꓼ_ ꓟ ꓞꓳ ꓤ ꓔꓯ ꓚꓰꓼ_ ꓟ ꓚꓱꓹ ꓠꓬꓲ ꓫꓵꓽ ꓙꓳ_ ꓟ ꓔꓯ ꓟꓳ ꓪ ꓡꓳ= ꓕꓲꓽ ꓫꓵꓽ ꓠꓬ ꓪꓴ-ꓢ ꓡꓰ ꓒꓬꓱꓼ ꓡ ꓝꓲ ꓐꓰ ꓐꓯ ꓠꓬ ꓒꓬꓱꓼ ꓡ_ ꓟ-ꓸ ꓠꓬꓲ ꓫꓵꓽ ꓠꓬ ꓠꓱꓸ ꓦꓵꓽ ꓦꓶꓽ ꓔꓯ ꓣꓴ ꓢꓲ ꓫꓬꓹ ꓔ ꓟ ꓚꓱꓹ ꓟꓳ ꓪ_ ꓡꓳ= ꓓ ꓪꓴꓸ ꓕꓲ ꓫꓵꓽ ꓒꓬꓱꓼ ꓡ ꓝꓲ ꓐꓯ_ ꓠꓬ ꓒꓬꓱꓼ ꓡ_ ꓟ ꓕꓱ ꓟ ꓠꓬ ꓬꓲ-ꓢꓷ-ꓡꓲ ꓡꓽ ꓞꓳ ꓐꓴ ꓙꓵꓸꓹ ꓠꓲꓹ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓬꓲ-ꓢꓷ-ꓡꓲ ꓡ ꓞꓳ ꓐꓴ ꓚꓸꓸ ꓟꓲꓽ ꓠꓯꓼ ꓗꓪ ꓛꓳ ꓠꓬꓲ ꓠꓬ ꓪꓴ-ꓢ ꓕꓲꓽ ꓟ ꓓꓲ ꓥ ꓡꓳ= ꓪꓴ-ꓢ ꓠꓬ ꓮ ꓫꓵꓽ ꓔꓯ ꓥ ꓟꓲ ꓬꓰ ꓐ ꓡ_ ꓟ ꓥ ꓡꓳ= ꓬꓲ ꓡꓰ ꓒꓬꓱꓼ ꓡ ꓝꓲ ꓐꓯ_ ꓠꓬ ꓒꓬꓱꓼ ꓡ_ ꓡꓳ ꓐꓰ ꓕꓱ ꓡꓱ ꓙꓵꓸꓹ ꓔꓬ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓪꓴ-ꓢ ꓟꓵꓽ ꓚꓰꓼ ꓟꓲ ꓚꓰꓼ_ ꓔꓯ ꓕꓲꓽ ꓠꓬꓲ ꓗꓪ ꓐꓰ ꓠꓽ ꓥꓪ ꓠꓬꓲ ꓗꓪ ꓛꓲ ꓠꓬ ꓒꓬꓱꓼ ꓡ ꓝꓲ ꓐꓯ_ ꓠꓬ ꓒꓬꓱꓼ ꓡ_ ꓡꓳ= ꓮ ꓫꓵꓽ ꓡꓲ ꓟꓽ ꓙꓳ_ ꓟ ꓠꓯꓼ ꓗꓪ ꓐꓰ ꓙꓳ ꓡ_ ꓡꓳ= ꓠꓯ ꓞꓲꓸ ꓟ ꓗꓪ ꓐꓰ ꓠꓬꓲ ꓟꓳ ꓓꓴ ꓒꓬꓱꓼ ꓡ_ ꓡꓳ= ꓢꓯꓸ ꓫꓵꓽ ꓢꓯꓸ ꓙꓰꓽ ꓟꓽ ꓙꓳ_ ꓟ ꓗꓪ ꓐꓰ ꓙꓳ ꓡ_ ꓡꓳ=

ꓖꓳ ꓡꓱ ꓥ ꓟꓲ ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤ ꓔꓯ ꓚꓰꓼ_ ꓕꓯ ꓕꓱ ꓡꓱ ꓟꓽ ꓥ ꓐꓷ= ꓠꓱꓸ ꓦꓵꓽ ꓔꓯ ꓣꓴ ꓢꓲ ꓬꓲ ꓢꓯꓼ ꓦ ꓡꓴꓽ ꓖꓶ_ ꓠꓬ ꓞꓳ ꓤ ꓒꓬꓱꓼ ꓡ_ ꓟ ꓚꓱꓹ ꓡꓳꓸ ꓟꓳ ꓪ ꓓ_ ꓡꓳ=  ꓕꓱ ꓟ ꓔꓯ ꓛꓳ ꓠꓬꓲ ꓠꓬ ꓬꓲ-ꓢꓷ-ꓡꓲ ꓡ ꓞꓳ ꓐꓴ ꓟꓽ ꓙꓵꓸꓹ ꓐꓷ= ꓕꓱ ꓟ ꓙꓵꓸꓹ ꓠꓲꓹ ꓠꓬ ꓠꓱꓸ ꓐꓯꓼ ꓞꓳ ꓫꓵꓽ ꓐꓴ ꓙꓵꓸꓹ ꓠꓲꓹ ꓥ ꓐꓷ= ꓟꓬ ꓠꓬꓲ ꓐꓷ ꓠꓬꓲ ꓕꓱ ꓚꓸꓸ ꓟꓲꓽ ꓔꓯ ꓧꓪ ꓢꓴ ꓡꓰ ꓐꓯ_ ꓟ ꓠꓬ Hindu ꓙꓵꓸꓹ ꓠꓲꓹ ꓠꓯꓼ ꓗꓪ ꓐꓰ ꓡ_ ꓟ ꓥ ꓡꓳ ꓐꓰ ꓕꓱ ꓡꓱ ꓐꓯ_ ꓡꓳ= ꓖꓳ ꓟ ꓡꓲ ꓟ ꓞꓲ ꓞꓳ ꓫꓵꓽ ꓕꓲ ꓫꓵꓽ ꓡꓲ ꓕꓲꓽ ꓫꓵꓽ ꓠꓯꓼ ꓗꓪ ꓚꓸꓸ ꓟꓲꓽ ꓞꓳ ꓚꓰꓼ ꓪ ꓚꓰꓼ ꓫꓵꓽ ꓟꓵꓽ ꓚꓰꓼ ꓟꓲ ꓚꓰꓼ ꓫꓵꓽ ꓕꓱ ꓡꓱ ꓫꓵꓽ ꓚꓸꓸ ꓟꓲꓽ ꓚꓱꓹ ꓮ ꓟꓬꓹ ꓙꓳ_ ꓟ ꓗꓪ ꓥ ꓟꓲ  ꓕꓱ ꓐꓱ ꓚꓸꓸ ꓟꓲꓽ ꓗꓪ ꓠꓬ ꓕꓱ ꓡꓱ ꓬꓰ ꓢꓲ ꓞꓳ ꓚꓰꓼ ꓪ ꓚꓰꓼ_ ꓟ ꓚꓱꓹ ꓡꓳꓸ ꓟꓳ ꓪ ꓓ_ ꓡꓳ=

ꓖꓳ ꓟ ꓑꓶ ꓓꓴ ꓕꓱ ꓗꓪ ꓕꓱ ꓟ ꓔꓯ ꓐꓳ ꓢꓴ  ꓟꓳ-ꓫꓲ ꓠꓬ ꓠꓱꓸ ꓐꓯꓼ ꓞꓳ ꓫꓵꓽ ꓐꓴ ꓠꓱꓸ ꓐꓯꓼ ꓙꓵꓸꓹ ꓠꓲꓹ ꓠꓯꓼ ꓗꓪ ꓙꓵꓸꓹ ꓔꓬ ꓟ ꓔꓯ ꓣꓴ ꓢꓲ ꓐꓳ ꓔ ꓟ ꓚꓱꓹ ꓡꓳ ꓟꓳ ꓪ ꓓ_ ꓡꓳ= ꓕꓱ ꓗꓪ ꓪꓴ-ꓢ ꓚꓰꓼ_ ꓟ ꓚꓱꓹ ꓔꓯ ꓣꓳ ꓛꓳ ꓠꓬꓲ ꓠꓬ ꓪꓴ-ꓢ ꓠꓬ ꓬꓲ-ꓢꓷ-ꓡꓲ ꓡ ꓞꓳ ꓐꓴ ꓙꓵꓸꓹ ꓔꓬ ꓟ ꓡꓲ ꓐꓰ ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓪꓴ-ꓢ ꓕꓲꓽ ꓣꓳ ꓓꓲ ꓥ ꓟ ꓗꓪ ꓐꓰ ꓚꓰꓼ ꓔ ꓟ ꓚꓱꓹ ꓡꓳꓸ ꓟꓳ ꓪ_ ꓡꓳ= ꓬꓲ ꓚꓰ ꓬꓲ ꓪꓴꓸ ꓕꓳ ꓶ 1ꓽ26 ꓗꓪ ꓣꓳ ꓐꓬꓱꓽ ꓔꓯ ꓔꓯꓸꓸ ꓢꓲ ꓞꓳ ꓤ ꓚꓰꓼ ꓡꓯ ꓐꓯ_ ꓡꓳ= ꓕꓱ ꓗꓪ ꓣꓳ ꓐꓯ_ ꓟ ꓪꓴꓸ ꓠꓬꓲ ꓪꓴ-ꓢ ꓕꓲ ꓟ ꓠꓯꓼ ꓗꓪ ꓮ ꓟꓬꓹ ꓣꓳ ꓥ ꓟ ꓔꓯ ꓟꓳ ꓪ_ ꓡꓳ= ꓕꓱ ꓪꓴ-ꓢ ꓕꓲ ꓟ ꓠꓯꓼ ꓗꓪ 3 ꓣꓳ ꓔꓬ ꓡꓳ ꓐꓯ_ ꓟ ꓕꓱ ꓡꓱ ꓫꓵꓽ ꓙꓳ ꓢꓰꓽ= 3 ꓣꓳ ꓕꓲ ꓖꓳ ꓓꓱ ꓪꓴ-ꓢ ꓚꓱꓹ ꓠꓬ ꓢꓲ-ꓒ ꓬꓰ-ꓢꓴ ꓫꓵꓸꓹ ꓗ ꓠꓯꓸ 3 ꓦ ꓘꓳꓼ ꓗꓪ ꓛꓲ ꓟꓽ ꓙꓵꓸꓹ ꓟꓽ ꓓ ꓐꓯ_ ꓟ 3 ꓣꓳ ꓕꓲ ꓖꓳ ꓓꓱꓽ ꓪꓴ-ꓢ ꓐꓯ_ ꓟ ꓔꓯ ꓙꓵꓸꓹ ꓔꓬ ꓟ 3 ꓦ ꓘꓳꓼ ꓗꓪ ꓛꓲ ꓟꓽ ꓙꓳ ꓢꓰꓽ ꓐꓷ= ꓖꓳ ꓡꓱ ꓠꓬꓲ ꓕꓱ ꓗꓪ ꓣꓳ ꓐꓯ_ ꓟ ꓕꓱ ꓟ ꓥ ꓟꓲ ꓠꓱꓸ ꓐꓯꓼ ꓙꓵꓸꓹ ꓠꓲꓹ ꓠꓯꓼ ꓗꓪ ꓪꓴ-ꓢ ꓮ ꓟꓬꓹ ꓟ ꓐꓯ_ ꓟ ꓕꓱ ꓟ ꓥ ꓟꓲ ꓬꓲ ꓟꓸ ꓟꓲꓽ ꓓꓳ_ ꓟ ꓙꓳ_ ꓡꓳ= ꓬꓲ ꓚꓰ ꓬꓲ ꓪꓴꓸ ꓕꓳ ꓶ ꓔꓯ ꓠꓬ ꓟꓳ-ꓫꓲ ꓡꓰ ꓐꓳ ꓔ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓕꓱ ꓗꓪ ꓐꓰ ꓬꓲ ꓚꓰ ꓬꓲ ꓪꓴꓸ ꓢꓲ-ꓫꓬ ꓕꓳ ꓶ ꓐꓳ_ ꓟ ꓕꓲ ꓙꓵꓸꓹ ꓗꓪ ꓐꓰ ꓢꓴ ꓙꓵꓸꓹ ꓠꓲꓹ ꓔꓯ ꓥ ꓟꓲ ꓣꓴ ꓢꓲꓐꓳ ꓔ ꓟ ꓚꓱꓹ ꓣꓳ ꓡꓳꓸ ꓟꓳ_ ꓡꓳ= ꓕꓱ ꓟ ꓠꓬ ꓠꓱꓸ ꓐꓯꓼ ꓙꓵꓸꓹ ꓠꓲꓹ ꓐꓰ ꓫ ꓕꓱ_ ꓟ ꓚꓱꓹ ꓥ ꓡꓳ=

Add new comment

6 + 9 =