ꓠꓱꓸ ꓐꓯꓼ ꓙꓵ ꓠꓲꓹ ꓐꓰ ꓫꓸ ꓕꓱ ꓠꓹ ꓟ ꓟꓬꓱꓽ

ꓔꓲ ꓒꓽ ꓪꓸ ꓔꓲꓸ ꓬꓳ-ꓦ ꓒꓳ-ꓡꓳ ꓲꓲ ꓡꓰ 1986 ꓓꓰꓚ 22 ꓕꓯꓽ ꓦꓮꓔꓲꓚꓮꓠ ꓗꓪ ꓣꓳꓹ ꓟꓬꓱꓽ ꓬꓰ ꓔꓬ ꓢꓴ ꓔꓯ ꓫꓸ ꓕꓱꓹ ꓟ ꓚꓱ= ꓕꓱ ꓟ ꓫꓸ ꓕꓱꓹ ꓟ ꓠꓬ 1986ꓘꓳꓼ 10 ꓦ ꓟ 27 ꓠꓬꓲ ꓕꓯ ꓟꓲ ꓠꓯ ꓕꓲ ꓚꓳ ꓡꓳ ꓗꓪ ꓟ ꓙꓵ ꓠꓲꓹ ꓟꓽ ꓪꓽ ꓡꓯꓽ ꓘꓳꓹ ꓟ ꓬꓲ ꓓꓵ ꓣꓱꓽ ꓢꓴ ꓐꓴ ꓮꓢꓢꓲꓢꓲ  ꓡꓳ ꓒꓱ ꓗꓪ ꓕꓲꓽ ꓠꓲꓹ ꓕꓲ ꓪꓼ ꓪꓽ ꓘꓴ ꓙꓵꓹ ꓓꓳ ꓡꓰ ꓕꓯ ꓕꓱꓹ ꓟ ꓫꓸ ꓪ ꓘꓶꓽ ꓥˍ ꓡꓳ= ꓠꓱꓸ ꓐꓯꓼ ꓙꓵ ꓠꓲꓹ ꓐꓰ ꓕꓲꓽ ꓠꓲꓹ ꓕꓲꓽ ꓪꓼ ꓕꓲꓽ ꓖꓸꓼ ꓗꓪ ꓕꓲꓽ ꓗꓪꓸꓼ ꓗꓪ ꓕꓲꓽ ꓙꓵꓸꓼ ꓗꓪ ꓪꓽ ꓘꓴ ꓓꓴ ꓥ ꓐꓯꓹ ꓠꓬ ꓞꓳ ꓤꓽ ꓮꓽ ꓙꓵꓽ ꓮ ꓡꓲ ꓓꓴ ꓓꓽ ꓟ ꓗꓶ ꓡꓰꓳ= ꓮ ꓡꓰꓸꓼ ꓐꓯ ꓠꓬ ꓧꓶ ꓕꓯ ꓗꓪ ꓕꓱ ꓶꓱꓹ ꓫꓵꓽ ꓙꓵ ꓠꓲꓹ ꓟꓽ ꓪꓽ ꓡꓯꓽ ꓘꓳ ꓢꓴ ꓮꓽ ꓙꓵꓽ ꓕꓲꓽ ꓠꓲꓹ ꓕꓲꓽ ꓪꓼ ꓪꓽ ꓘꓴꓹ ꓟ ꓐꓯꓹ ꓟ ꓟꓽ ꓙꓳ ꓠꓬꓲ= ꓨꓳ ꓟ ꓪꓴꓸ ꓠꓬꓲ ꓠꓲ ꓕꓱ ꓟ ꓠꓬ ꓟꓽ ꓒꓬꓱꓼ ꓡ ꓐꓰ ꓓꓵꓽ ꓙꓽ ꓔꓬ ꓡꓳ= ꓖꓳ ꓡꓱ ꓥˍ ꓟꓲ ꓐꓯ ꓡꓳꓹ ꓟ ꓡꓰ ꓐꓰ ꓕꓲ ꓡꓰ꓾ 1986ꓸ 10ꓦꓸ 27 ꓠꓬꓲ ꓕꓯ ꓟꓲ ꓠꓯ ꓕꓲꓽ ꓚꓳ ꓡꓳ ꓗꓪ ꓟ ꓙꓵ ꓠꓲꓹ ꓠꓯꓸꓼ ꓗꓪ ꓬꓲ ꓓꓵ ꓣꓱꓽ ꓢꓴ ꓐꓴ ꓮꓽ ꓙꓵꓽ ꓘꓴ ꓜꓲꓼ ꓞꓳ ꓗꓪ ꓐꓰ ꓬꓲ ꓓꓵ ꓣꓱꓽ ꓢꓷꓸ ꓘꓴ ꓔ ꓢꓲ ꓠꓬꓲ ꓲꓔꓮꓡꓬ ꓗꓴꓷꓼ ꓮꓢꓢꓲꓢꓲ ꓡꓳ ꓒꓱ ꓗꓪ ꓕꓲꓽ ꓔꓶꓸ ꓗꓪ ꓕꓲꓽ ꓗꓪꓸꓼ ꓗꓪ ꓕꓲꓽ ꓙꓵꓸꓼ ꓗꓪ ꓮꓽ ꓙꓵꓽ ꓕꓲꓽ ꓠꓲꓹ ꓕꓲ ꓪꓼ ꓪꓽ ꓘꓴ ꓗꓷꓳ= ꓟꓽ ꓒꓬꓱꓼ ꓡ ꓓꓳꓺ ꓡ ꓓꓳꓻ ꓓꓵ ꓙꓹ ꓟ ꓮ ꓙꓵꓽ ꓒꓬꓱ ꓡꓺꓳ=

ꓕꓱ ꓕꓲ ꓘꓴꓸ ꓗꓪ ꓧꓲꓠꓓꓴ꓾ ꓐꓴꓓꓓꓧꓮ꓾ ꓲꓢꓡꓮꓟ꓾ ꓢꓧꓲꓠꓔꓳ ꓙꓵ ꓠꓲꓹ꓾ ꓚꓳꓠꓝꓴꓚꓲꓴꓢ ꓙꓵ ꓠꓲꓹ꓾ ꓔꓮꓳ ꓙꓵ ꓠꓲꓹ ꓕꓱ ꓡꓱꓹ ꓫꓵꓽ ꓖꓳ ꓟ ꓡꓰ ꓟ ꓞꓲ ꓙꓲ-ꓢꓴ ꓢꓲ ꓤꓼ ꓐꓴ ꓠꓯꓸꓼ ꓗꓪ ꓟ ꓘꓴ ꓜꓲꓽ ꓞꓳ ꓕꓲ ꓟ ꓡꓰ ꓕꓲ ꓟ ꓗꓪ ꓟ ꓬꓲ ꓓꓵ ꓣꓱꓽ ꓢꓴ ꓐꓴ ꓖꓳ ꓟ ꓡꓰꓽ ꓟꓽ ꓞꓲ ꓠꓱꓸ ꓐꓯꓼ ꓙꓵ ꓠꓲꓹ ꓔꓯ ꓙꓵ ꓔꓬ ꓢꓴ ꓮꓽ ꓟꓬꓹ ꓐꓰ ꓕꓲꓽ ꓖꓸꓼ ꓗꓪ ꓪꓽ ꓘꓴꓹ ꓟ ꓬꓲ ꓗꓷꓳ= ꓕꓱ ꓕꓲ ꓘꓴ ꓗꓪ ꓔꓲ ꓒꓽ ꓪꓸ ꓔꓲꓸ ꓡꓰ ꓐꓯ ꓡꓳꓹ ꓬꓰꓹ ꓟ ꓠꓬ ꓟꓲ ꓠꓯ ꓞꓳ ꓤꓽ ꓔꓯ ꓪꓴ-ꓢ ꓡꓰ ꓚꓰꓼ ꓔ ꓟ ꓬꓲ ꓪꓴꓸ ꓕꓯꓽ ꓡꓰꓽ ꓐꓰ ꓕꓲꓽ ꓠꓲꓹ ꓕꓲꓽ ꓪꓼ ꓪꓽ ꓡꓯꓽ ꓘꓳ ꓫꓱꓹ ꓡꓯꓽ ꓘꓳꓹ ꓟ ꓙꓳ ꓠꓹ ꓟ ꓐꓱ ꓶꓽ ꓚꓰꓼ ꓔ ꓡꓳ= ꓐꓹ ꓐꓽ ꓤꓽ ꓔꓲꓸ ꓢꓲ-ꓫꓬ-ꓟ-ꓦ ꓠꓬ ꓤꓽ ꓑꓸ ꓤꓼ ꓐꓰ ꓤꓽ ꓟꓶꓼ ꓤꓼ ꓟꓲ ꓠꓯ ꓞꓳ ꓤꓽ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓔꓯ ꓬꓲ ꓒꓬꓱꓽ ꓡꓰ ꓐꓰ ꓪꓽ ꓠ ꓪꓴ-ꓢ ꓠꓬ ꓚꓰꓼ ꓔ ꓟ ꓥˍ ꓡꓳ= ꓖꓳ ꓟ ꓑꓶꓸ ꓓꓴ ꓠꓲ ꓣꓳ ꓟꓲ ꓠꓯ ꓞꓳ ꓤꓽ ꓮꓽ ꓙꓵꓽ ꓐꓱ ꓶꓽ ꓓꓽ ꓪꓴꓸ ꓐꓹ ꓐꓽ ꓟꓹ ꓟ ꓠꓬ ꓪꓴ-ꓢ ꓥˍ ꓡꓳ= ꓣꓳ ꓟꓲ ꓠꓯ ꓞꓳ ꓤꓽ ꓮꓽ ꓙꓵꓽ ꓠꓬ ꓕꓲꓽ ꓦꓲ ꓡꓽ ꓞꓳ ꓗꓪ ꓟ ꓮꓸ ꓬꓲꓼ ꓠꓬꓲ ꓤꓽ ꓮꓸ ꓝꓲ ꓠꓬꓲ ꓟ ꓐꓴ ꓥˍ ꓡꓳ= ꓣꓳ ꓮꓽ ꓙꓵꓽ ꓠꓬ ꓕꓲ ꓦꓲ ꓡꓽ ꓞꓳ ꓗꓪ ꓐꓰ ꓫꓷꓸ ꓡꓹ ꓟ ꓥˍ ꓡꓳ=

ꓟꓲ ꓠꓯ ꓞꓳ ꓤꓽ ꓮꓽ ꓙꓵꓽ ꓠꓬ ꓛꓲ ꓡꓹ ꓟ ꓕꓲꓽ ꓠꓬꓲ ꓐꓱ ꓶꓽ ꓥꓳ ꓡꓳꓸ ꓔ ꓟ ꓠꓬ ꓕꓲꓽ ꓡꓰꓸꓼ ꓥˍ ꓡꓳ= ꓖꓳ ꓟ ꓠꓬ ꓟꓲ ꓠꓯ ꓗꓪ ꓟ ꓫꓸ ꓙꓲ ꓟꓶꓽ ꓙꓲ ꓓꓴ ꓗꓪ ꓐꓰ ꓡꓰꓹ ꓙꓲ ꓠꓹ ꓟ ꓐꓯ ꓟ ꓚꓬꓴ ꓙꓹ ꓟ ꓣꓱꓽ ꓛꓵꓽ ꓔꓯ ꓡꓳꓸ ꓔ ꓟ ꓥ ꓪ= ꓖꓳ ꓡꓱ ꓥˍ ꓟꓲ ꓙꓵ ꓠꓲꓹ ꓕꓲꓽ ꓟ ꓐꓰ ꓕꓲ ꓟ ꓠꓬ ꓟꓽ ꓪ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓘꓳ= ꓢꓲ ꓒꓽ ꓬꓰ-ꓢꓴ ꓠꓯꓸꓼ ꓗꓪ ꓣꓳ ꓠꓬ ꓕꓲꓽ ꓠꓲꓹ ꓕꓲꓽ ꓪꓼ ꓪꓽ ꓡꓯꓽ ꓘꓳ ꓫꓱꓹ ꓡꓯꓽ ꓘꓳ ꓠꓹ ꓟ ꓐꓱ ꓶꓽ ꓪꓴ-ꓢ ꓠꓬ ꓙꓽ ꓖꓶꓽ ꓔ ꓡꓳ= ꓕꓱ ꓟ ꓠꓬ ꓟꓲ ꓠꓯ ꓞꓳ ꓤꓽ ꓐꓱ ꓶꓽ ꓮ ꓡꓰ ꓓꓴ ꓓꓽ ꓟ ꓚꓵ ꓘꓶꓽ ꓓ ꓟ ꓕꓲꓽ ꓠꓲꓹ ꓕꓲꓽ ꓪꓼ ꓪꓽ ꓡꓯ ꓘꓳ ꓫꓱꓹ ꓡꓯ ꓘꓳꓹ ꓟ ꓚꓱꓹ ꓥˍ ꓡꓳ= ꓠꓱꓸ ꓐꓯꓼ ꓙꓵ ꓠꓲꓹ ꓐꓰ ꓪꓽ ꓡꓯꓽ ꓘꓳ ꓫꓱꓹ ꓡꓯꓽ ꓘꓳ ꓝꓸ ꓡꓯꓽ ꓘꓳ ꓢꓲ ꓠꓬꓲ ꓕꓲꓽ ꓠꓲꓹ ꓕꓲꓽ ꓪꓼ ꓗꓷ ꓡꓰ ꓠꓹ ꓟ ꓐꓱ ꓶꓽ ꓬꓰ ꓠꓹ ꓟ ꓐꓱ ꓶꓽ ꓙꓲ-ꓢꓴ ꓢꓲ ꓤꓼ ꓐꓴ ꓮ ꓕꓯꓽ ꓥˍ ꓟꓲ ꓢꓯꓼ ꓕꓵꓼ ꓠ ꓗꓹ ꓡꓳ=ꓫꓸ ꓕꓱ ꓪ ꓠꓹ ꓟ ꓢꓯꓼ ꓕꓵꓼ ꓠ ꓡꓳꓼ ꓥ꓾ ꓙꓽ ꓖꓶꓽ ꓠ ꓡꓳꓼ ꓥꓺ ꓐꓰ ꓔꓲ ꓒꓽ ꓪꓸ ꓔꓲꓸ ꓡꓰ ꓐꓯ ꓔ ꓡꓳ=

Add new comment

16 + 2 =